ລາວ​ທົບ​ທວນຄືນການ​ຈັດ​ຕັ້ງ​ປະ​ຕິ​ບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ

- WhatsApp Image 2017 07 12 at 9 - ລາວ​ທົບ​ທວນຄືນການ​ຈັດ​ຕັ້ງ​ປະ​ຕິ​ບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ

ຈັດກອງ​ປະ​ຊຸມທົບ​ທວນຄືນການ​ຈັດ​ຕັ້ງ​ປະ​ຕິ​ບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ (ປ​ພຍ) ຂຶ້ນທີ່​ແຂວງ​ສະຫວັນ​ນະ​ເຂດ ​ແລະ ​ແຂວງ​ຄຳ​ມ່ວນ ​ໄດ້​ຈັດ​ຂຶ້ນ​ໃນ​ວັນ​ທີ 12 ​ແລະ 14 ກັນຍາ​ນີ້ ​ໂດຍ​ການ​ເຂົ້າຮ່ວມ​ຂອງຮອງຫົວ​ໜ້າ​ກົມ​ອົງ​ການ​ຈັດ​ຕັ້ງ​ສາ​ກົນ, ຕາງໜ້າ​ຫົວ​ໜ້າ​ກອງ​ເລ​ຂາຄະ​ນະ​ຊີ້​ນຳ​ລະ​ດັບ​ຊາດ​ເພື່ອ​ການ​ຈັດ​ຕັ້ງ​ປະ​ຕິ​ບັດວຽກ​ງານ​ດັ່ງກ່າວ.

- lattana 1 - ລາວ​ທົບ​ທວນຄືນການ​ຈັດ​ຕັ້ງ​ປະ​ຕິ​ບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ

ກອງ​ປະ​ຊຸມໄດ້​​ປຶກ​ສາ​ຫາ​ລື, ແລກ​ປ່ຽນ​ຄວາມ​ຄິດ​ເຫັນ​ຕ່າງໆ ກ່ຽວ​ກັບການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງໃນ ສ​ປ​ປ ລາວ ແນ​ໃສ່​​ປູກ​ຈິດ​ສຳ​ນຶກ, ສ້າງ​ຄວາມ​ເຂົ້າ​ໃຈ ແລະ ເພີ່ມ​ທະ​ວີການ​ມີ​ສ່ວນ​ຮ່ວມ​ຂອງ​ທຸກ​ພາກ​ສ່ວນ ແລະ ຂະ​ແໜງ​ການ​ກ່ຽວ​ຂ້ອງຂັ້ນທ້ອງຖິ່ນໃນ​ການ​ເຊື່ອມ​ສານ​ເປົ້າ​ໝາຍ ປ​ພຍ ເຂົ້າ​ໃນ​ແຜນ​ພັດ​ທະ​ນາ ກໍ​ຄື​ການ​ສ້າງ​ແຜນ​ດຳ​ເນີນ​ງານ​ຮອດ ປີ 2030 ເພື່ອ​ເປັນ​ບ່ອນ​ອີງ​ໃຫ້​ແກ່​ການ​ວາງ​ແຜນ ແລະ ການ​ລະ​ດົມ​ທຶນ​ຮອນ​ເຂົ້າໃນ​ການ​ພັດ​ທະ​ນາ​ປະ​ເທດ​ຊາດ​ໃຫ້​ແທດ​ເໝາະ​ກັບສະ​ພາບ​ເງື່ອນ​ໄຂ​ ແລະ ທ່າ​ແຮງ​ຕົວ​ຈິງ​ຂອງ​ປະ​ເທດ​ເຮົາ ​ແລະ ​ໄດ້​ແຈ້ງ​ໃຫ້​ ຜົນ​ຂອງກອງ​ປະ​ຊຸມຄັ້ງ​ປະ​ຖົມ​ມະ​ລຶກຂອງ​ຄະ​ນະ​ຊີ້​ນຳ​ລະ​ດັບ​ຊາດ ເພື່ອ​ການ​ຈັດ​ຕັ້ງ​ປະ​ຕິ​ບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ (ປ​ພຍ) ໂດຍ​ສະ​ເພາະການ​ໃຫ້ທິດ​ຊີ້​ນຳ​ອັນ​ສຳ​ຄັນ​ຂອງ ພະ​ນະທ່ານ ທອງ​ລຸນ ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີ ແຫ່ງ ສ​ປ​ປ ລາວ ​ກ່ຽວ​ກັບການ​ວາງ​ແນວ​ທາງນະ​ໂຍ​ບາຍ ແລະ ທິດ​ທາງລວມໃນ​ວຽກ​ງານການ​ຈັດ​ຕັ້ງ​ຜັນ​ຂະ​ຫ​ຍາຍ​ເປົ້າ​ໝາຍ​ ປ​ພຍ ຢູ່ ສ​ປ​ປ ລາວ ໃນ​ຕໍ່​ໜ້າ.

ຜູ້​ເຂົ້າ​ຮ່ວມໄດ້​ຮັບ​ຟັງການລາຍ​ງານກ່ຽວ​ກັບເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປິ ຄັ້ງທີ 8  ແລະ ວຽກ​ງານ​ເກັບ​ກຳ​ຂໍ້​ມູນ ແລະ ສະ​ຖິ​ຕິ ໂດຍວິທະຍາກອນຈາກກົມອົງການຈັດຕັ້ງສາກົນ, ກະຊວງການຕ່າງປະເທດ, ກົມແຜນການ ແລະ ສູນ​ສະ​ຖິ​ຕິ​ແຫ່ງ​ຊາດ, ກະຊວງແຜນການ ແລະ ການລົງທຶນ ​ເຊິ່ງ​ເນື້ອ​ໃນ​ຫຼັກໆແມ່ນ​​ລາຍ​ງານ​ສະ​ພາບ​ການໂດຍ​ລວມຂອງການ​ຈັດ​ຕັ້ງ​ປະ​ຕິ​ບັດ ປ​ພຍ ມາ​ຮອດ​ປັດ​ຈຸ​ບັນ, ການ​ກຳ​ນົດ​ວາ​ລະ​ປີ 2030 ເພື່ອ​ການ​ພັດ​ທະ​ນາ​ແບບ​ຍືນ​ຍົງ ກໍ​ຄື​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງໃນ​ລະ​ດັບ​ສາ​ກົນ ແລະ ການ​ຮັບ​ຮອງ​ເອົາ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ​ແຫ່ງ​ຊາດ ທີ 18: “ຊີ​ວິດ​ທີ່​ປອດ​ໄພ​ຈາກ​ລະ​ເບີດບໍ່​ທັນ​ແຕກ” ​ພ້ອມ​ທັງ​ໄດ້​ນຳ​ສະ​ເໜີ​ບັນ​ດາ​ກົນ​ໄກ ແລະ ແຜນ​ດຳ​ເນີນ​ງານ​ແຫ່ງ​ຊາດສຳ​ລັບ​ການ​ຈັດ​ຕັ້ງ​ປະ​ຕິ​ບັດ ປ​ພຍ ຮອດ​ປີ 2030 ໂດຍ​ສະ​ເພາະ​ຄວາມ​ຄືບ​ໜ້າ​ໃນ​ການ​ເຊື່ອມ​ສານ ປ​ພຍ ເຂົ້າ​ໃນ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ແຫ່ງ​ຊາດ 5 ປີ ຄັ້ງ​ທີ VIII  ​ເຊິ່ງ​ຕິດ​ພັນ​ກັບຂົງ​ເຂດ​ວຽກ​ງານ​ຂອງ​ແຕ່​ລະຂະ​ແໜງ​ການ​​ທີ່​ກ່ຽວ​ຂ້ອງ ລວມ​ທັງ​ສູນ​ກາງ ແລະ ທ້ອງ​ຖິ່ນ​ ເພື່ອ​ຮັບ​ປະ​ກັນ​ໃຫ້​ແກ່​ການ​ຈັດ​ຕັ້ງ​ປະ​ຕິ​ບັດ​ແຜນ​ງານ​ຕ່າງໆ​ໃຫ້​ເປັນ​ລະ​ບົບ, ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ​ສູງ ອີງ​ໃສ່​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ແຫ່ງ​ຊາດ, ແຜນ​ການ ແລະ ບູ​ລິ​ມະ​ສິດ​ຂອງ​ຂະ​ແໜງ​ການ​ໃນ​ແຕ່​ລະ​ໄລ​ຍະ ​ເຊິ່ງຕ້ອງ​ໄດ້​ຕິດ​ຕາມ, ປະ​ເມີນ​ຜົນ, ເກັບ​ກຳ​ຂໍ້ມູນ ແລະ ​ສະ​ຖິ​ຕິຢ່າງ​ໃກ້​ຊິດ. ນອກ​ຈາກນີ້, ທີ່​ປະ​ຊຸມ​ຍັງ​ໄດ້​ມີ​ໂອ​ກາດຮັບ​ຟັງບົດ​ສະ​ເໜີ ກ່ຽວ​ກັບການ​ຮ່ວມ​ງານ​ກັນ​ລະ​ຫວ່າງ​ອົງ​ການ​ຈັດ​ຕັ້ງ​ສາ​ກົນ​ທີ່ບໍ່​ສັງ​ກັດ​ລັດ​ຖະ​ບານ (INGOs) ແລະ ອົງ​ການ​ຈັດ​ຕັ້ງ​ທາງ​ສັງ​ຄົມ​ຂອງ​ລາວ (CSOs) ກໍ​ຄືກົນ​ໄກການ​ຄຸ້ມ​ຄອງອົງ​ການ​ຈັດ​ຕັ້ງ​ສາ​ກົນ​ທີ່ບໍ່​ສັງ​ກັດ​ລັດ​ຖະ​ບານ ແລະ ອົງ​ການ​ຈັດ​ຕັ້ງ​ທາງ​ສັງ​ຄົມ​ຂອງ​ລາວ ​ເຊິ່ງເປັນອົງການຈັດຕັ້ງສາກົນໜຶ່ງທີ່ໄດ້ເຂົ້າມາໃຫ້ການຊ່ວຍເຫລືອແກ່ ສປປ ລາວ, ຕັ້ງແຕ່ກ່ອນປີ 1975 ແລະ ເພີ່ມຫລາຍຂຶ້ນນັບແຕ່ ສປປ ລາວ ໄດ້ດຳເນີນ ແລະ ຜັນຂະຫຍາຍແນວທາງການຕ່າງປະເທດ ພາຍໃຕ້ແນວທາງຈິນຕະນາການໃໝ່ຂອງພັກ ແຕ່ປີ 1986 ເປັນຕົ້ນມາ.

- dao e1499999169791 - ລາວ​ທົບ​ທວນຄືນການ​ຈັດ​ຕັ້ງ​ປະ​ຕິ​ບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ