ນະຄອນຫລວງເອົາໃຈໃສ່ກໍາຈັດຍຸງລາຍ

ພະແນກສາທາລະນະສຸກນະຄອນຫລວງວຽງຈັນ, ພວມເລັ່ງໂຄສະນາການຈັດຕັ້ງປະຕິບັດຄໍາຂວັນ 5ປ ເພື່ອທໍາລາຍແຫລ່ງເພາະພັນຍຸງລາຍ, ພາຍຫລັງເຫັນວ່າໄລຍະນີ້ເປັນລະດູຝົນສະພາບແວດລ້ອມເອື້ອອໍານວຍໃຫ້ແກ່ການຂະຫຍາຍຕົວຂອງຍຸງລາຍ, ຊຶ່ງເປັນພາຫະນໍາເຊື້ອຂອງໄຂ້ເລືອດອອກໃຫ້ໝົດໄປ.  ຫົວໜ້າພະແນກສາທາລະນະສຸກນະຄອນຫລວງວຽງຈັນ ໃຫ້ຮູ້ວ່າ: ພາຍຫລັງມີຄໍາສັ່ງຂອງທ່ານນາຍົກລັດຖະມົນຕີວ່າດ້ວຍການປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍອອກມາເມື່ອເດືອນພຶດສະພາຜ່ານມານີ້, ຂະແໜງການຕົນກໍໄດ້ຜັນຂະຫຍາຍຄໍາສັ່ງດັ່ງກ່າວເປັນແຜນງານ ແລະ ຈັດກິດຈະກໍາຕ່າງໆເພື່ອປ້ອງກັນ ແລະ ສະກັດກັ້ນການລະບາດຂອງພະຍາດດັ່ງກ່າວ, ໂດຍວຽກງານຕົ້ນຕໍແມ່ນສຸມໃສ່ການປຸກລະດົມປະຊາຊົນເຂດຊຸມຊົນແອອັດ, ເຂດຊານເມືອງທີ່ອາດມີຄວາມສ່ຽງເກີດພະຍາດໄຂ້ຍຸງລາຍໄດ້ເອົາໃຈໃສ່ປະຕິບັດຄໍາຂວັນ 5ປ ຄື: (1) ປິດຝາພາຊະນະນໍາໃຊ້ໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່. (2) ປ່ຽນນໍ້າໃນພາຊະນະ ເຊັ່ນ: ເຕົ້າດອກໄມ້, ນໍ້າຮອງຕີນຕູ້, ຖ້ານຮອງຈອກນໍ້າ. (3) ປ່ອຍປາຫາງນົກຍຸງເພື່ອກິນໜອນນໍ້າຍຸງລາຍ (4) ປັບປຸງໂດຍການອານາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະ, ກະປ໋ອງ ແລະ ຢາງຕີນລົດທີ່ມີນໍ້າຂັງ ແລະ (5) ປະຕິບັດໃຫ້ເປັນນິໄສປະຈໍາແລະ ເມື່ອບໍ່ດົນມານີ້ກໍໄດ້ຈັດງານສັບປະດາຕ້ານໄຂ້ຍຸງລາຍຢູ່ນະຄອນຫລວງວຽງຈັນ, ໂດຍຈັດໃຫ້ມີຂະບວນລົດຖີບຕິດທຸງ 5ປ ແຕ່ສູນການຄ້າລາວ-ໄອເຕັກຮອດວົງວຽນດອນໜູນແລ້ວກັບຄືນສູນການຄ້າລາວ-ໄອເຕັກ, ໂດຍມີມວນຊົນຊາວນະຄອນຫລວງວຽງຈັນເຂົ້າຮ່ວມເປັນຈໍານວນຫລາຍ, ນອກຈາກນີ້ຍັງມີກິດຈະກໍາຖາມ-ຕອບຄວາມຮູ້ໃນການຕ້ານພະຍາດໄຂ້ເລືອດອອກ, ແຈກຢາຍປາຫາງນົກຍຸງເພື່ອກິນໜອນນໍ້າຍຸງລາຍ ແລະ ຈັດແຂ່ງຂັນເລື່ອງສັ້ນຕ້ານໄຂ້ເລືອດອອກໃນຫົວຂໍ້: “ເພື່ອຂ້ອຍເອງ, ເພື່ອຄອບຄົວ ແລະ ເພື່ອເພື່ອນໃນຫ້ອງຮຽນ” ຊຶ່ງມາຮອດປັດຈຸບັນມີຜູ້ສົ່ງຜົນງານມາເຂົ້າຮ່ວມປະກວດແລ້ວຫລາຍກວ່າ 40 ເລື່ອງ. ພ້ອມນີ້ກໍໄດ້ຈັດຕັ້ງພະນັກງານຂັ້ນບ້ານ, ຂັ້ນເມືອງເພື່ອຕິດຕາມສະພາບຄວາມໜາແໜ້ນຂອງໜອນນໍ້າ ແລະ ການທໍາລາຍແຫລ່ງເພາະພັນຍຸງລາຍຢ່າງເປັນປົກກະຕິເພື່ອຮັບປະກັນໃຫ້ປະຊາຊົນ, ສະຖາບັນການສຶກສາ, ສໍານັກງານ, ອົງການ ໄດ້ເພີ່ມທະວີຄວາມເອົາໃຈໃສ່ໃນການປະຕິບັດຄໍາຂວັນ 5ປ ເປັນຂະບວນກວ້າງຂວາງ ແລະ ມີປະສິດທິຜົນຄື: ໃນທ້າຍເດືອນມິຖຸນານີ້ກໍຈະຈັດກອງປະຊຸມສະຫລຸບຖອດຖອນບົດຮຽນກ່ຽວກັບການຕ້ານພະຍາດໄຂ້ເລືອດອອກ 6 ເດືອນຕົ້ນປີ ແລະ ວາງແຜນຈັດຕັ້ງປະຕິບັດວຽກງານໃນຕໍ່ໜ້າ.

ຫົວໜ້າພະແນກດັ່ງກ່າວ ໃຫ້ຮູ້ວ່າ: ປັດຈຸບັນຢູ່ນະຄອນຫລວງວຽງຈັນພົບຜູ້ຕິດເຊື້ອພະຍາດໄຂ້ຍຸງຫລາຍກວ່າ 400 ກໍລະນີ, ໃນນີ້ມີຜູ້ເສຍຊີວິດໜຶ່ງຄົນ ແລະ ຕົວເລກຜູ້ຕິດເຊື້ອອາດຈະເພີ່ມຂຶ້ນອີກ, ເນື່ອງຈາກຫລາຍປັດໃຈທີ່ຈະພາໃຫ້ເກີດພະຍາດດັ່ງກ່າວ ເປັນຕົ້ນ: ຍັງມີຫລາຍຊຸມຊົນ, ຫລາຍຄອບຄົວບໍ່ເອົາໃຈໃສ່ປະຕິບັດຄໍາຂວັນ 5ປ, ຫລາຍໂຄງການກໍ່ສ້າງຍັງມີສະພາບນໍ້າອັ່ງຂັງ, ເຊິ່ງເປັນແຫລ່ງເພາະພັນຕົ້ນຕໍຂອງຍຸງລາຍ ແລະ ພື້ນທີ່ຕ້ອງໄດ້ເຝົ້າລະວັງຫລາຍກວ່າໝູ່ແມ່ນເຂດເມືອງໄຊທານີ, ໄຊເສດຖາ, ສີໂຄດຕະບອງ ເນື່ອງຈາກມີປະຊາກອນຫລາຍ ແລະ ມີເນື້ອທີ່ກວ້າງຂວາງ, ຊຶ່ງອາດເຮັດໃຫ້ເກີດການແຜ່ລະບາດຂອງເຊື້ອພະຍາດດັ່ງກ່າວໄດ້ໄວ.