ລາວເປີດປີທ່ອງທ່ຽວ 2018 ແລະ ບຸນນະມັດສະການພະທາດຫຼວງວຽງຈັນ

- advert banner 728 90 728x90 - ລາວເປີດປີທ່ອງທ່ຽວ 2018 ແລະ ບຸນນະມັດສະການພະທາດຫຼວງວຽງຈັນ

ພິທີເປີດປີທ່ອງທ່ຽວລາວ 2018 ແລະ ບຸນນະມັດສະການພະທາດຫຼວງວຽງຈັນມີຂຶ້ນໃນແລງວັນທີ 28 ຕຸລານີ້, ທີ່ເດີນພະທາດຫຼວງ, ໂດຍການເຂົ້າຮ່ວມ ແລະ ກ່າວເປີດໂດຍທ່ານນາຍົກລັດຖະມົນຕີ ທອງລຸນ ສີສຸລິດ, ມີການນໍາຂັ້ນສູງພັກ-ລັດ, ທູຕານຸທູດ ພ້ອມດ້ວຍແຂກຖືກເຊີນ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມຢ່າງຫຼວງຫຼາຍ.

- lattana 1 - ລາວເປີດປີທ່ອງທ່ຽວ 2018 ແລະ ບຸນນະມັດສະການພະທາດຫຼວງວຽງຈັນ

ໃນໂອກາດທີ່ມີຄວາມໝາຍສໍາຄັນນີ້, ທ່ານນາຍົກລັດຖະມົນຕີໄດ້ກ່າວຄໍາປາໄສວ່າ: ຕາງໜ້າພັກ-ລັດຖະບານ ແລະ ປະຊາຊົນລາວ ຂໍເຊີນຊວນນັກທ່ອງທ່ຽວທາງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວປະເທດລາວດ້ວຍຄວາມມ່ວນຊື່ນ ແລະ ໂຊກດີຕະຫຼອດໄປ.

ໃນໂອກາດນີ້, ທ່ານລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຍົກໃຫ້ເຫັນວ່າ: ການເປີດປີທ່ອງທ່ຽວລາວ 2018 ນີ້, ເປັນກິດຈະກໍາທີ່ສໍາຄັນທີ່ສຸດ ນອກຈາກເປັນການສົ່ງເສີມການທ່ອງທ່ຽວແລ້ວ, ຍັງເປັນການອະນຸລັກວັດທະນະທໍາທີ່ເປັນເອກະລັກ ແລະ ຮີດຄອງປະເພນີອັນດີງາມຂອງລາວ, ພ້ອມນັ້ນ ການເປີດປີທ່ອງທ່ຽວລາວ 2018 ນີ້ ຍັງເປັນການສ້າງຄວາມຄຶກຄື້ນ ເພື່ອກະຕຸ້ນເສດຖະກິດທາງກົງ ແລະ ທາງອ້ອມ, ໂດຍສະເພາະບັນດາຫົວໜ່ວຍທຸລະກິດທີ່ປິ່ນອ້ອມໃນຂະແໜງການທ່ອງທ່ຽວ ແລະ ເປັນເຫດການທີ່ມີຄວາມໝາຍສໍາຄັນຂອງຊາດທີ່ສະແດງໃຫ້ເຫັນທົ່ວພັກ, ທົ່ວກອງທັບ ແລະ ທົ່ວປວງຊົນລາວ ພ້ອມພຽງກັນປະຕິບັດຕາມນະໂຍບາຍຂອງລັດຖະບານໃນການຈັດປີທ່ອງທ່ຽວລາວ 2018 ພ້ອມທັງຫ້າງຫາກະກຽມເປີດຕະຫຼາດນັດສາກົນ ແລະ ບຸນນະມັດສະການພະທາດຫຼວງວຽງຈັນ, ຊຶ່ງເປັນບຸນປະເພນີອັນດີງາມຂອງຊາດເຮົາ ແລະ ຍັງເປັນການສະເຫຼີມສະຫລອງຜົນສໍາເລັດການປະຕິສັງຂອນພະທາດຫລວງຄັ້ງທີ 4 ແລະ ງານສົມໂພດພະທາດຫຼວງໃນໄລຍະດຽວກັນ.   ທ່ານກ່າວອີກວ່າ: ກິດຈະກໍາປີທ່ອງທ່ຽວລາວ 2018 ມີທັງກິດຈະກໍາພາຍໃນ ແລະ ຕ່າງປະເທດ, ຊຶ່ງປະກອບມີບັນດາບຸນປະເພນີ ແລະ ເທດສະການຕ່າງໆຢູ່ໃນບັນດາແຂວງໃນຂອບເຂດທົ່ວປະເທດ.  ສົ່ງເສີມການທ່ອງທ່ຽວປະຫວັດສາດ, ທໍາມະຊາດ ແລະ ວັດທະນະທໍາທີ່ໂດດເດັ່ນຂອງແຕ່ລະແຂວງ, ຊຶ່ງນັກທ່ອງທ່ຽວສາມາດເຂົ້າມາທ່ອງທ່ຽວໄດ້ຕະຫຼອດປີ.

ໃນໂອກາດດັ່ງກ່າວ, ທ່ານຍັງໄດ້ຍົກໃຫ້ເຫັນວ່າ: ໂດຍປະຕິບັດນະໂຍບາຍດັ່ງກ່າວ, ໃນຊຸມປີຜ່ານມາການທ່ອງທ່ຽວລາວໄດ້ມີການເຕີບໃຫຍ່ຂະຫຍາຍຕົວເປັນກ້າວໆມາ, ເຮັດໃຫ້ມີນັກທ່ອງທ່ຽວເຂົ້າມາທ່ອງທ່ຽວລາວ ນັບມື້ຫຼາຍຂຶ້ນ. ໃນປີ 2000 ມີນັກທ່ອງທ່ຽວເຂົ້າມາລາວ 737.208 ຄົນ, ມີລາຍຮັບ 113 ລ້ານກວ່າໂດລາສະຫະລັດ ແລະ ໃນປີ 2015 ຈໍານວນນັກທ່ອງທ່ຽວທີ່ເຂົ້າມາລາວເພີ່ມຂຶ້ນເປັນ 4,6 ລ້ານກວ່າຄົນ, ມີລາຍຮັບ 725 ລ້ານກວ່າໂດລາສະຫະລັດ ແລະ ຄາດວ່າໃນປີ 2020 ຈະມີນັກທ່ອງທ່ຽວເຖິງ 6,2 ລ້ານຄົນ ແລະ ຈະມີລາຍຮັບ 993 ລ້ານກວ່າໂດລາສະຫະລັດ.