ປັບໃໝຜູ້​ລະ​ເມີດ​ລະບຽບ​ຈະລາຈອນ 10 ເທົ່າຍັງສືບຕໍ່

- WhatsApp Image 2017 07 12 at 9 - ປັບໃໝຜູ້​ລະ​ເມີດ​ລະບຽບ​ຈະລາຈອນ 10 ເທົ່າຍັງສືບຕໍ່

ຫົວໜ້າພະແນກຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ, ມາດຕະການປັບໃໝ 10 ເທົ່າຕໍ່ຜູ້ລະເມີດລະບຽບການສັນຈອນ ກໍຄືມາດຕະການຂອງອົງການປົກຄອງນະຄອນຫລວງກໍານົດອອກເພື່ອຈັດຕັ້ງປະຕິບັດໂຄງການວຽງຈັນສະອາດ ຫລື ດໍາລັດຂອງນາຍົກລັດຖະມົນຕີເລກທີ 188/ນຍ  ແມ່ນເຈົ້າໜ້າທີ່ຍັງປະຕິບັດເປັນປົກກະຕິ ແລະ ເຂັ້ມງວດ, ໂດຍສະເພາະຕໍ່ຜູ້ທີ່ລະເມີດດໍາລັດ 188 ໃນມາດຕາ 14 ທີ່ກໍານົດໄວ້ວ່າ: ການຈອດລົດຢູ່ບ່ອນຫ້າມຈອດ, ຈອດທາງຄ້ອຍ, ທາງໂຄ້ງ, ຈອດຢູ່ຫົວຂົວ, ກາງຂົວ, ຈອດຊ້ອນກັນ, ຈອດໃກ້ທາງຄົບ ຫລື ຈອດໃກ້ທາງແຍກໃນໄລຍະ 15 ແມັດແມ່ນຈະຖຶກປັບໃໝຄູນ 10 ເທົ່າຂອງຄ່າປັບໃໝຈາກປົກກະຕິຄື: ລົດຈັກ 30 ພັນກີບ, ລົດຈັກ 3 ລໍ້ 50 ພັນກີບ, ລົດເກັງ, ກະບະ, ລົດຈິບ, ລົດຕູ້ 70 ພັນກີບ, ລົດໂດຍສານ, ລົດບັນທຸກ 150 ພັນກີບ ແລະ ລົດບັນທຸກ 10 ລໍ້ຂຶ້ນໄປ 2 ແສນກີບ.

- lattana 1 - ປັບໃໝຜູ້​ລະ​ເມີດ​ລະບຽບ​ຈະລາຈອນ 10 ເທົ່າຍັງສືບຕໍ່

ສໍາລັບມາດຕາ 26 ໄດ້ລະບຸວ່າ: ການນໍາໃຊ້ຂອບເຂດການສັນຈອນບໍ່ຖືກຕ້ອງ ເຊັ່ນ: ຕັ້ງລໍ້, ຕັ້ງໂຕະ,​ ກາງເຕັ້ນວາງຂາຍສີນຄ້າປະເພດຕ່າງໆໃສ່ທາງ, ບ່າທາງ ແລະ ທາງຄົນຍ່າງ. ນອກນີ້, ເຈົ້າຂອງສໍານັກງານ ແລະ ອາຄານທີ່ຕັ້ງຢູ່ແຄມທາງຫາກອະນຸຍາດໃຫ້ມີການກະທໍາດັ່ງກ່າວແມ່ນຈະຖືກປັບໃໝຄູນ 10 ເທົ່າຈາກຄ່າປັບໃໝປົກກະຕິຄື: 50 ພັນກີບກໍຈະເພີ່ມເປັນ 5 ແສນກີບ.

ສ່ວນມາດຕາ 38 ໄດ້ກໍານົດວ່າ: ຖ້າຜູ້ຂັບຂີ່ ຫລື ເຈົ້າຂອງລົດໄດ້ບັນທຸກຫີນ, ດິນ, ຊາຍ ບໍ່ມີການປົກປິດຫຸ້ມຫໍ່ດີ ເຮັດໃຫ້ສິ່ງທີ່ບັນທຸກຕົກເຮ່ຍໃສ່ທາງ ຫລື ລົດແລ່ນເຂົ້າ-ອອກສະຖານທີ່ກໍ່ສ້າງໄດ້ສ້າງຄວາມເປື້ອນເປີະໃສ່ທາງຈະຖືກປັບໃໝ 1 ແສນກີບຕໍ່ຖ້ຽວຕໍ່ຄັນ, ພ້ອມທັງຮັບພິຊອບຄ່າໃຊ້ຈ່າຍຕ່າງໆໃນການອານາໄມເສັ້ນທາງທີ່ຕົນໄດ້ເຮັດເປື້ອນ. ນອກນີ້, ຜູ້ຂັບຂີ່ ຫລື ເຈົ້າຂອງລົດຂົນສົ່ງໂດຍສານທຸກປະເພດຫາກໄດ້ຖີ້ມຂີ້ເຫຍື້ອ,​ ຖົງຢາງ, ຖົງນໍ້າ ຫລື ສິ່ງເສດເຫລືອຕ່າງໆລົງພື້ນທາງຈະຖືກປັບໃໝ 2 ເທົ່າຈາກຄ່າປັບໃໝປົກກະຕິ 50 ພັນກີບ.

ເຈົ້າໜ້າທີ່ ໃຫ້ຮູ້ວ່າ: ມາດຕະການປັບໃໝຄືດັ່ງກ່າວ ເພື່ອເນັ້ນໃຫ້ຜູ້ໃຊ້ລົດໃຊ້ຖະໜົນ ກໍຄືສັງຄົມໄດ້ເອົາໃຈໃສ່ເຄົາລົບລະບຽບຈະລາຈອນສູງຂຶ້ນ ແລະ ສ້າງໃຫ້ສັງຄົມມີຄວາມເປັນລະບຽບຈົບງາມຈະເລີນສີວິໄລ.