ຮອງນາຍົກ ສອນໄຊ ສີພັນດອນ ເນັ້ນໃຫ້ກະກຽມເປີດປີທ່ອງທ່ຽວລາວ 2018 ໃຫ້ດີ

- WhatsApp Image 2017 07 12 at 9 - ຮອງນາຍົກ ສອນໄຊ ສີພັນດອນ ເນັ້ນໃຫ້ກະກຽມເປີດປີທ່ອງທ່ຽວລາວ 2018 ໃຫ້ດີ

ໃນໂອກາດຊີ້ນໍາຕໍ່ກອງປະຊຸມກອງປະຊຸມປຶກສາຫາລືແຜນກະກຽມເປີດປີທ່ອງທ່ຽວລາວ 2018 ເມື່ອບໍ່ດົນມານີ້ຂອງທ່ານຮອງນາຍົກລັດຖະມົນຕີ ສອນໄຊ ສີພັນດອນ, ໄດ້ເນັ້ນໃຫ້ທຸກພາກສ່ວນນັບທັງສູນກາງ ແລະ ທ້ອງຖິ່ນມີການວາງແຜນໃຫ້ລະອຽດຮອບດ້ານ ເພື່ອຮັບປະກັນໃຫ້ການເປີດປີທ່ອງທ່ຽວດັ່ງກ່າວປະສົບຜົນສໍາເລັດຈົບງາມ, ອັນສໍາຄັນແມ່່ນວຽກງານປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມສະອາດຈົບງາມໃນສັງຄົມ, ຊຶ່ງຈະຕ້ອງໄດ້ເອົາໃຈໃສ່ສະກັດກັ້ນ ແລະ ຕ້ານປາກົດການຫຍໍ້ທໍ້ຕ່າງໆ ເຊັ່ນ: ປຸ້ນຈີ້-ຊີງຊັບ, ລັກຊັບ, ການກໍ່ອາຊະຍະກຳ ແລະ ປາກົດການບໍ່ດີອື່ນໆທີ່ສ້າງພາບພົດບໍ່ຈົບງາມ, ພ້ອມນັ້ນກໍຕ້ອງເລັ່ງໃສ່ປັບປຸງພື້ນຖານໂຄງລ່າງຖະໜົນຫົນທາງ, ສະໜາມບິນ, ສະຖານທີ່ທ່ອງທ່ຽວ, ທີ່ພັກ, ຮ້ານອາຫານ, ພາຫະ ນະຂົນສົ່ງ, ລະບົບໂທລະຄົມມະນາຄົມ, ລວມເຖິງການບໍລິການແຂກ ແລະ ນັກທ່ອງທ່ຽວ ບົນພື້ນຖານຄວາມສະດວກສະບາຍ, ວ່ອງໄວທັນໃຈ, ສະອາດ, ປອດໄພ, ຮັກສາໄດ້ວັດທະນະທຳອັນດີງາມຂອງຊາດ, ໄປຄຽງຄູ່ກັບການເອົາໃຈໃສ່ແກ້ໄຂຂໍ້ຈຳກັດ ແລະ ກົດໜ່ວງຖ່ວງດຶງວຽກງານການທ່ອງທ່ຽວເຮັດແນວໃດໃຫ້ຖືກຕ້ອງສອດຄ່ອງກັບລະບຽບກົດໝາຍ, ປັບປຸງຂອດບໍລິການອຳນວຍຄວາມສະດວກດ້ານເອກະສານເຂົ້າ-ອອກ ແລະ ການເກັບຄ່າທໍານຽມຕ່າງໆສຳລັບນັກທ່ອງທ່ຽວໃຫ້ເໝາະສົມ, ພ້ອມທັງກວດກາຄືນກ່ຽວກັບຄ່າບໍລິການເລົ່ານັ້ນ ເຊັ່ນ: ຄ່າຜ່ານປະຕູຢູ່ແຕ່ລະແຫລ່ງທ່ອງທ່ຽວໃຫ້ເໝາະສົມ, ຂະນະດຽວກັນການນຳໃຊ້ງົບປະມານຕ້ອງບົນພື້ນຖານປະຢັດມັດທະຍັດ, ຫລີກເວັ້ນການຟູມເຟືອຍ, ເພີ່ມທະວີວຽກງານໂຄສະນາເຜີຍແຜ່ຂໍ້ມູນຂ່າວສານການທ່ອງທ່ຽວ, ໄປຄຽງຄູ່ກັບການສ້າງຂະບວນການ, ຈັດກິດຈະກໍາຕ່າງໆໃຫ້ມີບັນຍາກາດຟົດຟື້ນ, ມີເນື້ອໃນໃຫ້ສັງຄົມຮັບຮູ້ຢ່າງກວ້າງຂວາງ, ທັງສາມາດສ້າງຄວາມເຊື່ອໝັ້ນ ແລະ ດຶງດູດນັກທ່ອງທ່ຽວໄດ້ເປັນຢ່າງດີ. ນອກນີ້ຕ້ອງຕິດຕາມກວດກາບັນດາຜູ້ປະກອບການບໍລິການທ່ອງທ່ຽວຕ້ອງເຄື່ອນໄຫວຖືກຕ້ອງຕາມລະບຽບກົດໝາຍ, ພ້ອມທັງປະກອບພັນທະຂອງຕົນຕາມລະບຽບຫລັກການ, ຍົກລະດັບການບໍລິການໃຫ້ໄດ້ມາດຕະ ຖານ, ຍຸຕິທຳ ແລະ ເດັດຂາດບໍ່ໃຫ້ມີກໍລະນີສວຍໂອກາດເອົາປຽບແຂກກໍຄືນັກທ່ອງທ່ຽວ.

- lattana 1 - ຮອງນາຍົກ ສອນໄຊ ສີພັນດອນ ເນັ້ນໃຫ້ກະກຽມເປີດປີທ່ອງທ່ຽວລາວ 2018 ໃຫ້ດີ

ກະຊວງຖະແຫລງຂ່າວ, ວັດທະນາທໍາ ແລະ ທ່ອງທ່ຽວ ໃຫ້ຮູ້ວ່າ: ມາຮອດປັດຈຸບັນ,​ ການກະກຽມຄວາມພ້ອມໃນການເປີດປີທ່ອງທ່ຽວ 2018 ເຫັນວ່າມີຄວາມຄືບໜ້າດີ ເປັນຕົ້ນ: ດ້ານບຸກຄະລາກອນຮັບຜິດຊອບ, ການກຳນົດວາລະເຄື່ອນໄຫວວຽກງານຕ່າງໆ, ການກຳນົດກິດຈະກຳການທ່ອງທ່ຽວ, ເນື້ອໃນຈິດໃຈການຈັດປີທ່ອງທ່ຽວລາວ 2018 ກໍຄືເນື້ອໃນການໂຄສະນາເຜີຍແຜ່, ແຫລ່ງທຶນ ແລະ ແຜນງົບປະມານໃຊ້ຈ່າຍຕ່າງໆ, ການອອກແບບສັນຍາລັກ ແລະ ຄຳຂວັນການທ່ອງທ່ຽວແມ່ນມີຄວາມພ້ອມເປັນທີ່ຮຽບຮ້ອຍແລ້ວ.

- dao e1499999169791 - ຮອງນາຍົກ ສອນໄຊ ສີພັນດອນ ເນັ້ນໃຫ້ກະກຽມເປີດປີທ່ອງທ່ຽວລາວ 2018 ໃຫ້ດີ