ໝັ່ນຕື່ມກຳລັງໃຈໃຫ້ຕົນເອງ

- WhatsApp Image 2017 07 12 at 9 - ໝັ່ນຕື່ມກຳລັງໃຈໃຫ້ຕົນເອງ

ໃນແຕ່ລະມື້ຊີວິດຄົນເຮົາມີທັງເລື່ອງດີ ແລະ ຮ້າຍຜ່ານເຂົ້າມາ ຫາກໄດ້ພົບກັບເລື່ອງດີໆ ຊີວິດກໍຈະມີແຕ່ຮອຍຍິ້ມ, ແຕ່ຫາກ ບັງເອີນຕ້ອງພົບກັບເລື່ອງຮ້າຍໆ ຄວາມຮູ້ສຶກທໍ້ຖອຍ ຫລືື ໝົດກຳລັງໃຈກໍອາດເຂົ້າມາໂຈມຕີເຮົາໄດ້ຄືກັນ.

- lattana 1 - ໝັ່ນຕື່ມກຳລັງໃຈໃຫ້ຕົນເອງ

ເມື່ອຄວາມຮູ້ສຶກຕິດລົບເຫລົ່ານີ້ເກີດຂຶ້ນ ທຸກຄົນຕ້ອງການກຳລັງໃຈກັນທັງໝົດ ແລະ ເຄັດລັບ 5 ຂໍ້ ຕໍ່ໄປນີ້ຈະຊ່ວຍທ່ານໄດ້.

  1. ຮັກໂຕເອງໃຫ້ເປັນ : ເມື່ອເຮົາຮັກໂຕເອງ ຈະເຮັດໃຫ້ເຮົາຢາກດູແລເອົາໃຈໃສ່ ແລະ ຕື່ມເຕັມສິ່ງດີໆໃຫ້ໂຕເອງ ແມ່ນແຕ່ ໃນຍາມທີ່ຕ້ອງພະເຊີນກັບຄວາມລຳບາກ ຄົນທີ່ຮັກໂຕເອງຈະບໍ່ຄິດທຳຮ້າຍໂຕເອງ, ແຕ່ຈະໃຊ້ວິທີການຮຽນຮູ້ເຖິງແກ່ນແທ້ຂອງບັນຫາ ແລະ ພະຍາຍາມແກ້ໄຂມັນເພື່ອໃຫ້ໂຕເອງກັບມາມີຄວາມສຸກຄືເກົ່າ.
  2. ຊອກຫາຄວາມພູມໃຈ : ຮູ້ຈັກພູມໃຈກັບເລື່ອງນ້ອຍໆໃນຊີວິດ ເຊັ່ນ : ພູມໃຈທີ່ມີຄອບຄົວອົບອຸ່ນ, ພູມໃຈທີ່ເປັນທີ່ຮັກຂອງໝູ່ເພື່ອນ, ພູມໃຈທີ່ໄດ້ຊ່ວຍເຫລືອຜູ້ອື່ນ, ບໍ່ຈຳເປັນຈະຕ້ອງພູມໃຈສະ ເພາະກັບສິ່ງທີ່ຍິ່ງໃຫຍ່ເທົ່ານັ້ນ.
  3. ຄິດເຖິງດ້ານດີໃນຊີວິດ : ຢ່າເບິ່ງຊີວິດໃນດ້ານລົບພຽງດ້ານດຽວ, ແຕ່ໃຫ້ລອງສຳຫລວດດ້ານດີໆທີ່ເຊື່ອງຢູ່ໃນທຸກຢ່າງທີ່ກ່ຽວຂ້ອງກັບຊີວິດເຮົາ ນັບແຕ່ໂຕເອງ, ສຸຂະພາບ, ຄອບຄົວ, ໜ້າທີ່ວຽກງານ ເພື່ອເພີ່ມຄວາມຄິດໃນດ້ານບວກໃຫ້ໂຕເອງ.
  4. ໄຂກ່ອງຄວາມຊົງຈຳ : ເວລາທີ່ຮູ້ສຶກທໍ້ຖອຍ ໃຫ້ຄິດເຖິງເລື່ອງດີໆທີ່ເຄີຍຜ່ານເຂົ້າມາໃນຊີວິດເຮົາ ຫລື ອາດນຳເອົາບັດອວຍພອນເກົ່າໆ, ຂອງຂັວນເກົ່າໆມາເປີດເບິ່ງອີກເທື່ອໜຶ່ງ ການຄິດເຖິງໄລຍະເວລາທີ່ເຄີຍມີຄວາມສຸກຈະເປັນແຮງກະຕຸ້ນໃຫ້ເຮົາຮູ້ສຶກເບີກບານໃຈ.
  5. ໃຊ້ທຳມະປະຄອງໃຈ : ດຳລົງຊີວິດໂດຍໃຊ້ຫລັກທຳມະນຳທາງສະເໝີ ເພາະທຳມະຈະຊ່ວຍປັບຈິດໃຈໃຫ້ເຮົາຍອມຮັບການເກີດຂຶ້ນ, ຕັ້ງຢູ່ ແລະ ດັບໄປໄດ້ຢ່າງສະຫງົບ. ດັ່ງນັ້ນ, ເມື່ອມີສິ່ງໃດປ່ຽນແປງ ຫລື ບໍ່ເປັນດັ່ງທີ່ຄາດຫວັງໄວ້ ເຮົາກໍຈະເຮັດໃຈໄດ້ງ່າຍຂຶ້ນ.

ເບິ່ງທຸກສິ່ງທີ່ເກີດຂຶ້ນດ້ວຍສະຕິ ແລ້ວຈະພົບວ່າຊີວິດມີເລື່ອງດີໆລໍຖ້າທ່ານຢູ່ອີກຫລາຍ.

- dao e1499999169791 - ໝັ່ນຕື່ມກຳລັງໃຈໃຫ້ຕົນເອງ