ບຸນທາດຫຼວງສູນລວມນ້ຳໃຈມະຫາສາມັກຄີ

- advert banner 728 90 728x90 - ບຸນທາດຫຼວງສູນລວມນ້ຳໃຈມະຫາສາມັກຄີ

ໂດຍ: ກ້ອງສ່ອງ ອິດສະຫລະ

- lattana 1 - ບຸນທາດຫຼວງສູນລວມນ້ຳໃຈມະຫາສາມັກຄີ

ບຸນ​ພະທາດຫຼວງ​ປະ​ຈໍາປີ 2560 ຈະ​ເປັນ​ປີ​ແຫ່ງ​ຄວາມ​ໝາຍຢ່າງ​ຫຼວງ​ຫຼາຍ​​ແກ່​ປະ​ເທດ​ຊາດ​ບ້ານ​ເມືອງ​ຂອງພວກ​ເຮົາ ຍ້ອນ​ວ່າ​ກ້າວ​ມາ​ເຖິງ​ຍຸກ​ສ້າງສາພັດທະນາ​ປະ​ເທດຊາດ​​ໃຫ້​​ຈະ​ເລີ​ນຮຸ່ງ​ເຮືອງ​ໄປ​ຫຼາຍ​ເທົ່າ​ໃດ​ກໍຍິ່ງ​ສະ​ແດງ​ໃຫ້​ເຫັນ​ເຖິງ​​ສີສັນ​​ໃນ​ແງ່​ເສດຖະກິດ-ສັງຄົມ ​ແລະ ​ວັດທະນະ​ທໍາ​ອັນ​ຍອດ​ຍິ່ງ​ຂອງປະ​ເທດ​ຊາດ. ຖ້າ​ເບິ່ງ​ໃນ​ດ້ານ​ເສດຖະກິດ​ກໍຕ້ອງ​ເບິ່ງ​ໃນ​ດ້ານຜະລິດ​ຕະພັນ​ສິນຄ້າ ນັບ​ທັງ​ດ້ານ​ອຸດ​ສາຫະ​ກໍາ, ກະສິກໍາ ​ເພາະ​ໂອກາດ​ບຸນນະມັດສະການ​ພະທາດຫຼວງ​ ສິນຄ້າ​ທັງ​ພາຍ​ໃນ ​ແລະ​ ຕ່າງປະ​ເທດ​ກໍຈະຫ​ລຸ​ຫຼັ່ງ​ທັ່ງ​ເທ​ເຂົ້າ​ມາ​ຈໍາໜ່າຍ​ໃນງານ​ຢ່າງ​ມະຫຶມາ. ຖ້າ​ເບິ່ງ​ໃນ​ດ້ານ​ສັງຄົມ​ກໍຈະ​ເຫັນ​​ຄວາມ​ສະຫງົບຈົບງາມ, ຄວາມ​ສາມັກຄີອັນ​ເປັນ​ປຶກ​ແຜ່ນຂອງປະຊາຊົນ​ບັນດາ​ເຜົ່າ ​ຫຼື​ ຖ້າ​ຈະເບິ່ງ​ໃນ​ແງ່​ສະ​ເພາະ​ຂອງ​ວັດທະນະ​ທໍາ​ກໍ​ຈະ​ເຫັນ​​ໄດ້ໃນ​ດ້ານ​ຮີດຄອງ​ປະ​ເພນີ, ວິຖີ​ຊີວິດ, ຂະ​ນົບ​ທໍານຽມ​ຂອງ​ຄົນ​ລາວ​ທີ່​ໄດ້​ດໍາລົງ​ຄົງ​ຕົວ​ໃນ​ຜືນ​ແຜ່ນດິນສຸວັນນະ​ພູມ​ແຫ່ງ​ນີ້.

ຕາມ​ຜູ້​ຂຽນ​ຄິດ, ກ່ອນ​ອື່ນ​ໝົດ​ພວກ​ເຮົາ​ໃນ​ຕະກູນລາວ,​ ເຊື້ອ​ຊາດ​ລາວ, ສັນຊາດ​ລາວ​ ບໍ່​ວ່າ​ຢູ່​ແຫ່ງ​ຫົນ​ຕໍາ​ບົນ​ໃດ​ກໍ​ຕ້ອງໄດ້​ພ້ອມ​ກັນຂໍຂອບ​ໃຈ ​ແລະ ​ຮູ້​ບຸນຄຸນ​ຢ່າງ​ລົ້ນ​ເຫຼືອ​ຕໍ່​ວິລະ​ກະສັດ ​ແລະ ​ຜູ້​ນໍາ​ໃນ​ຍຸກກ່ອນ​ທີ່​ໄດ້​ນໍາພາ​ສ້າງສາ​ສິ່ງ​ນີ້​ຂຶ້ນ​ມາ​ຈົນ​ກາຍ​ເປັນ​ຊັບສິນ​ທາງ​ປັນຍາ​ອັນ​ລ້ຳ​​ເລີດ ​ແລະ ​ກາຍ​ເປັນ​ມູນ​ເຊື້​ອໃຫ້​ພວກ​​ເຮົາ​ໄດ້​ສືບ​ທອດກັນ​ມາ​ຜອງ​ເທົ່າ​ທຸກ​ວັນ​ນີ້.​ ເມື່ອ​ກ່າວ​ເຖິງ​ຜົນງານ ແລະ​ ພາລະກິດ​ອັນ​ຍິ່ງ​ໃຫຍ່​ກໍຕ້ອງ​ໄດ້​ລໍາ​ລຶກນຶກ​​ເຖິງ​ພະ​ຍາ​ຟ້າ​ງຸ່ມ​ມະຫາລາດ​ທີ່​ໄດ້​ທ້ອນ​ແຜ່ນດິນ​ລ້ານຊ້າງ​ກວ້າງ​ໃຫຍ່​ໄພສານ ​ທັງ​ເປັນ​ຜູ້​ນໍາເອົາ​ສາສະໜາ​ພຸດ​ເຂົ້າ​ມາ​ເພື່ອ​ສຶກສາ​ອົບຮົມ​ ແລະ ​ສ້າງ​ຄົນ​ລາວ​, ຊາດ​ລາວໃຫ້​ເປັນ​ຊາດໜຶ່ງ​ທີ່ຍັງ​ຍືນ​ຍົງ​ຄົງ​ຕົວ​ໃນ​ດິນ​ແດນແຫ່ງ​ນີ້. ຂໍ​ຂອບ​ໃຈ​ ແລະ​ ຮູ້​ບຸນຄຸນ​ພະ​ເຈົ້າ​ສຸລິຍະ​ວົງສາ​ທໍາ​ມິ​ກະລາດ​ທີ່​ເປັນ​ຜູ້​ຝັກ​ໄຝ່​ໃນ​ການ​ປັບປຸງ​ ແລະ ​ເສີມຂະຫຍາຍ​ມູນ​ເຊື້ອແຫ່ງ​ວັດທະນະ​ທໍາ​ຂອງ​ຊາດ ​ແລະ ​ສາສະໜາ​ໃຫ້​ຍືນ​ຍົງ​ຄົງ​ຕົວ​ມາ​ຮອດ​ຍຸກປັດຈຸບັນ. ຂໍ​ຂອບ​ໃຈ ​ແລະ​ ຮູ້​ບຸນຄຸນ​ພະ​ເຈົ້າ​ໄຊ​ເສດຖາ​ທິລາດ​ທີ່​​ໄດ້​ມີ​ວິ​ໄສ​ທັດ​ ແລະ ​ມຸມ​ມອງ​ອັນ​ກວ້າງ​ໄກ ຍ້າຍ​ນະຄອນຫຼວງ​​ຈາກ​ນະຄອນ​ຊຽງ​ທອງມາ​ຕັ້ງ​ຢູ່​ວຽງ​ຈັນ ​ແລະ ​ເປັນ​ຜູ້ສ້າງ​ພະທາດຫຼວງ​​ໃຫ້​ກາຍ​ເປັນ​ສັນຍາ​ລັກ​ແຫ່ງ​ຄວາມ​ເປັນ​ປຶກ​ແຜ່ນ ​​ເຮັດ​ໃຫ້ປວງ​ຊົນ​ລາວ​ທັງ​ຊາດ​ໄດ້ພາກັນ​ລໍາ​ລຶກ ​ແລະ ​ເຄົາລົບ​ນົບ​ໄຫວ້ມາ​ຮອດ​ຍຸກ​ປັດຈຸບັນ. ຂໍ​ຂອບ​ໃຈ​ ແລະ ​ຮູ້​ບຸນຄຸນ​ຕໍ່​ພາລະກິດ​ອັນ​ຍິ່ງ​ໃຫຍ່​ຂອງ​ປະທານ ​ໄກສອນ ພົມວິຫານ ທີ່​ໄດ້​ນໍາພາ​ປ່ຽນແປງ​ປະ​ເທດ​ລາວ​ອັນ​ແສນ​ຮັກ ​ແລະ ​ຫວງ​ແຫນ​ຂອງ​ພວກ​ເຮົາກ້າວ​ສູ່​ຍຸກ​ໃໝ່ບົນ​ເສັ້ນທາງ​ອັນ​ສະຫງ່າ​ງາມ​​ແຫ່ງ​ຍຸກ​ສະ​ໄໝ.

​ເພາະສະ​ນັ້ນ,​ ເຮົາ​ຈຶ່ງ​ສາມາດ​ເວົ້າ​ໄດ້​ວ່າ ​ບຸນພະທາດຫຼວງບໍ່​ພຽງ​ແຕ່​ເປັນ​ຮີດຄອງ​ປະ​ເພນີ​ທີ່​ເຄີຍ​ປະຕິບັດ​ກັນ​ມາ​ໃນ​ແຕ່ລະ​ປີຕາມ​ຮີດ​ຕາມ​ຄອງ​ເທົ່າ​ນັ້ນ, ​ແຕ່​ມັນຍັງ​ເປັນ​ການ​ສືບ​ທອດ ​ແລະ​ ເສີມ​ຂະຫຍາຍ​ມູນ​ເຊື້ອ​ແຫ່ງ​ວິລະ​ກໍາ​ອັນ​ລໍ້າ​ເລີດ​ຂອງ​ວິລະ​ກະສັດ ​ແລະ ​ຜູ້ນໍາ​ຮຸ້ນ​ກ່ອນໃຫ້​ຢູ່ຄຽງ​ຄູ່​ກັບ​ຄົນ​ລາວ ​ແລະ ​ຊາດ​ລາວ​ຕະຫຼອດ​ໄປ. ​​ເຮົາ​ເຫັນ​ວ່າໃນ​ການ​ເຮັດບຸນ​ນະມັດສະການ​ພະທາດຫຼວງ​ໃນແຕ່ລະ​ປີ​ນັ້ນ​ເຫັນ​ວ່າ​ແຕກ​ຕ່າງ ​ແລະ ​ມີ​ການ​ພັດທະນາດີ​ຂຶ້ນ​ທຸກ​ປີ ເປັນ​ຕົ້ນ​ນອກຈາກ​ການ​ປະຕິບັດ​ພິທີ​ກໍາທາງ​ດ້ານ​ສາສະໜາ​ຕາມ​ຮີດ​ຕາມ​ຄອງ​ແລ້ວ ​ໃນ​ຍຸກ​ປັດຈຸບັນ​ຍັງ​ມີ​ການ​ເຊື່ອມ​ໂຍງ​ກັບ​ການ​ຈໍາໜ່າຍ​ສິນຄ້າ, ການທ່ອງທ່ຽວ​ ແລະ ​ອື່ນ​ໆ. ນີ້​ກໍ​ສະ​ແດງ​ໃຫ້​ເຫັນ​ວ່າ​ສະພາບ​ການ​ຂອງ​ໂລກ​ ແລະ ​ສະພາບ​ຂອງ​ບ້ານ​ເມືອງ​ມີ​ການ​ພັດທະນາ​ທີ່ກ້າວ​ໄກ​ໄປ​ເທົ່າ​​ໃດ​ ພວກ​ເຮົາ​ກໍຍິ່ງ​ເຮັດ​ໃຫ້​ສີສັນ​ຂອງ​ບຸນທາດຫຼວງ​ກາຍ​ເປັນ​ສູນລວມ​ແຫ່ງ​ນ້ຳ​ໃຈ​ມະຫາ​ສາມັກຄີ​ຂອງ​ປວງ​ຊົນ​ລາວ​ທັງ​ຊາດ. ​ໃນ​ໂອກາດ​ບຸນ​ນະມັດສະການ​ພະທາດຫຼວງໃນ​ແຕ່ລະ​ປີ ນ​ອກຈາກ​ຈະ​ມີ​ປະຊາຊົນ​ລາວ​ບັນດາ​ເຜົ່າ​ໃນ​ທົ່ວ​ປະ​ເທດ​ໄດ້​ເຂົ້າ​ມາ​ສັກກາລະ​ບູຊາ​ ແລະ ​ທ່ອງ​ທ່ຽວ​ແລ້ວ ​ກໍຍັງ​ມີ​ຊາວຕ່າງປະ​ເທດ​ຈາກທຸກ​ສາລະ​ທິດ​ໄດ້​ເຂົ້າມາ​ທ່ອງ​ທ່ຽວ​​ຢ່າງ​ຫຼວງ​ຫຼາຍ​ພາຍ​ມາກ.

​ເຖິງ​ຢ່າງ​ໃດ​ກໍດີ, ​ເທົ່າ​ທີ່ຜູ້​ຂຽນ​ໄດ້​ຮັບ​ຮູ້​ສະ​ເພາະ​ບຸນທາດຫຼວງ​ປີ​ນີ້​ຍິ່ງ​ຈະ​ມີ​ກິດຈະ​ກໍາ​ທີ່​ຫຼາກ​ຫຼາຍ​ກວ່າປີ​​ຜ່ານ​ໆມາ. ທາງດ້ານສາສະໜາ​ນັ້ນ ​​ໃນ​ຂັ້ນ​ເລີ່ມ​ຕົ້ນ​ກໍ​ຈະ​ມີ​ພິທີ​ສົມ​ໂພດ​ພະທີ່​ຫຼອມ​ດ້ວຍ​ຄໍາ​ໃນ​ຍຸກ​ສັງຄົມ​ນິຍົມ​​ເພື່ອ​ເປັນ​ສັນຍາລັກ​ໄວ້ຄຽງ​ຄູ່​ກັບ​ພະທາດຫຼວງ. ກິດຈະ​ກໍາ​ນີ້​ແມ່ນ​ໄດ້​ປະຕິບັດ​ກັນ​ມາ​ໃນ​ວັນ​ທີ 27 ຕຸລາ 2017. ສ່ວນວ່າ​ກິດຈະ​ກໍາ​ທີ່​ເປັນ​ທາງ​ການ​ນັ້ນ​​ເພິ່ນ​​ມີພິທີ​ເປີດ​ປີ​ທ່ອງ​ທ່ຽວ​ຢ່າງ​ເປັນທາງ​ການ ​​ແລະ ​ມີ​ກິດຈະ​ກໍາ​ອື່ນໆ​ທີ່​ຫຼາກ​ຫຼາຍ​ຢ່າງ​ເຕັມ​ຮູບ​ແບບ. ກໍຂໍໃຫ້​ບຸນ​ພະທາດຫຼວງ​ປີ​ນີ້​ຈົ່ງ​ເປັນ​ປີ​ແຫ່ງ​ຄວາມ​ສະຫງົບ​ຈົບງາມ, ​ເປັນ​ປີ​ມະຫາ​ສາມັກຄີ​ຂອງ​ຄົນ​ໃນ​ທົ່ວ​ປະ​ເທດ ​ແລະ ​ຈາກ​ຕ່າງແດນ​ທີ່​ໄດ້​ເຂົ້າ​ມາ​ສໍາຜັດ​ກັບ​ບັນຍາກາດສີສັນ​ຂອງ​ບຸນ​ນະມັດສະການ​ພະທາດຫຼວງຢູ່​ເມືອງ​ລາວ.