ປ້ອງກັນເຫດຮ້າຍຈາກສັງຄົມອອນລາຍ

- WhatsApp Image 2017 07 12 at 9 - ປ້ອງກັນເຫດຮ້າຍຈາກສັງຄົມອອນລາຍ

ໂດຍ: ວິ​ເສດ ສະ​ແຫວ​ງສຶກສາ

- lattana 1 - ປ້ອງກັນເຫດຮ້າຍຈາກສັງຄົມອອນລາຍ

ມື້ນີ້, ພວກ​ເຮົາພາກັນ​ຍິງ​ສາຍຕາ​ໄປ​ໄກໆ​ສູ່​ໂລກ​ວ້າງ ​ເພື່ອ​ເບິ່ງ​ບັນຫາ​ທີ່​ຫຼາຍ​ປະ​ເທດ​ມີ​ຄວາມ​ກັງວົນ​ໃຈ​ເຖິງ​ຂັ້ນຕ້ອງ​ໄດ້​ເອົາ​ມາດ​ຕະການ​ຈຳ​ເປັນ ​ເພື່ອ​ກຳຈັດ​ຂ່າວ​ບິດ​ເບືອນ, ຂ່າວ​ບໍ່​ມີ​ມູນ​ຄວາມ​ຈິງ​ທີ່​ເຜີຍ​ແຜ່​ຜ່ານ​ສື່​ສັງຄົມ​ອອນ​ລາຍ. ຢູ່​ເມືອງ​ຮາງ​ຊູ ​ແຂວງ​ເຊ​ຈຽງ (Hangzhou, Zhegjiang) ທາງ​ການ​ໄດ້​ເອົາມາດ​ຕະການ​ລ້ຳໜ້າ ​ເພື່ອ​ຄວບ​ຄຸມ​ບັນຫາ​ຂັດ​ແຍ່ງ​ທີ່​ພົວພັນ​ກັບສື່​ສັງຄົມ​ອອນ​ລາຍ​ຜ່ານ​ເຄືອ​ຂ່າຍ​ອິນ​ເຕີ​ເນັດ ​ໂດຍ​ໄດ້​ສ້າງຕັ້ງສານ​ເພື່ອ​ລົງ​ເລິກ​ແກ້​ໄຂ​ບັນຫາ​ຂັດ​ແຍ່ງ​ທາງ​ອິນ​ເຕີ​ເນັດ. ທີ່​ຕ້ອງ​ເລືອກ​ເອົາ​ເມືອງ​ຮາງ​ຊູ​ເປັນ​ທີ່​ຕັ້ງຫ້ອງການ​ສານ​ອິນ​ຕີ​ເນັດ​ເປັນ​ແຫ່ງ​ທຳ​ອິດ​ຂອງ​ປະ​ເທດ​ ກໍ​ເພາະວ່າ​ເມືອງ​ນີ້​ເປັນ​ຈຸດ​ໃຈກາງ​ສຳຄັນ​ຂອງ​ອຸດສາຫະກຳ​ເຕັກ​ໂນ​ໂລ​ຊີ ​ແລະ ການ​ດຳ​ເນີນ​ທຸລະ​ກຳ​ດ້ານ​ການ​ເງິນ​ຜ່ານ​ລະບົບ​ອອນ​ລາຍ. ​ແຕ່​ຄຽງ​ຄູ່​ກັບ​ຄວາມ​ຈະ​ເລີ​ນກ້າວໜ້າ​ດັ່ງກ່າວ ກໍ​ເກີດ​ມີ​ບັນຫາ​ຂັດ​ແຍ່ງ​ທີ່​ພົວພັນ​ກັບ​ການ​ໃຫ້​ບໍລິການ ​ແລະ ການ​ນຳ​ໃຊ້​ສື່​ສັງຄົມ​ອອນ​ລາຍ. ສານ​ອິນ​ເຕີ​ເນັດ​ຂອງ​ເມືອງ​ຮາງ​ຊູ​ຮັບຜິດຊອບ​ພິຈາລະນາ​ແກ້​ໄຂ 6 ບັນຫາ​ຂັດ​ແຍ່ງ​ທາງ​ແພ່ງ ​ແລະ ດ້ານ​ການ​ບໍລິຫານ​ຂອງ​ຕົວ​ເມືອງ ​ເຊັ່ນ​ຄະດີ​ກ່ຽວ​ກັບ​ສິດທິ​ໃນ​ຊັບ​ສິນ​ທາງ​ປັນຍາ ​ແລະ ການ​ຄ້າ​ຜ່ານ​ລະບົບ​​ເອ​ເລັກ​ໂຕຼນິກ (​ເອີ້ນ​ວ່າ ອີ-ຄອມ​ເມີດ – e-commerce). ນອກ​ຈາກ​ນັ້ນ ສານ​ຍັງ​ມີໜ້າ​ທີ່​ພິຈາລະນາ​ແກ້​ໄຂ​ຄະດີ​ທີ່​ພົວພັນ​ກັບ​ເວ​ບ​ໄຊ​ຕາມ​ການ​ມອບ​ໝາຍ​ຈາກ​ສານ​ຂັ້ນ​ເທິງ. ທ່ານ ຊູ​ຈຽງ (Zhou Qiang) ປະທານ​ສານ​ປະຊາຊົນ​ສູງ​ສຸດ ສປ ຈີນ ມີ​ຄຳ​ເຫັນ​ກ່ຽວ​ກັບ​ການ​ສ້າງສາ​ນອິນ​ເຕີ​ເນັດ​ນີ້​ວ່າ: “​ເພື່ອ​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ດ້ານ​ກົດໝາຍ​ຂອງ​ບັນດາ​ຄູ່​ກໍລະນີ ​ແລະ ​ເພື່ອ​ຮັບປະກັນ​ການ​ແກ້​ໄຂ​ບັນຫາ​ຂັດ​ແຍ່ງ​ທາງ​ອອນ​ລາຍ​ໃຫ້​ມີ​ປະສິດທິພາບ​ສູງ”. ທາງ​ເບື້ອງປະ​ເທດ​ຟີ​ລິບ​ປິ​ນພຸ້ນ, ທ່ານ​ປະທານາທິບໍດີ ​ໂຣດຼິ​ໂກ ດູ​ເຕັກ​ເຕ ກໍ​ໄດ້​ລົງ​ນາມປະກາດ​ໃຊ້​ກົດໝາຍ​ອາຍາ​ສະບັບ​ປັບປຸງ​ທີ່​ກວມ​ເອົາ​ມາດ​ຕະການ​ລົງ​ໂທດ​ຕໍ່​ຜູ້​ເຜີຍ​ແຜ່​ຂ່າວ​ບິດ​ເບືອນ, ບໍ່​ມີ​ມູນ​ຄວາມ​ຈິງ​ທີ່​ທຳລາຍ​ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ, ທຳລາຍ​ຜົນປະ​ໂຫຍ​ດ ​ແລະ ຄວາມ​ໜ້າ​ເຊື່ອ​ຖື​ຂອງ​ລັດ, ຍຸ​ຍົງ​ສົ່ງ​ເສີມ​ໃຫ້​ຄົນ​ລະ​ເມີດ​ກົດໝາຍ. ຜູ້​ທີ່​ມີ​ຄວາມ​ຜິດ​ໃນ​ກໍລະນີ​ຂ້າງ​ເທິງ​ນີ້ ຈະ​ຖືກ​ຕັດ​ອິດສະຫຼະພາບ​ແຕ່ 1 ​ເດືອນ​ກັບ 1 ວັນ​ເຖິງ 6 ​ເດືອນ ​ແລະ ​ປັບ​ໄໝ​ເປັນ​ເງິນ​ແຕ່ 40.000 ຫາ 200.000 ​ເປ​ໂຊ (​ແຕ່ 782-3.909 ​ໂດ​ລາ​ສະຫະລັດ). ຢູ່ ສ.​ເກົາຫຼີ ກໍ​ມີ​ຂ່າວ​ກ່ຽວ​ກັບການ​ລົງ​ໂທດ​ຊາຍ​ອາຍຸ 73 ປີ ທີ່​ເຜີຍ​ແຜ່​ຂ່າວ​ບໍ່​ມີ​ຄວາມ​ຈິງ​ຜ່ານ​ສື່​ສັງຄົມ​ອອນ​ລາຍ​ວ່າ: ທ່ານ​ນາງ ລີ​ຮີ​ໂຮ ອາຍຸ 94 ປີ ອະດີດ​ສັດ​ຕີ​ໝາຍ​ເລກ​ໜຶ່ງ (ພັນ​ລະ​ຍາ​ຂອງ​ອະດີດ​ປະທານາທິບໍດີ ກິດ​ແດ​ຈຸ​ງ) ຈະ​ແຕ່ງດອງ​ກັບ​ນັກ​ຮ້ອງ​ປະ​ເພດ “​ແຣບ” ຈາກ​ສະຫະລັດ​ຊື່ ດ໋ອກ​ເຕີ ​ເດຼ (Dr Dre) ອາຍຸ 52 ປີ. ຜູ້​ເຜີຍ​ແຜ່​ຂ່າວ​ນີ້​ຖືກ​ປັບ​ໄໝ​ເປັນ​ເງິນ 5 ລ້ານ​ວອນ ​(​ເກືອບ 5.000 ​ໂດ​ລາ​ສະຫະລັດ) ຍ້ອນ​ຄວາມ​ຜິດ​ການ​ໝິ່ນປະໝາດ​ກຽດ​ສັກ​ສີ​ຂອງ​ຜູ້​ເສຍ​ຊີວິດ ​ແລະ ຜູ້​ເສຍ​ຫາຍ. ຢູ່​ສະຫະພັນຣັດ​ເຊຍ ສານ​ໄດ້​ຕັດສິນຄະດີ​ສອງ​ສາວ​ຊື່ ອາລີ​ອອນ​ນາ ຊັບ​ເຈັນ​ໂກ ​ແລະ ອາລີ​ນາ ອອກ​ໂລ​ວາ ດ້ວຍ​ໂທດ​ຈຳ​ຄຸກ 4 ປີກັບ 3 ​ເດືອນ ​ແລະ 3 ປີ​ກັບ 10 ວັນ ຕາມ​ລຳດັບ ຍ້ອນ​ຄະດີ​ທໍລະມານ​ສັດ​ແລ້ວ​ເຜີຍ​ແຜ່​ພາບ​ຜ່ານ​ສື່​ສັງຄົມ​ອອນ​ລາຍ​ ​ເຊິ່ງ​ໄດ້​ສ້າງ​ຄວາມ​ແຕກ​ຕື່ນ ​ແລະ ສະ​ຍົດ​ສະຫຍອງ​ໃຈ​ໃນ​ສັງຄົມ. ​ເຫດການ​ນີ້​ເກີດ​ຂຶ້ນລະຫວ່າງ​ເດືອນ 6-8 ປີ 2016 ທັງ​ສອງ​ສາວ​ໄດ້​ຮ່ວມ​ກັນ​ຂ້າ​ໝາ ​ແລະ ​ແມວ​ຈຳນວນ 15 ​ໂຕ ດ້ວຍ​ການ​ທໍລະມານ ​ເຊັ່ນ​ເຈາະ​ຕາ, ລອກ​ໜັງ, ຕັດ​ແຂ່ງ-ຂາ ​ແລ້ວ​ຈໍ່​ຍິງ​ ຈາກ​ນັ້ນກໍ​ເອົາ​ຕີນ​ຢຽບ​ສັດ​ເຄາະ​ຮ້າຍ​ແບບ​ປ່າ​ເຖື່ອນ. ຄະດີ​ນີ້​ແກ່ຍາວ​ມາ​ເປັນ​ເວລາ 1 ປີ ກ່ອນ​ສານ​ຈະ​ຕັດສິນ​ຂັ້ນ​ເດັດຂາດ​ໃນ​ວັນ​ທີ 26 ​ເດືອນ​ສິງຫາ​ປີ​ນີ້. ນອກຈາກ​ສອງ​ສາວ​ຜູ້​ກໍ່​ເຫດ​ແລ້ວ ຊາຍ​ໝຸ່ມມື​ກ້ອງ​ທີ່​ບັນທຶກ​ພາບ​ການ​ທາລຸນ​ສັດ​ກໍ​ຖືກ​ຕັດສິນ​ຈຳ​ຄຸກ​ເປັນ​ເວລາ 3 ປີ. ສ່ວນ​ພໍ່​ແມ່ ​ແລະ ຜູ້​ປົກຄອງ​ຂອງ​ສອງ​ສາວ​ກໍ​ຖືກ​ປັບ​ໄໝ​ເຊັ່ນ​ກັນ ຖານ​ມີ​ຄວາມ “ບົກ​ຜ່ອງ​ໃນ​ການ​ອົບຮົມ​ສັ່ງສອນ​ພວກ​ລູກໆ”.