ເປີດນຳໃຊ້ເຂື່ອນໄຟຟ້າເຊນ້ຳນ້ອຍ 2 ແລະ ເຊກະຕຳ 1 ຢ່າງເປັນທາງການ

- WhatsApp Image 2017 07 12 at 9 - ເປີດນຳໃຊ້ເຂື່ອນໄຟຟ້າເຊນ້ຳນ້ອຍ 2 ແລະ ເຊກະຕຳ 1 ຢ່າງເປັນທາງການ

ພິທີເປີດການນຳໃຊ້ເຂື່ອນໄຟຟ້າເຊນ້ຳນ້ອຍ 2 ແລະ ເຊກະຕຳ 1 ຢ່າງເປັນທາງການໄດ້ຈັດຂຶ້ນໃນວັນທີ 1 ກັນຍານີ້, ທີ່ເມືອງປາກຊ່ອງແຂວງຈໍາປາສັກ, ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີບັນດາທ່ານລັດຖະມົນຕີ, ຮອງລັດຖະມົນຕີ, ທ່ານເຈົ້າແຂວງ, ຮອງເຈົ້າແຂວງ ແລະ ທ່ານປະທານບໍລິສັດ ບີຄຣີມ ກຣຸບ ຈຳກັດ ແລະ ບໍລິສັດ ເອັສວີ ກຣຸບ ເຂົ້າຮ່ວມ.

- lattana 1 - ເປີດນຳໃຊ້ເຂື່ອນໄຟຟ້າເຊນ້ຳນ້ອຍ 2 ແລະ ເຊກະຕຳ 1 ຢ່າງເປັນທາງການ

ທ່ານ ໄຊສົງຄາມ ວໍລະຈິດ ປະທານບໍລິສັດ ເອັສວີ ກຣຸບ ກ່າວໃນພິທີວ່າ: ເຂື່ອນໄຟຟ້າເຊນ້ຳນ້ອຍ 2 ແລະ ເຊກະຕຳ 1 ໄດ້ຮັບອະນຸຍາດຈາກການນຳແຂວງຈຳປາສັກເມື່ອກາງປີ 2012 ແລະ ໄດ້ເຊັນສັນຍາຊື້-ຂາຍກະແສໄຟຟ້າກັບລັດວິສາຫະກິດໄຟຟ້າລາວ, ຊຶ່ງເຂື່ອນເຊນ້ຳນ້ອຍ 2 ກຳລັງຕິດຕັ້ງ 6,7 ເມກາວັດ ທີ່ຈະສາມາດຜະລິດກະແສໄຟຟ້າໄດ້ 40 ກິກາວັດໂມງຕໍ່ປີ ແລະ ເຂື່ອນເຊກະຕໍາ 1 ມີກໍາລັງຕິດຕັ້ງ 13,4 ເມກາວັດ, ຊຶ່ງຈະສາມາດຜະລິດກະແສໄຟຟ້າໄດ້ປະມານ 80 ກິກາວັດໂມງຕໍ່ປີ, ດ້ວຍການລົງທຶນທັງໝົດ 50 ລ້ານໂດລາສະຫະລັດ, ຊຶ່ງໃນແຕ່ລະປີທັງ 2 ໂຄງການດັ່ງກ່າວຈະສາມາດຜະລິດກະແສໄຟຟ້າໄດ້ປະມານ 120 ກິກາວັດໂມງ, ຊຶ່ງມີອາຍຸສຳປະທານ 50 ປີ.

ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ໄດ້ມີຄໍາເຫັນວ່າ: ມາຮອດປັດຈຸບັນ, ສປປ ລາວ ມີເຂື່ອນໄຟຟ້າທັງໝົດ 53 ແຫ່ງ, ຊຶ່ງມີກໍາລັງຕິດຕັ້ງ 6.597 ເມກາວັດ ແລະ ສາມາດຜະລິດພະລັງງານໄຟຟ້າໄດ້ເຖິງ 31.824 ກິກາວັດໂມງຕໍ່ປີ ແລະ ຄາດວ່າຮອດປີ2020-2021 ສປປ ລາວ ເຮົາຈະມີແຫລ່ງຜະລິດພະລັງງານໄຟຟ້າ 100 ແຫ່ງ, ມີກຳລັງຕິດຕັ້ງປະມານ 13.062 ເມກາວັດ ແລະ ມີກຳລັງຜະລິດປະມານ 66.944 ກິກາວັດໂມງຕໍ່ປີ. ໃນນີ້, ປະມານ 85% ຈະສົ່ງອອກໄປຈຳໜ່າຍຢູ່ຕ່າງປະເທດ, ຄຽງຄູ່ກັບການພັດທະນາແຫລ່ງຜະລິດກະແສໄຟຟ້າຢ່າງເປັນລະບົບແລ້ວ, ສປປ ລາວ ກໍໄດ້ເອົາໃຈໃສ່ພັດທະນາລະບົບສາຍສົ່ງ ແລະ ສະຖານີໄຟຟ້າ, ຊຶ່ງໄດ້ຂະຫຍາຍຕົວຢ່າງວ່ອງໄວ. ໃນນີ້ຄືຫລັງປີ 2006 ທົ່ວປະເທດມີລະບົບສາຍສົ່ງພຽງແຕ່ 10.000 ກິໂລແມັດ ແລະ ມີສະຖານີໄຟຟ້າ 15 ແຫ່ງ. ແຕ່ມາຮອດປັດຈຸບັນ, ສປປ ລາວ ມີລະບົບສາຍສົ່ງແຮງດັນສູງ, ແຮງດັນກາງ ແລະ ແຮງດັນຕ່ຳທັງໝົດ 53 ພັນກວ່າກິໂລແມັດ, ມີສະຖານີຈ່າຍໄຟຟ້າ 60 ແຫ່ງ. ອັນທີ່ເປັນພື້ນຖານສຳຄັນກວ່າໝູ່ແມ່ນ ສປປ ລາວ ໄດ້ຖືເອົາວຽກງານຂະຫຍາຍຕາໜ່າງໄຟຟ້າລົງສູ່ຊົນນະບົດຕິດພັນຢ່າງແໜ້ນແຟ້ນກັບການພັດທະນາແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ຊຶ່ງມາຮອດປັດຈຸບັນນີ້ມີຈຳນວນບ້ານທີ່ໄດ້ຊົມໃຊ້ໄຟຟ້າແລ້ວ 87% ແລະ 94% ຂອງຄອບຄົວມີໄຟຟ້າຊົມໃຊ້ຖາວອນແລ້ວ. ສ່ວນການສົ່ງອອກພະລັງງານໄຟ ຟ້າໄປຕ່າງປະເທດ ເຊັ່ນ: ໄທ, ຫວຽດນາມ, ກຳປູເຈຍ, ມຽນມາ ໄດ້ເພີ່ມຂຶ້ນ 4 ເທົ່າເມື່ອທຽບກັບປີ 2010 ແລະ ມີທ່າອ່ຽງເພີ່ມຂຶ້ນໃນແຕ່ລະປີ.

ໃນໂອກາດນີ້, ທ່ານ ສອນໄຊ ສີພັນດອນ ກໍໄດ້ມອບເງິນປະກອບສ່ວນບັນເທົາທຸກໄພນ້ຳຖ້ວມໃຫ້ບັນດາແຂວງທີ່ຖືກຜົນກະທົບຄື: ແຂວງຈຳປາສັກ, ເຊ ກອງ, ອັດຕະປື ແລະ ແຂວງຄຳມ່ວນ ແຂວງລະ 10 ລ້ານກີບ.