ການປະຕິບັດຄໍາຕັດສີນຂອງສານຍັງມີຫລາຍຂອດຕ້ອງແກ້ໄຂ

- advert banner 728 90 728x90 - ການປະຕິບັດຄໍາຕັດສີນຂອງສານຍັງມີຫລາຍຂອດຕ້ອງແກ້ໄຂ

ທ່ານລັດຖະມົນຕີກະຊວງຍຸຕິທໍາ ໄຊສີ ສັນຕິວົງ ຍອມຮັບວ່າການປະຕິບັດຄໍາຕັດສີນຂອງສານແມ່ນຍັງມີຄວາມຫຍຸ້ງຍາກ ແລະ ຂໍ້ຄົງຄ້າງຫລາຍຢ່າງ, ຊຶ່ງມັນສະແດງອອກຜ່ານການເຄື່ອນໄຫວວຽກງານຕົວຈິງ, ໂດຍສະເພາະໃນ ໄລຍະ 9 ເດືອນຜ່ານມາ, ສາມາດຈັດຕັ້ງປະຕິບັດຄໍາຕັດສີນຂອງສານສໍາເລັດ ຈໍານວນ 1.555 ເລື່ອງ, ທຽບໃສ່ໄລຍະດຽວກັນຂອງປີຜ່ານມາເພີ້ມຂຶ້ນ 6% ແລະ ມາຮອດປັດຈຸບັນ, ມີຈໍານວນຄໍາຕັດສີນໃຊ້ໄດ້ເດັດຂາດທີ່ພວມຈັດຕັ້ງປະຕິບັດ ແລະ ບໍ່ສາມາດປະຕິບັດໄດ້ຫລາຍກວ່າ 21.000 ເລື່ອງ, ໃນນີ້ຄະດີແພ່ງຫລາຍກວ່າ 5.600 ເລື່ອງ ແລະ ອາຍາຫລາຍກວ່າ 15.000 ເລື່ອງ, ພວມຈັດຕັ້ງຫລາຍກວ່າ 18.000 ເລື່ອງ, ບໍ່ສາມາດຈັດຕັ້ງປະຕິບັດໄດ້ 2.800 ກວ່າເລື່ອງເທົ່າກັບ 14% ຂອງຈໍານວນຄໍາຕັດສີນທີ່ີມີທັງໝົດ ແລະ ເຖິງວ່າໃນຜ່ານມາພວກເຮົາໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານໃນຂົງເຂດຢ່າງເປັນປົກກະຕິ, ແຕ່ປາກົດວ່າການປະຕິບັດວຽກງານຍັງບໍ່ທັນມີຈຸດສຸມ, ບໍ່ເລິກເຊິ່ງເທົ່າທີ່ຄວນ, ຈຶ່ງພາໃຫ້ພະນັກງານປະຕິບັດຄໍາຕັດສີນຂອງສານຈໍານວນໜຶ່ງມີທັດສະນະການເມືອງບໍ່ໜັກແໜ້ນ, ຂາດຈັນຍາບັນຂອງພະນັກງານນັກກົດໝາຍ, ການບໍລິການປະຊາຊົນ ກໍຄືຄູ່ກໍລະນີບໍ່ມີຄວາມໂປ່ງໃສ, ເລືອກປະຕິບັດ, ທັງຊັກຊ້າ ແລະ ບາງຄະດີປະຕິບັດບໍ່ຖືກຕາມຄໍາຕັດສີນ ແລະ ອື່ນໆ, ຊຶ່ງເປັນໜໍ່ແໜງໜຶ່ງທີ່ພາໃຫ້ເກີດມີການວິພາກວິຈານຈາກສັງຄົມຕໍ່ຂະແໜງຍຸຕິທໍາ ແລະ ເພື່ອແກ້ໄຂສະພາບຫຍໍ້ທໍ້ດັ່ງກ່າວ, ໃນຕໍ່ໜ້ານີ້, ຈະໄດ້ສຸມໃສ່ປັບປຸງກົງຈັກການຈັດຕັ້ງຂອງອົງການຈັດຕັ້ງປະຕິບັດຄໍາຕັດສີນຂອງສານໃຫ້ມີຄວາມໜັກແໜ້ນ, ເຂັ້ມແຂງທາງດ້ານການເມືອງແນວຄິດ, ແບບແຜນວິທີເຮັດວຽກ, ເພື່ອໃຫ້ພະນັກງານມີທັດສະນະຖືກຕ້ອງ ແລະ ໂປ່ງໃສ, ປະຕິບັດໜ້າທີ່ວຽກງານໃຫ້ມີຄວາມວ່ອງໄວ, ຖືກຕ້ອງ ແລະ ສັກສິດຕາມລະບຽບກົດໝາຍ.

- lattana 1 - ການປະຕິບັດຄໍາຕັດສີນຂອງສານຍັງມີຫລາຍຂອດຕ້ອງແກ້ໄຂ