ຮອງນາຍົກລັດຖະມົນຕີຢ້ຽມຢາມແຂວງບິ່ງເຢືອງ ສສ.ຫວຽດນາມ

- advert banner 728 90 728x90 - ຮອງນາຍົກລັດຖະມົນຕີຢ້ຽມຢາມແຂວງບິ່ງເຢືອງ ສສ.ຫວຽດນາມ

ໃນວັນທີ 25 ຕຸລານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ  ພ້ອມດ້ວຍຄະນະ, ໄດ້ສືບຕໍ່ຢ້ຽມຢາມ ແລະ ເຮັດວຽກຢູ່ແຂວງບິ່ງເຢືອງ ສສ. ຫວຽດນາມ, ໂດຍໄດ້ຮັບການຕ້ອນຮັບຈາກທ່ານ ເຈີ່ນແທງລຽມ ປະທານສະພາປະຊາຊົນແຂວງບິ່ງເຢືອງດ້ວຍຄວາມອົບອຸ່ນ ເພື່ອຮັບຟັງສະພາບການພັດທະນາເສດຖະກິດ-ສັງຄົມຂອງແຂວງບິ່ງເຢືອງ, ໂດຍປະຕິບັດຕາມການຊີ້ນໍາ-ນໍາພາຂອງສູນກາງພັກ ກໍຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກແຂວງໄດ້ເຮັດໃຫ້ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ. ຊຶ່ງອັນພົ້ນເດັ່ນທີ່ສຸດແມ່ນການລົງທຶນດ້ານອຸດສາຫະກໍາໄດ້ຮັບຂະຫຍາຍຕົວຢ່າງໄວວາ. ໃນປີ 2016 ຈັງຫວະການເຕີບໂຕຂອງເສດຖະກິດສະເລ່ຍຢູ່ໃນລະດັບ 8,5%, ລາຍໄດ້ສະເລ່ຍຕໍ່ຫົວຄົນ ປະມານ 108 ລ້ານດົງຕໍ່ຄົນຕໍ່ປີ ຫລື ປະມານ 4.900 ໂດລາສະຫະລັດ, ຂະແໜງອຸດສາຫະກໍາກວມ 63%, ການຄ້າ 23,5%, ຂະແໜງກະສິກໍາ 4%, ສ່ວນທີ່ຍັງເຫລືອແມ່ນຂະແໜງການອື່ນໆ. ການເກັບລາຍຮັບເຂົ້າງົບປະມານໃນປີ 2017 ບັນລຸໄດ້ 40 ພັນຕື້ດົງ. ສໍາລັບການລົງທຶນຕ່າງປະເທດໃນແຕ່ລະປີແມ່ນລື່ນຄາດໝາຍທີ່ວາງໄວ້, ເຊິ່ງສະແດງອອກນັບແຕ່ປີ 2016 ມາຮອດໄລຍະ 9 ເດືອນປີ 2017 ມີໂຄງການທັງໝົດ  3.000 ກວ່າໂຄງການທີ່ຍັງຈັດຕັ້ງປະຕິບັດຢູ່, ມີມູນຄ່າທັງໝົດປະມານ 27,9 ຕື້ໂດລາສະຫະລັດ, ບັນດາໂຄງການດັ່ງກ່າວແມ່ນມາຈາກ 63 ປະເທດໃນພາກພື້ນ ແລະ ໃນໂລກ. ສາມາດເວົ້າໄດ້ວ່າແຂວງບິ່ງເຢືອງເປັນແຂວງໜຶ່ງທີ່ສາມາດດຶງດູດການລົງທຶນຂອງຕ່າງປະເທດເປັນອັນດັບ 2 ໃນຈໍານວນ 63 ແຂວງຫວຽດນາມຖັດຈາກນະຄອນໂຮ່ຈິມິງ. ເນື່ອງຈາກວ່າແຂວງໄດ້ເອົາໃຈໃສ່ເປີດກວ້າງ ແລະ ສ້າງເງື່ອນໄຂອໍານວຍຄວາມສະດວກກ່ຽວກັບກົນໄກ, ລະບຽບການຕ່າງໆ ເພື່ອດຶງດູດການລົງທຶນ, ບັນດາການນໍາຂອງແຂວງທຸກຂັ້ນ ໄດ້ເອົາໃຈໃສ່ຊຸກຍູ້, ຕິດຕາມ ແລະ ໃຫ້ການຊ່ວຍເຫລືອຢ່າງໃກ້ຊິດກັບບັນດາວິສາຫະກິດ, ນັກທຸລະກິດ ແລະ ຜູ້ປະກອບການຕ່າງໆ ເພື່ອຮ່ວມກັນແກ້ໄຂບັນດາບັນຫາທີ່ຫຍຸ້ງຍາກໄດ້ຢ່າງທັນການ.

- lattana 1 - ຮອງນາຍົກລັດຖະມົນຕີຢ້ຽມຢາມແຂວງບິ່ງເຢືອງ ສສ.ຫວຽດນາມ

ມາຮອດປັດຈຸບັນ ທົ່ວແຂວງບໍ່ມີຄອບຄົວທຸກຍາກແລ້ວ, ໂດຍອີງໃສ່ມາດຕະຖານຄວາມທຸກຍາກຂອງແຂວງທີ່ໄດ້ກໍານົດ, ເຊິ່ງສູງກວ່າມາດຕະຖານ ທີ່ລັດຖະບານວາງອອກທົບ 2 ເທົ່າ. ເວົ້າສະເພາະການຮ່ວມມືພົວພັນລະຫວ່າງແຂວງບິ່ງເຢືອງກັບບັນດາແຂວງຂອງລາວນັ້ນ, ຫວັງວ່າທ່ານ ຮອງນາຍົກລັດ ຖະມົນຕີແຫ່ງ ສປປ ລາວ ຈະສ້າງເງື່ອນໄຂອໍານວຍຄວາມສະດວກ ເພື່ອເຮັດໃຫ້ການຮ່ວມມືຂັ້ນທ້ອງຖິ່ນຂອງສອງປະເທດນັບມື້ໄດ້ຮັບການເສີມຂະຫຍາຍ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງອຳນາດການປົກຄອງແຂວງ ແລະ ປະຊາຊົນ ທີ່ສາມາດຍາດມາໄດ້ຢ່າງໃຫຍ່ຫລວງ, ພ້ອມຕີລາຄາສູງຕໍ່ສາຍພົວ ພັນການຮ່ວມມືຂອງສອງຝ່າຍ ລາວ-ຫວຽດນາມ ຕະຫລອດໄລຍະຫລາຍປີທີ່ຜ່ານມາເວົ້າລວມ, ເວົ້າສະເພາະແມ່ນການພົວພັນຮ່ວມມືລະຫວ່າງແຂວງບິ່ງເຢືອງ ແລະ ບັນດາແຂວງຂອງລາວ ອັນເປັນການເສີມຂະຫຍາຍສາຍພົວພັນແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດລາວ-ຫວຽດນາມໃຫ້ນັບມື້ກ້າວສູ່ລວງເລິກ.