ກອງປະຊຸມເຈົ້າໜ້າທີ່ອາວຸໂສອາເຊັມທີ່ມຽນມາເພື່ອກຽມຄວາມພ້ອມໃຫ້ກອງປະຊຸມອາເຊັມຄັ້ງທີ 13

- advert banner 728 90 728x90 - ກອງປະຊຸມເຈົ້າໜ້າທີ່ອາວຸໂສອາເຊັມທີ່ມຽນມາເພື່ອກຽມຄວາມພ້ອມໃຫ້ກອງປະຊຸມອາເຊັມຄັ້ງທີ 13

ໃນ​ວັນ​ທີ 6-8 ກັນຍານີ້, ທ່ານຫົວໜ້າກົມເສດຖະກິດກະຊວງ​ການ​ຕ່າງປະເທດ ທັງ​ເປັນ​ຫົວໜ້າ​ເຈົ້າ​ໜ້າທີ່​ອາວຸ​ໂສອາເຊັມ ​ສປປ ລາວ ໄດ້​ນຳພາ​ຄະນະ​ຜູ້​ແທນລາວ​​ເຂົ້າ​ຮ່ວມ​ກອງ​ປະຊຸມ​ເຈົ້າ​ໜ້າທີ່​ອາວຸໂສອາຊີ-ເອີຣົບທີ່ເນປີດໍ, ປະເທດມຽນມາ ເພື່ອສືບຕໍ່ປຶກສາຫາລືການກະກຽມເນື້ອໃນໃຫ້ແກ່ກອງປະຊຸມລັດຖະມົນຕີຕ່າງປະເທດອາຊີ-ເອີຣົບ ຫລື ອາເຊັມຄັ້ງທີ 13 ທີ່ສາທາລະນະລັດ ສະຫະພາບມຽນມາຈະເປັນເຈົ້າພາບຈັດຂຶ້ນໃນວັນທີ 20-21 ພະຈິກນີ້.

- lattana 1 - ກອງປະຊຸມເຈົ້າໜ້າທີ່ອາວຸໂສອາເຊັມທີ່ມຽນມາເພື່ອກຽມຄວາມພ້ອມໃຫ້ກອງປະຊຸມອາເຊັມຄັ້ງທີ 13

ກອງປະຊຸມໄດ້ທົບທວນຄືນການຮ່ວມມືໃນໄລຍະຜ່ານມາ ແລະ ວາງທິດທາງໃນຕໍ່ໜ້າລະຫວ່າງອາຊີ-ເອີຣົບ ເປັນຕົ້ນແມ່ນການກະຕຸກຊຸກຍູ້ກົນໄກການຮ່ວມມືລະຫວ່າງສອງທະວີບໃຫ້ມີຄວາມຄ່ອງຕົວ ແລະ ເປັນຮູບປະທໍາຫລາຍຂຶ້ນ ກໍຄືການຈັດຕັ້ງຜັນຂະຫຍາຍເນື້ອໃນຈິດໃຈກອງປະຊຸມສຸດອາຊີ-ເອີຣົບຄັ້ງທີ 11 ໂດຍສະເພາະທິດທາງການເຊື່ອມຈອດທາງດ້ານເສດຖະກິດ, ດ້ານການຄ້າຜ່ານລະບົບອິນເຕີແນັດ (E-Commerce), ການລົງທຶນ, ຄົມມະນາຄົມ-ຂົນສົ່ງ ແລະ ວັດທະນະທໍາ ເພື່ອໃຫ້ສອດຄ່ອງກັບທ່າອ່ຽງຂອງການເຊື່ອມໂຍງໃນຍຸກປັດຈຸບັນ ກໍຄືການກ້າວເຂົ້າສູ່ທົດສະວັດທີ 3 ຂອງການຮ່ວມມືອາເຊັມ. ນອກນັ້ນ, ກອງປະຊຸມຍັງໄດ້ຫາລືກ່ຽວກັບຮ່າງຖະແຫລງການຂອງປະທານກອງປະຊຸມລັດຖະມົນຕີຕ່າງປະເທດຄັ້ງທີ 13 ໂດຍໄດ້ເນັ້ນໃຫ້ຮ່າງຖະແຫລງການດັ່ງກ່າວສັ້ນ, ກະທັດຮັດ, ມີເນື້ອໃນຄົບຖ້ວນ ແລະ ກວມລວມບັນຫາຕ່າງໆທີ່ສອງທະວີບໃຫ້ຄວາມສົນໃຈຮ່ວມກັນ.

ກ່ອນໜ້າການເຂົ້າຮ່ວມກອງປະຊຸມ, ຄະນະຜູ້ແທນລາວຍັງໄດ້ເຂົ້າຮ່ວມກອງປະຊຸມໜ່ວຍງານລິເລີ່ມດ້ານການເຊື່ອມຈອດອາເຊັມຄັ້ງທີ 2 ໃນວັນທີ 6 ສິງຫາ 2017 ເພື່ອສືບຕໍ່ປຶກສາຫາລືການຄັດເລືອກປະທານຮ່ວມຈາກອາຊີ ແລະ ເອີຣົບຝ່າຍລະ 2 ປະເທດ ແລະ ຫາລືການກໍານົດຄໍານິຍາມດ້ານການເຊື່ອມຈອດອາຊີ-ເອີຣົບ ເພື່ອແນໃສ່ເຮັດໃຫ້ການເຊື່ອມຈອດລະຫວ່າງສອງທະວີບເປັນຮູບປະທໍາຫລາຍຂຶ້ນ. ໜ່ວຍງານດັ່ງກ່າວຖືກສ້າງຕັ້ງຂຶ້ນຢູ່ໃນກອງປະຊຸມສຸດຍອດອາເຊັມຄັ້ງທີ 11 ທີ່ອູລານບາຕໍ, ປະເທດມົງໂກລີໃນປີ 2016.

ຂອບການຮ່ວມມືອາຊີ-ເອີຣົບ ASEM ສ້າງຕັ້ງຂຶ້ນໃນປີ 1996 ແລະ ປັດຈຸບັນມີປະເທດສະມາຊິກ 51 ປະເທດຈາກອາຊີ ແລະ ເອີຣົບ ແລະ ສອງອົງການຈັດຕັ້ງເຂົ້າຮ່ວມ (ກອງເລຂາອາຊຽນ ແລະ ສະຫະພາບເອີຣົບ). ໃນປີ 2012 ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາເຊັມຄັ້ງທີ 9.