ມາເລເຊຍຍຶດງາຊ້າງ ແລະ ເກັດໂຕຫລິ່ນ ເກືອບ 1 ລ້ານໂດລາ ໄດ້ຢູ່ສະໜາມບິນ

​ເຈົ້າໜ້າ​ທີ່​ພາສີ​-ອາກອນ​ສະໜາມ​ບິນ​ຂອງ​ມາ​ເລ​ເຊຍ ​ເປີດ​ເຜີຍ​ວ່າ: ຍຶດ​ໄດ້​ງາ​ຊ້າງ ​ແລະ ​ເກັດ​ໂຕຫລິ່ນ ມູນ​ຄ່າ​ເກືອບ 1 ລ້ານ​ໂດ​ລາ​ສະຫະລັດ ​ໃນ​ວັນທີ 30 ກໍລະກົດ​ແລ້ວ​ນີ້.

- lattana 1 - ມາເລເຊຍຍຶດງາຊ້າງ ແລະ ເກັດໂຕຫລິ່ນ ເກືອບ 1 ລ້ານໂດລາ ໄດ້ຢູ່ສະໜາມບິນ

​ເຈົ້າໜ້າ​ທີ່​ກ່າວ​ວ່າ: ພົບ​ງາ​ຊ້າງ 23 ອັນ ນ້ຳໜັກ 76 ກິ​ໂລ ​ໃນ​ສາງ​ສິນຄ້າ​ຢູ່​ສະໜາມ​ບິນ​ສາກົນ​ກົວ​ລາ​ລຳ​ເປີ ມູນ​ຄ່າ 275.000 ຣິງກິດ ລຳລຽງ​ມາ​ກັບ​ເຮືອບິນ​ສາຍ​ການບິນ​ອີ​ທິຮັດ ຕົ້ນທາງ​ມາ​ຈາກ​ນະຄອນຫລວງ​ລາກ​ອດ ຂອງ​ອານ​ເຊ​ລີ ຜ່ານ​ນະຄອນຫລວງ​ອາ​ບູດາ​ບີ ຂອງ​ສະຫະ​ນະຄອນ ​ອາ​ເມຣັດ ​ເອມິ​ເຣດ. ຕໍ່​ມາ​ໃນ​ວັນ​ດຽວ​ກັນ ພົບ​ເກັດ​​ໂຕຫລິ່ນ 6 ຖົງ ນ້ຳໜັກ 300,9 ກິ​ໂລ ມູນ​ຄ່າ 390.000 ຣິງກິດ ຢູ່​ສາງ​ດຽວ​ກັນ ລຳລຽງ​ມາ​ກັບ​ເຮືອບິນ​ສາຍ​ການບິນ​ເອທິ​ໂອ​ປີ ຕົ້ນທາງ​ມາ​ຈາກ​ສາ​ທານະ​ລັດ​ ປະຊາຊົນ​ກຄອງ​ໂກ. ສິ່ງ​ຜິດ​ກົດໝາຍ​ທັງ​ສອງ​ຊຸດ​ນີ້​ໃສ່​ທີ່ຢູ່ປອມ ​ເຊິ່ງບໍ່​ສາມາດ​ຕິດຕາມ​ຫາ​ຜູ້​ຮັບ​ໄດ້ ​ແລະ ຍັງ​ບໍ່​ຮູ້​ແນ່ນອນ​ວ່າ​ປາຍທາງ​ທີ່​ແທ້​ຈິງ​ຢູ່​ມາ​ເລ​ເຊຍ ຫລື ບໍ່.

ນັບ​ແຕ່​ຕົ້ນປີ​ຈົນ​ຮອດ​ປັດຈຸບັນ, ພາສີ-ອາກອນ​ສະໜາມ​ບິນ​ສາກົນ​ກົວ​ລາ​ລຳ​ເປີ ຍຶດ​ໄດ້​ສັດປ່າ​ຜິດ​ກົດໝາຍ​ແລ້ວ​ຫລາຍ​ຄັ້ງ, ສະ​ເພາະ​ເດືອນ​ພຶດສະພາ​ຍຶດ​ໄດ້​ເກັດ​ໂຕຫລິ່ນຫລາຍ​ກວ່າ 700 ກິ​ໂລ ຫລາຍ​ທີ່​ສຸດ​ເທົ່າ​ທີ່​ເຄີຍ​ມີ​ມາ ​ເຊື່ອ​ວ່າ​ພະນັກງານ​ຢູ່​ສະໜາມ​ບິນຈະ​ມີ​ສ່ວນ​ກ່ຽວຂ້ອງ ​ເຖິງ​ວ່າ​ຍັງ​ບໍ່​ມີ​ຫລັກ​ຖານ​ຢືນຢັນ. ປັດຈຸບັນ​ພາສີ-ອາກອນ​ໄດ້​ເພີ່ມ​ມາດ​ຕະການ​ກວດກາ ​ແລະ ບັງຄັບ​ໃຊ້​ກົດໝາຍ​ໃນ​ເລື່ອງ​ນີ້​ແລ້ວ. ຂະນະ​ທີ່​​ໃນ​​ເດືອນ​ກ່ອນ, ຮົງ​ກົງ​ຍຶດ​ໄດ້​ງາ​ຊ້າງ​ຫລາຍ​ກວ່າ 7.200 ກິ​ໂລ ລຳລຽງ​ມາ​ຈາກ​ມາ​ເລ​ເຊຍ ​ເປັນ​ຈຳນວນ​ການ​ຍຶດ​ໃນ​ຄັ້ງດຽວ​ຫລາຍ​ທີ່​ສຸດ​ໃນ​ຮອບ 30 ປີ.