ສປ ຈີນ ເລັ່ງ​ພັດທະນາລົດ​ໄຟຄວາມ​ໄວ​ສູງແບບ​ບໍ່ມີ​ຄົນ​ຂັບ

- WhatsApp Image 2017 07 12 at 9 - ສປ ຈີນ ເລັ່ງ​ພັດທະນາລົດ​ໄຟຄວາມ​ໄວ​ສູງແບບ​ບໍ່ມີ​ຄົນ​ຂັບ

ໃນໂອກາດ​ຄະນະ​ທີ​ມງານ​ສື່​ມວນ​ຊົນ​ລາວ ​ແລະ ​ໄທ ​ໄດ້​ດຳ​ເນີນ​ການ​ຢ້ຽມຢາມ ​ແລະ ເຮັດ​ວຽກຢູ່​ນະ ຄອນຫລວງ​ປັກ​ກິ່ງ ​ແຫ່ງ ສປ ຈີນ ​ເມື່ອ​ທ້າຍ​ເດືອນ​ພະຈິກຜ່ານ​ມາ, ​ ແລະ ໄດ້ສຳພາດ​ທ່ານ ຫົວໜ້າກົມ​ເຕັກ​ໂນ​ໂລ​ຊີ ບໍລິສັດ​ທາງ​ລົດ​ໄຟ ສປ ຈີນ​​ວ່າ: ພາຍຫລັງ​​ປະສົບ​ຜົນສຳ​ເລັດ ​ໃນ​ການ​ພັດທະນາລົດ​ໄຟ​ຄວາມ​ໄວ​ສູງ​​ໃນ​ຫລາຍ​ລະດັບ ຈາກ​ປັກ​ກິ່ງ​ໄປຫາ​ເມືອງ​ຕ່າງໆ​ ​ໃນ​ຊຸມ​ປີຜ່ານມານັ້ນ, ສປ ຈີນ ພວມເລັ່ງ​​ສືບຕໍ່ພັດທະນາ​ລະບົບຂົນສົ່ງດ້ວຍລົດໄຟໃຫ້​ມີ​ຄວາມ​ກ້າວໜ້າຂຶ້ນ​ເລື້ອ​ຍໆ ແລະ ຄາດ​ວ່າ​ໃນ​ປີ 2022 ລົດ​ໄຟຄວາມ​ໄວ​ສູງຈະ​ບໍ່​ໃຫ້ມີ​ຄົນ​ຂັບ.​

- lattana 1 - ສປ ຈີນ ເລັ່ງ​ພັດທະນາລົດ​ໄຟຄວາມ​ໄວ​ສູງແບບ​ບໍ່ມີ​ຄົນ​ຂັບ

ທ່ານ ຈ້າວ ກົວ​ຖັງ ຫົວໜ້າກົມ​ເຕັກ​ໂນ​ໂລ​ຊີ ບໍລິສັດ​ທາງ​ລົດ​ໄຟ ສປ ຈີນ ກ່າວ​ວ່າ: 1964 ປະ​ເທດ​ຍີ່ປຸ່ນ ​ເປັນ​ປະ​ເທດ​ທຳ​ອິດ​ໄດ້​ພັດທະນາ​ລົດ​ໄຟຄວາມ​ໄວ​ສູງ​ສຳ​ເລັດ ​ໃນລະດັບ​ຄວາມ​ໄວ 210 ກິໂລແມັດຕໍ່ຊົ່ວໂມງ. ຈາກ​ນັ້ນ, ປະ​ເທດ​ຝຣັ່ງ, ​ເຢຍລະ​ມັນ, ອີ​ຕາ​ລີ, ​ແອັດ​ສະ​ປາຍ, ສ ​ເກົາຫລີ, ​ໂຮ​ນລັງ, ​ເບ​ນຢຽມ ​ແລະ ສະ​ວີ​ເດັນ ກໍໄດ້​ສຳ​ເລັດ​ການ​ພັດທະນາ​ລົດ​ໄຟຄວາມ​ໄວ​ສູງ​ເຊັ່ນດຽວ​ກັນ. ສະ​ເພາະ​ຢູ່ ສປ ຈີນ ​ໄດ້​ພັດທະນາ​ລົດໄຟ​ຄວາມ​ໄວ​ສູງ​ສຳ​ເລັດ​ຄັ້ງ​ທຳ​ອິດ​ ໃນ​ປີ1994 ​ໃນ​ຄວາມ​ໄວ 160 ກິ​ໂລ​ແມັດຕໍ່ຊົ່ວ​ໂມງ  ​ແລ່ນ​ແຕ່​ເມືອງ​ກວາງ​ໂຈ​ ຫາ​ເມືອງ​ເຊິ​ນ​ເຈິ​ນ ​ແລະ ຮອດ​ປີ​  2003 ​ໄດ້​ມີ​​ລົດ​ໄຟ​ຄວາມ​ໄວ​ສູງ 250 ກິ​ໂລ​ແມັດຕໍ່ຊົ່ວ​ໂມງ ຖ້ຽວ​ທຳ​ອິດ ​ແຕ່​ກິນ​ຮວານ​ດາວ​ໄປ​ຫາ​ເມືອງ​ເຊິນ​ຢາງ ​ແລະ ທ້າຍປີ 2008 ​ເສັ້ນທາງ​ລົດ​ໄຟຟ້າຄວາມ​ໄວ​ສູງ 350 ກິ​ໂລ​ແມັດຕໍ່ຊົ່ວໂມງ ຈາກ​ປັກ​ກິ່ງ​ຫາ​ຕຽນ​ຈິງ ​ໄດ້​ເປີດ​ນຳ​​ໃຊ້​ຢ່າງ​ເປັນ​ທາງ​ການ.

ນັບ​ແຕ່​​ປີ 2016 ​ເປັນ​ຕົ້ນ​ມາ, ສປ ຈີນ​ ​ເປັນ​ປະ​ເທດ​ທີ່​ມີ​ເສັ້ນທາງ​ລົດ​ໄຟ​ຄວາມ​ໄວ​ສູງ​ຍາວ​ທີ່​ສຸດ​ໃນ​ໂລກ​ ດ້ວຍ​ຄວາມ​ຍາວ 22.000 ກິ​ໂລ​ແມັດ ທັງ​ມີ​ປະຊາກອນ​ເດີນທາງ​ດ້ວຍ​ລົດ​ໄຟ​ຟ້າຄວາມ​ໄວ​ສູງຫລາຍ​ກວ່າ​ໝູ່​ໃນ​ໂລກ, ຄິດ​ສະ​ເລ່ຍ 60% ຂອງ​ຜູ້​ໂດຍສານ​ ແມ່ນ​ເດີນທາງ​ໄປ​ນຳ​ລົດ​ໄຟຟ້າ​ຄວາມ​ໄວ​ສູງ ​ແລະ ປັດຈຸບັນ​ພວມ​ສືບ​ຕໍ່​ສ້າງທາງ​ລົດ​ໄຟຄວາມ​ໄວ​ສູງ​ຕື່ມ​ອີກ ​ໃນ​ຄວາມ​ຍາວ 11.000 ກິ​ໂລ​ແມັດ.

ສປ ຈີນ ​ມີ​ຄວາມ​ມຸ່ງ​ໝັ້ນ​ໃນ​ການ​ພັດທະນາ​ລົດ​ໄຟ​ແຕ່ລະ​ໄລຍະ​ຢ່າງ​ຈິງ​ຈັງ ​ແລະ ​ກໍສາມາດ​ພັດທະນາ​ລົດ​ໄຟ​ຄວາມ​ໄວ​ສູງ​ໄດ້​ສຳ​ເລັດໃນ​ລະດັບ​ມາດຕະຖານ​ສາກົນ ​ທີ່​ທົ່ວ​ໂລກ​​ຍອມຮັບ ​ແລະ ຫລາຍ​ປະ​ເທດ​ກໍໄດ້​ນຳ​ໃຊ້​ເຕັກ​ໂນ​ໂລ​ຊີ​ການ​ສ້າງ​ທາງ​ລົດ​ໄຟ ​ແລະ ລາງ​ລົດ​ໄຟ​ຄວາມ​ໄວ​ສູງຈາກສປ ຈີນ ​ລວມທັງ​ມີ​ການ​ເຊື່ອມ​ຕໍ່​ສາຍ​ທາງ​ການ​ແລ່ນ​ລົດ​ໄຟ​ຄວາມ​ໄວ​ສູງ ​ລະຫວ່າງ ສປ ຈີນ ກັບ​ບັນດາ​ປະ​ເທດ​ຕ່າງໆໃນ​ໂລກ.