ວິທີການຕົວຢ່າງເພື່ອຄຸ້ມຄອງ ສື່ສັງຄົມອອນລາຍ

- WhatsApp Image 2017 07 12 at 9 - ວິທີການຕົວຢ່າງເພື່ອຄຸ້ມຄອງ ສື່ສັງຄົມອອນລາຍ

ໂດຍ: ວິ​ເສດ ສະ​ແຫວ​ງສຶກສາ

- lattana 1 - ວິທີການຕົວຢ່າງເພື່ອຄຸ້ມຄອງ ສື່ສັງຄົມອອນລາຍ

ມື້ນີ້​ຜູ້​ຂຽນ​ໄດ້​ສັງ​ລວມ​ເອົາ​ບັນຫາ​ທີ່​ພົວພັນ​ກັບ​ສື່​ສັງຄົມ​ອອນ​ລາຍ​ທີ່​ຫລາຍ​ປະ​ເທດ​ໄດ້​ອອກ​ມາດ​ຕະການ​ຄວບ​ຄຸມ ​ເພື່ອ​ບໍ່​ໃຫ້​ເກີດ​ມີ​ບັນຫາ​ຕາມ​ມາ​ຈາກ​ການ​ນຳ​ໃຊ້​ແບບ​ແຕກ​ປອກອອກ​ທາງ ​ເຊັ່ນ​ຫວ່າງ​ບໍ່​ເຫິງ​ມາ​ນີ້, ກະຊວງ​ສື່ສານ ​ແລະ ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຂອງ​ອິນ​ໂດ​ເນ​ເຊຍ ​ໄດ້​ຕົກລົງ​ກັບ​ບໍລິສັດ​ອິນ​ເຕີ​ເນັດ​ຂອງ​ສະຫະລັດ​ອາ​ເມ​ລິ​ກາ ຄື​ກູ​ເກິ​ນ ​ແລະ ທະວິ​ດ​ເຕີ ​ໃນ​ຄວາມ​ພະຍາຍາມ​ກຳຈັດ​ເນື້ອ​ໃນ​ບໍ່​ດີ​ທີ່​ລະ​ເມີດ​ລະບຽບ​ກົດໝາຍ​ຂອງ​ອິນ​ໂດ​ເນ​ເຊຍ. ​ໂຄງການ​ຮ່ວມ​ມື​ດັ່ງກ່າວ​ເອີ້ນ​ເປັນ​ພາສາ​ອັງກິດ​ວ່າ: “ທຼັດຟະ​ແລກ​ເກີ” ​ເຊິ່ງຄາດ​ວ່າ​ຈະ​ເລີ່​ມປະຕິບັດ​ພາຍ​ໃນ​ໄຕ​ມາດ​ທີ 4 ຂອງ​ປີ​ນີ້. ​ເປົ້າໝາຍ​ຂອງ​ໂຄງການ​ເນັ້ນການ​ຄຸ້ມ​ຄອງ​ເນື້ອ​ໃນ​ຂອງ​ກູ​ເກິ​ນ ​ໂດຍ​ຈະ​ມີ​ໜ່ວຍ​ອາສາ​ສະໝັກ​ອິດສະຫຼະ​ເຮັດ​ໜ້າ​ທີ່​ກວດ​ເນື້ອ​ໃນ​ໃຫ້​ເປັນ​ໄປ​ຕາມ​ກົດ​ລະບຽບ​ຂອງ​ເຄືອ​ຂ່າຍ. ນອກ​ນັ້ນຍັງ​ຈະ​ພິຈາລະນາ​ເພີ່ມ​ຂໍ້​ຈຳກັດ​ອາຍຸ​ຂອງ​ຜູ້​ເຂົ້າອ່ານ ຫລື ຈະ​ລຶບ​ເນື້ອ​ໃນ​ທີ່​ບໍ່​ເໝາະ​ສົມ​ອອກ. ​ໂຄງການ “ທຼັດຟະ​ແລກ​ເກີ” ຈະ​ດຳ​ເນີນ​ໃນ​ຂັ້ນທົດ​ລອງ. ຖ້າ​ບັນລຸ​ໄດ້​ຕາມ​ເປົ້າໝາຍ​ກໍ​ຈະ​ເຮັ​ດ​ໃຫ້​ອິນ​ໂດ​ເນ​ເຊຍ​ເປັນ​ປະ​ເທດ​ທຳ​ອິດ​ທີ່​ມີ​ການ​ຮ່ວມ​ມື​ກັບ​ສອງ​ເຄືອ​ຂ່າຍ​ອິນ​ເຕີ​ເນັດ​ໃຫຍ່​ລະດັບ​ໂລກ​ດັ່ງກ່າວ. ຢູ່​ເບື້ອງປະ​ເທດ​ອົດ​ສະຕຼາລີ​ພຸ້ນ, ທາງ​ການ​ກໍ​ໄດ້ຖື​ສຳຄັນ​ເປັນ​ພິ​ເສດ​ວຽກ​ຮ່ວມ​ມື​ກັບ​ເຄືອ​ຂ່າຍ​ສື່ສານ​ສັງຄົມ ​ໂດຍ​ທ່ານ​ນາຍົກລັດຖະມົນຕີ ມານ​ຄອມ ​ເທີນ​ບູນ ​ໄດ້​ພົບ​ປະ​ກັບ​ບັນດາ​ຜູ້ນຳ​ບໍລິສັດ​ໃຫຍ່​ບໍລິການ​ສື່ສານ​ສັງຄົມ​ອອນ​ລາຍ. ​ໃນ​ການ​ພົບ​ປະ, ທ່ານ​ນາຍົກ​ໄດ້​ເວົ້າວ່າ: ພວກ​ເຮົາ​ຈະ​ບໍ່​ອະນຸຍາດ​ໃຫ້​ພວກ​ກໍ່​ການ​ຮ້າຍ, ພວກ​ນິຍົມ​ຄວາມ​ຮຸນ​ແຮງ​ສວຍ​ໃຊ້​ເຄືອ​ຂ່າຍ​ອິນ​ເຕີ​ເນັດ ​ແລະ ສື່ສານ​ສັງຄົມ​ອອນ​ລາຍ ​ເພື່ອ​ກະຈາຍ​ຂ່າວ​ທີ່​ເປັນ​ພິດ​ເປັນ​ໄພ​ຂອງ​ພວກ​ເຂົາ​ອອກ​ສູ່​ສັງຄົມ. ທາງ​ການ​ອົດ​ສະຕຼາລີ​ໄດ້​ຮ່າງ​ກົດໝາຍ​ພັນທະ​ໃຫ້​ເຄືອ​ຂ່າຍ​ອິນ​ເຕີ​ເນັດ ​ແລະ ສື່ສານ​ສັງຄົມ​ອອນ​ລາຍ​ຮັບຜິດຊອບ​ສົງ​ຂໍ້​ມູນ​ຂ່າວສານ​ອັນ​ຈຳ​ເປັນ​ກ່ຽວ​ກັບ​ກຸ່ມ​ກໍ່​ການ​ຮ້າຍ ກໍ​ຄື​ແຜນ​ປະຕິບັດ​ງານ​ຂອງ​ພວກ​ເຂົາ​ໃຫ້​ທາງ​ການ. ລັດຖະບານ​ອົດ​ສະຕຼາລີ​ເຊື່ອ​ວ່າ ການ​ເຮັດ​ພັນທະ​ຂອງ​ເຄືອ​ຂ່າຍ​ອິນ​ເຕີ​ເນັດ​ໃນ​ການ​ສະໜອງ​ຂໍ້​ມູນ​ກ່ຽວ​ກັບ​ພວກ​ກໍ່​ກາ​ນຮ້າຍ​ນັ້ນຈະ​ຊ່ວຍ​ໃຫ້​ທາງ​ການ​ສາມາດ​ຈັດການ​ກັບ​ພວກ​ກໍ່​ການ​ຮ້າຍ​ຢ່າງ​ທັນ​ການ. ​ແຜນ​ກຳຈັດ​ພວກ​ກໍ່​ການ​ຮ້າຍ​ບໍ່​ໃຫ້​ສວຍ​ໃຊ້​ເຄືອ​ຂ່າຍ​ສື່ສານ​ສັງຄົມ​ນີ້​ໄດ້​ຮັບ​ການ​ສະໜັບສະໜູນ​ຢ່າງ​ກວ້າງຂວາງ​ໃນ​ທົ່ວ​ສັງຄົມ​ອົດ​ສະຕຼາລີ. ສ່ວນ​ຢູ່ ສສ ຫວຽດນາມ, ປະ​ເທດ​ບ້ານ​ໃກ້​ເຮືອນ​ຄຽງຂອງ​ພວກ​ເຮົາ​ນີ້ ​ເພິ່ນ​ກໍ​ມີ​ແຜນ​ຍຸດ​ທະ​ສາດ​ແຫ່ງ​ຊາດ ​ເພື່ອ​ກຳຈັດ​ອາ​ຊະ​ຍາ​ກຳ​ທາງ​ອິນ​ເຕີ​ເນັດ​ໃນ​ໄລຍະ​ແຕ່​ປີ 2016-2025. ພາຍ​ໃຕ້​ແຜນການ​ດັ່ງກ່າວ, ກະຊວງ​ຖະ​ແຫລ​ງຂ່າວ ​ແລະ ສື່ສານ ຈະ​ເພີ່ມ​ການ​ຮ່ວມ​ມື​ກັບ​ບັນດາ​ກະຊວງ ກໍ​ຄື​ຂະ​ແໜງ​ການ​ກ່ຽວຂ້ອງ​ເພ​ື່ອພັດທະນາ​ລະບົບ​ສື່ສານ ​ແລະ ສື່​ມວນ​ຊົນ​ໃນ​ລະດັບ​ໂຮງ​ຮຽນ ​ແລະ ຄອບຄົວ ​ເພື່ອ​ຍົກ​ສູງ​ຄວາມ​ຮັບ​ຮູ້​ໃນ​ການ​ປ້ອງ​ກັນ​ໄພ​ອັນຕະລາຍ​ຈາກ​ອາ​ຊະ​ຍາ​ກຳ​ທາງ​ອິນ​ເຕີ​ເນັດ, ອອກ​ແຮງ​ສຶກສາ​ອົບຮົມ​ໄວ​ໜຸ່ມ​ໃຫ້​ຮູ້​ວິທີ​ຄັດ​ຂໍ້ຄວາມ-​ເນື້ອ​ໃນ​ທີ່​ບໍ່​ເໝາະ​ສົມ​ອອກ​ຈາກ​ຈໍ​ສັງຄົມ​ອອນ​ລາຍ. ນອກຈາກ​ນັ້ນ ທາງ​ການ​ກ່ຽວຂ້ອງ​ຍັງ​ຈະ​ພັດທະນາ​ລະບົບ​ປ້ອງ​ກັນ​ຄວບ​ຄຸມ​ການ​ເຂົ້າ​ເຖິງ​ເຄືອ​ຂ່າຍ​ເວ​ບ​ໄຊ​ທີ່​ມີ​ເນື້ອ​ໃນ​ແປກ​ປອມ​ບິດ​ເບືອນ​ອີກ​ດ້ວຍ.

- dao e1499999169791 - ວິທີການຕົວຢ່າງເພື່ອຄຸ້ມຄອງ ສື່ສັງຄົມອອນລາຍ