ລາວຫາລືແຜນແມ່ບົດຈັດສັນທີ່ດິນແຫ່ງຊາດ

- WhatsApp Image 2017 07 12 at 9 - ລາວຫາລືແຜນແມ່ບົດຈັດສັນທີ່ດິນແຫ່ງຊາດ

ກອງປະຊຸມວິທະຍາສາດເພື່ອຄົ້ນຄວ້າ ແລະ ປະກອບຄຳເຫັນໃສ່ຮ່າງແຜນແມ່ບົດຈັດສັນທີ່ດິນແຫ່ງຊາດ ໄດ້ສໍາເລັດລົງເມື່ອບໍ່ດົນມານີ້, ໂດຍການເປັນປະ ທານຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ໃຫ້ກຽດເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຜູ້ຊີ້ນຳຄະນະສະເພາະກິດ ເພື່ອດຳເນີນການກວດກາ, ສຶກສາຄົ້ນຄວ້າ ແລະ ວິໄຈບັນຫາທີ່ດິນ.

- lattana 1 - ລາວຫາລືແຜນແມ່ບົດຈັດສັນທີ່ດິນແຫ່ງຊາດ

ທ່ານລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ ກ່າວວ່າ: ການສ້າງແຜນແມ່ບົດຈັດສັນທີ່ດິນແຫ່ງຊາດ ແມ່ນເພື່ອກຳນົດເຂດທົ່ວປະເທດຢ່າງເປັນລະບົບ ແນໃສ່ການວາງແຜນຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ທີ່ດິນຕາມຫລັກວິຊາການ ແລະ ລະບຽບກົດໝາຍ ເຮັດໃຫ້ທີ່ດິນ ກໍຄືຊັບພະຍາກອນທຳມະຊາດຕ່າງໆມີຄວາມຍືນຍົງ.

ໃນໂອກາດນີ້, ທ່ານຮອງນາຍົກລັດຖະມົນຕີ ບຸນທອງ ຈິດມະນີ ໄດ້ໃຫ້ກຽດໂອ້ລົມຊີ້ນໍາວ່າ: ກອງປະຊຸມຄັ້ງນີ້ແມ່ນມີຄວາມສໍາຄັນຫລາຍເພາະວ່າໄດ້ສຸມໃສ່ແກ້ໄຂບັນຫາທີ່ພວມພົ້ນເດັ່ນ ເປັນຕົ້ນ: ການແກ້ໄຂດ້ານການຫຍໍ້ທໍ້, ການອະນຸມັດນຳໃຊ້ທີ່ດິນບໍ່ຖືກຕ້ອງ, ການເຊົ່າ ແລະ ສຳປະທານທີ່ດິນເປັນບໍລິເວນກວ້າງ ແລະ ມີໄລຍະຍາວ, ແຕ່ຄ່າເຊົ່າ ຫລື ຄ່າສໍາປະທານບໍ່ເໝາະສົມ. ນອກນີ້, ຍັງມີສະພາບການສວຍໂອກາດຫັນທີ່ດິນປ່າໄມ້ທີ່ອຸດົມສົມບູນ ເພື່ອປູກໄມ້ ແລະ ພືດກະສິກຳ, ບັນຫາການຈັບຈ່ອງທີ່ດິນຊະຊາຍ, ບັນຫາການອະນຸມັດທີ່ດິນແລກປ່ຽນໂຄງການ, ບັນຫາການບຸກລຸກທີ່ດິນປ່າສະຫງວນ ແລະ ປ່າປ້ອງກັນແຫລ່ງນ້ຳ, ບັນຫາການອອກໃບຕາດິນຊັກຊ້າ, ບັນຫາການນຳໃຊ້ທີ່ດິນ ແລະ ຊັບພະຍາກອນທຳມະຊາດທີ່ຍັງບໍ່ໄດ້ສຳຫລວດ, ຈັດສັນ ແລະ ອື່ນໆ, ພ້ອມນີ້, ທ່ານຮອງນາຍົກລັດຖະມົນຕີ ໄດ້ເນັ້ນວ່າໃຫ້ອົງການຈັດຕັ້ງຂັ້ນສູນກາງ ແລະ ທ້ອງຖິ່ນ ຖືສຳຄັນກ່ຽວກັບແຜນແມ່ບົດຈັດສັນທີ່ດິນແຫ່ງຊາດ ທີ່ພັກ ແລະ ລັດຖະບານໄດ້ວາງທິດທາງ ແລະ ຊີ້ນຳການສ້າງມາເປັນເວລາຫລາຍປີແລ້ວຈົນມາຮອດປັດຈຸບັນເຫັນວ່າມີຄວາມຈຳເປັນພາວະວິໄສ ແລະ ເງື່ອນໄຂອຳນວຍ, ໂດຍແມ່ນກະຊວງຊັບພະຍາກອນທຳມະຊາດ ແລະ ສິ່ງແວດລ້ອມເປັນໃຈກາງໃນການປະສານສົມທົບສ້າງ ແລະ ສືບຕໍ່ປັບປຸງເນື້ອໃນ ແລະ ຂໍ້ມູນຂອງຮ່າງແຜນແມ່ບົດຈັດສັນທີ່ດິນແຫ່ງຊາດ ໂດຍຖືເອົາຄວາມເປັນເອກະພາບ ແລະ ບັນຫາໃດທີ່ຍັງບໍ່ທັນຊັດເຈນໄປສືບຕໍ່ປັບປຸງແກ້ໄຂໃຫ້ສຳເລັດ ແລະ ສາມາດຮັບຮອງໄດ້ ແລະ ພາຍຫລັງແຜນແມ່ບົດດັ່ງກ່າວສຳເລັດແມ່ນໃຫ້ບັນດາກະຊວງ, ຂະແໜງການ ແລະ ທ້ອງຖິ່ນ ຕ້ອງຄຸ້ມຄອງ ແລະ ພັດທະນາທີ່ດິນໃຫ້ຖືກຕ້ອງ ແລະ ສອດຄ່ອງຕາມທີ່ໄດ້ກຳນົດໄວ້ຢູ່ໃນແຜນດັ່ງກ່າວ, ສໍາລັບມະຕິຂອງຄະນະບໍລິຫານງານສູນກາງພັກວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ແມ່ນໄດ້ຖືກຮັບຮອງ, ຊຶ່ງພວກເຮົາຈະໄດ້ພ້ອມກັນນຳໄປຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍໃຫ້ເປັນຮູບປະທຳ, ໄປຄຽງຄູ່ກັບການປັບປຸງກົດໝາຍທີ່ດິນ ແລະ ກົດໝາຍກ່ຽວຂ້ອງອື່ນໆໃຫ້ສອດຄ່ອງກັບມະຕິ ເພື່ອເປັນບ່ອນອີງໃຫ້ແກ່ການຄຸ້ມຄອງ ແລະ ພັດທະນາທີ່ດິນໃນຂອບເຂດທົ່ວປະເທດໃຫ້ມີປະສິດທິຜົນ, ຕ້ອງໄດ້ເອົາໃຈໃສ່ຢ່າງເຂັ້ມງວດໃນການສ້າງແຜນຈັດສັນທີ່ດິນຂັ້ນທ້ອງຖິ່ນ, ນັບແຕ່ແຂວງ, ເມືອງ ແລະ ບ້ານ ໃຫ້ສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ ແລະ ມີການຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດ, ຕ້ອງໄດ້ສູ້ຊົນປະຕິບັດຄາດໝາຍໂຕເລກທີ່ດິນປ່າໄມ້ທີ່ໄດ້ກຳນົດ 70% ເພື່ອປົກປັກຮັກສາແຫຼ່ງນ້ຳ, ຄວາມອຸດົມສົມບູນທາງທຳມະຊາດ ແລະ ທີ່ດິນກະສິກຳ 19% ເພື່ອຮັບປະກັນຄວາມໝັ້ນຄົງດ້ານສະບຽງອາຫານ, ການຜະລິດເປັນສິນຄ້າ ແລະ ປະກອບສ່ວນໃນການແກ້ໄຂຄວາມທຸກຍາກຂອງປະຊາຊົນ ແລະ ທີ່ດິນປະເພດອື່ນໆຕາມການກຳນົດຢູ່ໃນແຜນແມ່ບົດຈັດສັນທີ່ດິນແຫ່ງຊາດ ແລະ ໃຫ້ບັນດາກະຊວງ ແລະ ທ້ອງຖິ່ນເອົາໃຈໃສ່ວຽກງານໂຄສະນາເຜີຍແຜ່ແນວທາງນະໂຍບາຍ, ມະຕິ ແລະ ກົດໝາຍກ່ຽວກັບທີ່ດິນ ລວມທັງແຜນແມ່ບົດຈັດສັນທີ່ດິນ ແຫ່ງຊາດຢ່າງທົ່ວເຖິງ ເພື່ອນຳໄປຈັດຕັ້ງປະຕິບັດຜັນຂະຫຍາຍເປັນອັນລະອຽດໃຫ້ມີຜົນສຳເລັດ.