ພີເອສ໌ ກັບສາກລະຄອນມ້ວນທ້າຍ

- WhatsApp Image 2017 07 12 at 9 - ພີເອສ໌ ກັບສາກລະຄອນມ້ວນທ້າຍ

ໂດຍ: ກ້ອງສ່ອງ ອິດສະຫລະ

- lattana 1 - ພີເອສ໌ ກັບສາກລະຄອນມ້ວນທ້າຍ

​    ໃນ​ປີຜ່ານມາ, ກ​ະ​ແສ​ຂ່າວ​ຮື​ຮາ​ກັນ​ເລື່ອງ​​ເອຊຽນ​ເຟດສ໌ ​“​ເຈັ້ງ” ສຸດ​ທ້າຍ​ຜູ້​ອໍານວຍ​ການ​ບໍລິສັດທີ່​ເປັນ​ຄົນ​ຕ່າງປະ​ເທດກໍ​ຫອບ ເງິນ ແລະ ​ສັງຂານເປີດ​ໜີອາດຫຼາດໄປ​ຢ່າງ​ໄຮ້​ຮ່ອງຮອຍ. ມາ​ຮອດ​ປັດຈຸບັນ, ຊາຕາ​ກໍາ​ຂອງ​ບໍລິສັດ​ດັ່ງກ່າວກໍຄື​ສະມາຊິກ​ຜູ້​ທີ່​ເອົາ​ເງິນໄປ​ຝາກນັ້ນ​ເປັນໄປແນວໃດ​, ໄດ້​ເງິນຄືນ ຫລື ​ບໍ່​ນັ້ນ ກໍປາກົດວ່າມິດຈີ່ລີ່​ ແລະ ຍັງບໍ່ມີແຫຼ່ງຂ່າວອັນໃດຄືບໜ້າ. ສ່ວນວ່າສະມາ ຊິກຜູ້ຖື​ຮຸ້ນ ຫລື ​ຜູ້ທີ່ເອົາເງິນໄປຝາກ ກໍໄດ້ແຕ່ສິ້ນ​ຫວັງແລະ ອີ່ມ​ປານ​ບັກ​ລາ​ອີ່ມ​ເຂົ້າຫລາມ. ຕົກມາ​ໃນປີ​ນີ້ ກໍ​ຖືກ​ຜຽນ​ຂອງບໍລິ ສັດ​ ພີ​ເອສ ທີ່​ເປັນ​ຄິວຕາມຫລັງ ​ແຕ່​ພັດຍິ່ງ​ດັງ​ກ່າວ​ເກົ່າ ເພາະມີສະມາຊິກຜູ້ຮ່ວມທຶນ​ແຕ່​ເໜືອຕະຫລອດ​ໃຕ້​ແລະ ​ອາດ​ເວົ້າ​​ໄດ້ ວ່າ​ໃນທົ່ວປະເທດກໍເປັນ​ໄດ້.

ຕາມ​ຜູ້​ຂຽນ​ວິ​ເຄາະ​ການ​ດໍາ​ເນີນ​ທຸລະ​ກິດ​ຂອງ​ສອງບໍລິສັດ​ນີ້, ​ແມ່ນ​​ໃນ​ຮູ​ບ​ແບບ​​ດຽວ​ກັນ​ຄື​ແບບ​ເຄິ່ງ​ເຫ້ຍ​ເຄິ່ງ​ແລນ ຫລື ເວົ້າ ອີກຢ່າງໜຶ່ງແມ່ນແບບໂຕເຈຍ. ເປັນ​ຫຍັງ​ຈຶ່ງ​ວ່າ​ແນວ​ນັ້ນ ? ຍ້ອນຄັນ​ຊິ​ວ່າ​​ທະນາ​ຄານ​ກໍ​ວ່າ​ເປັນບໍລິສັດ, ຄັນ​ຊິ​ວ່າ​ບໍລິສັດ​ພັດ​ເປັນ​ຮູບ​​ແບບລະດົມ​ທຶນໃຫ້​ສະມາຊິກ​ເອົາ​ເງິນ​ໄປ​ຝາກ ​ໂດຍ​ໃຫ້​ດອກ​ເບ້ຍ​ທີ່​ສູງກວ່າທະນາ​ຄານ, ດັ່ງ​ຄໍາ​ສຸພາສິດ​ເຂົາ​ວ່າ “​ຄັນ​ແມ່ນນົກ​ເບິ່ງ​ເພິ່ນ​ພັດ​ມີ​ຫູ, ຄັນ​ວ່າ​ເປັນ​ໜູ​ເພິ່ນ​ຊ້ຳ​ພັດ​ມີ​ປີກ”. ອັນບັນຫາກົກໆ​ຂອງ​ມັນກໍ​ຍ້ອນ​ວ່າ​ເພິ່ນ​ລະດົມ​ໃຫ້​ຄົນທັງຫລາຍ​ເອົາ​ເງິນ​ໄປ​ຝາກ ​ໂດຍ​ໃຫ້​ດອກ​ເບ້ຍ​ຄືທະນາຄານ ແລະ​ ສູງກວ່າທະນາ​ຄານ ຫລື ໃຫ້​ຜົນ​ປະ​ໂຫຍ​ດລື່ນໝູ່ ອັນ​ເປັນ​ການ​ຝືນ​ຕໍ່​ລະບຽບ​ກົດໝາຍ ໂດຍ​ສະ​ເພາະ​ແມ່ນ​ກົດໝາຍ​ທະນາ​ຄານ​ແຫ່ງ ສປປ ລາວ, ເພິ່ນຍັງ​​ອ້າງ​ຕົນວ່າ​ພວກ​ເຮົາ​ບໍ່​ແມ່ນ​ທະນາ​ຄານ ແຕ່ເປັນ​ບໍລິສັດສົ່ງ​ເສີມ​ກະສິກໍາ-ອຸດ​ສາຫະ​ກໍາຂາ​ອອກ​-ຂາ​ເຂົ້າ ຢ່າງ​​ໂກ້ໆ ທີ່​ລະດົມ​ໃຫ້​ຄົນ​​ໃນ​ສັງຄົມມີ​ສ່ວນ​ຮ່ວມໃນ​ການ​ດໍາເນີນທຸລະກິດ ແລະ ໄດ້​ຮັບ​ຜົນປະ​ໂຫຍ​ດ​ຕາມ​ນະ​ໂຍບາຍ​ຂອງ​ບໍລິສັດ​ວາງ​ອອກ​.

ເລື່ອງ​ຜົນ​ປະ​ໂຫຍ​ດ​ເປັນ​ດອກ​ເບ້ຍ ຫລື ​ຜົນກໍາ​​ໄລເປັນ​ເງິນ ​ແລະ ​ເປັນ​ວັດຖຸ​ນັ້ນ ກໍ​​ເປັນ​ໄປຕາມ​ນະ​ໂຍບາຍ​ຂອງ​ບໍລິສັດວາງ​ອອກ, ເວົ້າ​ແຈ້ງ ການໃຫ້​ດອກ​ເບ້ຍສູງກວ່າທະນາຄານມັນ​ເປັນ​ສິ່ງ​ຈູງ​ໃຈ​ ​​ແລະ ​ເປັນ​ເຊີງ​ລຸກໃຫ້ມີ​ສະມາຊິກ​ນັບ​ມື້​ນັບຫລາຍ​. ສ່ວນ ວ່າ​ຮູບ​ການ​ ແລະ​ ວິທີ​ການຂອງ​ພວກ​ເພິ່ນ​ເຮັດ​ກໍ​ແມ່ນແບບ​​​ເອົາ​ເນື້ອ​ມັນຍໍາ​ມັນ​ບໍ່​​ຕ້ອງ​ໄດ້​ລົງທຶນ​ລົງຮອນຢ່າງມະຫາສານຂອງຜູ້​ເປັນ​ເຈົ້າ​ຂອງ​ກິດຈະການ ມີພຽງ​ວິທີລະດົມໃຫ້​ຄົນ​ເອົາ​ເງິນ​ໄປ​ຝາກ​ຜູ້​ຫລາຍ​ຜູ້​ໜ້ອຍ​ຕາມ​ຄວາມ​ສະໝັກ​ໃຈ ຜູ້​ລະ​ຫ້າ​ລ້ານ​ສິບ​ລ້ານ ໄປຈົນຮອດ​ສີ່​ຫ້າ​ຕື້ກໍມີ. ​ເມື່ອ​ໄດ້​ເງິນເຂົາ​ໄປ​ແລ້ວ​ກໍ​ເອົາ​ໄປ​ລົງ​ທຶນໃສ່​ກິດຈະ​ການ ຫລື ​ໂຄງການ​ຕາມແຜນ​ທຸລະ​ກິດຂອງ​ບໍລິສັດ. ພໍ ຄົບ​ກໍານົດເດືອນມາກໍເອົາເງິນທີ່ໄດ້ລະດົມຈາກຜູ້ໃໝ່ໄປໃຫ້ດອກເບ້ຍຜູ້ເກົ່າໝູນວຽນໄປມາ ທັງ​ລົງທຶນ​ໃສ່​ກິດຈະການ​ທຸລະ​ກິດ​ຂອງຕົນ​, ທັງ​ແບ່ງ​ເປັນດອກ​ເບ້ຍ​ແກ່​ສະມາຊິກ​ຜູ້​ຮ່ວມ​ທຶນຕາມ​ເປີ​ເຊັນ​ເງິນ​ຝາກ​ຜູ້ຫລາຍ​ຜູ້​ໜ້ອຍ. ບັນດາສະມາຊິກທີ່ເອົາເງິນ ໄປຝາກ ຫລືວ່າ​ ໄປຮ່ວມທຶນໃນເບື້ອງຕົ້ນກໍໄດ້ຮັບດອກ​ເບ້ຍ​ເປັນປົກກະຕິ, ແຕ່ດົນໆໄປຫລາຍເດືອນກໍເລີ່ມຊັກຊ້າ​ແບບ​ສ້ວຍ​ຫາງ​ຂີ້​ໂກະ ສຸດທ້າຍມາກໍພາກັນເຈັ້ງຕາມສູດງູກິນຫາງ. ບໍລິສັດ ພີເອສ ເພິ່ນຍິ່ງມີນະໂຍບາຍທີ່ເໜືອກວ່າຫລາຍ ຕົວຢ່າງ: ຖ້າສະມາ ຊິກຜູ້ຮ່ວມທຶນ ຫລືວ່າ ລູກຄ້າຫາກຊື້ຜະລິດຕະພັນນ້ຳດື່ມລາວ​ທີ່ມີມູນຄ່າຮອດສາມລ້ານກີບຂຶ້ນ​ໄປ ເພິ່ນຈະແຖມສາຍຄໍຄໍາໃຫ້ ໜຶ່ງສະຫລຶງທັນທີ. ໃນຫລາຍປີຜ່ານມາ ໄດ້ມີໝູ່​ໃກ້ຊິດມາເລົ່າສູ່ຟັງ ແລະ ຢາກໃຫ້ເຮົາເອົາ​ເງິນໄປຝາກຄືລາວ ແຕ່ເຮົາຊ້ຳພັດບໍ່ ທັນມີເງື່ອນ​ໄຂ ​ເພາະໝົດ​ເດືອນມາກໍພໍ​ໄດ້​ແຕ່​ໃຊ້​ຈ່າຍຍັງ​ບໍ່​ມີ​ເງິນ​ສະ​ສົມ​ໄວ້. ດ້ວຍວິທີການນໍາໃຊ້ຈິດຕະວິທະຍາທາງດ້ານການຕະ ຫລາດຂອງພີເອສ ຢູ່ມາບໍ່ພໍເທົ່າໃດປີກໍມີສະມາຊິກຜູ້ຮ່ວມທຶນຫລັ່ງໄຫລເອົາເງິນມາຝາກ​ໄດ້ຫລາຍພັນຕື້. ເມື່ອມີເງິນມະຫາສານ ດັ່ງ​ທີ່​ພີເອສ ໄດ້ສຸມ​ໃສ່ການລົງທຶນບັນດາກິດຈະການ​ໂຄງການຂອງຕົນໃນແງ່ມຸມທຸລະກິດທີ່ຫລາກຫລາຍສີສັນ ມີທັງອຸດສາຫະ ກໍາ, ກະສິກໍາ ແລະ ການທ່ອງທ່ຽວ ອັນ​ຫລັກໆ​ນັ້ນ​ແມ່ນ​ຂະຫຍາຍໂຮງງານນ້ຳດື່ມລາວ, ປູກຜັກ​ປອດສານພິດ, ເຮັດເຮືອນແພ ​ແລະ ​ກິດຈະ​ການ​ອື່ນໆ ນັບທັງການສ້າງພື້ນຖານວັດຖຸເຕັກນິກຂອງບໍລິສັດຢ່າງຫລວງຫລາຍ ແລະ ຫລູຫລາ ຈົນ​ເປັນ​ທີ່​ໂດ່​ງດັ່ງ​ໃນ​ລະດັບ​ປະ​ເທດ. ນອກຈາກທີ່ກ່າວມານີ້ແລ້ວ, ທ່ານນາງ ສຸກນາລີ ເທບສີເມືອງ ທີ່ເປັນປະທານບໍລິສັດ ແລະ ທ່ານ ປໍເຮີ ຜູ້ເປັນຄົນ ໃກ້ຊິດ ແລະ ທັງ​ເປັນ​ວິຊາ​ການຂອງບໍລິສັດ ຍັງ​ພາກັນເອົາ​ເງິນທີ່ລະດົມ​ໄດ້ຈາກສະມາຊິກໄປຊື້ຄໍາ, ຊື້ເພັດນິນຈິນດາມາໄວ້ຢູ່ໃນ ຄອບຄອງຈົນ​ວ່າເປັນຫາບ​ເປັນ​ຫອບຢູ່ໃນຕົນຕົວ ເກືອບເວົ້າໄດ້ວ່າທັງສອງຄືເປັນຕູ້ຄໍາເຄື່ອນທີ່. ນອກຈາກຕົນເອງມີແລ້ວພັດ ຍັງລູກຍັງຫລານຢາຍກັນໄປໃຊ້ຈ່າຍຜູ້ຫລາຍຜູ້ໜ້ອຍຈົນເຮັດໃຫ້ ສຸກນາລີ ກາຍເປັນຮອງເຮົາ ແລະ ປໍເຮີ ກໍກາຍເປັນອຸຍສຽວປໍ້​ຢູ່ລາວໄປໂດຍປະລິຍາຍ.

ກ່າວເຖິງທຸລະກິດຜ່ານຂະບວນວິວັດການລົງທຶນໄປຫລາຍ ລາຍຮັບກໍບໍ່ສົມປະກອບ ເພາະເງິນທີ່ໄດ້ມາຈາກຜູ້ລົງທຶນໃໝ່ກໍ ເອົາໄປໃຫ້ດອກເບ້ຍຜູ້ເກົ່າ ສຸດທ້າຍມາເງິນທັງ​ໝົດມັນກໍເລີຍກຸດຫ້ຽນທັງຕົ້ນ ແລະ ທັງດອກເບ້ຍ. ສະຫລຸບແລ້ວເງິນທີ່ໄດ້ຈາກ ຜູ້ໃໝ່ກໍຂົນເອົາໄປຈ່າຍດອກໃຫ້ຜູ້ເກົ່າ ອາ​ໄສການ​ຈໍາໜ່າຍຜະລິດຕະພັນຕ່າງໆທີ່ເປັນລາຍຮັບຂອງ​ບໍລິສັດກໍເຫັນວ່າເຫລັກມັນ ຫລາຍກວ່າຖ່ານ ເມື່ອທຸລະກິດດໍາເນີນໄປແບບງູກິນຫາງ ທັງທຶນກໍນັບມື້ໝົດໄປ, ກໍາໄລກໍບໍ່ເຫັນ ນັບທັງຄົນຜູ້ທີ່ເອົາເງິນໄປຝາກ ກໍຖືກຢຸດສະງັກ ຍ້ອນທ່າອ່ຽງທຸລະກິດເລີ່ມມີບັນຫາ ແລະ ຢູ່ໃນທ່າລົງຄ້ອຍ ສະມາຊິກກໍບໍ່ໄດ້ຮັບຜົນປະໂຫຍດຕາມສັນຍາກໍເລີຍ​ເກີດ​ເສິກ​ຂີ້​ແບ້ ແລະ ​ເມື່ອ​ປະສົບ​ບັນຫາ​ບານ​ປາຍ ​ສຸກ​ນາລີ ​ກັບ ​ປໍ​ເຮີ ​ກໍ​​ເກີດອູດ​ຕັນປານ​ໜູ​ຖືກ​ໄຟ​ລາມ​ໂກນ ​ຈຶ່ງ​ໄດ້​ແຕ່​ອອກ ປາກ​ໂກ້ໆ​ຕໍ່ສະມາຊິກ​ວ່າ​ ເງິນ​ໝົດ​ແລ້ວ​ ບໍ່​ມີ​ຈະ​ໃຫ້​ທັງ​ຕົ້ນ ​​ແລະ ​ທັງ​ດອກເບ້ຍ ​ຈຶ່ງ​ເປັນ​ເຫດ​ໃຫ້​ເກີດ​ອົນລະຫົນ​ລະຫວ່າງ​ສອງ​ຝ່າຍ ​ເພື່ອ​ຕັດ​ບັນຫາທີ່ບານ​ປາຍ​ ຢ້ານ​ສະມາຊິກ​ທັງຫລາຍຝັກ​ ປໍ​ເຮີ ​ກັບ ​ສຸກ​ນາລີ ​ໃສ່​ກະບັ້ງ​ໄມ້​ໄຜ່ ເບື້ອງ​ເຈົ້າ​ໜ້າ​ທີ່​ຈຶ່ງ​ໄດ້​ເອົາ​ສອງຄົນ​ໄປ​ໄວ້​ທີ່​ປອດ​ໄພກ່ອນ. ສ່ວນວ່າ​ສາກ​ຕໍ່​ໄປ​ພະ​ເອກ ປໍ​ເຮີ ກັບ ນາງ​ເອກ ສຸກ​ນາລີ ຈະ​ເປັນ​ແນວ​ໃດ ​ຂໍ​ໃຫ້​ຕິດຕາມ​ຊົມ​​ໃນ​ສາກ​ເບື້ອງ​ໜ້າ. ນີ້​ລະສຸພາສິດ​​ເພິ່ນ​ວ່າ: “ຢາກກິນຫລາຍ​ໄດ້​ກິນ​ທໍ່​ກ້ອຍ ​ຢາກກິນ​ໜ້ອຍ​ໄດ້​ກິນ​ທໍ່​ຫົວ​ໂປ້​ມື” ສຸກ​ນາລີ ກັບ ປໍ​ເຮີ ກໍ​ປ່ຽນ​ຊີວິດ​ຈາກ​ນັກທຸລະກິດ​ມາ​ເປັນ​ນັກ​ໂທດ, ປ່ຽນ​ປະຫລັກ​ແຂນ​ຄໍາ​ມາ​ເປັນ​ປະຫລັກ​ແຂນ​ເຫລັກ. ນີ້​ລະຄື​ສາກ​ລະຄອນ​ມ້ວນທ້າຍ​ຂອງບໍລິສັດ ​ພີ​ເອສ.