ເຮັດໃຫ້ບຸນອອກພັນສາປະວຳລະນາ ເປັນບ່ອນສົ່ງເສີມການທ່ອງທ່ຽວລາວ

- WhatsApp Image 2017 07 12 at 9 - ເຮັດໃຫ້ບຸນອອກພັນສາປະວຳລະນາ ເປັນບ່ອນສົ່ງເສີມການທ່ອງທ່ຽວລາວ

ໂດຍ: ທ່ຽງ​ທຳ

- lattana 1 - ເຮັດໃຫ້ບຸນອອກພັນສາປະວຳລະນາ ເປັນບ່ອນສົ່ງເສີມການທ່ອງທ່ຽວລາວ

ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ, ຫຼາຍ​ຄົນ​ກໍ​ຄົງ​ຈະ​ຮູ້​ດີ​ແລ້ວ​ວ່າ​ຍັງ​ອີກ​ບໍ່​ດົນ ມື້ບຸນ​ອອກ​ພັນ​ສາ​ປະ​ວໍລະນາ ​ເຊິ່ງ​ແມ່ນ​ໜຶ່ງ​ໃນ​ຮີດ 12 ຄອງ 14 ຂອງ​ປະ​ເພນີ​ລາວ​ກໍ​ຈະ​ມາ​ເຖິງ​ແລ້ວ ນັ້ນຄື​ມື້ຂຶ້ນ 15 ຄໍ່າ​ເດືອນ 11 ລາວ ​ເຊິ່ງກົງ​ກັບ​ວັນ​ທີ 5 ຕຸລາ 2017 ນີ້ ​ແລະ ມື້ນັ້ນຊາວ​ພຸດ​ລາວ​ໃນ​ທົ່ວ​ປະ​ເທດ​ຕ່າງ​ກໍ​ຈະ​ໄດ້​ຫາງ​ຫາ​ກະກຽມ​ຈັດ​ງານ​ບຸນ​ດັ່ງກ່າວ​ ດ້ວຍ​ການ​ຄົບງັນ, ຟັງ​ເທດ​ສະໜາ, ກະກຽມ​ເຂົ້າຂອງ​ເຄື່ອງ​ສັງຄະ​ທານ, ຕັກບາດ​ຢາດ​ນ້ຳ ຖວາຍ​ແດ່ພະ​ພິຂຸ​ສົງ-ສາມະ​ເມນ ​ແລະ ອື່ນໆ​ຕາມ​ຮີດຄອງ​ປະ​ເພນີ ​ແລະ ສິ່ງ​ພິ​ເສດ​ໃນ​ໂອກາດ​ດັ່ງກ່າວ​ແມ່ນ​ການ​ແຂ່ງຂັນ​ຊ່ວງ​ເຮືອ ອັນ​ໄດ້​ປະດັບ​ໃຫ້​ບຸນ​ອອກ​ພັນ​ສາມີ​ບັນຍາກາດ​ຟົດຟື້ນຍິ່ງ​ຂຶ້ນ. ​ແຕ່​ໃນ​ຜ່ານ​ມາ​ນີ້ ​ເຖິງ​ວ່າ​ພວກ​ເຮົາ​ສາມາດ​ຈັດຕັ້ງປະຕິບັດ​ງານ​ບຸນ​ປະ​ເພນີ​ດັ່ງກ່າວ​ມີ​ຜົນສຳ​ເລັດ​ຫຼາຍ​ດ້ານ ​ໂດຍ​ສະ​ເພາະ​ແມ່ນ​ສາມາດ​ສົ່ງ​ເສີມ ​ແລະ ປົກ​ປັກ​ຮັກສາ​ວັດທະນະທຳ ​ແລະ ປະ​ເພນີ​ອັນ​ດີງາມ​ຂອງ​ຊາດ, ​ເປັນ​ບ່ອນ​​ເຕົ້າ​ໂຮມ​ມວນ​ຊົນ ​ເພື່ອ​ຮັດ​ແໜ້ນ​ຄວາມ​ສາມັກຄີ​ຮັກ​ແພງ​ຊ່ວຍ​​ເຫຼືອ​ເຊິ່ງກັນ ​ແລະ ກັນ, ປະກອບສ່ວນ​ເຂົ້າ​ໃນ​ການ​ສ້າງສາ​ພັດທະນາ​ປະ​ເທດ​ຊາດ​ຢ່າງ​ມີ​ຜົນສຳ​ເລັດ, ​ແຕ່​ຖ້າ​ເວົ້າ​ໃນ​ດ້ານ​ການ​ສົ່ງ​ເສີມ​ການທ່ອງທ່ຽວ​ແລ້ວ ​ແມ່ນ​ພວກ​ເຮົາ​ຍັງ​ເຮັດ​ໄດ້​ໜ້ອຍ, ​ໃນ​ຂະນະ​ທີ່​ຫຼາຍ​ປະ​ເທດ​ໃຜໆ​ກໍ​ມີ​ຄວາມ​ສົນ​ໃຈ ​ແລະ ຢາກ​ໄດ້​ມາ​ສຳຜັດ​ກັບ​ງານ​ບຸນ​ປະ​ເພນີ​ດັ່ງກ່າວ ​ແລະ ສິ່ງ​ນີ້​ຍ້ອນ​ຫຍັງ ? ນີ້​ເປັນ​ຄຳ​ຖາມ​ທີ່​ຈະ​ຕອບ​ໄດ້​ຍາກ, ຖ້າ​ຖິ້ມ​ໃສ່​ວ່າ​ຍ້ອນ​ພວກ​ເຮົາ​ບໍ່​ມີ​ການ​ໂຄສະນາ​ຢ່າງ​ແຂງ​ແຮງ ​ແລະ ກວ້າງຂວາງ ​ເພື່ອ​ໃຫ້​ແຂກ​ບ້ານ​ແຂກ​ເມືອງ​ໄດ້​ຮັບ​ຮູ້ ​ແລະ ​ເຂົ້າ​ໃຈ ຢາກ​ໄດ້​ມາ​ເບິ່ງ​ມາ​ຊົມ​ກໍ​ອາດ​ຈະ​ແມ່ນ ​ເພາະ​ໃນ​ຄວາມ​ເປັນ​ຈິງ​ແລ້ວກໍ​ບໍ່​ແມ່ນ​ສະ​ເພາະ​ແຕ່​ບຸນ​ອອກ​ພັນ​ສາ ຕະຫຼອດ​ຮອດ​ບຸນ​ພະທາດ​ຫຼວງ, ບຸນປີ​ໃໝ່​ລາວ ​ແລະ ອື່ນໆ ພວກ​ເຮົາ​ກໍ​ຍັງ​ເຮັດ​ການ​ໂຄສະນາ​ບໍ່​ທັນ​ແຂງ​ແຮງ​ພໍ ​ແລະ ມີ​ຫຼາຍ​ກິດຈະກຳ​ໃນ​ງານ​ປະ​ເພນີ​ດັ່ງກ່າວ, ຝ່າຍ​ທ່ອງ​ທ່ຽວ​ເຮົາ​ກໍ​ຍັງ​ບໍ່​ທັນ​ໄດ້​ມີ​ມາດ​ຕະການ​ເອົາ​ເຂົ້າກັບ​ລາຍການ​ທ່ອງ​ທ່ຽວ​ໃດ​ໜຶ່ງ​ຢ່າ​ງ​ເປັນ​ປະຈຳ, ຈຸດ​ນີ້​ພວກ​ເຮົາ​ກໍ​ຄວນ​ຄິດ ​ແລະ ການ​ໂຄສະນາ​ເພື່ອ​ດຶງ​ດູດ​ຜູ້​ມາ​ທ່ຽວ​ມາ​ຊົມ​ເດ​ຈະ​ເຮັດ​ແນວ​ໃດ ? ​ເອົາລະ ! ຍັງ​ອີກ​ບໍ່​ດົນ​ ຄື​ປີໜ້າ​ນີ້​ລາວ​ເຮົາ​ຈະ​ເປີດ​ປີ​ທ່ອງ​ທ່ຽວ ​ແລະ ຫວັງ​ວ່າ​ຂະ​ແໜງ​ການ​ຮັບຜິດຊອບ​ຂອງ​ເຮົາ​ກໍ​ອາດ​ຈະ​ມີ​ແຜນ​ແລ້ວ ​ເພື່ອ​ຫັນ​ເອົາ​ງານ​ບຸນ​ປະ​ເພນີ​ຕ່າງໆ​ທີ່​ເປັນ​ເອກະລັກ​ຂອງ​ຊາດ​ເຂົ້າຕິດ​ພັນ​ກັບ​ການທ່ອງທ່ຽວ ​ແລະ ຈະ​ເປັນ​ໂອກາດ​ໜຶ່ງ ​ເພື່ອ​ພວກ​ເຮົາ​ຈະ​ສາມາດ​ດຶງ​ດູດ​ການທ່ອງທ່ຽວ​ລາວ​ນັບ​ມື້ພົ້ນ​ເດັ່ນ​ຂຶ້ນ​ໃນ​ພາກພື້ນ ​ແລະ ສາກົນ.