ໂລກຍັງມີທາດຍຸກໃໝ່ບໍ່ຕໍ່າກວ່າ 40 ລ້ານຄົນ

- advert banner 728 90 728x90 - ໂລກຍັງມີທາດຍຸກໃໝ່ບໍ່ຕໍ່າກວ່າ 40 ລ້ານຄົນ

ອົງການ​ສາກົນ​ຫລາຍ​ແຫ່ງລະບຸ​ວ່າ: ​ໄລ່​ມາ​ຮອດ​ທ້າຍ​ປີຜ່ານມາ, ​ໂລກ​ມີ​ທາດ​ຍຸກ​ໃໝ່​ບໍ່​ຕໍ່າ​ກວ່າ 40 ລ້ານ​ຄົນ ​ແຍກ​ເປັນ​ຜູ້​ຖືກ​ບັງຄັບ​ໃຊ້​ແຮງ​ງານ 25 ລ້ານ​ຄົນ ​ແລະ ຜູ້​ຖືກ​ບັງຄັບ​ແຕ່ງດອງ 15 ລ້ານ​ຄົນ ສ່ວນ​ຫລາຍ​ຢູ່​ອາ​ຟຣິກາ ​ແລະ ອາຊີ.

- lattana 1 - ໂລກຍັງມີທາດຍຸກໃໝ່ບໍ່ຕໍ່າກວ່າ 40 ລ້ານຄົນ

ອົງການ​ແຮງ​ງານ​ສາກົນ (ILO), ອົງການ​ສາກົນ​ເພື່ອ​ການ​ຍົກ​ຍ້າຍ​ຖິ່ນ​ຖານ (IOM) ​ແລະ ມູນ​ນິທິ​ວອກ​ຟຣີ ​ເຊິ່ງ​ເປັນ​ກຸ່ມ​ສິດທິ​ມະນຸດ​ເຜີຍ​ແຜ່​ຜົນ​ການ​ສຶກສາ​ຮ່ວມ​ກັນ​ວ່າ: ທາດ​ແຮງ​ງານ​ມີ​ຢູ່​ໃນ​ເຮືອນ​ຂອງ​ນາຍ​ຈ້າງ, ​ໂຮງງານ, ສະຖານ​ທີ່​ກໍ່ສ້າງ, ​ໄຮ່ນາ ​ແລະ ​ເຮືອ​ປະມົງ ກວ່າ​ເຄິ່ງ​ເປັນ​ໜີ້​ຜູ້​ທີ່​ກັກ​ຂັງ​ບັງຄັບ​ໃຊ້​ແຮງ​ງານ ທີ່​ເຫລືອ​ບໍ່​ສາມາດ​ຫລົບໜີ​ໄດ້ ​ເພາະ​ຖືກ​ເຮັດ​ໃຫ້​ຕິດ​ຢາ​ເສບ​ຕິດ, ມີ​ເງິນ​ຕິດ​ຕົວ​ບໍ່​ພຽງພໍ, ຖືກ​ທຳຮ້າຍ​ຮ່າງກາຍ ຫລື ຢູ່​ໄກ​ເຮືອນ​ຈົນ​ບໍ່​ສາມາດ​ກັບ​ໄປ​ໄດ້. ທາດ​ແຮງ​ງານ​ 5 ລ້ານ​ຄົນ​ຖືກ​ບັງຄັບ​ຄ້າ​ປະ​ເວ​ນີ ​ແລະ ອີກ 4 ລ້ານ​ຄົນ​ຖືກ​ລັດ​ບັງຄັບ​ເຊັ່ນ: ​ໃຊ້​ແຮງ​ງານ​ຕາມ​ຄຸກ ຫລື ບັງຄັບ​ເກນ​ເຂົ້າກອງທັບ.

ລາຍ​ງານ​ລະບຸ​ວ່າ: ​ໃນ​ບັນດາ​ທາດ​ຍຸກ​ໃໝ່ 40 ລ້ານ​ຄົນ ​ເປັນ​ເດັກ​ຍິງ ​ແລະ ​ແມ່ຍິງ​ເຖິງ 71% ຫລື ​ເກືອບ 29 ລ້ານ​ຄົນ, ໜຶ່ງ​ໃນ​ສີ່ ຫລື ປະມານ 10 ລ້ານ​ຄົນ​ເປັນ​ເດັກ ​ໂດຍ​ພົບ​ວ່າ​ມີ​ເດັກ​ຍິງ ​ແລະ ​ແມ່ຍິງ​ຖືກ​ບັງຄັບ​ແຕ່ງດອງ​ປະມານ 15,4 ລ້ານ​ຄົນ ກວ່າ​ໜຶ່ງ​ໃນ​ສາມ​ເປັນ​ເດັກ​ຍິງ​ອາຍຸ​ບໍ່​ເຖິງ 18 ປີ. ພາກ​ພື້ນທີ່​ພົບ​ທາດ​ຍຸກ​ໃໝ່​ແຜ່​ຫລາຍ​ທີ່​ສຸດ ຄື​ອາ​ຟຣິກາ ອັດຕາ​ສ່ວນ 7,6 ຕໍ່​ປະຊາກອນ 1.000 ຄົນ, ຮອງ​ລົງ​ມາ​ຄື​ອາຊີ ​ແລະ ປາຊີ​ຟິກ ອັດຕາ​ສ່ວນ 6,1 ຕໍ່​ປະຊາກອນ 1.000 ຄົນ, ​ແຕ່​ຖ້າ​ເບິ່ງ​ໃນ​ແງ່​ຂອງ​ຈຳນວນ​ແລ້ວ ອາຊີ​-ປາຊີ​ຟິກມີ​ທາດ​ຍຸກ​ໃໝ່​ສູງ​ເຖິງ 62% ຂອງ​ໂລກ ​ແລະ ມີ​ອັດຕາ​ສ່ວນ​ທາດ​ແຮງ​ງານ​ສູງ​ທີ່​ສຸດ 4 ຕໍ່​ປະຊາກອນ 1.000 ຄົນ. ຂະນະ​ທີ່​ອາ​ຟຣິກາ​ມີ​ອັດຕາ​ສ່ວນ​ການ​ບັງຄັບ​ແຕ່ງດອງ 4,8 ຕໍ່​ປະຊາກອນ 1.000 ຄົນ ຫລື ສອງ​ເທົ່າ​ຂອງ​ອັດຕາ​ສະ​ເລ່ຍ​ໂລກ 2,1 ຕໍ່​ປະຊາກອນ 1.000 ຄົນ.