ຍທຂ ເຜີຍຈະສຸມໃສ່ສ້ອມແປງ ແລະ ບູລະນະ​​ທາງຫລວງ​ໃຫ້ມີລະດັບດີຂຶ້ນ

- advert banner 728 90 728x90 - ຍທຂ ເຜີຍຈະສຸມໃສ່ສ້ອມແປງ ແລະ ບູລະນະ​​ທາງຫລວງ​ໃຫ້ມີລະດັບດີຂຶ້ນ

ກົມຂົວ​ທາງກະຊວງໂຍທາທິການ ແລະ ຂົນສົ່ງ ​ໃຫ້​ຮູ້​ວ່າ: ​ປີ 2018 ນີ້, ຂະແໜງການຂອງຕົນຈະສຸມໃສ່ການປະຕິບັດວຽກງານສ້ອມແປງ ແລະ ບູລະນະເສັ້ນທາງຫລວງໃຫ້ມີລະດັບດີຂຶ້ນ, ເຊິ່ງຕາມແຜນການປີໜ້ານີ້, ມີທັງໝົດ 129 ສັນຍາໂຄງການ, ລວມມີມູນຄ່າຫລາຍກວ່າ 1.675 ຕື້ກີບ. ໃນນີ້, ໜ້າວຽກສ້ອມ​ແປງ​ທາງ​ຍຸບ, ທາງບວມ ​ແລະ ໜ້າ​ທາງ​ເປັນ​ຂຸມ, ຕະລິ່ງທາງ​ເຈື່ອນ, ລະບົບ​ສັນຍານ​ຈະລາຈອນ, ຫລັກ​ໝາຍ​ກິ​ໂລ​ແມັດ, ຂີດເສັ້ນຈະລາຈອນ, ສ້ອມ​ແປງ​ຂົວ ​ແລະ ລະບົບ​ລະບາຍ​ນ້ຳລວມມີມູນຄ່າຫລາຍກວ່າ 606 ຕື້ກີບ. ໜ້າວຽກສີດ​ທັບ​ໜ້າທາງທີ່​ມີ​ການ​ຫລຸດ​ລອກ​ ລວມມີມູນຄ່າຫລາຍກວ່າ 175 ຕື້ກີບ ແລະ ໜ້າວຽກຍົກ​ລະດັບ​ເສັ້ນທາງ​ທີ່​ຕໍ່າ, ​ມັກ​ມີນ້ຳຖ້ວມ​ຂັງ, ກໍ່ສ້າງ​ຮ່ອງນ້ຳ, ວາງ​ທໍ່​ລະບາຍ​ນ້ຳລອດ​ທາງ ແລະ ຕິດຕັ້ງ​ຮາວເຫລັກ​ໃນ​ຈຸດ​ທີ່​ມີ​ຄວາມ​ສ່ຽງ​ເກີດ​ອຸປະຕິ​ເຫດລວມມີມູນຄ່າຫລາຍກວ່າ 894 ຕື້ກີບ.

- lattana 1 - ຍທຂ ເຜີຍຈະສຸມໃສ່ສ້ອມແປງ ແລະ ບູລະນະ​​ທາງຫລວງ​ໃຫ້ມີລະດັບດີຂຶ້ນ

ທ່ານ ​ແພງ ດວງ​ເງິນ ຫົວໜ້າກົມດັ່ງກ່າວ ໃຫ້ຮູ້ວ່າ: ປີ 2017 ຂະແໜງ ຍທຂ ​ໄດ້ປະຕິ​ບັດ​ວຽກ​ງານ​ບູລະນະ​ຮັກສາ​ທາງ​ຫລວງ​​ແຫ່ງ​ຊາດ​ທັງ​ໝົດ 126 ສັນຍາທີ່ຂຶ້ນກັບ 25 ​ໂຄງການລວມມີມູນ​ຄ່າຫລາຍກວ່າ 581 ຕື້ກີບ. ໃນນີ້ປະຕິບັດສຳ​ເລັດ 100% ມີ 97 ສັນຍາ. ສ່ວນໜ້າວຽກທີ່ບໍ່ສໍາເລັດມີ 29 ສັນຍາແມ່ນເກີດຈາກຫລາຍສາເຫດ ເປັນຕົ້ນ: ຂະແໜງການກ່ຽວຂ້ອງ​ບໍ່​ສາມາດ​ຕິດຕາມ, ຊຸກຍູ້​ການຈັດຕັ້ງປະຕິບັດ​ວຽກ​ງານ​ບັນດາ​ໂຄງການ​ຢ່າງ​ທົ່ວ​ເຖິງ, ​ບາງໜ້າວຽກຍັງ​ບໍ່​ມີ​ພາລະ​ບົດບາດ​ເພື່ອເປັນ​ບ່ອນ​ອີງ​ໃນ​ການຈັດຕັ້ງປະຕິບັດ​, ຄະນະ​ຄຸ້ມ​ຄອງ​ບາງ​ໂຄງການ​ຍັງ​ມີ​ຂໍ້​ຈຳກັດ​ດ້ານ​ປະສົບ​ການ, ບໍ່​ສາມາດ​ຮັບປະກັນ​ຄຸນ​ນະພາ​ບຕາມ​ມາດຖານ​ເຕັກນິກ ​ແລະ ສຳ​ເລັດ​ທັນຕາມ​ກຳນົດ​ເວລາ. ນອກ​ນີ້ການ​ນຳ​ໃຊ້​ງົບປະມານ​ບາງ​ໂຄງການ​ຍັງ​ບໍ່​ຖືກ​ເປົ້າໝາຍ, ມີ​ການ​ປ່ຽນ​ແປງ​ໜ້າ​ວຽກ​ໂດຍ​ບໍ່​ໄດ້​ຮັບ​ອະນຸມັດ​ຈາກຂະແໜງກ່ຽວຂ້ອງ ແລະ ​ເຮັດ​ໃຫ້​ເສັ້ນທາງ​ບໍ່​ໄດ້​ຮັບ​ການ​ສ້ອມ​ແປງ​ຕາມ​ການ​ຂຶ້ນ​ແຜນ ​ແລະ ອື່ນໆ. ເຊິ່ງ​ໃນ​ຕໍ່ໜ້າ​ແມ່ນຈະໄດ້ຄົ້ນຄວ້າ​ລະບົບ​ຄຸ້ມ​ຄອງວຽກງານທີ່ມີປະສິດທິພາບ ແລະ ມີປະສິດທິຜົນດີກວ່າເກົ່າມານໍາໃຊ້ໃນວຽກງານເພື່ອຮັບປະກັນໃຫ້ເກີດຜົນປະໂຫຍດສູງສຸດ.