ຄົນຮ້າຍຂັບລົດຕູ້ແລ່ນຕຳຝູງຊົນ ຢູ່ນະຄອນຫລວງລອນດອນ

​ເກີດ​ເຫດ​ຄົນ​ຮ້າຍ​ຂັບ​ລົດ​ຕູ້​ຕຳ​ຝູງ​ຊົນ​ຢູ່​ບໍລິ​ເວນ​ມັດສະ​ຢິດ​ແຫ່ງ​ໜຶ່ງ​ທາງ​ຕອນ​ເໜືອ​ຂອງ​ນະຄອນຫລວງ​ລອນ​ດອນ ​ເຮັດ​ໃຫ້​ມີ​ຜູ້​ໄດ້​ຮັບ​ບາດ​ເຈັບ​ຢ່າງ​ໜ້ອຍ 10 ຄົນ. ຂະນະ​ທີ່​ເຈົ້າໜ້າ​ທີ່​ຈັບ​ກຸມ​ຜູ້​ຖືກ​ສົງ​ໄສ​ໄດ້​ໜຶ່ງ​ຄົນ.

 

+ ເກີດເຫດລະເບີດຢູ່ແມນເຊສເຕີຂອງອັງກິດ ມີຜູ້ເສຍຊີວິດ 19 ຄົນ, ບາດເຈັບ 50 ຄົນ

+ ກໍ່ການຮ້າຍບໍລິເວນສະພາກາງ ອັງກິດ ເສຍຊີວິດ 2 ບາດເຈັບສາຫັດຈຳນວນຫລາຍ

 

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ລອນ​ດອນ ປະ​ເທດ​ອັງກິດ ​ໃນ​ວັນ​ທີ 19 ມິຖຸນາ​ວ່າ: ສຳນັກງານ​ຕຳຫລວດ​ນະຄອນຫລວງ​ລອນ​ດອນ​ໄດ້​ຮັບ​ແຈ້ງ​ເຫດ​ມີ​ຄົນ​ຂັບ​ລົດ​ຕູ້​ໂດຍສານ​ຕຳ​ຝູງ​ຊົນ ​ເຊິ່ງກຳລັງ​ສັນຈອນ​ຢູ່​ບໍລິ​ເວນ​ມັດ​ສະ​ຢິດຟິນບິ​ວຣີ ປຣາກ ຢູ່​ທາງ​ເໜືອ ​ໃນ​ເວລາ 00:20 ​ໂມງ ຕາມ​ເວລາ​ທ້ອງ​ຖິ່ນ ຈຶ່ງ​ສົ່ງ​ເຈົ້າໜ້າ​ທີ່​ໄປ​ກວດ​ສອບ​ຈຸດ​ເກີດ​ເຫດ ​ໂດຍ​ສາມາດ​ຈັບ​ກຸມ​ຜູ້​ຖືກ​ສົງ​ໄສ​ໄດ້ 1 ຄົນ ຄື​ຄົນ​ຂັບ​ລົດ​ຄັນ​ດັ່ງກ່າວ ​ແລະ ​ເລັ່ງນຳ​ຕົວ​ຜູ້​ໄດ້​ຮັບ​ບາດ​ເຈັບ​ຢ່າງ​ໜ້ອຍ 10 ຄົນ​ສົ່ງ​ໂຮງໝໍ ພ້ອມ​ທັງ​ປິດ​ການ​ຈະລາຈອນ​ໃນ​ພື້ນທີ່​ດັ່ງກ່າວ​ຊົ່ວຄາວ.

ຂະນະ​ທີ່​ສື່​ທ້ອງ​ຖິ່ນ​ຫລາຍ​ແຫ່ງ​ຢູ່​ອັງກິດ​ລາຍ​ງານ​ວ່າ: ຄົນ​ຂັບ​ລົດ​ຕູ້​ມີ​ມີດ​ເປັນ​ອາວຸດ ​ແລະ ​ໃຊ້​ແທງ​ປະຊາຊົນ​ຢ່າງ​ໜ້ອຍ​ຄົນ​ໜຶ່ງ, ສ່ວນ​ຄະນະ​ມົນຕີ​ມຸສລິ​ມ​ແຫ່ງ​ບຣິ​​ເຕນ (MCB) ອອກ​ຖະ​ແຫລ​ງການສະ​ແດງ​ຄວາມ​ກັງວົນ​ຕໍ່​ເຫດການ​ດັ່ງກ່າວ ທີ່​ເກີດ​ຂຶ້ນ​ໃນ​ໄລຍະ​ເດືອ​ນລໍ​ມາດ​ອນ ​ແລະ ຂໍ​ໃຫ້​ຊາວ​ມຸສລິ​ມຮ່ວມ​ກັນ​ອະທິຖານ​ໃຫ້​ຜູ້​ໄດ້​ຮັບ​ບາດ​ເຈັບ​ທຸກ​ຄົນ ​ເຊິ່ງສ່ວນ​ຫລາຍ​ເປັນ​ຊາວ​ມຸສລິ​ມທີ່​ໄປ​ສູດ​ມົນ​ໃນ​ມັດສະ​ຢິດ.

ທັງ​ນີ້, ມັດສະ​ຢິດທີ່​ເກີດ​ເຫດ​ຕັ້ງຢູ່​ໃກ້​ກັບ​ຖະໜົນ​ເຊ​ເວນ ຊິ​ສ​ເຕີ ​ເຊິ່ງ​ໃນ​ອະດີດ​ຖື​ເປັນ​ໜຶ່ງ​ໃນ​ເຂດ​ທີ່​ມີ​ສະມາຊິກ​ກຸ່ມ​ຫົວ​ຮຸນ​ແຮງ​ຢູ່​ເປັນ​ຈຳນວນ​ຫລາຍ, ໜຶ່ງ​ໃນ​ນັ້ນຄື​ທ້າວ ອາ​ບູ ຮຳ​ຊາ ນັກ​ສາສະໜາ​ຊາວ​ເອຢິບ​ ​ເຈົ້າຂອງ​ສາຍາ “ມື​ຕະຂໍ​ຕາ​ດຽວ” ​ເຊິ່ງທາງ​ການ​ອັງກິດ​ສົ່ງ​ຕົວ​ໄປ​ນະຄອນ​ນິວຢອກ​ໃນ​ຖານະ​ຜູ້​ຮ້າຍ​ຂ້າມ​ແດນ ​ເພື່ອ​ໄປ​ຂຶ້ນສານ​ໃນ​ຄະດີ​ກໍ່​ການ​ຮ້າຍ ​ໃນ​ປີ 2015. ​ເຖິງ​ຢ່າງ​ໃດ​ກໍ​ຕາມ, ມັດ​ສະ​ຢິດຟິນບິ​ວຣີ ປຣາກ ​ເປັນ​ໜຶ່ງ​ໃນ​ສາສະໜາ​ຂອງ​ຊາວ​ມຸສລິ​ມທີ່​ເຂົ້າຮ່ວມ​ກິດຈະກຳ​ກັບ MCB ​ເມື່ອ 2 ປີ​ກ່ອນ ​ເພື່ອ​ປຸກລະດົມ ​ແລະ ປະຊາສຳພັນ​ຄວາມ​ຮູ້​ຄວາມ​ເຂົ້າ​ໃຈ​ທາງ​ສາສະໜາ​ທີ່​ຖືກຕ້ອງ​ໃຫ້​ແກ່​ຊາວ​ຕາ​ເວັນ​ຕົກ.