ຈົ່ງມີສະຕິ ເຂື່ອນແຕກບັນຫາບໍ່ໄກຕົວ

- WhatsApp Image 2017 07 12 at 9 - ຈົ່ງມີສະຕິ ເຂື່ອນແຕກບັນຫາບໍ່ໄກຕົວ

ໂດຍ: ທ່ຽງທຳ

- lattana 1 - ຈົ່ງມີສະຕິ ເຂື່ອນແຕກບັນຫາບໍ່ໄກຕົວ

ເພື່ອນຜູ້ອ່ານທີ່ຮັກແພງ, ຫລາຍທ່ານກໍຄົງຈະດີໃຈ ເມື່ອລັດຖະບານເຮົາໄດ້ມີນະໂຍບາຍເປັນບູລິມະສິດໃນການ ພັດທະນາເຂື່ອນໄຟຟ້າຕາມທ່າແຮງ ແລະ ຄວາມອາດສາມາດບົ່ມຊ້ອນທາງດ້ານທຳມະຊາດ ແລະ ແມ່ນ້ຳລຳເຊອັນອຸ ດົມສົມບູນຂອງປະເທດເຮົາ ເພື່ອແນໃສ່ສ້າງປະເທດລາວເປັນໝໍ້ໄຟແຫ່ງອາຊຽນ ແລະ ເມື່ອນັ້ນແມ່ນປະເທດເຮົາຈະມີ ລາຍຮັບຢ່າງມະຫາສານຈາກການຂາຍແຫຼ່ງພະລັງງານດັ່ງກ່າວ, ແຕ່ການພັດທະນາດ້ານນີ້ມັນກໍມີຄວາມສ່ຽງເປັນບໍ່ ໜ້ອຍ ແລະ ອາດເປັນມະຫັນຕະໄພໄດ້ ຫາກໃນເມື່ອເຮົາຖືເບົາຕໍ່ມາດຖານເຕັກນິກການກໍ່ສ້າງ, ການພັດທະນາ ແລະ ຄວາມລະອຽດອ່ອນຂອງຄຸນນະພາບ ເພື່ອສາມາດຮອງຮັບໃນເວລານ້ຳຂຶ້ນ, ນ້ຳລົງ, ໃນເວລາມີພາຍຸ, ແຜ່ນດິນໄຫວ ແລະ ອື່ນໆ ເຊິ່ງບົດຮຽນນີ້ກໍມີຫລາຍປະເທດໄດ້ຮັບເຄາະຮ້າຍຈາກມັນມາແລ້ວ ແລະ ຢູ່ລາວເຮົາກໍເກີດມີຢູ່ເຂື່ອນເຊ ກອງ ແລະ ມໍ່ໆນີ້ ຄືວັນທີ 11 ກັນຍານີ້ ກໍເກີດເຫດເຂື່ອນນ້ຳອ້າວ ເມືອງຜາໄຊ ແຂວງຊຽງຂວາງ ແຕກກະທັນຫັນ, ເຖິງວ່າຍັງບໍ່ມີລາຍງານເຖິງການເສຍຊີວິດຂອງຄົນ ແຕ່ມັນກໍສົ່ງຜົນກະທົບບໍ່ໜ້ອຍເຖິງພື້ນຖານການຜະລິດ, ໄຮ່ນາ ຮົ້ວສວນ, ເຮືອນຊານບ້ານຊ່ອງ, ຜົນລະປູກ, ສັດລ້ຽງ ແລະ ຊັບສິນອື່ນໆຂອງປະຊາຊົນເສຍຫາຍເປັນຈຳນວນບໍ່ ໜ້ອຍ, ພ້ອມຍັງສົ່ງຜົນກະທົບຕໍ່ເສັ້ນທາງຄົມມະນາຄົມ, ການສັນຈອນໄປມາພົບຄວາມຫຍຸ້ງຍາກ ເຊິ່ງສິ່ງດັ່ງກ່າວ ກ່ອນຈະປົວແປງມັນຄືນມາໄດ້ກໍຕ້ອງໄດ້ໃຊ້ງົບປະມານ ແລະ ໄລຍະເວລາເປັນບໍ່ໜ້ອຍ. ນີ້ແລ້ວຄືບົດຮຽນ. ດັ່ງນັ້ນ ພວກເຮົາຕ້ອງມີສະຕິ ນັບແຕ່ຂອດອະນຸຍາດທີ່ຈະໃຫ້ໃຜ, ບໍລິສັດໃດລົງທຶນເຮັດເຂື່ອນກໍຕ້ອງໄດ້ພິຈາລະນາໃຫ້ຖີ່ຖ້ວນ, ບໍ່ແມ່ນວ່າໃຜມີເງິນມີທຶນແລ້ວແມ່ນຢາກເຮັດຫຍັງກໍເຮັດໂລດ ໂດຍຍັງຂາດການສຶກສາຄົ້ນຄວ້າທີ່ດີ ເຖິງຄວາມອາດ ສາມາດຂອງເຂົາເຈົ້າ. ພ້ອມນັ້ນກໍແມ່ນເບື້ອງກວດກາຢ່າງລະອຽດຖີ່ຖ້ວນຂອງນັກວິຊາການ ຖ້າພາຍໃນບໍ່ມີຄວາມ ພ້ອມກໍຕ້ອງໄດ້ຈ້າງຜູ້ຊ່ຽວຊານ, ຜູ້ມີປະສົບການຂອງປະເທດພັດທະນາເພິ່ນມາຊ່ວຍກໍຈະເປັນການດີ ເພື່ອຮັບປະກັນບໍ່ ໃຫ້ເຂື່ອນດັ່ງກ່າວກາຍເປັນບົ່ມແຕກຊ້ຳ.

ເອົາລະ ! ນີ້ເປັນສ່ວນປະກອບເລັກໆນ້ອຍໆຂອງສື່, ຖ້າຜິດພາດປະການໃດກໍຂໍອະໄພ ເພາະເຫັນຂ່າວວ່າມີເຫດ ເຂື່ອນແຕກກໍໜ້າເປັນຫ່ວງ ແລະ ເຕືອນສະຕິຂອງທຸກໆຝ່າຍໃຫ້ຢູ່ໃນຄວາມພ້ອມ ເພາະຜູ້ຢູ່ໃຕ້ດິນຍາມໃດກໍເປັນຫ່ວງ ຢ້ານວ່າຜູ້ຂຶ້ນຕົ້ນໄມ້ຕົກຢູ່ສະເໝີ.

- dao e1499999169791 - ຈົ່ງມີສະຕິ ເຂື່ອນແຕກບັນຫາບໍ່ໄກຕົວ