ລາວເຂົ້າຮ່ວມກອງປະຊຸມຄັ້ງທີ 1 ຂອງຄະນະຮັບຜິດຊອບຈັດການແຂ່ງຂັນສີມືແຮງງານອາຊຽນຄັ້ງທີ 12

- WhatsApp Image 2017 07 12 at 9 - ລາວເຂົ້າຮ່ວມກອງປະຊຸມຄັ້ງທີ 1 ຂອງຄະນະຮັບຜິດຊອບຈັດການແຂ່ງຂັນສີມືແຮງງານອາຊຽນຄັ້ງທີ 12

ຄະນະຜູ້ແທນລາວນຳໂດຍທ່ານ ຄອນສີ ມະຫາວົງ ຮອງຫົວໜ້າ ກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ, ໄດ້ເຂົ້າຮ່ວມກອງປະຊຸມຄັ້ງທີ 1 ຂອງຄະນະຮັບຜິດຊອບຈັດການແຂ່ງ ຂັນສີມືແຮງງານອາຊຽນຄັ້ງທີ 12 (The 1st Organizing Committee Meeting(OCM) for the 12th ASEAN Skills Competition(ASC), ເຊິ່ງຈັດຂຶ້ນໃນລະຫວ່າງວັນທີ 11-12 ກັນຍານີ້, ທີ່ປະທດໄທ, ໂດຍການເປັນປະທານຂອງທ່ານ ສິຣິໄຊ ດິດສະກຸນ ລັດຖະມົນຕີກະຊວງແຮງງານແຫ່ງປະເທດໄທ, ເພື່ອກຳນົດເນື້ອໃນ, ຫຼັກການ ແລະ ແຜນການຂອງການແຂ່ງຂັນຂຶ້ນເປັນບ່ອນອີງໃຫ້ແກ່ບັນດາປະເທດສະມາຊິກອາຊຽນ.

- lattana 1 - ລາວເຂົ້າຮ່ວມກອງປະຊຸມຄັ້ງທີ 1 ຂອງຄະນະຮັບຜິດຊອບຈັດການແຂ່ງຂັນສີມືແຮງງານອາຊຽນຄັ້ງທີ 12

ການແຂ່ງຂັນສີມືແຮງງານອາຊຽນມີຂຶ້ນທຸກໆ 2 ປີ, ເຊິ່ງຄັ້ງທີ 1 ຈັດ ຂຶ້ນທີ່ປະເທດມາເລເຊຍໃນປີ1996ໂດຍມີ4ປະເທດເຂົ້າຮວ່ມການແຂ່ງຂັນຄື: ອິນໂດເນເຊຍ, ມາເລເຊຍ, ຟິລິບປິນ ແລະໄທ; ຄັ້ງທີ 11, ໄດ້ຈັດຂຶ້ນໃນ ປີ 2016, ທີ່ປະເທດມາເລເຊຍ, ແລະ ຄັ້ງທີ 13, ຈະຈັດຂຶ້ນທີ່ປະເທດສິງກະໂປໃນ ປີ 2020. ສຳລັບລາວເຮົາ ໄດ້ເລີ່ມເຂົ້າຮ່ວມແຂ່ງຂັນຄັ້ງທີ 3, ທີ່ບາງກອກ, ປະເທດໄທໃນປີ 2001 ແລະ ໄດ້ເຂົ້າຮ່ວມຕະຫຼອດມາ, ເຊິ່ງສາມາດຍາດໄດ້ຜົນງານຕາມຈຸດປະສົງ ແລະ ລະດັບຄາດໝາຍໃນແຕ່ລະຄັ້ງທັງ ສາມາດນຳໄປຜັນຂະຫຍາຍ ແລະ ຖ່າຍທອດເຂົ້າໃນການພັດທະນາສີມື ແຮງງານລາວໃຫ້ດີຂຶ້ນຕາມລຳດັບ.

ທ່ານລັດຖະມົນຕີກະຊວງແຮງງານແຫ່ງປະເທດໄທ, ໄດ້ຍົກໃຫ້ເຫັນ ຄວາມໝາຍ ແລະ ຄວາມສຳຄັນຂອງການແຂ່ງຂັນສີມືແຮງງານອາຊຽນ ເຊິ່ງເປັນການຊ່ວຍພັດທະນາກຳລັງແຮງງານ ກໍຄືການພັດທະນາຊັບພະຍາ ກອນມະນຸດ, ການເຊື່ອມໂຍງອາຊຽນ ແລະ ພາກພື້ນ. ໃນການເຂົ້າຮ່ວມຂອງ ສປປ ລາວ, ຄະນະຜູ້ແທນ ໄດ້ສະແດງເຈດຈຳນົງຂອງ ສປປ ລາວ ຕາມທິດທາງ ແລະ ນະໂຍບາຍແຫ່ງຊາດໃນການປະກອບສ່ວນ ແລະ ເຂົ້າ ຮ່ວມແຂ່ງຂັນສີມືແຮງງານອາຊຽນທີ່ເປັນການແລກປ່ຽນບົດຮຽນເປັນການພັດທະນາຄວາມຮູ້ ແລະ ຄວາມສາມາດຂອງຊາວໜຸ່ມລາວ ແລະ ທັງເປັນອີກເວທີໜຶ່ງໃນການຮັດແໜ້ນສາຍສຳພັນ ແລະ ຄວາມສາມັກ ຄີອັນໂອບເອື້ອອາລີເພື່ອຄວາມເປັນນ້ຳໜຶ່ງໃຈດຽວຂອງບັນດາປະເທດສະມາຊິກອາຊຽນກໍຄືການຫັນວິໃສທັດໃຫ້ເປັນຮູບປະທຳໃນຂອບຂອງອາຊຽນ.

ກອງປະຊຸມຄັ້ງນີ້ໄດ້ກຳນົດແຜນການແຂ່ງຂັນສີມືແຮງງານອາຊຽນຄັ້ງທີ 12 ທີ່ຈະມີ ຂຶ້ນໃນລະຫວ່າງວັນທີ 26 ສິງຫາ-4 ກັນຍາ 2018, ທີ່ນົນທະບູລີ, ໂດຍປະເທດໄທເປັນເຈົ້າພາບ; ຊຶ່ງຈະມີ 24 ສາຂາວິຊາທີ່ຈະແຂ່ງຂັນ ແລະ 1 ສາຂາ ວິຊາສາທິດ ແລະ ຄາດວ່າຈະມີຜູ້ເຂົ້າແຂ່ງຂັນທັງໝົດ 332 ຄົນ. ສ່ວນລາຍລະອຽດອື່ນໆຄະນະຮັບຜິດຊອບດ້ານວິຊາການຈະສືບຕໍ່ປຶກສາຫາລື ແລະ ແຈ້ງເຖິງປະເທດເຈົ້າພາບໃນເວລາອັນຄວນ.

ສຳລັບ ສປປ ລາວ ໄດ້ກຳນົດແຜນການເບື້ອງຕົ້ນທີ່ຈະສົ່ງເຂົ້າຮ່ວມ ແຂ່ງຂັນສີມືແຮງງານອາຊຽນຄັ້ງທີ 12, ເຊິ່ງນັບເປັນຄັ້ງທີ 10 ຂອງ ສ ປປ ລາວ, ມີ 7 ສາຂາວິຊາຄື: (1) ຊ່າງຕິດຕັ້ງໄຟຟ້າ, (2) ຊ່າງໄມ້ເຄື່ອງ ເຮືອນ, (3) ຊ່າງຈອດໂລຫະ, (4) ຊ່າງປຸງແຕ່ງອາຫານ, (5) ຊ່າງຕັດ ຫຍິບ, (6) ຊ່າງກໍ່ ແລະ (7) ຊ່າງອອກແບບເວັບໄຊໂດຍຈຳນວນນັກ ແຂ່ງຂັນທີມຊາດ ລາວຈະມີ 2 ຄົນຕໍ່ສາຂາວິຊາທີ່ມີອາຍຸບໍ່ເກີນ 22 ປີ, ເມື່ອເຖິງປີ 2018, ເຊິ່ງກະ ຊວງແຮງງານ ແລະ ສະຫວັດດີການສັງຄົມ ແລະ ພາກສ່ວນກ່ຽວ ຂ້ອງຈະຈັດງານມະຫາກຳແຂ່ງຂັນສີມືແຮງງານແຫ່ງ ຊາດໃນຕົ້ນປີ 2018 ເພື່ອຄັດເລືອກເອົາຄູຝຶກ ແລະ ນັກແຂ່ງຂັນສີມືແຮງງານລາວເຂົ້າຮ່ວມຢ່າງມີຄຸນນະພາບ.