https://www.youtube.com/watch?v=yrcygcQcD4s

ອາເມລິກາຕ້ອງການຂຶ້ນທະບຽນ ສື່ຣັດເຊຍເປັນ “ຕົວແທນຕ່າງປະເທດ”

- WhatsApp Image 2017 07 12 at 9 - ອາເມລິກາຕ້ອງການຂຶ້ນທະບຽນ ສື່ຣັດເຊຍເປັນ “ຕົວແທນຕ່າງປະເທດ”

- 59b84896fc7e9331498b4567 - ອາເມລິກາຕ້ອງການຂຶ້ນທະບຽນ ສື່ຣັດເຊຍເປັນ “ຕົວແທນຕ່າງປະເທດ”

- lattana 1 - ອາເມລິກາຕ້ອງການຂຶ້ນທະບຽນ ສື່ຣັດເຊຍເປັນ “ຕົວແທນຕ່າງປະເທດ”

ລັດຖະບານ​ວໍ​ຊິງ​ຕັນ​ຕ້ອງການ​ຂຶ້ນທະບຽນ​ສະຖານີ​ໂທລະພາບ “ຣັດ​ເຊຍ ທູ​ເດ” ​ໃນ​ຖານະ “ຕົວ​ແທນ​ຕ່າງປະ​ເທດ” ​ແລະ ຂໍ​ໃຫ້​ໜ່ວຍ​ງານ​ລັດ​ທຸກ​ແຫ່ງ​ເລີກ​ໃຊ້​ຊອບ​​​ແວ​ຈາກ​ບໍລິສັດ​ “​ແຄ​ສ​ເປີ​ສກີ” ຂອງຣັດ​ເຊຍ​ພາຍ​ໃນ 90 ວັນ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ວໍ​ຊິງ​ຕັນ ປະ​ເທດ​ສະຫະລັດ​ອາ​ເມ​ລິ​ກາ ​ໃນ​ວັນ​ທີ 13 ກັນຍາ​ວ່າ: ກະຊວງ​ຍຸຕິ​ທຳ​ອາ​ເມ​ລິ​ກາ​ອອກ​ຖະ​ແຫລ​ງການ​ໃຫ້​ສະຖານີ​ໂທລະພາບຣັດ​ເຊຍ​ທູ​ເດ​ປະຈຳ​ພາກພື້ນອາ​ເມ​ລິ​ກາ ຫຼື ອາຣທີ ອາ​ເມ​ລິ​ກາ ຂຶ້ນທະບຽນ​ກັບ​ລັດຖະບານ​ວໍ​ຊິງ​ຕັນ​ໃນ​ຖານະ “ຕົວ​ແທນ​ຕ່າງປະ​ເທດ”. ຂະນະ​ທີ່​ທ່ານ​ນາງ ມາ​ກາຣິຕາ ຊິ​ໂມ​ຍານ ບັນນາທິການ​ບໍລິຫານ​ຂອງ​ອາຣທີ​ໃນ​ນະຄອນຫລວງ​ມົດ​ສະ​ກູ ປະນາມ​ຄຳ​ສັ່ງ​ດັ່ງກ່າວ​ວ່າ​ເປັນ​ສ່ວນ​ໜຶ່ງ​ຂອງ “ສົງຄາມ” ລະຫວ່າງ​ລັດຖະບານ​ວໍ​ຊິງ​ຕັນ​ກັບ​ສື່​ມວນ​ຊົນ​ຂອງຣັດ​ເຊຍ ​ແລະ ອາຣທີ​ກຳລັງ​ພິຈາລະນາ​ຕອບ​ໂຕ້​ຕາມ​ຂອບ​ຂອງ​ກົດໝາຍ.

ທັງ​ນີ້, ອາຣທີ​ ​ເຊິ່ງ​ໄດ້​ຮັບ​ງົບປະ​ມານ​ສະໜັບສະໜູນ​ຈາກ​ທາງ​ການຣັດ​ເຊຍ ກຳລັງ​ຕົກ​ເປັນ​ເປົ້າໝາຍ​ຂອງ​ການ​ສອບ​ສວນ ​ໂດຍ​ກະຊວງ​ຍຸຕິ​ທຳ​ອາ​ເມ​ລິ​ກາ ​ແລະ ສຳນັກງານ​ສອບ​ສວນ​ກາງ (FBI) ກ່ຽວ​ກັບ​ສົມມຸດ​ຖານ​ວ່າ: ລັດຖະບານ​ມົດ​ສະ​ກູ​ແຊກ​ແຊງ​ການ​ເລືອກ​ຕັ້ງປະທານາທິບໍດີ​ອາ​ເມ​ລິ​ກາ​ໃນ​ປີຜ່ານມາ, ຫລັງ​ປາກົດ​ພາບ ພົທ ​ໄມ​ເຄິລ ຟລິນ ອະດີດ​ທີ່​ປຶກສາ​ດ້ານ​ຄວາມ​ໝັ້ນຄົງ​ປະຈຳ​ທຳນຽບຂາວ​ຂອງ​ປະທານາທິບໍດີ ​ໂດ​ນັນ ທຣຳ ​ໄດ້​ຮັບ​ຄ່າ​ຕອບ​ແທນ​ຫລາຍ​ພັນ​​ໂດ​ລາ​ສະຫະລັດ ​ໃຫ້​ເຂົ້າຮ່ວມ​ງານ​ກາ​ລາ​ດິນ​ເນີ​ຂອງ​ອາຣທີ ອາ​ເມ​ລິ​ກາ ​ໃນ​ເດືອນ​ທັນວາ 2015 ​ແລະ ນັ່ງ​​ໃກ້​ກັບ​ປະທານາທິບໍດີ ວະ​ລາ​ດິ​ເມຍ ປູ​ຕິນ ​ແລະ ລາຍ​ງານ​ຂອງ​ໜ່ວຍ​ຂ່າວ​ລັບ​ອາ​ເມ​ລິ​ກາ​ໃນ​ເດືອນ​ມັງກອນ​ຜ່ານ​ມາ ລະບຸ​ວ່າ: ອາຣທີ​ຄື “ສຳນັກງານ​ໂຄສະນາ​ຊວນ​ເຊື່ອ​ລະຫວ່າງ​ປະ​ເທດ​ຂອງ​ທຳນຽບ​ແກມ​ລິນ”.

​ໃນ​ວັນ​ດຽວ​ກັນ, ກະຊວງ​ຄວາມ​ໝັ້ນຄົງ​ແຫ່ງ​ມາຕຸພູມ​ຂອງ​ອາ​ເມ​ລິ​ກາ ອອກ​ຖະ​ແຫຼ​ງການ​ໃຫ້​ໜ່ວຍ​ງານ​ທຸກ​ແຫ່ງ​ໃນ​ສັງກັດ​ຂອງ​ລັດຖະບານ​ວໍ​ຊິງ​ຕັນ ຢຸດ​ການ​ໃຊ້​ຜະລິດ​ຕະພັນ​ຊອບ​ແວ​ຂອງ​ແຄ​ສ​ເປີ​ສກີ ​ເຊິ່ງ​ເປັນ​ບໍລິສັດ​ດ້ານ​ຄວາມ​ປອດ​ໄພ ​ແລະ ຄວາມ​ໝັ້ນຄົງ​ທາງ​ໄຊ​ເບີ​ຂອງຣັດ​ເຊຍ ​ໂດຍ​ໃຫ້​ເວລາ​ໜ່ວຍ​ງານ​ແຕ່ລະ​ແຫ່ງ​ສູງ​ສຸດ 90 ວັນ​ໃນ​ການ​ຖອດ​ຊອບ​ແວ​ຂອງ​ແຄ​ສ​ເປີ​ສກີ​ອອກ​ຈາກ​ລະບົບ ​ເນື່ອງ​ຈາກ​ລັດຖະບານ​ວໍ​ຊິງ​ຕັນ​ມີ​ຄວາມ​ກັງວົນ​ຕໍ່​ການ​ເຊື່ອມ​ໂຍງ​ລະຫວ່າງ​ແຄ​ສ​ເປີ​ສກີ​ກັບ​ໜ່ວຍ​ຂ່າວ​ລັບ​ຂອງ​ລັດຖະບານ​ມົດ​ສະ​ກູ.

​ເຖິງ​ວ່າ​ກະຊວງ​ການ​ຕ່າງປະ​ເທດຣັດ​ເຊຍ​ຍັງ​ສະຫງວນ​ທ່າ​ທີ​ຕໍ່​ສະຖານະ​ການ​ທັງ​ໝົດ​ດັ່ງກ່າວ, ​ແຕ່​ສື່​ທ້ອງ​ຖິ່ນ​ຂອງຣັດ​ເຊຍ​ລາຍ​ງານ​ວ່າ: ລັດຖະບານ​ມົດ​ສະ​ກູ​ຖອນ​ສິດ​ໃນ​ການ​ຈອດ​ລົດ​ຂອງ​ເຈົ້າໜ້າ​ທີ່​ການ​ທູດ​ອາ​ເມ​ລິ​ກາ​ປະຈຳ​ສະຖານ​ກົງສຸນ​ຢູ່​ເມືອງ​ເຊ​ນປີ​ເຕີ​ສ​ເບິ​ກ ​ແລະ ​ເຢຄາ​ເທຣິນ​ເບິ​ກ ດ້ວຍ​ການ​ທາສີ​ເປັນ​ມ້າ​ລາຍ​ແທນ.