ລະວັງອັກຄີໄພຍ້ອນໄຟຟ້າລັດວົງຈອນ

- WhatsApp Image 2017 07 12 at 9 - ລະວັງອັກຄີໄພຍ້ອນໄຟຟ້າລັດວົງຈອນ

ໂດຍ: ກ້ອງສ່ອງ ອິດສະຫລະ

- lattana 1 - ລະວັງອັກຄີໄພຍ້ອນໄຟຟ້າລັດວົງຈອນ

ໃນອາທິດແລ້ວນີ້, ຜູ້ຂຽນເຫັນແຫລ່ງຂ່າວໃນສື່​ເຮົາວ່າ: ຜົນການສືບສວນ-ສອບສວນສາເຫດໄຟ​ໄໝ້ສູນການຄ້າສາກົນຊັ່ງ ຈຽງນັ້ນແມ່ນຍ້ອນໄຟຟ້າລັດວົງຈອນ ວ່າຊັ້ນ ! ເວົ້າເລື່ອງໄຟ​ໄໝ້ຕະຫລາດຫລາຍແຫ່ງໃນທົ່ວປະເທດຜ່ານມານັ້ນ, ຜົນສະຫລຸບ ສ່ວນຫລາຍກໍຍ້ອນໄຟຟ້າລັດວົງຈອນ. ສ່ວນວ່າດ້ວຍສາເຫດອື່ນແມ່ນມີໜ້ອຍສຸດ. ແນວໃດກໍຕາມ, ຕາມເຮົາວ່າໃນເມື່ອມັນ​ໄໝ້ໄປແລ້ວ, ຊັບສິນມັນກໍຈິບຫາຍໄປແລ້ວຫລາຍຕື້ ມີແຕ່ວ່າໃນຂັ້ນຕໍ່ໄປພວກເຮົາຈະພ້ອມກັນຫາວິທີປ້ອງກັນ ແລະ ສະກັດກັ້ນ ມັນແນວໃດ ເພື່ອບໍ່ໃຫ້ມີ​ສະພາບ​ນີ້ເກີດຂຶ້ນມາອີກ.

ຄືດັ່ງພວກເຮົາຮູ້ນໍາກັນແລ້ວວ່າ, ຜົນເສຍຫາຍຈາກໄຟ​ໄໝ້ມັນເປັນໄພອັນຕະລາຍມະຫັນ ເຊິ່ງບໍ່ມີໃຜເພິ່ງປາດຖະໜາ. ດັ່ງ ຄໍາສຸພາສິດບູຮານເພິ່ນເຄີຍເວົ້າວ່າ: ດັບນໍ້າດັບໄຟເປັນມະຫາປະໄລທີ່ຮ້າຍກາດ ເຊິ່ງໃນຫລາຍປີຜ່ານມາຢູ່ບ້ານເມືອງເຮົາໄດ້ມີຜົນ ເສຍຫາຍຫລວງຫລາຍມາແລ້ວຍ້ອນອັກຄີໄພ ​ແລະ ສິ່ງດັ່ງກ່າວມັນຍັງເປັນໄພຂົ່ມຂູ່ ແລະ ກົດໜ່ວງຄວາມຈະເລີນຂອງຊາດ ຍ້ອນວ່ານອກຈາກສົ່ງຜົນກະທົບຕໍ່ຜູ້ປະກອບການທີ່ຫາກິນຕາມຕະຫລາດໂດຍກົງແລ້ວ

ຍັງສົ່ງຜົນສະທ້ອນຕໍ່ລະບົບເສດຖະກິດຂອງປະເທດນໍາດ້ວຍ ທີ່ໄດ້ຈາກການເກັບອາກອນຕ່າງໆກໍຖືກຢຸດສະງັກ ແລະ ຜົນກະທົບ ດັ່ງກ່າວຍັງກົດໜ່ວງແກ່ຍາວໄປຫລາຍປີຈຶ່ງຈະສາມາດຟື້ນຕົວໄດ້.

ຕາມຜູ້ຂຽນວ່າ, ຈາກສະພາບຕ່າງໆທີ່ເຮົາໄດ້ຍົກມາຂ້າງເທິງນີ້, ເຫດ ແລະ ຜົນ ອັນຕົ້ນຕໍຂອງມັນກໍແມ່ນການນໍາໃຊ້ໄຟຟ້າ ເປັນຫລັກ ເພາະວ່າການນໍາໃຊ້ໃຫ້ຖືກຕ້ອງຕາມເຕັກນິກ ແລະ ຖືກວິທີມັນກໍມີຜົນດີແກ່ເຮົາຫລາຍດ້ານ, ແຕ່ວ່າເມື່ອພວກເຮົາ ຫາກຊົມໃຊ້ເກີນລະບົບມາດຖານມັນກໍມີຜົນຮ້າຍຕາມມາເຊັ່ນ: ໄຟຟ້າລັດວົງຈອນ ແລະ ກໍລະນີອື່ນໆ.

ໃນຜ່ານມາ, ສ່ວນຫລາຍພວກເຮົາກໍຮູ້ແຕ່ການນໍາໃຊ້, ແຕ່ການໝັ່ນເອົາໃຈໃສ່ຕິດຕາມກວດກາສ້ອມແປງ ຫລື ມີມາດຕະ ການສະກັດກັ້ນແມ່ນຍັງບໍ່ທັນພາກັນປະຕິບັດຢ່າງເຄັ່ງຂັດ ແລະ ເປັນເຈົ້າການ, ເມື່ອເປັນແນວນັ້ນຈຶ່ງແມ່ນສາເຫດຕົ້ນຕໍຂອງ ການເກີດອັກຄີໄພ.

ເຖິງຢ່າງໃດກໍດີ, ຕາມຜູ້ຂຽນວ່າ ປັດ​ໄຈທີ່ສາມາດຫລີກເວັ້ນຈາກອັກຄີໄພໄດ້ນັ້ນ ມັນກໍມີທາງອອກຄື: ອັນທີໜຶ່ງຕ້ອງແມ່ນ ຕົນເອງເປັນເຈົ້າການຢ່າງເດັດຂາດຈິງຈັງ ຍ້ອນວ່າຄວາມໃກ້ຊິດຕິດແທດກັບວັດຖຸສິ່ງຂອງ ຕະຫລອດຮອດການນໍາໃຊ້ຟືນໄຟ ແມ່ນຄົນເຮົາເອງເປັນຜູ້ເຮັດ ແລະ ສ້າງມັນຂຶ້ນມາ. ສະນັ້ນ ເຮົາກໍຕ້ອງໄດ້ຮັບຜິດຊອບເພື່ອຄວາມປອດໄພໃນຊີວິດ ແລະ ຊັບສິນ ຂອງເຮົາເອງ ຫລື ຂອງສ່ວນລວມ, ອັນສອງມາເບື້ອງໜ່ວຍງານວິຊາສະເພາະ ເປັນຕົ້ນບໍລິສັດໄຟຟ້າກໍຕ້ອງມີລະບົບການຈັດຕັ້ງ ຊີ້ນໍາ ແລະ ແນະນໍາຢ່າງໃກ້ຊິດແທດເຖິງແຕ່ເທິງລົງລຸ່ມແຕ່ລຸ່ມຂຶ້ນເທິງ ໂດຍສະເພາະກໍາຊັບໃຫ້ໜ່ວຍງານຮັບຜິດຊອບເລື່ອງໄຟ ໃນບໍລິສັດ ຫລື ອົງກອນຂອງຕົນມີການຕິດຕາມກວດກາ, ຖະໜຸບໍາລຸງ ແລະ ສ້ອມແປງ ຫລື ແນະນໍາການໃຊ້ໄຟຟ້າເຂົ້າລະບົບ ລະບຽບ ແລະ ຖືກຕ້ອງຕາມມາດຕະຖານເຕັກນິກ. ຊາທິດກໍ່າເຫັນຜ່ານມາ, ທາງບໍລິສັດກ່ຽວຂ້ອງແມ່ນຈະເນັ້ນໜັກແຕ່ການ ວາງເປົ້າໝາຍຜະລິດໃຫ້ໄດ້ຫລາຍຕາມແຜນຍຸດທະສາດເສດຖະກິດ-ສັງຄົມແຫ່ງຊາດ. ໃນເມື່ອຂະຫຍາຍໄຟຟ້າໃຫ້ຜູ້ຊົມໃຊ້ໄດ້ ຫລາຍເທົ່າໃດກໍເກັບເງິນນໍາຜູ້ຊົມໃຊ້ໄດ້ຫລາຍເທົ່ານັ້ນ, ເຜີໆມາຖ້າຈ່າຍບໍ່ທັນຕາມເພິ່ນກໍານົດກໍມາຕັດໄຟຢ່າງບໍ່ມີການປານີ. ສ່ວນວ່າການລົງທຶນຮອນໃສ່ການໂຄສະນາໃນການຕ້ານ ແລະ ສະກັດກັ້ນບັນຫາອັກຄີໄພໃຫ້ທົ່ວສັງຄົມມີຈິດສໍານຶກແມ່ນຍັງມີ ໜ້ອຍ, ສ່ວນອັນສຸດທ້າຍທາງເຈົ້າໜ້າທີ່ຮັບຜິດຊອບກໍຄວນໄດ້ເບິ່ງຄືນວ່າໃນຜ່ານມາພວກເຮົາເຫັນໄຟ​ໄໝ້ແລ້ວຈຶ່ງໄປມອດ, ເຜີໆມາໄປຊ້າແດ່ ຫລື ໄປຮອດບໍ່ມີທາງເຂົ້າຍ້ອນທາງມັນແຄບໄຟກໍເລີຍ​ໄໝ້ໝົດກ້ຽງ. ສະຫລຸບແລ້ວຈະເຮັດຫຍັງທໍາຫຍັງກໍ ຕາມ, ຕ້ອງໄດ້ຮ່ວມມືກັນເປັນຕ່ອງໂສ້, ເປັນທີມງານ ແລະ ປະສານງານກັນຢ່າງກົມກຽວ ຈຶ່ງຈະສາມາດເດີນໜ້າໄດ້ໃນເງື່ອນໄຂທີ່ ສະພາວະໂລກຮ້ອນ ແລະ ມີການປ່ຽນແປງຂອງດິນຟ້າອາກາດຢູ່ເລື້ອຍໆ, ທຸກສິ່ງຢ່າງກໍຕ້ອງໄດ້ພັດທະນາໄປຕາມກົດເກນ ແລະ ທັນຍຸກທັນສະໄໝ ຈຶ່ງຈະປາບສິ່ງຫຍໍ້ທໍ້ອັນບໍ່ດີນັ້ນໄດ້.

- dao e1499999169791 - ລະວັງອັກຄີໄພຍ້ອນໄຟຟ້າລັດວົງຈອນ