ເອດີດີພີ ຍົກລະດັບຄວາມຮູ້ໃຫ້ນັກກິລາລອຍນໍ້າຄົນພິການທີມຊາດລາວ

- advert banner 728 90 728x90 - ເອດີດີພີ ຍົກລະດັບຄວາມຮູ້ໃຫ້ນັກກິລາລອຍນໍ້າຄົນພິການທີມຊາດລາວ

ທ້າຍອາທິດຜ່ານມາ ທີ່ສະໜາມກິລາລອຍນໍ້າຂ້າງເດີ່ນເຈົ້າອານຸວົງ ອົງການຄົນພິການອາຊີເພື່ອການພັດທະນາ ຫລື ເອດີດີພີ ໄດ້ມີການຍົກລະດັບຄວາມຮູ້, ຄວາມສາມາດນັກກິລາລອຍນໍ້າຄົນພິການທີມຊາດລາວ ໂດຍຄູຝຶກຈາກປະເທດຢີ່ປຸ່ນ ເພື່ອສ້າງສະມັດຖະພາບຂອງນັກກິລາລາວນັບມື້ສູງຂຶ້ນເລື້ອຍໆ. ນອກຈາກນັ້ນ ຍັງກຽມຄວາມພ້ອມເຂົ້າຮ່ວມການແຂ່ງຂັນລະດັບພາກພື້ນ ແລະ ສາກົນ.

- lattana 1 - ເອດີດີພີ ຍົກລະດັບຄວາມຮູ້ໃຫ້ນັກກິລາລອຍນໍ້າຄົນພິການທີມຊາດລາວ

ທ່ານນາງ ໂດນ ຄະນະຮັບຜິດຊອບຈັດການຍົກລະດັບໃຫ້ແກ່ນັກກິລາລອຍນໍ້າຄົນພິການລາວ ​ໃຫ້ສໍາພາດວ່າ: ພາຍຫລັງສໍາເລັດການເຂົ້າຮ່ວມແຂ່ງຂັນອາຊຽນພາຣາເກມ ຄັ້ງທີ 9 ທີ່ປະເທດມາເລເຊຍຈັດຂຶ້ນກາງເດືອນກັນຍາຜ່ານມານີ້ ພວກເຮົາກໍເລັ່ງຝຶກຊ້ອມກຽມຄວາມພ້ອມໃຫ້ກັບນັກກິລາເຂົ້າຮ່ວມລາຍການຕ່າງໆ. ຫລັງຈາກນັ້ນ, ອົງການຄົນພິການເພື່ອພັດທະນາ (ADDP) ຮ່ວມກັບສະຫະພັນກິລາລອຍນໍ້າແຫ່ງຊາດລາວຈຶ່ງຈັດການຝຶກອົບຮົມຄັ້ງນີ້ຂຶ້ນ ໂດຍທ່ານ ໂອກິໂຊ ຄູຝຶກ ຈາກປະເທດຢີ່ປຸ່ນມາໃຫ້ຄວາມຮູ້ໃນຄັ້ງນີ້, ນອກຈາກການຍົກລະດັບຄວາມຮູ້, ຄວາມສາມາດແລ້ວ ທາງຄະນະຮັບຜິດຊອບພວກເຮົາຍັງໄດ້ວາງແຜນການຝຶກຊ້ອມຕ່າງໆ ເພື່ອກຽມຄວາມພ້ອມເຂົ້າຮ່ວມການແຂ່ງຂັນລາຍການໃນປີ 2018. ສໍາລັບລາຍຊື່ຜູ້ເຂົ້າຮ່ວມຍົກລະດັບປະກອບມີ ທ້າວ ວອນວິຈິດ, ທ້າວ ລໍາພອນ, ທ້າວ ໂອລໍາ, ນາງ ບົວລະພັນ, ນາງ ສົມສານ,​ ນາງ ລັດສະໝີ, ນາງ ພຸດສະດີ. ນອກຈາກນັ້ນ, ພວກເຮົາຍັງໄດ້ຈັດກິດຈະກໍາໃຫ້ແກ່ເດັກພິການໄດ້ສະແດງຄວາມສາມາດໃນການລອຍນໍ້າຈາກຜູ້ມີປະສົບການມາຊ່ວຍຝຶກທັກສະການລອຍນໍ້າ.

ທ່ານນາງ ໂດນ ເວົ້າຕື່ມວ່າ: ການຍົກລະດັບຄັ້ງນີ້ໄດ້ສ້າງຄວາມໝັ້ນໃຈໃຫ້ແກ່ນັກກິລາລາວຫລາຍພໍສົມຄວນ ເພາະທາງສໍາມະກອນໄດ້ສອນທັກສະການລອຍນໍ້າໃຫ້ຖືກຕ້ອງຕາມລະບຽບການແຂ່ງຂັນໃນລະດັບສາກົນ. ສະນັ້ນ, ຕົນເອງໃນນາມຜູ້ຈັດການຍົກລະດັບຄັ້ງນີ້ສະແດງຄວາມຂອບໃຈທີ່ຂັ້ນເທິງເຫັນຄວາມສໍາຄັນຂອງນັກກິລາຄົນພິການລາວ ໄດ້ມີໂອກາດພັດທະນາຕົນເອງກໍຄືພັດທະນາວົງການກິລາຄົນພິການລາວໃຫ້ທຽບເທົ່າກັບບັນດານັກກິລາພິການໃນພາກພື້ນ ແລະ ສາກົນ. ພ້ອມກັນສ້າງຜົນງານດີເດັ່ນໃນການແຂ່ງຂັນລາຍການຕ່າງໆມາສູ່ ສປປ ລາວ.