ລາວກຽມສົ່ງນັກກິລາກະຕໍ້ເຂົ້າຮ່ວມຊີງແຊ້ມໂລກ ທີ່ປະເທດໄທຕົ້ນເດືອນທັນວານີ້

- advert banner 728 90 728x90 - ລາວກຽມສົ່ງນັກກິລາກະຕໍ້ເຂົ້າຮ່ວມຊີງແຊ້ມໂລກ ທີ່ປະເທດໄທຕົ້ນເດືອນທັນວານີ້

ສະຫະພັນກະຕໍ້ແຫ່ງຊາດລາວ ກຽມສົ່ງນັກກິລາທີມຊາດລາວຈໍານວນ 30 ຄົນເຂົ້າຮ່ວມການແຂ່ງຂັນກະຕໍ້ຊີງແຊ້ມໂລກທີ່ປະເທດໄທເປັນເຈົ້າພາບ ເພື່ອຝຶກຊ້ອມນັກກິລາລາວໃຫ້ມີຄວາມສາມາດ ແລະ ທັກສະດີຂຶ້ນກວ່າເກົ່າ ເຊິ່ງການແຂ່ງຂັນຈະຈັດຂຶ້ນໃນຕົ້ນເດືອນທັນວານີ້ ໂດຍນັກກິລາລາວຈະເຂົ້າຮ່ວມ 7 ລາຍການຄື: ທີມຊຸດຊາຍ-ຍິງ; ຄູ່ຊາຍ-ຍິງ; ດ່ຽວຊາຍ-ຍິງ, ລອດບ້ວງຊາຍ.

- lattana 1 - ລາວກຽມສົ່ງນັກກິລາກະຕໍ້ເຂົ້າຮ່ວມຊີງແຊ້ມໂລກ ທີ່ປະເທດໄທຕົ້ນເດືອນທັນວານີ້

ທ່ານນາງ ໂນລີ ຊາມົນຕີ ຄູຝຶກນັກກິລາກະຕໍ້ທີມຊາດລາວ ໃຫ້ສໍາພາດວ່າ: ການແຂ່ງຂັນກະຕໍ້ຊີງແຊ້ມໂລກ ເຊິ່ງຈະຈັດຂຶ້ນໃນວັນທີ 11-17 ທັນວາ 2017 ທີ່ປະເທດໄທນີ້ ພວກເຮົາຈະສົ່ງນັກກິລາເຂົ້າຮ່ວມແຂ່ງຂັນທັງໝົດ 30 ຄົນໃນ 7 ລາຍການ ເພື່ອຝຶກຊ້ອມນັກກິລາທີມຊາດລາວໃຫ້ມີຄວາມສາມາດ, ພະລະກໍາລັງ ແລະ ທັກສະການໃຫ້ຄ່ອງແຄ້ວຂຶ້ນກວ່າເກົ່າ. ທັງນີ້ກໍເພື່ອກະກຽມເຂົ້າຮ່ວມການແຂ່ງຂັນລາຍການຕ່າງໆໃນລະດັບພາກພື້ນ ແລະ ສາກົນ. ມາຮອດປັດຈຸບັນພວກເຮົາໄດ້ກະກຽມຄວາມພ້ອມຖືວ່າ 100% ແລ້ວທີ່ຈະເຂົ້າຮ່ວມການແຂ່ງຂັນດັ່ງກ່າວ. ສໍາລັບການຝຶກຊ້ອມຂອງນັກກິລາພວກເຮົາໄດ້ເລີ່ມມາແຕ່ທ້າຍເດືອນຕຸລາຂອງທຸກໆມື້ແຕ່ເວລາ 17:00 – 19:00 ໂມງ ຢູ່ສະໜາມຝຶກຊ້ອມເດີ່ນໂຮງຮຽນມັດທະຍົມສົມບູນເຈົ້າອານຸວົງ.

ທ່ານນາງ ໂນລີ ຊາມົນຕີ ຍັງກ່າວຕື່ມວ່າ: ການເຂົ້າຮ່ວມແຂ່ງຂັນຄັ້ງນີ້ ພວກເຮົາຈະສົ່ງນັກກິລາທີມຊາດຊຸດໃໝ່ຮຸ້ນເຍົາວະຊົນເປັນສ່ວນຫລາຍ ເພື່ອສ້າງນັກກິລາຮຸ້ນສືບທອດຫລາຍຂຶ້ນກວ່າເກົ່າ ແລະ ເຮັດໃຫ້ເຍົາວະຊົນໄດ້ໂອກາດສະແດງຄວາມສາມາດໃນເວທີພາກພື້ນ, ພ້ອມທັງພັດທະນາຕົນເອງຂຶ້ນເລື້ອຍໆ ເພື່ອນໍາເອົາບົດຮຽນກັບມາພັດທະນາວົງການກິລາກະຕໍ້ລາວໃຫ້ທຽບເທົ່າກັບບັນດາປະເທດໃນພາກພື້ນ ແລະ ສາກົນ. ສ່ວນແຜນການອອກເດີນທາງເຂົ້າຮ່ວມການແຂ່ງຂັນຈະອອກໃນວັນທີ 9 ທັນວານີ້ ກ່ອນມື້ແຂ່ງຂັນ ເພາະວ່າຈະໃຫ້ນັກກິລາແຕ່ລະຄົນໄດ້ຝຶກຊ້ອມເພື່ອໃຫ້ລື້ງເຄີຍກັບສະໜາມກ່ອນການລົງສະໜາມແຕ່ລະຄັ້ງ. ສໍາລັບເປົ້າໝາຍການເຂົ້າຮ່ວມແຂ່ງຂັນຄັ້ງນີ້ ພວກເຮົາໄດ້ຕັ້ງຄວາມຫວັງໄວ້ສູງພໍສົມຄວນເພື່ອໃຫ້ຕິດອັນດັບ 1 ໃນ 3 ທຸກໆລາຍການ.