ຈີນເພີ່ມໂທດບໍ່ເຄົາລົບເພງຊາດ ເປັນຈຳຄຸກສູງສຸດ 3 ປີ

- advert banner 728 90 728x90 - ຈີນເພີ່ມໂທດບໍ່ເຄົາລົບເພງຊາດ ເປັນຈຳຄຸກສູງສຸດ 3 ປີ

ຈີນ​ແກ້​ໄຂ​ກົດໝາຍ​ເພີ່ມ​ບົດ​ລົງ​ໂທດຜູ້​ບໍ່​ເຄົາລົບ​ເພງ​ຊາດ​ໃຫ້​ຖືກ​ຈຳ​ຄຸກ​ສູງ​ສຸດ 3 ປີ, ພາຍຫລັງ​ມີ​ຄຳ​ສັ່ງ​ຫ້າມ​ເອົາ​ເພງ​ຊາດ​ໄປ​ຮ້ອງ​ຕາມ​ງານ​ລ້ຽງ, ງານ​ແຕ່ງດອງ ​ແລະ ງານ​ສົບ.

- lattana 1 - ຈີນເພີ່ມໂທດບໍ່ເຄົາລົບເພງຊາດ ເປັນຈຳຄຸກສູງສຸດ 3 ປີ

ຈີນ​ຜ່ານ​ຮ່າງ​ກົດໝາຍ​ເພງ​ຊາດ​ໃນ​ເດືອນ​ກັນຍາ ກຳນົດ​ບົດ​ລົງ​ໂທດ​ຜູ້​ບໍ່​ເຄົາລົບ​ເພງ​ຊາດ ​ໂດຍ​ການຈຳ​ຄຸກ 15 ວັນ, ຫລ້າ​ສຸດ​ສຳນັກ​ຂ່າວ​ຊິນ​ຮົວລາຍ​ງານ​ວ່າ: ສະພາ​ປະຊາຊົນ​ແຫ່ງ​ຊາດ​ຈີນ ​ເຊິ່ງ​ເປັນ​ສະພາ​ສູງ​ສຸດ​ກຳລັງ​ພິຈາລະນາ​ມາດ​ຕະການ​ໃໝ່​ທີ່​ຈະ​ເປັນ​ສ່ວນ​ໜຶ່ງ​ໃນ​ກົດໝາຍ​ອາຍາ ກຳ​ນົດບົດ​ລົງ​ໂທດ​ຫລາຍ​ຢ່າງ ນັບ​ແຕ່​ການ​ຖອນ​ສິດທາ​ງການ​ເມືອງ​ໄປ​ຈົນ​ເຖິງ​ການ​ຄວບ​ຄຸມ​ຕົວ​ທາງ​ອາຍາ ​ແລະ ຈຳ​ຄຸກ​ສູງ​ສຸດ 3 ປີ.

ຈີນ​ເຂັ້ມງວດ​ເລື່ອງ​ການ​ຮັກ​ຊາດ​ນັບ​ແຕ່​ປະທານ​ປະ​ເທດ ສີ​ຈິ້ນຜິ​ງ ຂຶ້ນຮັບ​ຕຳ​ແໜ່​ງ​ໃນ​ປີ 2012, ທ່ານ​ເນັ້ນ​ປູກ​ຈິດ​ສຳນຶກ​ຮັກ​ຊາດ​ໄວ້​ໃນ​ທຸກ​ແງ່​ມຸມ​ຂອງ​ການ​ສຶກສາ ​ໂດຍ​ກ່ອນ​ໜ້າ​ນີ້ ຈີນ​ມີ​ແຕ່​ກົດໝາຍ​ວ່າ​ດ້ວຍ​ການ​ໃຊ້​ທຸງຊາດ ​ແລະ ​ເຄື່ອງໝາຍ​ປະຈຳ​ຊາດ ຈົນ​ມີ​ການ​ອອກ​ລະບຽບ​ໃນ​ປີ 2014 ​ໃຫ້​ເປີດ​ເພງ​ຊາດ​ໄດ້​ສະ​ເພາະ​ພິທີ​ທາງ​ການ​ທູດ, ງານ​ກິລາ​ສຳຄັນ ​ແລະ ກອງ​ປະຊຸມ​ລະດັບ​ສາກົນ, ຫ້າມ​ນຳ​ໄປ​ໃຊ້​ຕາມ​ງານ​ສ່ວນ​ຕົວ ບໍ່​ວ່າ​ຈະ​ເປັນ​ງານ​ແຕ່ງດອງ, ງານ​ສົບ ​ແລະ ງານ​ອື່ນໆ.