ຜົວເມຍປະກັນ ຍ້ອນພະນັນແຂ່ງນົກກາງແກ

- advert banner 728 90 728x90 - ຜົວເມຍປະກັນ ຍ້ອນພະນັນແຂ່ງນົກກາງແກ

- 2017 08 02 30480 1501616985 - ຜົວເມຍປະກັນ ຍ້ອນພະນັນແຂ່ງນົກກາງແກ

- lattana 1 - ຜົວເມຍປະກັນ ຍ້ອນພະນັນແຂ່ງນົກກາງແກ

ໂດຍ: ວິ​ເສດ ສະ​ແຫວ​ງສຶກສາ

ມື້ນີ້​ມີ​ເລື່ອງ​ເບົາໆ​ເວົ້າ​ແບບ​ກັນ​ເອງ​ບໍ່​ເຄັ່ງ​ດ້ານ​ຫລັກການ​ຫລັ​ກ​ແກ່ນ​ຫຍັງ​ເລີຍ, ມັນ​ເປັນ​ເລື່ອງ​ເສບ​ຕິດ ​ເຊິ່ງຖ້າ​ໃຜ​ຫລົງ​ໄຫລ​ໄຝ່ຝັນ​ຈົນ​ເງີຍ​ຫົວ​ບໍ່​ຂຶ້ນ​ແລ້ວ ກໍ​ຈະ​ກາຍ​ເປັນ​ໄພ​ໃກ້​ຕົວ ​ເຮັດ​ໃຫ້​ມົວ​ໝອງ. ​ເລື່ອງ​ເສບ​ຕິດ​ນີ້ ພວກ​ເຮົາ​ໝາຍ​ເຖິງ​ການ​ກະທຳ​ທີ່​ເປັນ​ສິ່ງ​ລໍ້​ໃຈ, ອອກ​ລິດ ​ແລະ ກ່ອມ​ປະສາດ-ກ່ອມ​ອາລົມ​ ​ເຊັ່ນ​ຢາ​ເສບ​ຕິດ. ນອກ​ນັ້ນ ກໍ​ຍັງ​ມີ​ເລື່ອງ​ເສບ​ຕິດ​ການ​ພະນັນ ​ເຊິ່ງທັງ​ໝົດ​ມີ​ຜົນ​ກະທົບ​ແງ່​ລົບ.

​ເລື່ອງ​ທີ່​ຈະ​ເວົ້າສູ່​ກັນ​ຟັງ​ໃນ​ບົດ​ນີ້, ຜູ້​ຂຽນ​ແປ​ມາ​ແບບ​ໂກ້ໆ​ຈາກ​ບົດ​ໜັງສືພິມ​ວຽງ​ຈັນທາ​ມ (Vientiane Times) ສະບັບ​ວັນ​ທີ 3 ​ເດືອນ​ສິງຫາ​ນີ້​ເອງ ຊື່​ບົດ​ມີ​ເນື້ອ​ໃນ​ທີ່​ສະ​ເທືອ​ນ​ໃຈ​ພໍ​ສົມຄວນ​ວ່າ: “ການ​ແຂ່ງ​ນົກກາງ​ແກ​ເປັນ​ຊະ​ນວນ​ເຮັດ​ໃຫ້​ມີ​ການ​ຢ່າ​ຮ້າງ​ຫລາຍ​ສິບ​ຄູ່​ໃນ​ອິນ​ໂດ​ເນ​ເຊຍ” (Pigeon racing leads to dozens of divorces in Indonesia) ຟັງ​ແຕ່​ຫົວ​ຂໍ້​ບາງ​ຄົນ​ອາດ​ຄິດ​ເຖິງ​ເລື່ອງ​ທີ່​ມີ​ຄົນ​ເລົ່າ​ວ່າ ມີ​ເມຍ​ບາງ​ຄົນ​ເອົາ​ໝາກ​ບຸນ​ຍັດ​ໃສ່​ກະຕິບ​ເຂົ້າ​ໃຫ້​ຜົວ​ກິນ ​ເພື່ອ​ເຮັດ​ໃສ່​ຍ້ອນ​ວ່າ​ຜິວ​ຕິດ​ຕີ​ບູນຈົນ​ລືມ​ແລງ​ລືມ​ງາຍ ລືມ​ລູກ​ລືມ​​ເມຍ. ​ແຕ່​ບາ​ງຄົນ​ບອກ​ວ່າ: ​ເລື່ອງ​ຈັ່ງ​ຊີ້​ເກີດ​ຂຶ້ນກັບ​ພວກ​ຕິດ​ຕີກ໋ອບຄື​ກັນ ຄື​ມີ​ເມຍ​ບາງ​ຄົນ​ຕັ້ງ​ແກ້ງ​ແກງ​ໝາກບູນ​ໃຫ້​ຜົວ​ຊົດ. ​ເລື່ອງ​ນີ້​ຈະ​ມີ​ຄວາມ​ຈິງ ຫລື ບໍ່ກໍ​ຢ່າ ​ແຕ່​ມັນ​ກໍ​ຊ່ວຍ​ເຕືອນສະຕິ​ວ່າ ການ​ເຮັດ​ຫຍັງ​ເລີຍ​ເຖື​ອດນັ້ນຍ່ອມ​ມີ​ຜົນ​ກະທົບ​ທາງ​ລົບ​ຫລາຍ​ກວ່າ​ທາງ​ບວກ. ກິລາ​ບູນ, ກິລາ​ຕີກ໋ອບ ​ເປັນ​ກິລາ​ທີ່​ດີ​​ເດັ່ນ ນິຍົມ​ກັນ​ຫລິ້ນກັນຊົມ​ກັນ​ທົ່ວ​ໂລກ ສາມາດ​ນຳ​ກຽດ​ຊື່ສຽງ ​ແລະ ລາຍ​ໄດ້​ມາສູ່​ປະ​ເທດ​ຊາດ ​ແລະ ບຸກຄົນ​ຖ້າ​ເຮັດ​ໄດ້​ດີ.

- 97162001 gettyimages 487111976 - ຜົວເມຍປະກັນ ຍ້ອນພະນັນແຂ່ງນົກກາງແກ

ບົດ “ການ​ແຂ່ງ​ນົກກາງ​ແກ​ເປັນ​ຊະ​ນວນ​ເຮັດ​ໃຫ້​ມີ​ການ​ຢ່າ​ຮ້າງ​ຫລາຍ​ສິບ​ຄູ່​ໃນ​ອິນ​ໂດ​ເນ​ເຊຍ” ນີ້, ພໍ​ອ່ານ​ຈົບ​ຄັ້ງທຳ​ອິດ​, ຜູ້​ຂຽນ​ຍັງ​ຄິດ​ວ່າ​ເປັນ​ເລື່ອງ​ຕະຫລົກ​ຫລາຍ​ກວ່າ ​ເພາະ​ຄິດ​ບໍ່​ເຖິງ​ວ່າ​ເລື່ອງ​ການ​ແຂ່ງ​ນົກກາງ​ແກ​ຂາວ​ທີ່​ເປັນ​ສັນຍາ​ລັກ​ແຫ່ງ​ສັນຕິພາບ ​ແລະ ຄວາມ​ຮັກ​ນີ້​ຈະ​ສາມາດ​ເຮັດ​ໃຫ້​ສະ​ຖາ​ບັນ​ຄອບຄົວ​ແຕກ​ຫັກ​ໄດ້. ​ແຕ່​ມັນ​ກໍ​ເປັນ​ໄປ​ແລ້ວ. ​ເລື່ອງ​ນີ້​ເກີດ​ຂຶ້ນຢູ່​ເມືອງ​ປູ​ບາ​ລິງ​ກາ (Purbalingga) ທີ່​ໃຈກາງ​ເກາະ​ຈາ​ວາ. ​ເນື້ອ​ໃນ​ຂອງ​ບົດ​ບອກ​ວ່າ ​ໃນ​ເດືອນ​ກໍລະກົດ​ເດືອນ​ດຽວ​ຂອງ​ປີ​ນີ້ ຫ້ອງ​ການ​ສານ​ຂອງ​ເມືອງ​ໄດ້​ຮັບ​ຄຳ​ຮ້ອງ​ຂໍ​ຢ່າ​ຮ້າງ​ຈາກ​ຜູ້​ເປັນ​ເມຍ​ເຖິງ 90 ​ເລື່ອງ ທຽບ​ກັບ 13 ​ເລື່ອງ​ໃນ​ເດືອນ​ມິຖຸນາ​ຜ່ານ​ມາ. ​ເຫດຜົນ​ຂອງ​ການ​ຂໍ​ຢາ​ຮ້າງ​ກໍ​ຄື: ຜົວ​ຕິດ​ແຂ່ງ​ນົກກາງ​ແກ​ຈົນ​ລືມ​ຄອບຄົວ, ບໍ່​ຫົວຊາ​ນຳ​ວຽກ​ຢ້າວ​ການ​​ເຮືອນ, ຄອບຄົວ​ພົບ​ບັນຫາ​ເສດຖະກິດ​ຝືດ​ເຄືອງ ​ແຕ່​ລະມື້ຝ່າຍ​ຜົວ​ງົມ​ແຕ່​ບົວລະບັດ​ຂັດ​ສີ​ຖະໜຸຖະໜອມ​ນົກ​ໃຫ້​ມີ​ກຳລັງວັງຊາ ​ເອົາ​ຊະນະ​ການ​ແຂ່ງ ​ເຊິ່ງ​ໄດ້​ກາຍ​ເປັນ​ການ​ພະນັນ​ໄປ​ໃນ​ຕົວ. ພໍ​ຮອດ​ປະມານ 10 ​ໂມງ​ເຊົ້າ​ແຕ່​ລະມື້ ບັນດາ​ຜົວ​ໃນ​ຕົວ​ເມືອງ​ປູ​ບາ​ລິງ​ກາ​ຈະ​ພາກັນ​ໄປ​ເຕົ້າ​ໂຮມ​ກັນ​ຢູ່​ທ້ອງ​ທົ່ງ ​ເພື່ອ​ປ່ອຍ​ນົກກາງ​ແກ​ແຂ່ງ​ກັນ​ວ່າ​ນົກ​ໃຜ​ຈະ​ບິນ​ສູງ, ບິນ​ໄກ, ບິນ​ງາມ ​ແລະ ທົນ​ທານ. ພວກ​ເຂົາ​ພາກັນ​ແຊ່​ຢູ່​ທົ່ງ​ຈົນ​ຄໍ່າ​ມືດ​ປືດ​ຕາ​ຈຶ່ງ​ກັບ​ຄືນ​ເຮືອນ. ທ່ານ ນູ ອັບ​ຟະ​ລາ (Nur Aflah) ສະໝຽນ​ຫ້ອງການ​ສານ​ເມືອງ ​ເວົ້າກ່ຽວ​ກັບ​ບັນຫາ​ນີ້​ວ່າ: ​ໃນ​ເມືອງ​ນີ້ ພວກ​ຜູ້​ຊາຍ​ສ່ວນ​ຫລວງຫລາຍ​ວ່າງ​ງານ ​ເລີຍ​ພາກັນ​ມາ​ເປັນ “ນັກ​ບິນ” ຄື​ບິນ​ນົກກາງ​ແກ​ແຂ່ງ​ກັນ, ​ແຕ່​ລະມື້​ເຖິງ​ຟ້າ​ຊິ​ແດດ ຝົນ​ຊິ​ຕົກ ພວກ​ເຂົາ​ບໍ່​ສົນ. ນອກຈກ​ໃຊ້​ເວລາ​ປະຊັນ​ຂັນ​ແຂ່ງ​ນົກ​ກັນ​ແລ້ວ ພວກ​ເຂົາ​ຍັງ​ໃຊ້​ເວລາ​ທັງ​ໝົດ​​ເຝິກ​ແອບ​ນົກ​ໃຫ້​ປີກ​ກ້າ​ຂາ​ແຂງ. ຍາມ​ແລ້ງ​ເປັນ​ລະດູ​ການ​ແຂ່ງ​ນົກ​ກັນ​ຢ່າງ​ຂຶ້ນໜ້າ​ຂຶ້ນຕາ. ​ເມື່ອ​ບັນຫາ​ການ​ແຂ່ງ​ນົກ​ໄດ້​ກາຍ​ເປັນ​ຢາ​ເສບ​ຕິດ ສ້າງ​ບັນຫາ​ແຕກ​ຫັກ​ແກ່​ສະ​ຖາ​ບັນ​ຄອບຄົວ​ຄື​ແນວ​ນີ້ ທາງ​ຫ້ອງການ​ສານ​ເມືອງ​ຈຶ່ງ​ໄດ້​ຮ້ອງ​ຂໍ​ໃຫ້​ອຳນາດ​ການ​ປົກຄອງ​ເມື​ອງ ​ແລະ ອົງການ​ສາສະໜາ ຍື່ນ​ມື​ເຂົ້າມາ​ຊ່ວຍ​ແກ້​ໄຂ ດ້ວຍ​ຮູບ​ການ​ສຶກສາ​ອົບຮົມ​ຊາວ​ເມືອງ​ໃຫ້​ເຫັນ​ໄພ​ອັນຕະລາຍ​ຂອງ​ການ​ເສບ​ຕິດ​ການ​ພະນັນ​ແຂ່ງ​ນົກ. ຂ່າວ​ບອກ​ວ່າ​: ພະຍາດ​ເສບ​ຕິດ​ແຂ່ງ​ນົກກາງ​ແກ​ນີ້​ໄດ້​ປາກົດ​ມີ​ຢູ່​ເມືອງ​ບາ​ຢູມາດ (Banyumas) ທີ່​ເຂດ​ໃຈກາງ​ເກາະ​ຈາ​ວາ​ເຊັ່ນ​ກັນ. ນາງ ຊາຕີ​ນີ (Sartini) ອາຍຸ 35 ປີ ​ເວົ້າຂີ້​ພື້ນຜົວ​ຂອງ​ຕົນ​ວ່າ: “​ໃນ​ຕອນ​ເຊົ້າ ບ້ອຍວ່າ​ມືນ​ຕາ​ຕື່ນ​ຂຶ້ນມາ ສິ່ງ​ທີ່​ເຂົາ​ຄວາ​ຫາ​ທຳ​ອິດ​ກໍ​ຄື​ນົກກາງ​ແກນັ້ນ​ເອງ, ພໍ​ຮອດ​ປະມານ 10 ​ໂມງ ​ເຂົາ​ກໍ​ຫາຍ​ວັບ​ໄປ​ທ້ອງ​ທົ່ງ”. ​ເລື່ອງ​ນີ້​ຟັງ​ແລ້ວ​ຄິດ​ເຖິງ​ເພ​ງ​ໄທ​ຊື່ວ່າ “ຈັບ​ແຕ່​​ໂທລະ​ສັບ” ທີ່​ລະບາຍ​ຄວາມ​ຈົ່ມ​ຂອງ​ເມຍ​ຕໍ່​ຜົວ​ທີ່​ເສບ​ຕິດ​ໂທລະສັບ​ວ່າ “ຈັບ​​ແຕ່​ໂທລະສັບ… ໜູນ​ອນບໍ່​ຫລັບ ບໍ່​ຈັບ​ໜູ​ເລີຍ !”. ຜູ້​ຂຽນ​ຢາກ​ໃຫ້​ຜູ້​ທີ່​ເຫັນ​ກິລາ​ຕີ​ບູນ​ເປັນ​ສິ່ງ​ຕິດ ກໍ​ຄື​ຜູ້​ທີ່​ຕົກ​ເປັນ​ທາດ​ສິ່ງ​ເສບ​ຕິດ​ອື່ນໆ​ໄດ້​ອ່ານ​ບົດ​ນີ້ ​ເພື່ອ​ຈະ​ໄດ້​ພິຈາລະນາ​ຕົນ​ເອງ​ຕາມ​ສົມຄວນ.