ເມືອງໂພນທອງຈັດແຂ່ງຂັນກິລາຫລາຍປະເພດ ເພື່ອຂໍ່ານັບຮັບຕ້ອນວັນຊາດທີ 2 ທັນວາ

- advert banner 728 90 728x90 - ເມືອງໂພນທອງຈັດແຂ່ງຂັນກິລາຫລາຍປະເພດ ເພື່ອຂໍ່ານັບຮັບຕ້ອນວັນຊາດທີ 2 ທັນວາ

ວັນ​ທີ 21 ພະຈິກ​ນີ້, ຢູ່​ເດີ່ນ​ສະ​ໂມ​ສອນ​ໃຫຍ່​ຂອງ​ເມືອງ​ໂພນ​ທອງ ​ແຂວງ​ຫລວງ​ພະ​ບາງ ​ໄດ້​ມີ​ພິທີ​ເປີດ​ການ​ແຂ່ງຂັນ​ກິລາ​ຫລາຍ​ປະ​ເພດ ​ເພື່ອ​ຂໍ່ານັບ​ຮັບ​ຕ້ອນ​ວັນຊາດ​ ວັນ​ທີ 2 ທັນວາ ຄົບຮອບ 42 ປີ ​ໂດຍ​ການ​ເຂົ້າຮ່ວມ​ຂອງ​ທ່ານ​ເຈົ້າ​ເມືອງ​ໂພນ​ທອງ, ຄະນະ​ຫ້ອງການ​ສຶກສາ​ທິການ ​ແລະ ກິລາ​ເມືອງ ​ແລະ ນັກ​ກິລາ​ທຸກ​ປະ​ເພດ​ເຂົ້າຮ່ວມ​ຢ່າງ​ເປັນ​ຂະ​ບວນການ​ຟົດຟື້ນ.

- lattana 1 - ເມືອງໂພນທອງຈັດແຂ່ງຂັນກິລາຫລາຍປະເພດ ເພື່ອຂໍ່ານັບຮັບຕ້ອນວັນຊາດທີ 2 ທັນວາ

ຮອງ​ຫົວໜ້າ​ຫ້ອງການ​ສຶກສາ​ທິການ ​ແລະ ກິລາ​ເມືອງ ​ໃຫ້​ຮູ້​ວ່າ: ການຈັດ​ງານ​ແຂ່ງຂັນ​ກິລາ​ຄັ້ງນີ້​ມີ 8 ປະ​ເພດກິລາ ຄື​ບານ​ເຕະ​ຍິງ-ຊາຍ, ບານ​ສົ່ງ​ຍິງ-ຊາຍ, ກະ​ຕໍ້​ຫວາຍ​ຍິງ-ຊາຍ, ​ເປ​ຕັງ​ຍິງ-ຊາຍ ​ເຊິ່ງການ​ແຂ່ງຂັນ​ປະ​ເພດ​ບານ​ເຕະ​ແມ່ນ​ໄດ້​ກຳນົດ​ເອົາ​ເດີ່ນ​ກິລາ​ບ້ານ​ກາງ, ບານສົ່ງ​ແມ່ນ​ໄດ້​ກຳນົດ​ເອົາ​ເດີ່ນ​ສະ​ໂມ​ສອນ​ເມືອງ, ກະຕໍ້​ຫວາຍ​ແມ່ນ​ເດີ່​ນ​ໂຮງຮຽນ ມສ ​ໂພນ​ທອງ ​ເພື່ອ​ເປັນ​ບ່ອນ​ແຂ່ງຂັນ ​ເພື່ອ​ເປັນ​ການ​ສ້າງ​ຂະ​ບວນການ​ຟົດຟື້ນ​ໃຫ້​ແກ່​ວັນຊາດ ວັນ​ທີ 2 ທັນວາ ຄົບຮອບ 42 ປີ ທີ່​ຈະ​ໝູນວຽນ​ມາ​ຄົບ​ຮອບ​ອີກ​ຄັ້ງໜຶ່ງ, ທັງ​ເປັນ​ການ​ຄັດ​ເລືອກ​ເອົາ​ນັກ​ກິລາ​ທີ່​ຈະ​ເປັນ​ຕົວ​ແທນ​ຂອງ​ເມືອງ​ໂພນ​ທອງ​ໄປ​ຮ່ວມ​ແຂ່ງຂັນ​ກິລາ​ເຂດ I ຂອງ 4 ​ເມືອງ​ເໜືອ ທີ່​ເມືອງ​ນ້ຳບາກ​ຈະ​ເປັນ​ເຈົ້າພາບ​ຈັດ​ຂຶ້ນ​ໃນຕົ້ນປີ 2018. ດັ່ງນັ້ນ ທ່ານ​ເຈົ້າ​ເມືອງ​ຈຶ່ງ​ໄດ້​ຮຽກຮ້ອງ​ໃຫ້​ນັກ​ກິລາ​ທຸກ​ປະ​​ເພດ, ທຸກ​ຄົນ​ຈົ່ງ​ພ້ອມ​ກັນ​ເປັນ​ກຳລັງ​ຊ່ວຍ​ຊົມ​ຊ່ວຍ​ເຊຍ​ນັກ​ກິລາ​ຂອງ​ຕົນ​ໃນ​ການ​ແຂ່ງຂັນ​ຄັ້ງນີ້ ​ເພື່ອ​ເປັນ​ການ​ພັດທະນາ​ນັກ​ກິລາ​ໃຫ້​ກ້າວ​ສູ່​ລະດັບ​ຊາດ​ຕໍ່​ໄປ.

ສຳລັບ​ປະ​ເພດ​ບານ​ເຕະ​ຊາຍ​ແມ່ນ​ມີ 12 ພາກສ່ວນ​ເຂົ້າຮ່ວມ​ແຂ່ງຂັນ ​ໂດຍ​ແບ່ງ​ອອກ​ເປັນ 4 ສາຍ ຄື​ສາຍ A ມີ​ຫ້ອງການ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ຫ້ອງການ​ສຶກສາ​ທິການ ​ແລະ ກິລາ, ກອງຮ້ອຍ 161; ສາຍ B ມີ​ຕຶກ​ວັດທະນະທຳ-ສັງຄົມ, ນັກຮຽນ ມສ ​ໂພນ​ທອງ, ກອງ​ບັນຊາ​ການ​ທະຫານ​ເມືອງ; ສາຍ C ມີ​ຫ້ອງ​ວ່າການ​ປົກຄອງ​ເມືອງ, ຄູ​ອາຈານ ມສ ​ໂພນ​ທອງ, ກອງ​ບັນຊາ​ການ ປກສ ​ເມືອງ; ສາຍ D ມີ​ຫ້ອງກາ​ນການ​ເງິນ, ຕຶກ​ອົງການ​ຈັດຕັ້ງມະຫາຊົນ, ຫ້ອງການ​ກະສິກຳ ​ໂດຍ​ໄດ້​ມີ​ການ​ແຂ່ງຂັນ​ມາ​ແລ້ວ​ແຕ່​ວັນ​ທີ 21 ພະຈິກ.