ຕ້ອນຮັບປີທ່ອງທ່ຽວຕ້ອງໃສ່ໃຈເລື່ອງຮັກສາ ຄວາມສະອາດຂອງຕົວເມືອງ

- advert banner 728 90 728x90 - ຕ້ອນຮັບປີທ່ອງທ່ຽວຕ້ອງໃສ່ໃຈເລື່ອງຮັກສາ ຄວາມສະອາດຂອງຕົວເມືອງ

ໂດຍ: ທ່ຽງ​ທຳ

- lattana 1 - ຕ້ອນຮັບປີທ່ອງທ່ຽວຕ້ອງໃສ່ໃຈເລື່ອງຮັກສາ ຄວາມສະອາດຂອງຕົວເມືອງ

ສະບາຍດີ ​ເພື່ອນ​ຜູ້​ອ່ານ​ທີ່​ຮັ​ກ​ແພງ, ພວກ​ເຮົາ​ຄົງ​ຈະ​ຮູ້​ດີ​ແລ້ວ​ວ່າ: ປີ​ທ່ອງ​ທ່ຽວ​ລາວ 2018 ​ໄດ້​ເປີດ​ຂຶ້ນ​ແລ້ວ​ພ້ອມໆ​ກັບ​ບຸນ​ນະມັດສະການ​ພະທາດ​ຫລວງ​ວຽງ​ຈັນ​ເປັນ​ປາງ​ບຸນ​ໃຫຍ່​ຂອງ​ຊາດ, ​ເປົ້າໝາຍ​ຫລັກ​ກໍ​ເພື່ອ​ແນ​ໃສ່​ສົ່ງ​ເສີມ ​ແລະ ດຶງ​ດູດ​ນັກ​ທ່ອງ​ທ່ຽວ​ເຂົ້າມາລາ​ວ​ໃຫ້​ຫລາຍ​ຂຶ້ນ, ພ້ອມ​ເປັນ​ການ​ຊຸກຍູ້​ການ​ພັດທະນາ​ເສດຖະກິດ-ສັງຄົມ​ລາວ​ເຕີບ​ໃຫຍ່​ຂະຫຍາຍຕົວ, ​ແຕ່​ເພື່ອ​ບັນລຸ​ເປົ້າໝາຍ​ດັ່ງກ່າວ ມັນ​ກໍ​ຕ້ອງ​ມີ​ຫລາຍ​ເງື່ອນ​ໄຂ ​ແລະ ຫລາຍ​ປັດ​ໄຈ​ເພື່ອ​ປະກອບສ່ວນ​ເຂົ້າ​ໃນ​ການ​ຮອງ​ຮັບ​ວຽກ​ງານ​ດັ່ງກ່າວ ​ແລະ ໜຶ່ງ​ໃນ​ນັ້ນກໍ​ແມ່ນ​ວຽກ​ງານ​ອະນາ​ໄມ​ຮັກສາ​ຄວາມ​ສະອາດ​ຂອງ​ຕົວ​ເມືອງ ​ແລະ ສິ່ງ​ແວດ​ລ້ອມ​ອັນ​ເປັນ​ປັດ​ໄຈ​ສຳຄັນ​ໜຶ່ງ​ທີ່​ຫລີກ​ເວັ້ນບໍ່​ໄດ້ ​ເພາະ​ປັດຈຸບັນ​ການທ່ອງທ່ຽວ​ທຳ​ມະ​ຊາດ​ໄດ້​ສ້າງ​ແຮງ​ຈູງ​ໃຈ​ແກ່​ນັກ​ທ່ອງ​ທ່ຽວ​ເປັນ​ຈຳນວນ​ບໍ່​ໜ້ອຍ ຄື​ຢູ່​ປະ​ເທດ​ບູຖານ ​ເຖິງ​ວ່າ​ເປັນ​ປະ​ເທດ​ນ້ອຍໆ​ແຕ່​ເຂົາ​ສາມາດ​ດຶງ​ດູດ​ນັກ​ທ່ອງ​ທ່ຽວ​ເຂົ້າປະ​ເທດ​ຈົນ​ເກີນ​ຄວາມ​ອາດ​ສາມາດ​ຮອງ​ຮັບ. ນີ້​ກໍ​ອາດ​ເນື່ອງ​ຈາກ​ວ່າ​ບັນຫາ​ຫລັກໆ​ແມ່ນ​ການ​ຮັກສາ​ຄວາມ​ສະອາດ ​ແລະ ຕ້ານ​ສິ່ງ​ແວດ​ລ້ອມ​ເປັນ​ພິດ, ​ເຂົາ​ເຈົ້າຮູ້​ປົກ​ປັກ​ຮັກສາປ່າ​ໄມ້ ​ແລະ ຊັບພະຍາກອນ​ທຳ​ມະ​ຊາດ​ທີ່​ກົມ​ກືນ​ກັບ​ການ​ອະນຸລັກ​ຮັກສາ​ວັດທະນະທຳ​ອັນ​ເປັນ​ມູນ​ມໍລະດົກ​ຂອງ​ເຂົາ​ເຈົ້າ, ປະຊາຊົນ​ເຄົາລົບ​ນັບຖື​ລະບຽບກົດໝາຍ​ຂອງ​ພົນລະ​ເມືອງ​ຢ່າງ​ເຄັ່ງ​ຂັດ ນັບ​ແຕ່​ຂອດ​ການ​ນຸ່ງ​ຖື, ອາຫານ​ການ​ກິນ​ປອດ​ສານພິດ ​ໄປ​ຈົນ​ຮອດ​ການ​ສະກັດ​ກັ້ນໜໍ່​ແໜງ​ໄພ​ສັງຄົມ​ທີ່​ບໍ່​ດີ ​ແລະ ມາລະຍາດ​ຂອງ​ພົນລະ​ເມືອງ​ໄດ້​ຍິນ​ວ່າ​​ເພິ່ນນຳ​ເອົາ​ສິ່ງ​ດັ່ງກ່າວ​ເຂົ້າ​ໃນ​ລະບົບ​ການ​ສຶກສາ​ນັບ​ແຕ່​ຂັ້ນປະຖົມ​ເປັນ​ຕົ້ນ​ໄປ ​ແລະ ພວກ​ເຮົາ​ເດ ​ໃນ​ເມື່ອ​ຫລຽວຄືນ​ຫລັງ​ກໍ​ເຫັນ​ວ່າ​ສິ່ງ​ງົດ​ງາມ​ດັ່ງກ່າວ​ໄດ້​ຄ່ອຍໆ​ຫ່າງ​ຫາຍ​ໄປ ​ໂດຍ​ສະ​ເພາະ​ສິ່ງ​ແວດ​ລ້ອມ, ຫາດ​ຊາຍ​ທີ່​ພວກ​ເຮົາ​ໄດ້​ຊື່ນ​ຊົມ​ໃນ​ເມື່ອ​ກ່ອນ​ກໍ​ບໍ່​ມີ​ອີກ​ແລ້ວ, ​ແມ່ນ້ຳ​ໃສ​ອັນ​ສວຍ​ງາມ​ໃນ​ເມື່ອ​ກ່ອນ​ກໍ​ບົກ​​ແຫ້ງ​ລົງ. ນີ້​ກໍ​ເນື່ອງ​ຈາກ​ວ່າ​ປ່າ​ໄມ້ ​ແລະ ຊັບພະຍາກອນ​ທຳ​ມະ​ຊາດ​ຫລາຍ​ຢ່າງ​ໄດ້​ຖືກ​ທຳລາຍ, ​ແຕ່​ກໍ​ໂຊກ​ດີ​​ເມື່ອນາຍົກ​ໄດ້​ມີ​ຄຳ​ສັ່ງ​ຫ້າມ​ຕັດ​ໄມ້​ທຳລາຍ​ປ່າ​ຈຶ່ງ​ເຫັນ​ພູ​ປອກ​ໂຫລ້​ນຫລາຍ​ໜ່ວຍ​ຄ່ອຍໆ​ກັບ​ມາ​ມີ​ສີຂຽວ ​ແລະ ຫຍັບ​ເຂົ້າມາ​ມໍ່ໆ​ກໍ​ແມ່ນ​ເລື່ອງ​ທີ່​ບໍ່​ຄວນ​ລືມ​ຢູ່​ໃນ​ນະຄອນຫລວງ​ວຽງ​ຈັນ​ນັ້ນ​ແມ່ນ​ການ​ຮັກສາ​ອະນາ​ໄມ​ຄວາມ​ສະ​ອາດ​ຕົວ​ເມືອງ, ປັດຈຸບັນ​ເບິ່ງ​ຄື​ວ່າຄວາມ​ຮົກ​ເຮື້ອຂອງ​ເສັ້ນທາງ​ລະນຶກ​ວັນ​ປະຫວັດສາດ 450 ປີ ຖ້າ​ໃຜ​ຫາກ​ໄດ້​ຂີ່​ລົດ​ຜ່ານ​ເສັ້ນທາງ​ດັ່ງກ່າວ​ກໍ​ຈະ​ໄດ້​ເຫັນ​ເຖິງ​ຄວາມ​ເສົ້າໝອງ​ຮົກ​ເຮື້ອຂອງ​ມັນ, ຈາກ​ການ​ຂາດ​ຄວາມ​ຮັກສາ​ອະນາ​ໄມ​ຖາກ​ຖາງ​ຕົ້ນຫຍ້າ​ອັນ​ສູງຫລຽວ​ຈົນ​ເກືອບ​ວ່າ​ບໍ່​ເຫັນ​ກັນ, ​ເມື່ອ​ຮອດ​ຍາມ​ຄໍ່າ​ມາ​ກໍ​ບໍ່​ມີ​ຮອດ​ແສງ​ໄຟ​ທີ່​ຈະ​ເຍືອງ​ທາງ​ໃຫ້ການ​ສັນຈອນ​ໄປມາ​ໃນ​ເສັ້ນທາງ​ດັ່ງກ່າວສົມ​ເປັນ​ເສັ້ນທາງ​ຫລັກ​ຂອງ​ນະຄອນຫລວງ, ​ເມື່ອ​ເວົ້າຮອດ​ລະບົບ​ການ​ບໍລິການ​ເກ​ັບມ້ຽນ​ຂີ້​ເຫຍື້ອກໍ​ເຮັດ​ພຽງ​ແປະໆ​ບາງໆ, ຄຸ້ມ​ບ້ານ​ຊານ​ເມືອງ​ຫລາຍ​ບ່ອນ​ຍັງ​ຮົກ​ເຮື້ອ, ການຖິ້ມຂີ້​ເຫຍື້ອຊະຊາຍ​ຍັງ​ມີ​ຢູ່ ​ເຊິ່ງຈຸດ​ນີ້​ກໍ​ເນື່ອງ​ມາ​ຈາກ​ລະບົບ​ການ​ບໍລິການ​ເກັບ​ມ້ຽນ​ຂີ້​ເຫຍື້ອຢູ່​ນະຄອນຫລວງ​ເຮົາ​ມີ​ລັກສະນະ​ຊັກ​ຊ້າ, ບາງ​ບ່ອນ​ບາງ​ທາງ​ຊອຍ​ກໍ​ນັບ​ເປັນ​ອາທິດ​ຈຶ່ງ​ມີ​ລົດ​ເກັບ​ຂີ້​ເຫຍື້ອ​ເຂົ້າມາ​ບໍລິການ, ສິ່ງ​ນີ້​ຂະ​ແໜງ​ການ​ຮັບຜິດຊອບ​ຄວນ​ພິຈາລະນາ ​ເພື່ອ​ສ້າງ​ນະຄອນຫລວງ​ໃຫ້​ສະອາດ​ງາມ​ຕາ ​ແລະ ​ເປັນ​ຈຸດ​ດຶງ​ດູດ​ຜູ້​ມາ​ທຽວ​ຊົມ.