ສື່ໃໝ່ສື່ເກົ່າກໍມີຄຸນຄ່າເທົ່າກັນ

- WhatsApp Image 2017 07 12 at 9 - ສື່ໃໝ່ສື່ເກົ່າກໍມີຄຸນຄ່າເທົ່າກັນ

ໂດຍ: ກ້ອງສ່ອງ ອິດສະຫຼະ

- lattana 1 - ສື່ໃໝ່ສື່ເກົ່າກໍມີຄຸນຄ່າເທົ່າກັນ

ໃນ​ເງື່ອນ​ໄຂທີ່​ວິທະຍາສາດ​ ແລະ ​ເຕັກ​ໂນ​ໂລ​ຊີ​ພວມ​ມີ​ການ​ພັດທະນາກ້າວໜ້າ​ລ້ຳ​ຍຸກແລະ​ ທັນ​ສະ​ໄໝ​​ໄປ​ຕິກໆ ໄດ້​ກາຍ​ເປັນໜຶ່ງ​ໃນ​ປັດ​ໃຈ​ທີ່ສ້າງ​ໃຫ້ລະບົບ​ແນວ​ຄິດ​ ແລະ ​ການ​ກະທໍາ​ຂອງ​ຄົນ​ເຮົານັບ​ມື້ມີ​ການ​ປ່ຽນ​ແປງ​ໄປ​ຢ່າງ​ຕັ້ງໜ້າ. ນອນ​ຢູ່​ໃນ​ບັນຫາ​ຕ່າງໆ​ທີ່​ເກີດ​ຂຶ້ນ​ເຊິ່ງກາຍ​ເປັນ​ຈິດຕະສາດສັງຄົມ ກໍ​ຄື​ຄວາມ​ຮັບ​ຮູ້​ຈາກ​ສິ່ງ​ໃໝ່​ໆ​ໄດ້ເຂົ້າ​ມາ​ທົດ​ແທນ​ອັນ​ເກົ່າ​ຢ່າງ​ຕໍ່​ເນື່ອງ ​ແລະ​ ເປັນ​ລະບົບນັ້ນກໍ​ຄື​ສື່​ອອນລາຍ​ ຫຼື ​ທີ່​ເອີ້ນ​ກັນວ່າ: “ຂ່າວ​ໃໝ່”. ​ໃນ​ສັງຄົມ​ຍຸກປັດຈຸບັນ​ ​ເຖິງວ່າ​ສື່​ອອນ​ລາຍ ຫຼືວ່າ ສື່ໃໝ່​ມັນ​ເກີດມາ​ຕາມ​ຫຼັງ, ແຕ່​ມັນຍິ່ງ​ດັງ​ກວ່າ​ເກົ່າ ​ຍ້ອນ​ວ່າ​ມັນ​​ທັນ​ສະ​​ໄໝ​ ແລະ ​ມີ​ຂໍ້​ດີ​ໃນ​ຫຼາຍ​ດ້ານ ​ເປັນ​ຕົ້ນ​ການ​ສົ່ງ​ຂໍ້​ມູນຂ່າວສານ​ຜ່ານ​ສື່​ອອນ​ລາຍ​ມັນ​ວ່ອງ​ໄວ​ທັນ​ໃຈ ​ສາມາດ​ຮູ້​ເຫັນ​ໄດ້​ຢ່າງ​ຄົບ​ເຄື່ອງ ແລະ ຊັດເຈນ ທັງ​ໄດ້​ເບິ່ງ,​ ໄດ້​ຊົມ​, ໄດ້​ຟັງ​ບັນດາ​ເຫດການ​​ທີ່​ມັນ​ເກີດ​ຢູ່​ພາຍ​ໃນ​ພາຍ​ນອກ ​ຫຼື​ວ່າ ​ຢູ່ໃນ​ທົ່ວ​ໂລກ​ໄດ້​ຢ່າງສະດວກ​ສະບາຍ. ຖ້າ​ຈະ​ເວົ້າ​ແຈ້ງ​ແລ້ວ ການ​ບໍລິ​ໂພ​ກບັນດາ​​ແຫຼ່ງຂໍ້​ມູນຂ່າວ​​ສານ​ຕ່າງໆ​ຜ່ານ​ສື່​ອອນ​ລາຍມັນ​ໃຊ້ເວລາ​ພຽງ​ສັ້ນ​ໆ​ກະທັດ​ຮັດແບບ​ບໍ່​ໄດ້​ເສຍ​​ເວລາ​ພໍ​ທີ່​ຈະ​ມາ​ນັ່ງ​ອ່ານ, ນັ່ງ​ຟັງ,​ ​ນັ່ງ​ຄິດ​ ແລະ​ ນັ່ງ​ວິ​ເຄາະ​ເຈາະ​ເລິກ ​ເພາະ​ທຸກ​ສິ່ງ​ທຸກ​ຢ່າງ​ມັນ​ມີ​ຢູ່​ໃນ​ໂນ​ດບຸກ​ ແລະ ​ໂທລະສັບ​ມື​ຖື ຈະໄປໃສມາໃສກໍເບິ່ງໄດ້ເຫັນໄດ້ ແລະ ຮູ້ໄດ້ສາລະພັດ​ຢ່າງ. ນັ້ນ​ຄືສິ່ງ​ທີ່​ເຮັດ​ໃຫ້ສື່​ໃໝ່​ມີບົດບາດຕໍ່ສັງ​ຄົມ ​ແລະ ຕໍ່​ຄົນ​ເຮົາ​ໃນ​ຍຸກ​ໂລກາ​ພິວັດ.​ ແນວ​ໃດ​ກໍດີ, ​ຕາມເຮົາ​ວ່າ ​ສື່​ໃໝ່​​ມັນກໍມີ​ຈຸດ​ອ່ອນ​ ແລະ ອັນ​ຈໍາກັດຢູ່​ບ່ອນ​ວ່າ ມັນກໍບໍ່​ສາມາດ​ສະໜອງຂໍ້​ມູນທຸກ​ແງ່​ມຸມ​ແລະ​ ທຸກ​​ເຫດການ​ທີ່​ເກີດ​ຂຶ້ນໃນສັງຄົມບ້ານເມືອງໄດ້ຕາມຄວາມຮຽກຮ້ອງຕ້ອງການຂອງຄົນເຮົາ. ອັນ​ສອງ​ມາ​ທຸກ​ຂໍ້​ມູນ​ຂ່າວສານ​ທີ່​ມີ​ໃນ​ສື່​ອອນ​ລາຍ​ມັນ​ກໍມີ​ທັງ​ອັນ​ດີ ​ແລະ​ ອັນ​ບໍ່​ດີ, ມັນມີ​ທັງ​ຂອງ​ຈິງ ​​ແລະ ຂອງ​ປອມ​ ແລະ ມີ​ອັນ​ຕັ້ງໜ້າ ​ແລະ​ ຫຍໍ້​ທໍ້. ສະ​ນັ້ນ, ຖ້າ​ເຮົາ​ບໍ່​ມີ​ຫຼັກ​ໝັ້ນ​ໃນ​ຕົນ​ເອງແດ່ ​ທັງ​ບໍ່​ມີ​ວິຈາລະ​ນາ​ຍານ​ໃນ​ການ​ບໍລິ​ໂພ​ກກໍ​ຈະເຮັດໃຫ້ເຮົາ​ຕົກ​ຢູ່​ໃນ​ຫຼຸມ​ຂອງ​ສື່​ອອນ​ລາຍ​ ທັງ​ອັນ​ດີ ​ແລະ ສິ່ງ​ຫຍໍ້​ທໍ້. ຈາກນັ້ນກໍເກີດແນວຄິດໄຄ່ວເຂແລ້ວສະແດງອອກໃນດ້ານພຶດຕິກໍາ​ຖືເອົາ​ປາກົດການ​ມາ​ເປັນ​ຕົວ​ຕັ້ງໂດຍບໍ່​ຄໍານຶງ​ເຖິງ​ທາດ​ແທ້​, ກໍ​ເລີຍ​ເຮັດ​ໃຫ້ການ​ຮັບ​​ເອົາ​ຂໍ້​ມູນ​ຂ່າວສານ​ເປັນອັນຜິດພາດ ເປັນ​ຕົ້ນ​ແມ່ນ​ເວົ້າ​ເລື່ອງ​ຫວຍ​ຂູດ​ວ່າ​ມີຜູ້​ຖືກ 100 ລ້ານ ວ່າ​ຊັ້ນ ! ​ແຕ່​ຜ່ານ​ການ​ພິສູດ​ຢ່າງ​ລະອຽດ​ອ່ອນ​ພັດ​ວ່າ​ມັນເປັນ​ຂອງ​ປອມ.ສຸດ​ທ້າຍ​ມັນກໍລາມ​ພະ​ລາມ​ຈົວ​ໄປ​ຮອດ​ຫວຍ​ທວາຍ​ເຕະບານ ​ແລະ ​ຫວຍ​ອື່ນໆຕ້ອງ​ໄດ້​ແຈບ​ມັບ​ໄປ​ຕາມໆ​ກັນ​ໃນ​ເຄືອ​ຂ່າຍຂອງ​ຫວຍ​ພັດທະນາ​ໄປ​ຕາມ​ວາດ.

​ໄປ​ຄຽງ​ຄູ່​ກັບ​ວົງ​ການ​ສື່​ໃໝ່​ໄດ້​​ເກີດ​ຂຶ້ນ ​ແລະ ມີ​ການ​ພັດທະນາ​ກ້າວ​ໄປ​ກັບ​ຂະ​ບວນວິວັດທະນາ​ການ​ຂອງ​ໂລກ, ​ສື່​ເກົ່າ​ໝາຍ​ຄວາມ​ວ່າ​ສື່​ສິ່ງ​ພິມ​ຕ່າງໆ​ກໍ​ມີ​ການ​ພັດທະນາ​ກ້າວ​ໄປ​ພ້ອມໆ​ກັນ​ ເປັນ​ຕົ້ນ​​ໃນສະ​​ໄໝ​ກ່ອນ​ເວົ້າ​ເຖິງ​ໜັງສືພິມພວກ​ເຮົາຂຽນ​​ເອົາ​ແລ້ວ​ກໍ​ໄປ​ອ່ານ​ສູ່​ກັນ​ຟັງ, ຕໍ່​ມາ​ກໍ​ຂຽນ​ເປັນ​ຫຼາຍ​ສະບັບ, ກ້າວ​ໄປ​ແກ່ວ​ງ​ໃສ່​ຈັກ​ໂລ​ນຽວ, ຕໍ່​ມາ​ກໍ​ມີ​ເຄື່ອງ​ຈັກ​ພິມ​ກ້າວ​ຂຶ້ນ​ມີ​ເຄື່ອງ​ຈັກ​ທີ່​ທັນ​ສະ​ໄໝພິມ​ສອດ​ສີ​ ແລະ​ ອື່ນໆ ຂໍ​ວ່າ​ແຕ່​ເຮົາ​ຕ້ອງການ. ສ່ວນວ່າ​ທາງດ້ານ​ເນື້ອ​ໃນ​ນັ້ນກໍເຫັນ​ວ່າ​​ມີ​ຫຼາຍດ້ານທີ່​ອຸດົມສົມບູນດ້ວຍ​ເນື້ອ​ຫາ​ສາລະ​ຕ່າງໆ ​ເປັນ​ຕົ້ນ​​ຂໍ້​ມູນ​​​ຂ່າວສານ ​ແລະ ສາລະ​ໜ້າ​ຮູ້​ປະ​ເພດ​ຕ່າງໆ​ທີ່​ມັນ​ເກີດ​ຢູ່​ໃນ​ສັງຄົມ ​ແລະ ​ໃນ​ໂລກ,​ ແຕ່​ຈຸດພິ​ເສດ​​ຄ້າງ​ຄາ​ຂອງ​ສື່​ເກົ່າ​ນັ້ນເສຍທີແຕ່ມັນ​ອ່າວ​ຊັກຊ້າ ​ໂດຍ​ສະ​ເພາະ​ແມ່ນ​ໜັງສື​ພິ​ມກວ່າ​ຈະ​ໄດ້​ອ່ານ​ແມ່ນ​ຕ້ອງ​ໃຊ້​ເວລາ​ເປັນ​ມື້​ສອງ​ມື້. ຈຸ​ດໜັກ​ແມ່ນ​ຢູ່​ເຂດ​ຊົນນະບົດ​ສອກຫຼີກ​ຫ່າງ​ໄກ​ຫາ​ໜັງສືພິມ​ຈະ​ມາ​ອ່ານ​ກໍ​ບໍ່​ມີ ​ຍ້ອນການ​ແຈກ​ຢາຍ​ກໍ​ບໍ່​ທົ່ວ​ເຖິງ​ສົມທົບກັບ​ການ​ພິມ​ຈໍາໜ່າຍ​ກໍມີ​ອັນ​ຈໍາກັດ​ ແລະ ​ນັບ​ທັງ​ການ​ບໍລິຫານ​ຈັດການ​ຂອງ​ຜູ້​ຜະລິດ​, ຜູ້​ຈໍາໜ່າຍ​ ນັບ​ທັງຜູ້ບໍລິການກໍມີ​ອັນຂ້ອງໆຄາໆ​ກ້ຽວ​ກອດພັນ​ກັນ​ປານ​ເຈັກ​ຂາຍ​ລວດ, ຊ້ຳບໍ່ໜໍາສົມທົບ​ກັບ​ຄົນ​ລາວ​ເຮົາອ່າວ​ຂີ້ຄ້ານ​ອ່ານໜັງສື​ພິມ​ ແລະ ​ສື່​ສິ່ງ​ພິມ​ຕ່າງໆ​ແດ່​ມັນ​ກໍ​ເລີຍ​ເຂົ້າກັນ​ເປະປາ​ນ​ເປົາ​ໝາກ​ແປດ​ຈຶ່ງເຮັດ​ໃຫ້ວົງ​ການ​ສື່​ເກົ່າ​ມັນ​ຕົກລະດັບດ້ານ​ຄຸນຄ່າ​ວ່າ​ມັນ​ເປັນອັນ​ຫລ້າ​ຫຼັງ ວ່າ​ຊັ້ນ !.

​ເຖິງ​ຢ່າງ​ໃດ​ກໍດີ, ​ເທົ່າ​ທີ່​ຜູ້​ຂຽນ​ໄດ້​ຕິດຕາມ​ເບິ່ງ​ວົງ​ການ​ສື່​ຂອງ​ລາວ​ເຮົາ​ ບໍ່​ວ່າ​ສື່​ໃໝ່​ສື່​ເກົ່າ​ມັນ​ກໍມີ​ຄຸນຄ່າ​ເທົ່າ​ກັນ. ​ເປັນ​ຫຍັງ​ຈຶ່ງ​ວ່າ​ແນວ​ນັ້ນ ? ຍ້ອນວ່າ​ສື່​ໃໝ່ສ່ວນ​ໜຶ່ງ​ເພິ່ນ​ກໍ​ເກັບ​ກໍາເອົາ​ຂ່າວ​ຄາວ​ໃນ​ໜັງສືພິມ​ໄປ​ລົງ​ຂ່າວເໝືອນ​ກັນ​ ເຫຼືອ​ນັ້ນຈຶ່ງ​ແມ່ນ​ຂ່າວ​ເນື້ອຫາສາລະແບບ​ທົ່ວ​ໄປ ນັບ​ທັງ​ເລື່ອງ​ຈິງ​ເລື່ອງ​ປອມ​​ ແລະ ອັນ​ຕັ້ງໜ້າ​ຫຍໍ້​ທໍ້. ສະຫຼຸບ​ແລ້ວ, ລະຫວ່າງ​ສື່​ເກົ່າ​ກັບ​ສື່​ໃໝ່​ກໍ​ມີ​ຂໍ້​ດີ​​ຂໍ້ເສຍທີ່ແຕກ​ຕ່າງ​ກັນໄປ. ນອກຈາກ​ນັ້ນ ກໍ​ມີ​ການ​ພົວພັນ​ກັນ​ຢ່າງ​ກົມກຽວ​ດ້ວຍຫຼາກ​ຫຼາຍ​ສີສັນ​ປຽບ​ເໝືອນ​ປະເພດອາຫານທີ່ຢັ່ງ​ຢາຍຢູ່ໃນໂຕະ ຫຼື ຢູ່ໃນຕະຫຼາດ ສຸດແລ້ວແຕ່ຜູ້ຈະເລືອກຊື້ເລືອກຂາຍ, ເລືອກກິນເລືອກໃຊ້ຕາມອັດທະຍາໃສຂອງແຕ່ລະຄົນ. ແຕ່ອັນສໍາຄັນທີ່ສຸດແມ່ນຂອດປັງປຸງຕົນເອງໃຫ້ຢູ່ລອດ ແລະ ຢູ່ໄດ້ຢ່າງໝັ້ນຄົງ. ຊາທິດກໍ່າຄິດ ຖ້າຫາກສື່ເກົ່າເຮັດຕາມສະຕາຍອັນເກົ່າ, ເຮັດຄືເກົ່າ ແລະ ເວົ້າແບບອັນເກົ່າ, ຊໍ້າ​ບໍ່​ໜໍາ​ມີ​ອັນ​ຜິດໆ​ຖືກໆ​ເຮັດຫຍັງກໍພໍແຕ່ມ້າມແປະພຸງຢຸດໆຢ່ອນໆ ແລະ ເຮັດຄືໂສ້ບໍ່ເຄັ່ງ ແນ່ນອນສື່ເກົ່າກໍຈະເສຍທ່າໃຫ້ສື່ໃໝ່ມາກືນກິນ​ໂດຍ​ປະລິຍາຍ​ໄປ​ເຂົ້າ​ຢູ່ໃນຈິດໃຈຂອງຄົນເຮົາປານ​ຄົນ​ຕິດ​ຝິ່ນ.