ອາເມລິກາຂຶ້ນອາກອນເຫລັກ ຫວຽດນາມທີ່ໃຊ້ວັດຖຸດິບຈາກຈີນ

- WhatsApp Image 2017 07 12 at 9 - ອາເມລິກາຂຶ້ນອາກອນເຫລັກ ຫວຽດນາມທີ່ໃຊ້ວັດຖຸດິບຈາກຈີນ

ລັດຖະບານ​ວໍ​ຊິງ​ຕັນປະກາດ​ຂຶ້ນອາກອນ​ສິນຄ້າ​ເຫລັກ​ນຳ​ເຂົ້າຈາກ​ຫວຽດນາມ ຖານ​ໃຊ້​ວັດ​ຖຸດິບ​ນຳ​ເຂົ້າຈາກ​ບໍລິສັດ​ໃນ​ຈີນ ທີ່ຢູ່​ໃນ​ບັນຊີ​ດຳ​ລະ​ເມີດ​ມາດ​ຕະການ​ຕໍ່ຕ້ານ​ການ​ອຸດ​ໜຸນ​ລາຄາ​ສິນຄ້າ​ຂອງ​ກະຊວງ​ການ​ຄ້າ​ອາ​ເມ​ລິ​ກາ.

- lattana 1 - ອາເມລິກາຂຶ້ນອາກອນເຫລັກ ຫວຽດນາມທີ່ໃຊ້ວັດຖຸດິບຈາກຈີນ

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ວໍ​ຊິງ​ຕັນ ປະ​ເທດ​ສະຫະລັດ​ອາ​ເມ​ລິ​ກາ ​ໃນ​ວັນ​ທີ 5 ທັນວາ​ວ່າ: ກະຊວງ​ການ​ຄ້າ​ອາ​ເມ​ລິ​ກາ​ອອກ​ຖະ​ແຫລ​ງການ​ໃນ​ວັນ​ທີ 5 ທັນວາ ​ເພີ່ມ​ອັດຕາ​ອາກອນ​ເຫລັກ​ຫລາຍ​ລາຍການ​ທີ່​ນຳ​ເຂົ້າຈາກ​ຫວຽດນາມ ​ເນື່ອງ​ຈາກ​ສິນຄ້າ​ເຫລັກ​ຫລາຍ​ລາຍການ​ຂອງ​ຫວຽດນາມ​ຜະລິດ​ໂດຍ​ໃຊ້​ວັດຖຸ​ດິບ​ຈາກ​ບໍລິສັດ​ໃນ​ຈີນ ທີ່ຢູ່​ໃນ​ລາຍ​ຊື່​ບໍລິສັດ​ເຊິ່ງລະ​ເມີດ​ມາດ​ຕະການ​ຕໍ່ຕ້ານ​ການ​ອຸດໜຸນ​ລາຄາ​ສິນຄ້າ​ຂອງ​ອາ​ເມ​ລິ​ກາ ​ໂດຍ​ລາຍ​ງານ​ຂອງ​ກະຊວງ​ການ​ຄ້າ​ລະບຸ​ວ່າ: ນັບ​ແຕ່​ອອກ​ມາດ​ຕະການ​ຂຶ້ນອາກອນ​ເຫລັກ​ຫລາຍ​ລາຍການ​ຈາກ​ຈີນ ​ໃນ​ປີ 2015 ມູນ​ຄ່າ​ສິນຄ້າ​ເຫລັກ​ສົ່ງ​ອອກ​ຈາກ​ຫວຽດນາມ​ສູ່​ອາ​ເມ​ລິ​ກາ​ເພີ່ມ​ຂຶ້ນຈາກ 11 ລ້ານ​ໂດ​ລາ​ສະຫະລັດ​ຕໍ່​ປີ ​ເປັນ 295 ລ້ານ​ໂດ​ລາ​ສະຫະລັດ​ຕໍ່​ປີ.

ທັງ​ນີ້, ສິນຄ້າ​ເຫລັກ​ຈາກ​ຫວຽດນາມ​ທີ່​ຈະ​ໄດ້​ຮັບ​ຜົນ​ກະທົບ​ຈາກ​ມາດ​ຕະການ​ດັ່ງກ່າວ ລວມທັງ​ເຫລັກ​ແຜ່ນ​ຂາວລີດ​ເຢັນ​ຈາກ​ຫວຽດນາມ​ຕ້ອງ​ຜະ​ເຊີນ​ກັບ​ອັດຕາ​ອາກອນ​ເພີ່ມ​ຂຶ້ນ​ເປັນ 531%. ຂະນະ​ທີ່​ອັດຕາ​ອາກອນ​ສຳລັບ​ສະ​ແຕນ​ເລດ ຫລື ​ເຫລັກ​ກ້າ​ຈາກ​ຫວຽດນາມ​ເພີ່ມ​ຂຶ້ນ​ເປັນ 238% ​ເຊິ່ງຜູ້​ຊ່ຽວຊານ​ເບິ່ງ​ວ່າ: ​ເປັນ​ອັດຕາ​ຢູ່​ໃນ​ລະດັບ “ສູງ” ທີ່​ຈະ​ເຮັດ​ໃຫ້​ສິນຄ້າ​ເຫລັກ​ຈາກ​ຫວຽກ​ນາມ​ຕ້ອງ​ຖອນ​ຕົວ​ອອກ​ຈາກ​ຕະຫລາດ​ໃນ​ອາ​ເມ​ລິ​ກາ. ​ເຖິງ​ຢ່າງ​ໃດ​ກໍ​ຕາມ, ຕົວ​ເລກ​ດັ່ງກ່າວ​ຍັງ​ສາມາດ​ປ່ຽນ​ແປງ​ໄດ້ ​ແລະ ລັດຖະບານ​ວໍ​ຊິງ​ຕັນ​ມີ​ກຳນົດ​ປະກາດ​ອັດຕາ​ເກັບ​ສຸດ​ທ້າຍ​ໃນ​ວັນ​ທີ 16 ກຸມພາ​ທີ່​ຈ​ະ​ເຖິງ.