ໂຄງການລົດ​ໄຟລາວ-​ຈີນຄືບໜ້າຕາມ​ແຜນ

- advert banner 728 90 728x90 - ໂຄງການລົດ​ໄຟລາວ-​ຈີນຄືບໜ້າຕາມ​ແຜນ

- 171 - ໂຄງການລົດ​ໄຟລາວ-​ຈີນຄືບໜ້າຕາມ​ແຜນ

- lattana 1 - ໂຄງການລົດ​ໄຟລາວ-​ຈີນຄືບໜ້າຕາມ​ແຜນ

ການຈັດ​ຕັ້ງ​ປະຕິບັດ​ໂຄງການກໍ່ສ້າງ​ເສັ້ນທາງ​ລົດ​​ໄຟຄວາມ​ໄວ​ສູງ ລາວ-​ຈີນ, ຈີນ-​ລາວມາ​ຮອດ​ປັດຈຸບັນ​ໄດ້​ມີ​ຄວາມ​ຄືບໜ້າຕາມ​ແຜນການຄື: ​ໃນ​ລະຫວ່າງ​ວັນ​ທີ 15-23 ພະຈິກນີ້, ຄະນະ​ທີ​ມງານ​ສື່​ມວນ​ຊົນ​ລາວ ​ແລະ ​ໄທ ​ໄດ້​ໄປ​ເຄື່ອນ​ໄຫວ​ຢ້ຽມຢາມ​ເບິ່ງ​ການ​ພັດທະນາ​ລົດ​ໄຟຢູ່​ສປ ຈີນ ທັງ​ຢູ່​ນະຄອນຫລວງ​ປັກ​ກິ່ງ, ​ເມືອງ​ອູ​ຫານ ຂອງ​ມົນທົນ​ອູ​ເປ້, ​ເມືອງ​ຄຸນ​ມິ​ງ ​ແລະ ບໍ່ຫານ ມົນທົນ​ຢຸນນານ. ​ໃນ​ນີ້, ​ໄດ້​ລົງ​ຢ້ຽມຊົມ​ການກໍ່ສ້າງ​ສະຖານີ​ລົດ​ໄຟ​ຂະໜາດ​ໃຫຍ່ ຢູ່​ຈຸດ​ບໍ່ຫານ ​ເຊິ່ງພວມ​ໄດ້​ຮັບ​ການບຸກ​ເບີກ​ພັດທະນາ​ດ້ານ​ພື້ນຖານ​ໂຄງ​ລ່າງ ​ເປັນ​ຕົ້ນ ແມ່ນ​ເຂດ​ກໍ່ສ້າງ​ອາຄານ​ສະຖານີ​ລົດ​ໄຟ, ວຽກປ້ອງ​ກັນ​ຕະຝັ່ງ​ເຈື່ອນຮັກສາ​ສິ່ງ​ແວດ​ລ້ອມ, ການ​ສ້າງ​ຄອງ​  ເໝືອງນ້ຳ​ອ້ອມ​ສະຖານີ ​ແລະ ອື່ນໆ ຄາດ​ວ່າ​ທ້າຍ​ປີ 2018 ຈະ​ສຳ​ເລັດ. ຈາກ​ນັ້ນ, ທີ​ມງານ​ສື່​ມວນ​ຊົນ​ໄດ້​ຢ້ຽມຊົມການກໍ່ສ້າງ​ອຸມົງ​ມິດຕະພາບ​ຈີນ-​ລາວ ​ບໍ່ຫານ-​ບໍ່​ເຕັນ ເຊິ່ງມີ​ຄວາມ​ຍາວ 9,5 ກິ​ໂລ​ແມັດ. ​ໃນ​ນັ້ນ, ​ເບື້ອງ​ຈີນ ​ຍາວ 7,1 ກິ​ໂລ​ແມັດ ​ແລະ ​ເບື້ອງ​ລາວ​ ຍາວ 2,4 ກິ​ໂລ​ແມັດ, ປັດຈຸບັນ​ ສະ​ເພາະ​ຢູ່​ເບື້ອງ​ຈີນ​ໄດ້​ສຳ​ເລັດ​ປາກ​ອຸມົງ ​ແລະ ການ​ເຈາະ​ອຸມົງ​ປະຕິບັດ​ໄດ້​ແລ້ວ 300 ກວ່າ​ແມັດ, ສ່ວນ​ຢູ່​ເບື້ອງ​ລາວ ​ກໍ​ໄດ້​ຮັບ​ການກໍ່ສ້າງ​ເຊັ່ນ​ດຽວກັນ.

ຜູ້ຕາງໜ້າ​ບໍລິສັດ ການ​ລົດ​ໄຟ​ນະຄອນ​ຄຸນ​ມິ​ງ ລາຍ​ງານ​ວ່າ: ສຳລັບ​ການກໍ່ສ້າງ​ເສັ້ນທາງ​ລົດ​ໄຟ​ຄວາມ​ໄວ​ສູງ ຈາກ​ເມືອງ​ຄຸນ​ມິ​ງ ຫາ ບໍ່ຫານ ​​ໄດ້​ເລີ່​ມລົງມື​​ແຕ່​ປີ 2016, ມີ​ຄວາມ​ຍາວປະມານ 500 ກວ່າກິ​ໂລ​ແມັດ, ການກໍ່ສ້າງ​ແຕ່ລະໜ້າວຽກມີຄວາມຄືບໜ້າປະມານ 20-30%, ມີ 18 ສະຖານີ​ໃຫຍ່ ​ແຕ່​ລະ ສະ​ຖາ​ນີມີ​ສາງ​ຄ່ຽນຖ່າຍ​ສິນຄ້າ, ສະ​ເພາະ​ຄຸນ​ມິ​ງ-ຊຽງຮຸ່ງ ຈະ​ນຳ​ໃຊ້​ລາງ​ຄູ່ໃນ​ການ​ຂົນ​ສົ່ງ​​ໂດຍສານ ແລະ ຂົນ​ສົ່ງສິນຄ້າ. ການກໍ່ສ້າງ​ເສັ້ນທາງ​ລົດ​ໄຟ​ຄວາມ​ໄວ​ສູງ ຢູ່​ມົນທົນ​ຢຸນນານ ​ໄດ້​ເນັ້ນ​ການ​ເປັນ​ມິດ​ກັບ​ສິ່ງ​ແວດ​ລ້ອມ, ບໍ່ທຳລາຍ​ທຳ​ມະ​ຊາດ​ ​ແລະ ​ເນື້ອ​ທີ່​ການ​ຜະລິດ​ກະສິກຳ​ຂອງ​ປະຊາຊົນຫລາຍ ​ໂດຍ​ສະ​ເພາະ​ຢູ່​ໃນ​ເຂດ​ຊຸມ​ຊົນ ​ໄດ້​ມີ​ການ​ສ້າງ​ກຳ​ແພງ​ບັງ ​ເພື່ອ​ບໍ່​ໃຫ້​ມີ​ສຽງລົບ​ກວນ​ແຮງ​ເກີນ​ໄປ.

ຢ່າງ​ໃດ​ກໍ​ຕາມ ຜູ້ຕາງໜ້າ​ບໍລິສັດ ການ​ລົດ​ໄຟ​ນະຄອນ​ຄຸນ​ມິ​ງ ບອກ​ວ່າ: ຈະ​ມີ​ຄວາມ​ພະຍາຍາມ​ຊຸກຍູ້​ໃຫ້​ທຸກ​ບໍລິສັດ​ ດຳ​ເນີນ​ການກໍ່ສ້າງ​ໃຫ້​ມີ​ຄຸນ​ນະພາ​ບຕາມ​ມາດຖານ​ສາກົນ ​ແລະ ສຳ​ເລັດ​ຕາມ​ແຜນ ການ ​ເພື່ອ​ທີ່​ທັງ​ສອງ​ປະ​ເທດ ຈະ​ໄດ້​ນຳ​ໃຊ້​ລົດ​ໄຟ​ລຸ້ນ​ໃໝ່ລ້າ​ສຸດ ​ໃນ​ການ​ເຊື່ອມ​ຕໍ່ຄຸນ​ມິ​ງ-ວຽງຈັນ ກໍ​ຄື ສປ ຈີນ ​ແລະ ສປປ ລາວ ​ເພີ່ມ​ທະວີ​ການ​ພົວພັນ​ຮ່ວມ​ມື​ຮອບດ້ານ ລະຫວ່າງ​ສອງ​ປະ​ເທດ ກໍ​ຄື​ ການ​ນຳ​ເອົາ​ຜົນ​ປະ​ໂຫຍ​ດທາງ​ເສດຖະກິດ​ມາ​ໃຫ້​ປະຊາຊົນ​ສອງ​ຊາດ​ລາວ-​ຈີນ.

​ນະຄອນ​ຄຸນ​ມິ​ງ ມີ​ເສັ້ນທາງ​ລົດ​ໄຟ​ຄວາມ​ໄວ​ສູງ​ເຊື່ອມ​ຕໍ່ທຸກ​ແຂວງ​ໃນ​ທົ່ວປະ​ເທດ, ລວມ 70 ​ເສັ້ນ ທາງ ສາມາດ​ໄປມາຫາສູ່​ກັບ​ບັນດາ​ເມືອງ​​ໃຫຍ່ຕ່າງໆ​ສະດວກ​ສະບາຍ. ຖ້າ​ຫາກ​ເສັ້ນທາງຄຸນ​ມິ​ງ-ວຽງຈັນ​ສຳ​ເລັດ​ໃນ​ປີ 2021 ກໍ​ຍິ່ງ​ຈະ​ເພີ່ມ​ຄວາມ​ສະດວກ​ໃນ​ການ​ຂົນ​ສົ່ງ​ໂດຍສານ ​ແລະ ຂົນ​ສົ່ງ​ສິນຄ້າສະໜອງ​ໄດ້​ຕາມ​ຄວາມ​ຮຽກຮ້ອງ​ການ​ຂອງ​ປະຊາຊົນ​ສອງ​ປະ​ເທດ.

+ໂຄງການ​ກໍ່ສ້າງ​ທາງ​ລົດ​ໄຟ​ລາວ-​ຈີນ ຈະ​ປະຕິບັດ​ຕາມ​ລະບຽບຢ່າງ​ເຂັ້ມ​ງວດ