ຮອງ​ປະທານ​ປະ​ເທດ​ຢ້ຽມຢາມ ​ແລະ ​ເຮັດ​ວຽກຢູ່​ເມືອງ​ວຽງ​ທອງ

- advert banner 728 90 728x90 - ຮອງ​ປະທານ​ປະ​ເທດ​ຢ້ຽມຢາມ ​ແລະ ​ເຮັດ​ວຽກຢູ່​ເມືອງ​ວຽງ​ທອງ

​ໃນ​ວັນ​ທີ 1 ກັນຍາ​ນີ້, ທ່ານ ພັນຄຳ ວິພາ​ວັນ ກຳມະການ​ກົມ​ການ​ເມືອງ​ສູນ​ກາງ​ພັກ, ຮອງ​ປະທານ​ປະ​ເທດ​ແຫ່ງ ສປປ ລາວ ​ໄດ້ຢ້ຽມຢາມ ​ແລະ ​ເຮັດ​ວຽກ​ຢູ່​ເມືອງ​ວຽງ​ທອງ​ແຂວງ​ບໍລິ​ຄຳ​ໄຊ, ​ໂດ​ຍການ​ຕ້ອນຮັບ​ຂອງ​ທ່ານຄະນະ​ນຳ​ແຂວງ ​ແລະ ປະຊາຊົນ​ດ້ວຍ​ຄວາມ​ອົບ​ອຸ່ນ ​ແລະ ພາຍຫລັງ​ໄດ້​ຮັບ​ຟັງ​ການ​ລາຍ​ງານ​ສະພາບ​ພັດທະນາ​ເສດຖະກິດ-ສັງຄົມຈາກ​ທ່ານ​ເຈົ້າ​​ແຂວງ​ແລ້ວ, ທ່ານ​ຮອງ​ປະທານ​ປະ​ເທດ​ ກໍ​ໄດ້​ໃຫ້​ກຽດ​ໂອ້​ລົມ ​ແລະ ​ໃຫ້​ທິດ​ຊີ້​ນຳ​ວຽກ​ງານ​ປ້ອງ​ກັນຊາດ​-ປ້ອງ​ກັນ​ຄວາມ​ສະຫງົບ​ຢູ່​ທີ່​ຫ້ອງ​ປະຊຸມ​ສຳນັກງານ​ຫ້ອງ​ວ່າການ​ປົກຄອງ​ເມືອງ​ວຽງ​ທອງ, ​ໂດຍ​ມີ​ພະນັກງານ​ການ​ນຳ​ຫລັກ​ແຫ​ລ່ງຂອງ​ແຂວງ ​ແລະ ​ເມືອງ​ເຂົ້າ​ຮ່ວມ​ເປັນ​ຈຳນວນ​ຫລາຍ.

- lattana 1 - ຮອງ​ປະທານ​ປະ​ເທດ​ຢ້ຽມຢາມ ​ແລະ ​ເຮັດ​ວຽກຢູ່​ເມືອງ​ວຽງ​ທອງ

ທ່ານຮອງ​ປະ​ທານ​ປະ​ເທດ, ​ໄດ້​ເນັ້ນ​ໃຫ້​ອົງຄະນະ​ພັກ​ແຂວງ​-ອົງຄະ​ນະ​ພັກ​ເມືອງ​ຕະຫລອດ​ຮອດ​ອຳນາດ​ການ​ປົກຄອງ​ທຸກ​ຂັ້ນ ຈົ່ງ​ໄດ້​ເພີ່ມ​ທະວີ​ເອົາ​ໃຈ​ໃສ່​ວຽກ​ງານ​ປ້ອງ​ກັນ​ຊາດ-​ປ້ອງ​ກັນ​ຄວາມ​ສະຫງົບ ​ເຮັດ​ໃຫ້​ທົ່ວ​ປວງ​ຊົນ​ມີ​ຄວາມ​ສະຫງົບ ​ແລະ ​ເປັນ​ລະບຽບ​ຮຽບຮ້ອຍ​ດີ ​ແລະ ​ເອົາ​ໃຈ​ໃສ່​ຄຸ້ມ​ຄອງ​ສຳ​ມະ​ໂນ​ຄົວ, ຕິດຕາມ​ການ​ເຄື່ອນຍ້າຍ​ເຂົ້າ-ອອກ​ຂອງ​ພົນ​ເມືອງ​ໃຫ້​ຮັດກຸມ ​ແລະ ​ເລັ່ງ​ແກ້​ໄຂ​ບັນຫາ​ປະກົດ​ການ​ຫຍໍ້​ທໍ້​ທາງ​ສັງຄົມ​ ເປັນ​ຕົ້ນ: ບັນຫາ​ຢາ​ເສບ​ຕິດ ​ແລະ ອື່ນ​ໆ ​ເພື່ອ​ຮັບປະກັນ​ໃຫ້​ແຂວງ​ມີ​ສະຖຽນ​ລະ​ພາບ​ທາງ​ດ້ານ​ການ​ເມືອງ​ຢ່າງ​ໜັກ​ແໜ້ນ ​ແລະ ສັງຄົມ​ມີ​ຄວາມ​ເປັນ​ລະບຽບ​ຮຽບຮ້ອຍ, ຈາກນັ້ນ, ທ່ານ​ຍັງ​ໄດ້​ໄປ​ພົບ​ປະ​ໂອ້​ລົມ​ປະຊາຊົນ​ບ້ານ​ວັງ​ຫີນ​ເມືອງ​ວຽງ​ທອງອີກ​ດ້ວຍ.

ທ່ານ​ເຈົ້າ​ແຂວງ​ບໍລິ​ຄຳ​ໄຊ ​ໄດ້​ລາຍ​ງານ​ຫຍໍ້​ກ່ຽວ​ກັບ​ສະພາບ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ​ຂອງ​ແຂວງ​ໃຫ້​ທ່ານ​ຮອງ​ປະທານ​ປະ​ເທດ​ ໄດ້​ຮັບ​ຊາດ​ວ່າ: ​ໂດຍ​ລວມ​ແລ້ວ​ສະຖຽນ​ລະ​ພາບ​ທາງ​ດ້ານ​ການ​ເມືອງ​ຂອງ​ແຂວງ​ຍັງ​ມີ​ຄວາມ​ໜັກ​ແໜ້ນ, ສັງຄົມ​ມີ​ຄວາມ​ເປັນ​ລະບຽບ​ຮຽບຮ້ອຍ​ໂດຍ​ພື້ນຖານ, ​ເສ​ດຖະກິດ​ສືບ​ຕໍ່​ການ​ຂະຫຍາຍຕົວ ​ແລະ ຄວາມທຸກ​ຍາກ​ນັບ​ມື​ຖືກ​ຕີ​ຖອຍ​ຄື: ລວມຍອດ​ຜະລິດ​ຕະພັນ​ພາຍ​ໃນ GDP ຂອງ​ແຂວງ​ໃນ​ປີຜ່ານມາ​ບັນ​ລຸ 4.474 ກວ່າ​ຕື້​ກີບ, ດ້ວຍ​ອັດຕາ​ການ​ຂະ​ຫຍາ​ຍຕົວ 8%, ​ໃນ​ນັ້ນຂົງ​ເຂດ​ກະສິກຳ ​ແລະ ປ່າ​ໄມ້ຂະ​ຫຍາ​ຍຕົວ​ໃນ​ລະດັບ 3,5% ກວມ​ເອົາ 40,2%, ຂົງ​ເຂດ​ອຸດສາຫະກຳ ​ແລະ ການ​ກໍ່ສ້າງ​ຂະຫຍາຍຕົວ​ໃນ​ລະດັບ 11,02% ກວມ​ເອົາ 31,4%, ຂົງ​ເຂດ​ບໍລິການ​ຂະຫຍາຍຕົວ​ໃນ​ລະດັບ 8,93% ກວມ​ເອົາ 28,4% ຂອງ GDP.