ຍ້ອນຫຍັງສະພາບຫຍໍ້ທໍ້ຂອງ ຮ້ານບັນເທີງຈຶ່ງມັກເກີດມີຂຶ້ນ

- WhatsApp Image 2017 07 12 at 9 - ຍ້ອນຫຍັງສະພາບຫຍໍ້ທໍ້ຂອງ ຮ້ານບັນເທີງຈຶ່ງມັກເກີດມີຂຶ້ນ

ໂດຍ: ທ່ຽງ​ທຳ

- lattana 1 - ຍ້ອນຫຍັງສະພາບຫຍໍ້ທໍ້ຂອງ ຮ້ານບັນເທີງຈຶ່ງມັກເກີດມີຂຶ້ນ

​ເພ່ືອນ​ຜູ້​ອ່ານ​ທີ່​ຮັກ​ແພງ​ຫລາຍ​ຄົນ​ຄົງ​ຈະ​ເຂົ້າ​ໃຈດີ, ຖ້າ​ເວົ້າ​ເຖິງ​ຮ້ານ​ບັນ​ເທີ​ງກໍ​ຈະ​ໝົດ​ໄປ​ເລື່ອງ​ສຸລາ​ນາລີ ​ເພື່ອ​ຜູ້​ເຂົ້າມາ​ໃຊ້​ບໍລິການ​ໄດ້​ເບີກບານ​ມ່ວນ​ຊື່ນ​ໄດ້​ຮ້ອງ​ລຳ​ທຳ​​ເພງ, ມ່ວນ​ຊື່ນ​ເຮ​ຮາ​ໄປ​ຕາມ​ພາສາ​ຂອງ​ຜູ້​ດື່ມ​ຜູ້​ເມົາ, ບາງ​ຄົນ​ກາຍ​ເຖືອດ​ກໍ​ມັກ​ມີ​ປາກ​ມີ​ສຽງ, ມີ​ການ​ປະພຶດ​ທີ່​ບໍ່​ສາມາດ​ຄວບ​ຄຸມ​ຕົນ​ເອງ​ບໍ່​ໄດ້ ກໍ່​ໃຫ້​ເກີດ​ການ​ຜິດ​ຖຽງ ບາງ​ລາຍ​ກໍ​ເຖິງ​ຂັ້ນລົງ​ໄມ້​ລົງມື​ອາ​ລະວາ​ດຕີ​ກັນ, ຍິງ​ກັນ​ຕາຍ​ກໍ​ມີ, ​ແຕ່​ສ່ວນ​ຜູ້​ເປັນ​ເຈົ້າຂອງ​ກໍ​ບໍ່​ສາມາດ​ຄວບ​ຄຸມ​ໄດ້​ນັບ​ມື້​ເກີດ​ບານ​ປາຍ​ໄປ​ໃນ​ທາງ​ທີ່​ບໍ່​ສອດຄ່ອງ​ແຕະຕ້ອງ​ເຖິງ​ຮີດຄອງ​ປະ​ເພນີ​ອັນ​ດີງາມ​ຂອງ​ຊາດ, ປະປ່ອຍ​ໃຫ້​ມີ​ການ​ມົ້ວສຸມ​ໄພ​ສັງຄົມ ​ແມ່ຈ້າງ​ນາງ​ເລງ​ເກີດ​ຂຶ້ນ ​ແລະ ຮ້າຍ​ແຮງ​ໄປ​ກວ່າ​ນັ້ນ ມີ​ບາງ​ບ່ອນ​ກາຍ​ເປັນ​ບ່ອນ​ມົ້ວສຸມ​ຢາ​ເສບ​ຕິດ​ກໍ​ມີ. ​ແຕ່​ເປັນ​ຫຍັງ​ຜູ້​ປະກອບ​ການ​ເຫລົ່ານັ້ນຈຶ່ງ​ສາມາດ​ຄົງ​ຕົວ​ມາ​ໄດ້ ​ແລະ ​ເປັນ​ຫຍັງ​ເບື້ອງ​ເຈົ້າໜ້າ​ທີ່ ​ແລະ ອຳນາດ​ການ​ປົກຄອງ, ຂະ​ແໜງ​ການ​ກ່ຽວຂ້ອງ​ຈຶ່ງ​ປະປ່ອຍ​ໄປ. ອັນ​ນີ້​ກໍ​ເວົ້າຍາກ ບາງ​ຮ້ານ​ໃຫ້​ປິດ​ມື້ນີ້ ​ແຕ່​ມື້ໜ້າ​ກໍ​​ເປີດ​ມາ​ໃໝ່​ແລ້ວ ​ແລະ ຜູ້​ເປັນ​ເຈົ້າຂອງ​ຫລາຍ​ຄົນ​ກໍ​ຮູ້​ດີ​ວ່າ: “ປິດ​ໄດ້​ກໍ​ຕ້ອງ​ເປີດ​ໄດ້” ​ເພາະ​ທຸກ​ຄົນ​ຍັງ​ມີ​ປາກ​ຖົງ​ປີ້ນ​ຂຶ້ນ​ເບື້ອງ​ເທິງ​ຢູ່. ດັ່ງນັ້ນ ກ່ອນ​ຈະ​ເຮັດ​ອັນ​ໃດ​ກໍ​ຕ້ອງ​ມີ​ທີ່​ເພິ່ງ, ມີ​ການບິ​ແບ່ງ​ຈຶ່ງ​ຢູ່​ນຳ​ກັນ​ໄດ້ ​ແລະ ​ເມື່ອ​ເປັນ​ແນວ​ນີ້ ​ເຮົາ​ຈະ​ແກ້​ໄຂ​ແນວ​ໃດ ? ​ໃນ​ຂະນະ​ທີ່​ບາງ​ຮ້ານ​ມີ​ຄຳ​ສັ່ງ​ໃຫ້​ປິດ ​ແຕ່​ກໍ​ຍັງ​ເປີດ​ບໍລິການ​ຢູ່ ​ແລະ ກໍ​ບໍ່​ມີ​ໃຜ​ສາມາດ​ຢັບຢັ້ງມັນ​ໄດ້. ດັ່ງນັ້ນ ​ເພື່ອ​ຈະ​ເຮັດ​ການ​ປະຕິ​ຮູບ​ດ້ານ​ນີ້​ກໍ​ຕ້ອງ​ໄດ້​ເຮັດ​ມາ​ແຕ່​ເທິງ​ລົງ​ລຸ່ມ ​ແລະ ທຸກຂະ​ແໜງ​ການ ນັບ​ທັງ​ເບື້ອງ​ເຈົ້າໜ້າ​ທີ່​ກໍ​ຈະ​ຕ້ອງ​ໄດ້​ເປັນ​ຫລັກ​ໃນ​ການ​ກວດກາ​ຕິດຕາມ​ບ່ອນ​ໃດ, ຮ້ານ​ບັນ​ເທີ​ງ​ໃດ​ຫາກ​ມີ​ການ​ເຄື່ອນ​ໄຫວ​ບໍ່​ຖືກຕ້ອງ ກໍ​ຕ້ອງ​ມີ​ມາດ​ຕະການ​ເດັດຂາດ ​ເພື່ອ​ໃຫ້​ຢຸດຕິ ຫລື ມີ​ການ​ປັບປຸງ​ແກ້​ໄຂ​ໃຫ້​ໄປ​ຕາມ​ລະບຽບ​ແທ້, ບໍ່​ແມ່ນ​ວ່າ​ເວົ້າ​ແນວ​ໜຶ່ງ​ແຕ່​ໄປ​ເຮັດ​ແນວ​ໜຶ່ງ. ຖ້າ​ປະປ່ອຍ​ສະພາບ​ແບບ​ນີ້​ແກ່ຍາວ​ໄປ ກໍ​ຈະ​ເປັນ​ຈຸດ​ຕົ້ນຕໍ​ເພື່ອ​ເບື່ອ​ເມົາ​ຊາວ​ໜຸ່ມ​ເຍົາວະ​ຊົນ​ເຮົາ​ກໍ​ເປັນ​ໄດ້.