ເຈົ້າໜ້າທີ່ເຜີຍມືປືນຍິງນັກທຸລະກິດຈີນຢູ່ສູນການຄ້າສີໄຄພລາຊາແມ່ນຄົນຕ່າງປະເທດ

- advert banner 728 90 728x90 - ເຈົ້າໜ້າທີ່ເຜີຍມືປືນຍິງນັກທຸລະກິດຈີນຢູ່ສູນການຄ້າສີໄຄພລາຊາແມ່ນຄົນຕ່າງປະເທດ

ໃນວັນທີ 11 ຕຸລານີ້, ຢູ່ຫ້ອງຕຳຫລວດນະຄອນຫລວງວຽງຈັນ, ທ່ານພັນໂທ ຈັນຫອມ ແກ້ວສຸລາໄຊ ຫົວໜ້າຫ້ອງຕຳຫລວດ ປກສ ນະຄອນຫລວງວຽງຈັນ ໄດ້ຖະແຫລງຄວາມຄືບໜ້າການສືບສວນ-ສອບສວນຄະດີນັກທຸລະກິດຈີນຖືກຄົນຮ້າຍຍິງເສຍຊີວິດຢູ່ສູນການຄ້າສີໄຄພລາຊາ, ບ້ານນາແຮ່ເມືອງສີໂຄດຕະບອງນະຄອນຫລວງວຽງຈັນວ່າ: ຄົນຮ້າຍກໍ່ເຫດແມ່ນເປັນຄົນຕ່າງປະເທດ ແລະ ປັດຈຸບັນກຳລັງເລັ່ງປະສານກັບຕຳຫລວດສາກົນເພື່ອຕິດຕາມຕົວມາດຳເນີນຄະດີ.
ທ່ານຫົວໜ້າຫ້ອງຕຳຫລວດ ໃຫ້ຮູ້ວ່າ: ໃນເວລາປະມານ 9 ໂມງຂອງວັນທີ 7 ຕຸລາຜ່ານມານີ້, ທ້າວ ຊູຫວ່າງທຽນ ອາຍຸ 60 ປີສັນຊາດໃຕ້ຫວັນ, ເປັນນັກທຸລະກິດ ແລະ ເປັນປະທານສູນການຄ້າສີໄຄພລາຊາ, ພັກເຊົາຢູ່ບ້ານຫົວຊ້າງ ເມືອງນາຊາຍທອງນະຄອນຫລວງວຽງຈັນ, ໄດ້ຂັບລົດຍີ່ຫໍ້ເລັກຊັດສີດຳໝາຍທະບຽນ ກຕ 6289 ກຳແພງນະຄອນ, ໂດຍອອກຈາກເຮືອນມາພ້ອມແມ່ ແລະ ໄດ້ຂັບລົດມາຈອດຢູ່ດ້ານຫລັງຂອງສູນການຄ້າສີໄຄພລາຊາ. ຈາກນັ້ນໄດ້ມີຄົນຮ້າຍ 2 ຄົນຂີ່ລົດຈັກສີຂາວແດງບໍ່ມີປ້າຍທະບຽນ, ນຸ່ງໂສ້ງຂາຍາວ ແລະ ເສື້ອແຂນຍາວສີດໍາ, ໃສ່ຖົວມື ແລະ ໃສ່ໝວກກັນກະທົບສີດໍາ ໄດ້ເຂົ້າມາຈອດຢູ່ໃກ້ກັບລົດທ້າວ ຊູຫວ່າງທຽນ ແລ້ວໃຊ້ປືນສັ້ນຍິງໃສ່ຜູ້ກ່ຽວໃນຂະນະທີ່ລົງຈາກລົດເພື່ອຈະໄຂປະຕູເອົາແມ່ລົງຈາກລົດເປັນຈຳນວນ 12 ນັດ, ຈົນລົ້ມລົງ ແລະ ເສຍຊີວິດຄາທີ່ຈາກນັ້ນຄົນຮ້າຍໄດ້ເອົາຕົວຫລົບໜີໄປ.
ພາຍຫລັງເກີດເຫດ, ກະຊວງປ້ອງກັນຄວາມສະຫງົບໄດ້ມອບໝາຍໃຫ້ກົມວິຊາສະເພາະປະສານສົມທົບກັບກອງບັນຊາການ ປກສ ນະຄອນຫລວງວຽງຈັນ ຮີບຮ້ອນດຳເນີນການສືບສວນ-ສອບສວນຊອກຄົ້ນຫາຜູ້ກະທຳຜິດມາດຳເນີນຄະດີຕາມລະບຽບກົດໝາຍໃຫ້ໄດ້ໂດຍໄວ ແລະ ຜ່ານການສືບສວນຢ່າງຕັ້ງໜ້າ, ມາຮອດວັນທີ 8 ຕຸລານີ້, ເຈົ້າໜ້າທີ່ໄດ້ພົບເຫັນລົດຈັກຂອງຄົນຮ້າຍທີ່ນຳໃຊ້ກໍເຫດຈອດຖີ້ມໄວ້ໃນປ່າເຂດບ້ານສີຊົມຊື່ນເມືອງສີໂຄດຕະບອງນະ ຄອນຫລວງວຽງຈັນ, ພ້ອມທັງພົບວັດຖຸສິ່ງຂອງຈຳນວນໜຶ່ງທີ່ເປັນຫລັກຖານສຳຄັນທີ່ກ່ຽວພັນກັບເຫດການຄາດຕະກຳຄັ້ງນີ້, ຈຶ່ງສາມາດກຳນົດເປົ້າໝາຍກໍ່ເຫດໄດ້ຢ່າງຊັດເຈນວ່າ: ຄົນຮ້າຍແມ່ນຄົນຕ່າງປະເທດ ແລະ ປັດຈຸບັນແມ່ນໄດ້ຫລົບໜີໄປຕ່າງປະເທດແລ້ວ, ຊຶ່ງເຈົ້າໜ້າທີ່ພວກເຮົາພວມເລັ່ງປະສານສົມທົບກັບເຈົ້າໜ້າທີ່ປະເທດໃກ້ຄຽງ ແລະ ຕຳຫລວດສາກົນເພື່ອນຳຈັບຕົວເປົ້າໝາຍມາດຳເນີນຄະດີຕາມລະບຽບກົດໝາຍຂອງ ສປປ ລາວ.
ທ່ານຫົວໜ້າຫ້ອງຕຳຫລວດ ໃຫ້ຮູ້ວ່າ: ເຫດຄາດຕະກຳຄັ້ງນີ້, ຜູ້ກະທຳຜິດໄດ້ມີການກະກຽມ ແລະ ວາງແຜນຢ່າງລະອຽດ, ສ່ວນເຫດຈູງໃຈຂອງການຄາດຕະກຳແມ່ນມາຈາກຂັດແຍ່ງທາງດ້ານທຸລະກິດ.

- lattana 1 - ເຈົ້າໜ້າທີ່ເຜີຍມືປືນຍິງນັກທຸລະກິດຈີນຢູ່ສູນການຄ້າສີໄຄພລາຊາແມ່ນຄົນຕ່າງປະເທດ

+ພົບລົດຈັກຂອງຄົນຮ້າຍໃຊ້ກໍ່ເຫດ​ຍິງນັກທຸລະກິດຢູ່​ສູນ​ການ​ຄ້າ​ສີ​ໄຄ​ພລາຊາຖືກຖິ້ມຢູ່ແຄມນໍ້າຂອງ