ຂໍໃຫ້ເຈົ້າໜ້າທີ່ຮັກສາຄວາມສະຫງົບ ເປັນທີ່ເພິ່ງຂອງປະຊາຊົນຢ່າງແທ້ຈິງ

- WhatsApp Image 2017 07 12 at 9 - ຂໍໃຫ້ເຈົ້າໜ້າທີ່ຮັກສາຄວາມສະຫງົບ ເປັນທີ່ເພິ່ງຂອງປະຊາຊົນຢ່າງແທ້ຈິງ

ໂດຍ: ທ່ຽງ​ທຳ

- lattana 1 - ຂໍໃຫ້ເຈົ້າໜ້າທີ່ຮັກສາຄວາມສະຫງົບ ເປັນທີ່ເພິ່ງຂອງປະຊາຊົນຢ່າງແທ້ຈິງ

ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ, ບໍ່​ວ່າ​ໃຜ​ກໍ​ຈະ​ດີ​ໃຈ ​ແລະ ມີ​ຄວາມ​ເບີກບານ​ມ່ວນ​ຊື່ນ​ໃນ​ເມື່ອ​ສັງຄົມ​ມີ​ຄວາມ​ສະຫງົບ​ສຸກ, ​ໄປມາ​ທາງ​ໃດ​ກໍ​ມີ​ຄວາມ​ສະດວກ​ປອດ​ໄພ ​ແລະ ​ເປັນ​ລະບຽບ​ຮຽບຮ້ອຍ​ດີ, ປາສະຈາກ​ການ​ຂີ້ລັກ​ງັດ​ແງະ, ປຸ້ນຈີ້​ຂ້າພະ​ເຈົ້າ​ເອົາ​ຂອງ ກໍ່ກວນ​ຄວາມ​ບໍ່​ສະຫງົບ​ບ້ານ​ເມືອງ. ​ແຕ່​ສິ່ງ​ນັ້ນຈະ​ໄດ້​ມາ​ສ່ວນ​ຕົ້ນຕໍ​ກໍ​ຕ້ອງ​ແມ່ນ​ຄວາມ​ແຂ່ງ​ແກ່ນ​ຂະຫຍັນ​ຂັນ​ແຂງ​ຂອງ​ກຳລັງ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ແລະ ​ເວົ້າຫຍໍ້ໆ​ມາ​ກໍ​ແມ່ນ​ເຈົ້າໜ້າ​ທີ່​ຜູ້​ເຮັດ​ວຽກ​ງານ​ດັ່ງກ່າວ​ຕ້ອງ​ເປັນ​ທີ່​ເພິ່ງ​ຂອງ​ປະຊາຊົນ​ຢ່າງ​ແທ້​ຈິງ ​ແລະ ​ໃນ​ຜ່ານ​ມາ​ນີ້ ຢູ່​ສັງຄົມ​ເຮົາ​ເຖິງ​ວ່າ​ສິ່ງ​ຮ້າຍ​ແຮງ​ດັ່ງກ່າວ​ຍັງ​ບໍ່​ປາກົດ​ມີ​ຫລາຍ ​ແລະ ຮ້າຍ​ແຮງ​ຄື​ປະ​ເທດ​ອື່ນ, ​ແຕ່​ເມື່ອ​ມໍ່ໆ​ມາ​ນີ້ ກໍ​ໄດ້​ເລີ່​ມກໍ່​ຕົວ​ຂຶ້ນ ​ໂດຍ​ສະ​ເພາະ​ການ​ປຸ້ນ​ຈີ້​ຊີງ​ຊັບ-ຂ້າ​ເຈົ້າ​ເອົາ​ຂອງ, ບັນຫາ​ຢາ​ເສບ​ຕິດ, ຄ້າຂາຍ​ເຖື່ອນ ​ແລະ ອື່ນໆ ຈົນ​ເກີດ​ມີ​ສະພາບ​ຄາດ​ຕະກຳ​ຕ່າງໆ​ເກີດ​ຂຶ້ນຢ່າງ​ໜ້າ​ສະຫຍອງ​ຂວັນ. ດັ່ງ​ສື່​ຕ່າງໆ​ຂອງ​ເຮົາ​ໄດ້​ລາຍ​ງານ​ກໍ​ຈົນ​ເກືອບ​ວ່າ​ມີ​ເປັນ​ປະຈຳ ​ແລະ ຂ່າວ​ສ່ວນ​ຫລາຍ​ກໍ​ມີ​ແຕ່​ລາຍ​ງານ​ວ່າ​ເຈົ້າໜ້າ​ທີ່​ພວມ​ດຳ​ເນີນ​ການ​ສືບສວນ-ສອບ​ສວນ​ນຳ​ຈັບ​ຕົວ​ຄົນ​ຮ້າຍ​ມາ​ດຳ​ເນີນ​ຄະດີ​ຕາມ​ລະບຽບ​ກົດໝາຍ​ໃຫ້​ໄດ້​ໂດຍ​ໄວ, ​ແຕ່​ຂ່າວ​ວ່າ​ເຈົ້າໜ້າ​ທີ່​ສາມາດ​ຈັບ​ຕົວ​ຄົນ​ຮ້າຍ ຫລື ຄາດ​ຕະກອນ​ຜູ້​ກໍ່​ເຫດ​ມາ​ລົງ​ໂທດ​ແມ່ນ​ເຫັນ​ໜ້ອຍ, ບາງ​ທີ່​ຈຸດ​ນີ້​ກໍ​ແມ່ນ​ຍ້ອນ​ຄວາມ​ພະຍາຍາມ​ຂອງ​ເຈົ້າໜ້າ​ທີ່​ບໍ່​ແຂງ​ແຮງ​ພໍ​ບໍ ? ຫລື​ວ່າ ​ເຫດຜົນ​ໃດ ? ມີ​ຜູ້​ເສຍ​ຫາຍ​ຫລາຍ​ຄົນ​ເລົ່າ​ສູ່​ຟັງ​ວ່າ: ຖ້າ​ຢາກ​ໃຫ້​ເຈົ້າໜ້າ​ທີ່​ຂະຫຍັນ​ກໍ​ຕ້ອງ​ມີນ້ຳມີ​ຕ່ອນ​ໃຫ້​ເພິ່ນ, ກ່ອນ​ຈະ​ຊອກ​ລົດຈັກ​ຄັນ​ໜຶ່ງ​ທີ່​ຖືກ​ຄົນ​ຮ້າຍ​ລັກ​ໄປ​ຄືນ​ມາ​ໄດ້​ກໍ​ຕ້ອງ​ໝົດ​ຫລາຍ​ເຕີບ ​ເຊິ່ງຍັງ​ບໍ່​ທັນ​ເວົ້າຮອດ​ການ​ນຳ​ຕາມ​ຫາ​ລົດ​ໃຫຍ່​ເສຍ​ຫາຍ ຫລື ຄາດ​ຕະກອນ​ທີ່​ເປັນ​ອັນຕະລາຍ​ຍິ່ງ​ຕ້ອງການ​ໃຊ້​ຈ່າຍ​ຫລາຍ​ກວ່າ​ນີ້. ​ເອົາລະ​ນີ້​ເປັນ​ພຽງ​ຫາງ​ສຽງ​ຕໍ່​ສ່ວນ​ບຸກຄົນ​ເທົ່າ​ນັ້ນ, ສ່ວນ​ກຳລັງ​ເຈົ້າໜ້າ​ທີ່​ເຮົາ​ຄາດ​ວ່າ​ເພິ່ນ​ຈະ​ບໍ່​ເປັນ​ແນວ​ນັ້ນ ​ແລະ ​ເຖິງ​ແນວ​ໃດ​ກໍ​ດີ ຂໍ​ໃຫ້​ກຳລັງ​ເຈົ້າໜ້າ​ທີ່​ເຮົາ​ເປັນ​ທີ່​ເພິ່ງ​ຂອງ​ປະຊາຊົນ​ຢ່າງ​ແທ້​ຈິງ ​ເພື່ອ​ຄວາມ​ສະຫງົບ​ສຸກ ​ແລະ ຄວາມ​ເປັນ​ລະບຽບ​ຮຽບຮ້ອຍ​ຂອງ​ບ້ານ​ເມືອງ.