ຫລາຍທ້ອງຖິ່ນເກັບລາຍຮັບບໍ່ໄດ້ຕາມແຜນ

- advert banner 728 90 728x90 - ຫລາຍທ້ອງຖິ່ນເກັບລາຍຮັບບໍ່ໄດ້ຕາມແຜນ

ຕາມການລາຍງານຂອງກະຊວງການເງິນຕໍ່ກອງປະຊຸມສະພາແຫ່ງຊາດກ່ຽວກັບການຈັດຕັ້ງປະຕິບັດງົບປະມານ 6 ເດືອນຕົ້ນປີ ແລະ ການຄາດຄະເນໝົດປີ 2017 ນີ້ເຫັນວ່າ: ການຈັດເກັບລາຍຮັບງົບປະມານໃນ 6 ເດືອນຕົ້ນປີເມື່ອທຽບໃສ່ຄາດໝາຍໝົດປີທີ່ສະພາແຫ່ງຊາດຮັບຮອງຍັງເຮັດບໍ່ທັນໄດ້ດີເທົ່າທີ່ຄວນ, ຊຶ່ງຢູ່ໃນລະດັບພຽງແຕ່ 43% ຂອງແຜນການປີ, ໂດຍມີສາເຫດມາຈາກ ລາຍຮັບທີ່ຕິດພັນກັບລາຍຈ່າຍ ແລະ ລາຍຮັບຄ່າບໍລິການວິຊາການຍັງປະຕິບັດບໍ່ທັນຄ່ອງຕົວໄດ້ພຽງແຕ່ 15,39% ຂອງແຜນການປີ ແລະ ພາຍຫລັງໄດ້ເຂັ້ມງວດຫັນການຈັດເກັບລາຍຮັບເຂົ້າສູ່ລະບຽບການຈຶ່ງເຫັນວ່າຂະແໜງການ ແລະ ທ້ອງຖິ່ນຍັງບໍ່ທັນຮັບຮູ້ເຂົ້າໃຈດີເທົ່າທີ່ຄວນ, ຂະນະດຽວກັນກຸ່ມທຸລະກິດການຄ້າ, ນໍ້າມັນເຊື້ອໄຟ, ໂຮງແຮມ, ໂທລະຄົມມານາຄົມ, ກໍ່ສ້າງ, ບໍ່ແຮ່, ບໍລິການ ຂອງລັດຈໍານວນໜຶ່ງແຈ້ງມອບອາກອນຫລຸດລົງລວມແລ້ວຫລາຍກວ່າ 476 ຕື້ກີບ.

- lattana 1 - ຫລາຍທ້ອງຖິ່ນເກັບລາຍຮັບບໍ່ໄດ້ຕາມແຜນ

ກະຊວງດັ່ງກ່າວໃຫ້ຮູ້ວ່າ: ເຖິງວ່າຢູ່ທ້ອງຖິ່ນຈະບໍ່ໄດ້ມີການດັດແກ້ຕົວເລກຄາດໝາຍລາຍຮັບ ແລະ ລາຍຈ່າຍກໍຕາມ, ແຕ່ໄດ້ມີການດັດສະເລ່ຍບາງພາກລາຍຈ່າຍຈຳນວນໜຶ່ງໃຫ້ບາງທ້ອງຖິ່ນນອນໃນເພດານລວມແຜນງົບປະມານທີ່ສະພາແຫ່ງຊາດຮັບຮອງ ເຊັ່ນ: ເງິນເດືອນ, ເງິນອຸດໜູນ. ພ້ອມກັນນັ້ນ ຈາກການໄລ່ລຽງຂອງບັນດາແຂວງສາມາດສັງລວມບາງບັນຫາພົ້ນເດັ່ນດັ່ງນີ້: ການຄຸ້ມຄອງລາຍຈ່າຍຂອງບັນດາແຂວງບໍ່ໄປຕາມບູລິມະສິດ, ບໍ່ສອດຄ່ອງກັບການແຈ້ງແຜນ 6 ເດືອນຕົ້ນປີ, ມີການເບີກຈ່າຍເງິນເກີນແຜນເຊັ່ນ: ລາຍຈ່າຍດັດສົມ-ສົ່ງເສີມ, ເງິນຊື້ໃໝ່. ສຳລັບລາຍຈ່າຍເງິນລົງທຶນກໍ່ສ້າງພື້ນຖານຂອງລັດມີເຖິງ 10 ແຂວງທີ່ຈ່າຍເກີນແຜນ 6 ເດືອນຫລາຍກວ່າ 24 ຕື້ກີບ, ປັດຈຸບັນມີພຽງ 2 ແຂວງທີ່ມີລາຍຮັບກຸ້ມການເບີກຈ່າຍເງິນເດືອນ ແລະ ເງິນນະໂຍບາຍ ຄື: ນະຄອນຫລວງວຽງຈັນ ແລະ ແຂວງຈຳປາສັກ ໂດຍບໍ່ໄດ້ລໍຖ້າການດຸ່ນດ່ຽງຂອງສູນກາງ ແລະ ການຈັດເກັບລາຍຮັບໝົດປີຂອງທ້ອງຖິ່ນຄາດຄະເນຈະໄດ້ພຽງ 91% ຂອງແຜນການປີ, ໃນນີ້ຄາດວ່າຈະໄດ້ເກີນແຜນມີ 5 ແຂວງຄື:ແຂວງຜົ້ງສາລີ, ຫລວງນ້ຳທາ, ຊຽງຂວາງ, ວຽງຈັນ ແລະ ບໍລິຄຳໄຊ ປະມານ 15 ຕື້ກວ່າກີບ, ສ່ວນ 13 ແຂວງຄາດວ່າຈະບໍ່ໄດ້ຕາມແຜນປະມານ 400 ຕື້ກີບ.

ກະຊວງດັ່ງກ່າວ ໃຫ້ຮູ້ວ່າ: ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດປີ 2017 ດ້ານລາຍຮັບທັງໝົດຈະໄດ້ປະມານ 23.489 ຕື້ກີບເທົ່າກັບ 98,1% ຂອງແຜນການປີ. ໃນນັ້ນລາຍຮັບຊ່ວຍເຫລືອລ້າກວມ 103%, ລາຍຮັບພາຍໃນ 20.923 ຕື້ກີບເທົ່າກັບ 97,5% ຂອງແຜນການປີ ແລະ ສາເຫດ ແມ່ນເກີດຈາກປັດໄຈສຳຄັນສືບເນື່ອງມາຈາກ 6 ເດືອນຕົ້ນປີເຊັ່ນ: ອາກອນກຳໄລຈາກບໍ່ຄຳ 200 ຕື້ກີບແມ່ນບໍ່ສາມາດປະຕິບັດໄດ້, ຍ້ອນສະພາບການດໍາເນີນທຸລະກິດບໍ່ຄ່ອງຕົວ, ເຮັດໃຫ້ກຸ່ມທຸລະກິດສ່ວນໃຫຍ່ມີທ່າອ່ຽງມອບພັນທະຫລຸດລົງ ແລະ ສາເຫດອື່ນໆ. ສະນັ້ນ, ເພື່ອຮັບປະກັນການປະຕິບັດແຜນງົບປະມານປີ 2017 ໃຫ້ໄດ້ຫລາຍກວ່າ 98% ຂອງແຜນການປີ, ແມ່ນຈະດຳເນີນມາດຕະການດ້ານລາຍຈ່າຍໃຫ້ມີຄວາມຮັດກຸມ ແລະ ເອົາໃຈໃສ່ຕໍ່ການປະຕິບັດນະໂຍບາຍປະຢັດມັດທະຍັດໃຫ້ເປັນຮູບປະທຳ ເປັນຕົ້ນ: ເພີ່ມທະວີຄວາມເຂັ້ມງວດໃນການເກັບລາຍຮັບງົບປະມານ, ໂດຍສະເພາະຂະແໜງພາສີ ແມ່ນຈະສຸມໃສ່ເກັບລາຍຮັບຈາກນ້ຳມັນເຊື້ອໄຟ, ພາຫະນະທີ່ເປັນແຫລ່ງ ໃຫຍ່, ພ້ອມທັງເຂັ້ມງວດການເກັບຈາກວັດສະດຸກໍ່ສ້າງ, ເຄື່ອງໄຟຟ້າ ແລະ ເຄື່ອງອຸປະໂພກບໍລິໂພກຕ່າງໆ. ສໍາລັບຂະແໜງສ່ວຍສາອາກອນແມ່ນຈະສຸມໃສ່ບັນດາຫົວໜ່ວຍທຸລະກິດຂະໜາດກາງ ແລະ ຂະໜາດໃຫຍ່ທີ່ຈະໄດ້ລາຍຮັບເພີ່ມ, ໂດຍການລົງກວດກາແບບໄວ, ພ້ອມທັງເກັບລາຍຮັບຈາກບັນດາໂຄງການໄຟຟ້ານ້ຳຕົກ, ສາຍສົ່ງ, ບໍ່ແຮ່, ພ້ອມທັງເລັ່ງທວງບັນດາໜີ້ຄ້າງມອບຕ່າງໆໃຫ້ຄົບຖ້ວນຕາມກົດໝາຍກຳນົດ, ໄປຄຽງຄູ່ການເລັ່ງລັດ ແລະ ຂະຫຍາຍການນຳໃຊ້ເຄື່ອງມືທີ່ທັນສະໄໝເຂົ້າໃນການຄຸ້ມຄອງ ແລະ ຈັດເກັບລາຍຮັບ, ໂດຍສະເພາະເລັ່ງຕິດຕັ້ງຈັກເກັບເງິນແບບເອເລັກໂຕຣນິກຢູ່ບັນດາຕົວເມືອງໃຫຍ່ອ້ອມຂ້າງນະຄອນຫລວງວຽງຈັນ ເປັນຕົ້ນ: ຮ້ານອາຫານ, ໂຮງແຮມ, ສູນການຄ້າ ແລະ ອື່ນໆ, ສືບຕໍ່ສົມທົບກັບພາກສ່ວນກ່ຽວຂ້ອງເພື່ອກວດກາຈຳນວນພົນພະນັກງານ-ລັດຖະກອນ, ຫັນພະນັກງານບໍລິຫານທັງໝົດໄປສູ່ການເບີກຈ່າຍເງິນເດືອນຜ່ານບັດ ATM ເພື່ອສ້າງຄວາມໂປ່ງໃສ.