ກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ສ.ເກົາຫລີ ຄັ້ງທີ 7

- advert banner 728 90 728x90 - ກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ສ.ເກົາຫລີ ຄັ້ງທີ 7

ໃນຕອນບ່າຍວັນທີ 1 ກັນຍາຜ່ານມານີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດເຮົາ ໄດ້ຮັບກຽດເປັນປະທານຮ່ວມຂອງກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ສ.ເກົາຫລີຄັ້ງທີ 7 ຮ່ວມກັບທ່ານນາງ ຄັງຄຽງວາ ລັດຖະມົນຕີຕ່າງປະເທດ ສ.ເກົາຫລີ ແລະ ມີບັນດາຮອງລັດຖະມົນຕີຕ່າງປະເທດກຳປູເຈຍ, ມຽນມາ, ຫວຽດນາມ ແລະ ໄທເຂົ້າຮ່ວມ ແລະ ໄດ້ຕີລາຄາສູງຕໍ່ຄວາມຄືບໜ້າຂອງການຈັດຕັ້ງປະຕິບັດໂຄງການ ແລະ ແຜນວຽກຕ່າງໆພາຍໃຕ້ຂອບການຮ່ວມມືແມ່ນ້ຳຂອງ- ສາທາລະນະລັດ ເກົາຫລີໃນໄລຍະຜ່ານມາ, ໂດຍສະເພາະແມ່ນໝາກຜົນຂອງການຈັດຕັ້ງຜັນຂະຫຍາຍແຜນປະຕິບັດງານຂອງການຮ່ວມມືແມ່ນ້ຳຂອງ ສ.ເກົາຫລີ ສໍາລັບປີ 2014-2017 ແລະ ຖະແຫລງການຂອງປະທານຮ່ວມກອງປະຊຸມລັດຖະມົນຕີຕ່າງປະເທດແມ່ນ້ຳຂອງ ສ.ເກົາຫລີ ຄັ້ງທີ 6, ຊຶ່ງໄດ້ຮັບຮອງເອົາໃນປີ 2016 ທີ່ນະຄອນຫລວງວຽງຈັນ, ລວມທັງໄດ້ແລກປ່ຽນທັດສະນະກ່ຽວກັບບັນຫາພາກພື້ນ ແລະ ສາກົນ ແລະ ຮ່ວມກັນປຶກສາຫາລືກ່ຽວກັບທິດທາງການຮ່ວມມືທີ່ມີປະສິດທິຜົນໃນຕໍ່ໜ້າ ແນໃສ່ເສີມຂະຫຍາຍການຮ່ວມມືລະຫວ່າງບັນດາປະ ເທດແມ່ນ້ຳຂອງ ແລະ ສ.ເກົາຫລີ ແລະ ສົ່ງເສີມການພັດທະນາເສດຖະກິດ- ສັງຄົມ ແລະ ຍົກສູງຊີວິດການເປັນຢູ່ຂອງປະຊາຊົນໃນພາກພື້ນແມ່ນ້ຳຂອງໃຫ້

- lattana 1 - ກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ສ.ເກົາຫລີ ຄັ້ງທີ 7

ນັບມື້ດີຂຶ້ນ. ກອງປະຊຸມຄັ້ງນີ້, ໄດ້ຮັບຮອງເອົາເອກະສານສຳຄັນສອງສະບັບຄື: ຖະແຫລງການຂອງປະທານຮ່ວມກອງປະຊຸມລັດຖະມົນຕີຕ່າງປະເທດແມ່ນ້ຳຂອງ ສ.ເກົາຫລີ ຄັ້ງທີ 7 ແລະ ແຜນປະຕິບັດງານສະບັບໃໝ່ສຳລັບປີ 2017 -2020 ເພື່ອເປັນບ່ອນອີງໃຫ້ມີການຈັດຕັ້ງປະຕິບັດແຜນວຽກ ແລະ ໂຄງການຕ່າງໆພາຍໃຕ້ຂອບການຮ່ວມມືດັ່ງກ່າວໃນຕໍ່ໜ້າ. ອັນສຳຄັນແມ່ນກອງປະຊຸມໄດ້ເຫັນດີຮັບຮອງເອົາ 5 ໂຄງການໃໝ່ ເພື່ອບັນຈຸເຂົ້າໃນການນຳໃຊ້ກອງທຶນເພື່ອຮ່ວມມືແມ່ນ້ຳຂອງ ສ.ເກົາຫລີ ສຳລັບປີ 2017, ຊຶ່ງ ສ.ເກົາຫລີ ໄດ້ປະ ກອບສ່ວນດ້ານງົບປະມານເຂົ້າໃນກອງທຶນດັ່ງກ່າວນັບແຕ່ປີ 2015 ເປັນຕົ້ນມາ ເປັນຈຳນວນເງິນ 1 ລ້ານໂດລາສະຫະລັດຕໍ່ປີ ເພື່ອນຳໃຊ້ເຂົ້າໃນການຈັດຕັ້ງປະຕິບັດໂຄງການໃນຂອບຮ່ວມມືດັ່ງກ່າວ. ໃນນີ້, ລວມມີໂຄງການຂອງ ສປປ ລາວ ສະເໜີຈຳນວນ 1ໂຄງການຊື່ວ່າ: “ໂຄງການສ້າງແຜນແມ່ບົດ ແລະ ຄວາມອາດສາມາດ ເພື່ອພັດທະນາພື້ນຖານໂຄງລ່າງດ້ານອຸຕຸນິຍົມ-ອຸທົກກະສາດ ໃນອ່າງແມ່ນ້ຳຂອງ ຂອງ ສປປ ລາວ ໃຫ້ທັນສະໄໝ” ມູນຄ່າ 350 ພັນ ໂດລາສະຫະລັດ,ໃນໄລຍະເວລາປີເຄິ່ງ ໂດຍແມ່ນກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນຜູ້ຈັດຕັ້ງປະຕິບັດ. ສຳລັບແຜນການຮ່ວມມື ອັນພົ້ນເດັ່ນໃນຕໍ່ໜ້າແມ່ນ ສປປ ລາວ ໄດ້ຮັບກຽດເປັນເຈົ້າພາບຮ່ວມກັບສາທາລະນະລັດ ເກົາຫລີ ຕາມພັນທະໝູນວຽນຈັດກອງປະຊຸມເວທີປຶກສາ ຫາລືພາກທຸລະກິດຄັ້ງທີ 5 ພາຍໃຕ້ຫົວຂໍ້: “ສົ່ງເສີມການພັດທະນາວິສາຫະກິດຂະໜາດນ້ອຍ ແລະ ກາງ ແລະ ການພັດທະນາອຸດສາຫະກຳການທ່ອງທ່ຽວໃນບັນດາປະເທດແມ່ນ້ຳຂອງ ແລະ ສ.ເກົາຫລີ” ຊຶ່ງມີແຜນຈັດຂຶ້ນໃນວັນທີ 19-20 ຕຸລາ 2017 ທີ່ນະຄອນຫລວງວຽງຈັນ. ຈຸດປະສົງແມ່ນແນໃສ່ສົ່ງເສີມການຮ່ວມມືດ້ານເສດຖະກິດລະຫວ່າງບັນດາປະເທດແມ່ນ້ຳຂອງ ແລະ ສ.ເກົາ ຫລີ ເພື່ອເພີ່ມທະວີການຄ້າ, ການລົງທຶນ ແລະ ການທ່ອງທ່ຽວ ລວມທັງການພັດທະນາວິສາຫະກິດຂະໜາດນ້ອຍ ແລະ ຂະໜາດກາງ ແລະ ອຸດສາຫະກຳທ່ອງທ່ຽວໃນພາກພື້ນແມ່ນ້ຳຂອງ.

ກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ສ.ເກົາຫລີ ຄັ້ງຕໍ່ໄປຈະຈັດຂຶ້ນພາຍໃຕ້ການເປັນປະທານຮ່ວມຂອງ ສ.ເກົາຫລີ ແລະ ມຽນມາ ໃນປີ 2018 ໃນໄລຍະດຽວກັນກັບກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 51 ທີ່ສິງກະໂປ. ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ຍັງໄດ້ ເຂົ້າຮ່ວມພິທີເປິດເຮືອນວັດທະນະທຳອາຊຽນທີ່ບູຊານ ສ.ເກົາຫລີ ໃນຕອນເຊົ້າວັນທີ 1 ກັນຍາຜ່ານມານີ້ ເພື່ອສືບຕໍ່ສົ່ງເສີມການພົວພັນດ້ານວັດທະນະທຳ ແລະ ປະເພນີອັນດີງາມລະຫວ່າງອາຊຽນ ແລະ ສ.ເກົາຫລີ, ພ້ອມທັງເປັນ ການຍົກລະດັບການເປັນຄູ່ຮ່ວມຍຸດທະສາດອາຊຽນ-ສ.ເກົາຫລີ ຂຶ້ນສູ່ລະດັບໃໝ່ ໂດຍສະເພາະກໍແມ່ນການສະເຫລີມສະຫລອງປີແຫ່ງການແລກປ່ຽນວັດທະນະທຳອາຊຽນ-ສ.ເກົາຫລີ ໃນປີ 2017 ນີ້. ການສ້າງເຮືອນວັດທະນະທຳອາຊຽນດັ່ງກ່າວແມ່ນເປັນການຜັນຂະຫຍາຍຜົນຂອງກອງປະຊຸມສຸດຍອດສະເຫລີມສະຫລອງອາຊຽນ-ສ.ເກົາຫລີ ຄົບຮອບ 25 ປີ ໂດຍມີຈຸດປະສົງສົ່ງເສີມຄວາມຮັບຮູ້ ແລະ ເຂົ້າໃຈລະຫວ່າງປະຊາຊົນອາຊຽນ ແລະ ສ.ເກົາຫລີ ກ່ຽວກັບວັດທະນະທຳທີ່ຫລາກຫລາຍ ແລະ ມີເອກະລັກຂອງອາຊຽນໃຫ້ຖືກເຜີຍແຜ່ຢ່າງກວ້າງຂວາງ ແລະ ເລິກເຊິ່ງໃນອະນາຄົດ.