ລັດຖະມົນຕີກະຊວງການຕ່າງປະເທດສຳ​ເລັດ​ການຢ້ຽມຢາມອົດສະຕຣາລີ

- advert banner 728 90 728x90 - ລັດຖະມົນຕີກະຊວງການຕ່າງປະເທດສຳ​ເລັດ​ການຢ້ຽມຢາມອົດສະຕຣາລີ

ໂດຍຕອບສະໜອງຕາມຄໍາເຊີນຂອງ ທ່ານ ນາງ ຈູລີ ບີຊອບ (Julie Bishop), ລັດຖະມົນຕີກະຊວງການຕ່າງປະເທດ ແຫ່ງ ອົດສະຕຣາລີ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ສປປ ລາວ ພ້ອມດ້ວຍຄະນະໄດ້ດໍາເນີນການຢ້ຽມຢາມອົດສະຕຣາລີຢ່າງເປັນທາງການ ໃນລະຫວ່າງວັນທີ 26-28 ພະຈິກ 2017, ເຊິ່ງເປັນການຢ້ຽມຢາມຄັ້ງທໍາອິດ ນັບຕັ້ງແຕ່ທ່ານ ດໍາລົງຕໍາແໜ່ງເປັນລັດຖະມົນຕີກະຊວງການຕ່າງປະເທດ ແຫ່ງ ສປ ປ ລາວ, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງ​ປະ​ເທດ ລາວ ແລະ ອົດສະຕຣາລີ ໃຫ້ນັບມື້ໄດ້ຮັບການເສີມຂະຫຍາຍຂຶ້ນເລື້ອຍໆ.

- lattana 1 - ລັດຖະມົນຕີກະຊວງການຕ່າງປະເທດສຳ​ເລັດ​ການຢ້ຽມຢາມອົດສະຕຣາລີ

ການພົບປະສອງຝ່າຍມີ​ຂຶ້ນໃນວັນທີ 27 ພະຈິກນີ້ ທີ່ລັດຖະສະພາ ອົດສະຕຣາລີຕ່າງ​ກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ມີປະສິດທິ ພາບສູງ ທັງໃນຂອບສອງຝ່າຍ ແລະ ຫລາຍຝ່າຍ, ນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນການທູດນໍາກັນຈົນເຖິງປັດຈຸບັນ. ການຊ່ວຍເຫລືອເພື່ອການພັດທະນາ (ODA) ຂອງອົດສະຕຣາລີ ໃຫ້ແກ່ ສປປ ລາວ ໄດ້ເພີ່ມຂຶ້ນຢ່າງຕໍ່ເນື່ອງ, ເຊິ່ງຈັດເປັນອັນດັບທີ 3 ຂອງການຊ່ວຍເຫລືອ ODA ໃນ ສປປ ລາວ, ໂດຍໄດ້ສຸມໃສ່ຂະແໜງການຕ່າງໆ ເປັນຕົ້ນໂຄງການເກັບກູ້ລະເບີດບໍ່ທັນແຕກ (UXO), ການພັດ ທະນາຊົນນະບົດ ແລະ ພື້ນຖານໂຄງລ່າງ, ຊຶ່ງການຊ່ວຍເຫລືອດັ່ງກ່າວ ໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງລາວ ເພື່ອຫລຸດພົ້ນອອກຈາກສະຖານະປະເທດດ້ອຍພັດ ທະນາໃນປີ 2020. ສອງຝ່າຍໄດ້ຊົມເຊີຍຕໍ່ການສະໜັບສະໜູນ ຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ໃນໄລຍະຜ່ານມາ ແລະ ຫວັງຢ່າງຍິ່ງວ່າ ທັງສອງຝ່າຍຈະສືບຕໍ່ໃຫ້ການສະໜັບສະໜູນ ຊຶ່ງກັນ ແລະ ກັນ ເພື່ອເສີມຂະຫຍາຍການພົວພັນຮ່ວມມືກັນໃຫ້ສູງຂຶ້ນໃນອະນາຄົດ; ພ້ອມນີ້, ກໍໄດ້ເຫັນດີຈະສືບຕໍ່ຊຸກຍູ້ໃຫ້ມີການແລກປ່ຽນການຢ້ຽມຢາມ ຊຶ່ງກັນ ແລະ ກັນໃນທຸກລະດັບໃຫ້ຫລາຍຂຶ້ນ ແລະ ຊຸກຍູ້ການຮ່ວມມືສອງຝ່າຍທີ່ມີມາແລ້ວນັ້ນ ໃຫ້ໄດ້ຮັບການຂະຫຍາຍຕົວ​ຂຶ້ນເລື້ອຍໆ. ນອກຈາກນັ້ນ, ທັງສອງຝ່າຍຍັງໄດ້ປຶກສາຫາລືແລກປ່ຽນຄໍາຄິດຄໍາເຫັນ ກ່ຽວກັບສະພາບການທີ່ພົ້ນເດັ່ນໃນພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ຕາງໜ້າໃຫ້ລັດຖະບານ ສປປ ລາວ ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ແລະ ປະຊາຊົນອົດສະຕຣາລີ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ໃນໄລຍະຜ່ານມາ; ພ້ອມນີ້, ຍັງໄດ້ສະເໜີໃຫ້ລັດຖະບານອົດສະຕຣາລີ ສືບຕໍ່ໃຫ້ການຊ່ວຍເຫລືອແກ່ສປປ ລາວ, ໂດຍສະເພາະໃນການພັດທະນາຊັບພະຍາກອນມະນຸດ ກໍຄື ການໃຫ້ທຶນສຶກສາ ແລະ ຝຶກອົບຮົມໄລຍະສັ້ນ-ຍາວ ໃນຂະແໜງ ການຕ່າງໆ ແລະ ການຝຶກອົບຮົມນາຍແປພາສາ ສໍາລັບພະນັກງານການທູດລາວ ແລະ ຖືໂອກາດດັ່ງກ່າວ ແຈ້ງໃຫ້ຝ່າຍອົດສະຕຣາລີ ຊາບວ່າ ສປປ ລາວ ໄດ້ເປີດປີທ່ອງທ່ຽວ ປີ 2018 ຢ່າງເປັນທາງການໃນທ້າຍເດືອນຕຸລາຜ່ານມານີ້ ​ແລະ ຂໍເຊື້ອເຊີນ ປະຊາຊົນອົດສະຕຣາລີ ໃຫ້ເຂົ້າມາທ່ຽວທ່ອງ ສປປ ລາວ ຫລາຍຂຶ້ນ.

ທ່ານ ນາງ ຈູລີ ບີຊອບ ກໍໄດ້ສະແດງຄວາມຍິນດີຕ້ອນຮັບຕໍ່ການຢ້ຽມຢາມອົດສະຕຣາລີ ຢ່າງເປັນທາງການ ຂອງ ທ່ານ ສະເຫລີມໄຊ ກົມມະສິດ ພ້ອມດ້ວຍຄະນະ ໃນຄັ້ງນີ້ ແລະ ໄດ້ສະແດງຄວາມຍິນດີທີ່ຈະສືບຕໍ່ໃຫ້ການຊ່ວຍເຫລືອ ແລະ ສະໜັບສະໜູນ ສປປ ລາວ ເພື່ອເຮັດໃຫ້ບັນດາຂໍ້ສະເໜີຕ່າງໆປະກົດຜົນເປັນຈິງ. ພ້ອມດຽວກັນນີ້, ທ່ານ ຍັງໄດ້ສະແດງຄວາມຂອບໃຈຕໍ່ລັດຖະບານ ສປປ ລາວ ທີ່ໄດ້ໃຫ້ການຊ່ວຍເຫລືອ ແລະ ສະໜັບສະໜູນອົດສະຕຣາລີ ໃນເວທີພາກພື້ນ ແລະ ສາກົນ.

ໃນໂອກາດຢ້ຽມຢາມອົດສະຕຣາລີ ຄັ້ງນີ້, ທ່ານ ລັດຖະມົນຕີ ສະເຫລີມໄຊ ກົມມະສິດ ພ້ອມດ້ວຍຄະນະ ຍັງໄດ້ພົບປະກັບທ່ານ ນາງ ຄອນເຊັດຕາ ເຟຍຣາວັນຕີ-ແວລ ConcettaFierravanti-Wells, ສະມາຊິກສະພາສູງ, ລັດຖະມົນຕີເພື່ອພັດທະນາສາກົນ ແລະ ປາຊິຟິກ, ຊຶ່ງທັງສອງຝ່າຍໄດ້ປຶກ ສາຫາລື ແລະ ແລກປ່ຽນຄໍາຄິດຄໍາເຫັນ ກ່ຽວກັບພັດທະນາການຮ່ວມມືລະຫວ່າງ ລາວ-ອົດສະຕຣາລີ ໃຫ້ສູງຂຶ້ນໃນອະນາຄົດ; ໄດ້ພົບປະກັບນັກທຸລະກິດຊັ້ນນໍາຂອງອົດສະຕາລີ ຈໍານວນໜຶ່ງທີ່ເຮັດທຸລະກິດ ແລະ ລົງທຶນຢູ່ ສປປ ລາວ ເພື່ອປຶກສາຫາລື ການເສີມຂະຫຍາຍການຮ່ວມມື ໃຫ້ນັບມື້ນັບມີໝາກຜົນ ​ແລະ ຕ່າງຝ່າຍຕ່າງມີຜົນປະໂຫຍດນໍາກັນ, ຢ້ຽມຢາມມະຫາວິທະຍາໄລ ໂມຮາສ (Mohash) ແລະ ໃຫ້ກຽດຕ້ອນ ຮັບທ່ານ ສາດສະດາຈານ ມາກາເຣັດ ກາດເນີ (Margaret Gardner), ອະທິການບໍດີມະຫາວິທະຍາໄລ ໂມຮາສ; ແລະ ໃຫ້ກຽດໂອ້ລົມນັກສຶກສາລາວ ທີ່ກໍາລັງສຶກສາຢູ່ທີ່ມະຫາວິທະຍາໄລດັ່ງກ່າວ. ນອກນັ້ນ, ທ່ານລັດຖະມົນຕີ ແລະ ຄະນະ ຍັງໄດ້ຢ້ຽມຢາມສະຖານທີ່ຈັດກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ ທີ່ຈະຈັດຂຶ້ນ ຢູ່ ຊິດນີ້ ອົດສະຕຣາລີ ໃນເດືອນມີນາ 2018.