​ເນື້ອ​ໃນ​ຖະ​ແຫລ​ງຂ່າວຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ ໃນ​ວັນ​ທີ 1 ກັນຍາ 2017 ທີ່​ພະນົມ​ເປັນ

- WhatsApp Image 2017 07 12 at 9 - ​ເນື້ອ​ໃນ​ຖະ​ແຫລ​ງຂ່າວຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ ໃນ​ວັນ​ທີ 1 ກັນຍາ 2017 ທີ່​ພະນົມ​ເປັນ

 

- lattana 1 - ​ເນື້ອ​ໃນ​ຖະ​ແຫລ​ງຂ່າວຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ ໃນ​ວັນ​ທີ 1 ກັນຍາ 2017 ທີ່​ພະນົມ​ເປັນ

- Untitled 1 copy 1 1024x637 - ​ເນື້ອ​ໃນ​ຖະ​ແຫລ​ງຂ່າວຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ ໃນ​ວັນ​ທີ 1 ກັນຍາ 2017 ທີ່​ພະນົມ​ເປັນ

ຂໍ​ຮຽນ​ທ່ານ ສົມ​ເດັດ ອັກຄະມະຫາ ​ເສນາບໍດີ ​ເຕ​ໂຈ ​ຮຸນ​ເຊ​ນ ນາຍົກລັດຖະມົນຕີ​ແຫ່ງຣາຊະ​ອານາຈັກ​ກຳປູ​ເຈຍ, ຂ້າພະ​ເຈົ້າ​ເຫັນ​ດີ​ເຫັນ​ພ້ອມ​ກັບ​ທັງ​ໝົດ​ການ​ຖະ​ແຫລ​ງຂອງ​ນາຍົກລັດຖະມົນຕີ ຮຸນ​ເຊນ ​ໃນ​ການ​ພົບປະ​ຫາລື​ຂອງ​ຂ້າພະ​ເຈົ້າກັບ​ນາຍົກລັດຖະມົນຕີ ຮຸນ​ເຊ​ນ ມື້ນີ້. ຂ້າພະ​ເຈົ້າຂໍ​ຂອບ​ອົກ​ຂອບ​ໃຈ ​ແລະ ສະ​ແດງ​ຄວາມ​ຮູ້​ບຸນຄຸນ​ຕໍ່ ສົມ​ເດັດ ຮຸນ​ເຊ​ນ ອີກ​ເທື່ອ​ໜຶ່ງ ທີ່​ໄດ້​ຕ້ອນຮັບ​ຂ້າພະ​ເຈົ້າຢ່າງ​ອົບ​ອຸ່ນ​ທີ່​ໄດ້​ໃຫ້​ກຽດ ທັງ​ໃຫ້​ໂອກາດ​ຂ້າພະ​ເຈົ້າ​ໄດ້​ພົບ​ປະ​ຫາລື​ວຽກ​ງານ​ສຳຄັນ​​ໃນ​ມື້ນີ້ ​ແລະ ພວກ​ເຮົາ​ກໍ​ຕົກລົງ​ເປັນ​ເອກະ​ພາບ​ກັນ​ໃນ 4 ຂໍ້ ທີ່​ມີ​ຄວາມ​ສຳຄັນ​ດັ່ງກ່າວ​ນີ້ ທີ່​ນາຍົກລັດຖະມົນຕີ ຮຸນ​ເຊ​ນ ​ໄດ້​ຖະ​ແຫລ​ງ​ໄປ​ແລ້ວນັ້ນ. ອັນ​ນີ້​ຖື​ວ່າ​ແມ່ນ​ການ​ແກ້​ໄຂ​ບັນຫາ​ທີ່​ມີ​ຄວາມ​ສຳຄັນ​ໃຫ້​ແກ່​ສາຍ​ພົວພັນ​ມິດຕະພາບ​ການ​ຮ່ວມ​ມື​ອັນ​ມີ​ມູນ​ເຊື້ອ ລະຫວ່າງ​ສອງ​ຊາດ​ຂອງ​ພວກ​ເຮົາລາວ-ກຳປູ​ເຈຍ ​ແລະ ການ​ຮ່ວມ​ມື​ຢ່າງ​ໃກ້ຊິດ​ລະຫວ່າງ​ສອງ​ລັດຖະບານ​ຂອງ​ພວກ​ເຮົາ. ຂ້າພະ​ເຈົ້າກໍ​ເຫັນ​ດີ​ກັບ​ນາຍົກລັດຖະມົນຕີ ຮຸນ​ເຊ​ນ ວ່າ ກົນ​ໄກ​ຕ່າງໆ​ທີ່​ພວກ​ເຮົາ​ມີ​ຢູ່​ນີ້ ກໍ​ສືບ​ຕໍ່​ເຄື່ອນ​ໄຫວ​ເຮັດ​ວຽກ​ຮ່ວມ​ກັນ, ​ແຕ່​ວ່າ​ກົນ​ໄກ​ທີ່​ຄວາມ​ສຳພັນ​ສ່ວນ​ຕົວ​ລະຫວ່າງ​ຂ້າພະ​ເຈົ້າກັບ​ນາຍົກ ຮຸນ​ເຊ​ນ ​ແມ່ນ​ເປັນ​ກົນ​ໄກ​ທີ່​ດີ​ທີ່​ສຸດ ​ແລະ ພວກ​ເຮົາ​ມີ​ຫຍັງ​ກໍ​ປຶກສາ​ຫາລື​ກັນ​ໄດ້​ທຸກ​ເວລາ.

ຂ້າພະ​ເຈົ້າມີ​ຄວາມ​ຮູ້ສຶກ​ອົບ​ອຸ່ນ ​ແລະ ມີ​ຄວາມ​ເພິ່ງ​ພໍ​ໃຈ​ຕໍ່​ກັບ​ຜົນສຳ​ເລັດ​ຂອງ​ການ​ພົບ​ປະ, ​ເຫັນ​ດີ​ພວກ​ເຮົາ​ກໍ​ຕ້ອງ​ໄດ້​ໃຫ້​ສອງ​ລັດຖະມົນຕີ​ຕ່າງປະ​ເທດ​ພົບ​ປະກັນ​ຢ່າງ​ໄວ​ເທົ່າ​ທີ່​ຈະ​ໄວ​ໄດ້​ຕາມ​ທີ່​ຂ້າພະ​ເຈົ້າຮູ້​ວ່າ​ລັດຖະມົນຕີ​ຕ່າງປະ​ເທດກຳປູ​ເຈຍ Prak Sokhonh ​ໄດ້​ເປັນ​ເອກະ​ພາບ​ກັບລັດຖະມົນຕີ​ຕ່າງປະ​ເທດ ສະ​ເຫລີ​ມ​ໄຊ ກົມມະ​ສິດ ​ແລ້ວ ອັນ​ທີສອງ​ນີ້, ສອງ​ນາຍົກ​ໄດ້​ຕົກລົງ​ຈະ​ແກ້​ໄຂ 4 ຈຸດທີ່​ທາງ​ນາຍົກ​ສະ​ເໜີ​ມານັ້ນ​ໄປ​ສາກ່ອນ ຈະ​ເລີ່​ມຕົ້ນ​ໄດ້​ພາຍຫລັງ​ສອງ​ລັດຖະມົນຕີ​ຕ່າງປະ​ເທດ​ພົບ​ປະ​ຫາລື​ກັນ​ຄື: 033, ​ເສັ້ນຊາຍ​ແດນ 017, ​ເວີນ​ຄຳ, ອູ​ສະ​ວາຍ ຫລື ​ເຂດ 032 ທີ່​ໄດ້​ສະ​ເໜີ​ໄປ​ແລ້ວນັ້ນຈະ​ເລີ່​ມປຶກສາ​ຫາລື​ແກ້​ໄຂ​ນຳ​ກັນ​ໂດຍ​ໄວ​ເທົ່າ​ທີ່​ຈະ​ໄວ​ໄດ້, ຈາກ​ນັ້ນພວກ​ເຮົາ​ຈະ​ລົງ​ໄປ​ພື້ນທີ່​ຕົວ​ຈິງ​ເຂດ​ທີ່​ຄົງ​ຄ້າງ​ທີ່​ພວກ​ເຮົາ​ຈະ​ໄດ້​ແກ້​ໄຂ​ນັ້ນຄື ​ເຂດ​ຫ້ວຍ​ຕະ​ເງົ້າ​ ​ເຊິ່ງກໍ​ເຫັນ​ດີ​ນຳ​ກັນ​ວ່າ​ຈະ​ລົງ​ໄປ​ກວດ​ພື້ນທີ່​ຕົວ​ຈິງ ບ່ອນ​ໃດ​ເປັນ​ເອກະ​ພາບ​ກັນ​ກໍ​ປັກ​ຫລັກ​ໂລດ ​ເພື່ອ​ສືບ​ຕໍ່​ປັກ​ຫລັກ​ໝາຍ​ຕໍ່​ໄປ ຂ້າພະ​ເຈົ້າຄິດ​ວ່າ ​ໄວ ຫລື ຊ້າ​ເຂດ​ນີ້​ກໍ​ຕ້ອງ​ມີ​ຫລັກ​ໝາຍ​ຊາຍ​ແດນ. ຂໍ້​ທີ່ 4 ທີ່​ຕົກລົງ​ກັນ​ຄື​ທ່ານ ສົມ​ເດັດ ຮຸນ​ເຊ​ນ ນາຍົກລັດຖະມົນຕີ ​ໄດ້​ປະກາດ​ໄປ​ນັ້ນພວກ​ເຮົາ​ຈະ​ໄດ້​ຂຽນ​ຈົດໝາຍ​ເຖິງ​ປະທານາທິບໍດີ​ຝຣັ່ງ ​ໃຫ້​ຊ່ວຍ​ນຳ​ເອົາ​ແຜນ​ທີ່ມາດຕາ 1/100.000 ​ແລະ ມາດຕາ 1/50.000 ຫລື​ວ່າ ​ເອກະສານ​ຕ່າງໆ​ທີ່​ພົວພັນ​ເຖິງ​ການ​ກຳນົດ​ເສັ້ນຊາຍ​ແດນ ລະຫວ່າງ ລາວ ​ແລະ ກຳປູ​ເຈຍ ນີ້​ສົ່ງ​ໃຫ້ ລາວ ​ແລະ ກຳປູ​ເຈຍ ​ເພື່ອ​ໃຫ້​ເປັນ​ຫລັກ​ຖານ ພ້ອມ​ທັງ​ປຶກສາ​ຫາລື ​ເພື່ອ​ແກ້​ໄຂ​ຊາຍ​ແດນ​ຂອງ​ພວກ​ເຮົາ​ຕໍ່​ໄປ. ຂ້າພະ​ເຈົ້າ​ເຊື່ອ​ວ່າການ​ແກ້​ໄຂ​ບັນຫາ​ຊາຍ​ແດນ​ຂອງ​ພວກ​ເຮົາ​ທັງ​ສອງ​ປະ​ເທດ​ນັ້ນຈະ​ເຕັມ​ໄປ​ດ້ວຍ​ບົນ​ພື້ນຖານ​ຫລັກການ, ​ແຫ່ງ​ມິດຕະພາບ, ສະ​ເໝີ​ພາບ ​ແລະ ບໍ່​ໃຫ້​ໃຜ​ໄດ້​ໃຜ​ເສຍ. ນອກຈາກ​ນັ້ນ ສອງ​ນາຍົກ​ກໍ​ໄດ້​ປຶກສາ​ຫາລື​ເປັນ​ເອກະ​ພາບ​ກັນ​ວ່າ​ຈະ​ປົກ​ປັກ​ຮັກສາ​ຄວາມ​ສະຫງົບ ບໍ່​ໃຫ້​ມີ​ຄວາມ​ເຄັ່ງ​ຕຶງ​ໃນ​ເຂດ​ຊາຍ​ແດນ​ທີ່​ບໍ່​ທັນ​ໄດ້​ຕົກລົງ​ກັນ ອັນ​ນີ້​ແມ່ນ​ການ​ຕົກລົງ​ທີ່​ທັງ​ສອງ​ຝ່າຍ​ເຫັນ​ວ່າ​ມີ​ຄວາມ​ສຳຄັນ​ຫລາຍ ​ເມື່ອ​ເປັນ​ແນວ​ນັ້ນພວກ​ເຮົາ​ກໍ​ຈະ​ຕ້ອງ​ໄດ້​ປົກ​ປັກ​ຮັກສາ​ໃຫ້​ສະພາບ​ການ​ເປັນ​ຢູ່​ໃນ​ຂົງ​ເຂດ​ນັ້ນ​ໃຫ້​ເປັນ​ປົກກະຕິ ​ແລະ ບໍ່​ໃຫ້​ມີ​ການ​ສ້າງ​ຄວາມ​ເຄັ່ງ​ຕຶງ​​ໃດໆ​ຕໍ່​ກັນ ອັນ​ນີ້​ເປັນ​ການ​ຕົກລົງ​ທີ່​ມີ​ຄວາມ​ສຳຄັນ​ຫລາຍ​ທີ່​ສອງ​ນາຍົກ​ພວກ​ເຮົາ​ໄດ້​ປຶກສາ​ຫາລື​ກັນ ​ແລະ ຕົກ​ລົງ​ເປັນ​ເອກະ​ພາບ​ກັນ.

​ໂດຍ​ຫລັກການ​ທີ່​ພວກ​ເຮົາ​ຕົກລົງ​ກັນ​ມື້ນີ້ 4 ຫລັກການ​ນັ້ນ ຂ້າພະ​ເຈົ້າ​ເຊື່ອ​ໝັ້ນທີ່​ສຸດ​ວ່າ ​ເສັ້ນຊາຍ​ແດນ​ຂອງ​ພວກ​ເຮົາ​ຈະ​ໄດ້​ຮັບ​ການ​ສືບ​ຕໍ່​ແກ້​ໄຂ​ຕໍ່​ໄປ​ສ່ວນ​ຍັງ​ເຫລືອ 13-14% ນັ້ນຈະ​ສາມາດ​ມີ​ມື້ໜຶ່ງ​ພວກ​ເຮົາ​ຈະ​ມີ​ເສັ້ນຊາຍ​ແດນ​ທີ່​ສົມບູນ​ແບບ ​ແລະ ​ເຮັດ​ໃຫ້​ເປັນ​ມໍລະດົກ​ຕົກ​ທອດ​ໃຫ້​ລູກ​ຫລານ​ພວກ​ເຮົາ​ສືບ​ທອດ​ຕໍ່​ໄປ. ບົນ​ພື້ນຖານ​ດັ່ງກ່າວ​ນີ້ ນ້ຳ​ໃຈ​ມິດຕະພາບ​ທີ່​ມີ​ມູນ​ເຊື້ອ, ການ​ຮ່ວມ​ມື​ທີ່​ມີ​ໝາກ​ມີ​ຜົນ ດ້ວຍ​ຄວາມ​ຈິງ​ໃຈ ລະຫວ່າງ​ປະຊາຊົນ​ສອງ​ປະ​ເທດ​ພວກ​ເຮົາ​ຈະ​ສືບ​ຕໍ່​ໄດ້​ຮັບ​ການ​ຜັນ​ຂະຫຍາຍ​ເຂົ້າສູ່​ລວງ​ເລິກ​ມີ​ປະສິດທິ​ຜົນ​ກ້າວ​ໄປ​ສູ່​ເຮັດ​ໃຫ້​ປະຊາຊົນ​ສອງ​ປະ​ເທດ​ພວກ​ເຮົາ​ສືບ​ຕໍ່​ເປັນ​ບ້ານ​ໃກ້​ເຮືອນ​ຄຽງ​ທີ່​ດີ, ບ້ານ​ພີ່​ເມືອງ​ນ້ອງ​ບ້ານ​ແກ່ວ​ເມືອງ​ດອງ​ຕໍ່​ໄປ.

ອີກ​ເທື່ອ​ໜຶ່ງ ຂ້າພະ​ເຈົ້າຂໍ​ຂອບ​ໃຈ​ທ່ານ ສົມ​ເດັດ ອັກຄະມະຫາ ​ເສນາບໍດີ ​ເຕ​ໂຈ ຮຸນ​ເຊ​ນ ທີ່​ໄດ້​ຕ້ອນຮັບ​ຂ້າພະ​ເຈົ້າຢ່າງ​ອົບ​ອຸ່ນ ​ແລະ ຕອບ​ສະໜອງ​ການສະ​ເໜີ​ມາ​ພົບ​ສົມ​ເດັດ ຮຸນ​ເຊ​ນ ​ໃນ​ມື້ນີ້.

ຂໍ​ຂອບ​ໃຈ​ສື່​ມວນ​ຊົນ​ທີ່​ໄດ້​ໃຫ້​ຄວາມ​ສົນ​ໃຈ​ໃນ​ການ​ເອົາ​ຂ່າວ​ໃນ​ມື້ນີ້.