ກ້າວສູ່ປີໃໝ່ຕ້ອງຮ່ວມໃຈກັນພັດທະນາ

- advert banner 728 90 728x90 - ກ້າວສູ່ປີໃໝ່ຕ້ອງຮ່ວມໃຈກັນພັດທະນາ

- Untitled 1 2 - ກ້າວສູ່ປີໃໝ່ຕ້ອງຮ່ວມໃຈກັນພັດທະນາໂດຍ: ກ້ອງສ່ອງ ອິດສະຫລະ

- lattana 1 - ກ້າວສູ່ປີໃໝ່ຕ້ອງຮ່ວມໃຈກັນພັດທະນາ

ຕາມເຮົາວ່າ: ເມື່ອກ້າວເຂົ້າ ປີ 2560 ພວກເຮົາຕ້ອງໄດ້ພ້ອມກັນຫັນຄັນເລັ່ງ. ເປັນຫຍັງຈຶ່ງວ່າແນວນັ້ນ ? ຍ້ອນວ່າທຸກສິ່ງທຸກຢ່າງຈະພາກັນໄປສະຫລຸບ ຫລື ສະເຫລີມສະຫລອງໃນອີກ 3 ປີ ຫລື 4 ປີຂ້າງໜ້າ. ໃນແຜນ ພັດທະນາເສດຖະກິດ-ສັງຄົມ 5 ປີ ຄັ້ງທີ 8 ແຫ່ງລັດກໍຈະໄປມ້ວນທ້າຍໃນປີ 2020. ນັ້ນລະຄືເປົ້າໝາຍ ແລະ ຫລັກໄຊທີ່ພວກເຮົາຈະຕ້ອງໄດ້ພ້ອມກັນບຸກທະລຸ. ຕາມເຮົາຄິດ, ທຸກສິ່ງຢ່າງບໍ່ວ່າ ໃນແຜນພັດທະນາເສດຖະ ກິດ- ສັງຄົມ ກໍຄືບັນດາວິໄສທັດຂອງພັກ ແລະ ລັດຖະບານໄດ້ວາງອອກນັ້ນຈະໄປຕາມຄາດກະໄດ້ ຫລື ບໍ່ ? ມັນ ກໍຂຶ້ນກັບພວກເຮົາໝົດທຸກຄົນພາຍໃນຊາດເປັນຜູ້ມີພັນທະໜ້າທີ່ພ້ອມກັນຈັດຕັ້ງປະຕິບັດໃຫ້ເກີດດອກອອກ ຜົນ. ສະນັ້ນ ຈຶ່ງເວົ້າໄດ້ວ່າໃນລະບົບສາຍກ່ຽວພັນລະຫວ່າງແຜນວຽກ, ແຜນຄົນ ແລະ ແຜນເງິນແຫ່ງຊາດນັ້ນ ມັນຈຶ່ງກາຍເປັນໂລຊິກ ແລະ ມີວິທະຍາສາດທີ່ສຸດ ເພື່ອກ້າວໄປເຖິງໄຊຊະນະ ແລະ ຄວາມສໍາເລັດໃນຕໍ່ໜ້າ.

ສະເພາະປີ 2559 ຜ່ານມາ, ພວກເຮົາໄດ້ເຮັດສໍາເລັດໜ້າທີ່ຢ່າງຫລວງຫລາຍ ແລະ ອັນໂຕທີ່ເປັນພື້ນຖານ ກໍແມ່ນໄດ້ພ້ອມກັນຫັນເອົາມະຕິ 10 ຂອງພັກເຂົ້າສູ່ລວງເລິກ, ພ້ອມກັນຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ 5 ປີຄັ້ງທີ 8 ຂອງລັດຖະບານກາຍເປັນຮູບປະທໍາດີຂຶ້ນເລື້ອຍໆ. ບັນດາປາກົດການຫຍໍ້ທໍ້ອັນໃດທີ່ ເຫັນວ່າມັນເປັນອັນຕະລາຍຮ້າຍກາດຕໍ່ປະເທດຊາດບ້ານເມືອງ ຫລື ໂຕໃດທີ່ເຫັນວ່າຈະພາເອົາປະເທດຊາດບ້ານ ເມືອງເກີດວິກິດການລົ້ມຈົມນັ້ນ, ພວກເຮົາກໍໄດ້ພ້ອມພາກັນຕ້ານ ແລະ ສະກັດກັ້ນ ນັບທັງມີການຈໍາກັດປັດເປົ່າ ແລະ ປາບປາມໃຫ້ຫລຸດໜ້ອຍຖອຍລົງ ແລະ ກ້າວໄປເຖິງໃຫ້ໝົດສ້ຽງໄປຈາກສັງຄົມເຮົາເຊັ່ນ: ບັນຫາການສໍ້ ລາດບັງຫລວງ, ບັນຫາຢາເສບຕິດ ແລະ ປາກົດການຫຍໍ້ທໍ້ອື່ນໆ. ຕາມເຮົາຄິດໃນປັດຈຸບັນນີ້, ສິ່ງຫຍໍ້ທໍ້ທີ່ໄດ້ກົດ ໜ່ວງຄວາມຈະເລີນຂອງຊາດໃນໄລຍະຜ່ານມາກໍຄືໃນປັດຈຸບັນ ເຊິ່ງພວກເຮົາຈະຕ້ອງໄດ້ພ້ອມກັນແກ້ໄຂຢ່າງ ເດັດຂາດຈິງຈັງນັ້ນກໍແມ່ນການສໍ້ລາດບັງຫລວງໃນຖັນແຖວພະນັກງານຂອງລັດ, ຂະບວນຄ້າຂາຍຢາເສບຕິດ ທີ່ແຜ່ລາມມາຫຼາຍປີ. ສ່ວນວ່າການແກ້ໄຂອັນມີລັກສະນະຍາວນານນັ້ນກໍແມ່ນໄພຄຸກຄາມຈາກລະເບີດບໍ່ທັນ ແຕກທີ່ກົດໜ່ວງການພັດທະນາ ແລະ ເປັນມັດຈຸລາດຄອຍສັງຫານຄົນລາວເຮົາຢ່າງບໍ່ລົດລະປີລະ 5 ລະ 10 ຄົນ.

ເຖິງຢ່າງໃດກໍດີ, ຕາມເຮົາວ່າຕະຫລອດໄລຍະຜ່ານມາ ກໍຄືປັດຈຸບັນ, ພວກເຮົາມີພັກ ແລະ ລັດຖະບານເປັນ ຜູ້ຊີ້ນໍາ-ນໍາພາ ໂດຍສະເພາະແມ່ນລັດຖະບານຊຸດທີ 8 ໄດ້ເປັນແກນນໍາຫົວຫອກຫລາວແຫລມເດັດຂາດຈິງຈັງຕໍ່ ພາລະກິດສ້າງສາ ແລະ ພັດທະນາປະເທດຊາດ. ໃນ 40 ປີກວ່າຜ່ານມາ, ພວກເຮົາໄດ້ພິສູດຄວາມຈິງເຖິງຄວາມ ໜັກແໜ້ນເຂັ້ມແຂງ ແລະ ເຫັນຢ່າງຈະແຈ້ງແລ້ວວ່າພາຍໃຕ້ການຊີ້ນໍາ-ນໍາພາຂອງພັກ ແລະ ລັດຖະບານໃນ ຍຸກສະໄໝໃໝ່ນີ້, ປະເທດຊາດບ້ານເມືອງເຮົາໄດ້ມີການສ້າງສາພັດທະນາຢ່າງກ້າວກະໂດດຂັ້ນ. ຖ້າຈະເບິ່ງໃນດ້ານ ການເມືອງກໍນັບມື້ມີສະຖຽນລະພາບໜັກແໜ້ນ ແລະ ໝັ້ນຄົງ, ວຽກງານປ້ອງກັນຊາດ-ປ້ອງກັນຄວາມສະຫງົບ ກໍມີຄວາມສະຫງົບປອດໄພໂດຍພື້ນຖານ. ດ້ານເສດຖະກິດກໍນັບມື້ມີການຂະຫຍາຍຕົວໃນອັດຕາສະເລ່ຍ 7% ຕໍ່ປີ, ດ້ານສັງຄົມ-ວັດທະນະທໍາກໍນັບມື້ມີຄວາມຈະເລີນຮຸ່ງເຮືອງສີວິໄລ, ຊີວິດການເປັນຢູ່ຂອງປະຊາຊົນບັນດາເຜົ່າກໍ ນັບມື້ດີຂຶ້ນ ເລື້ອຍໆ.

ສິ່ງໂດດເດັ່ນອີກຢ່າງໜຶ່ງທີ່ໄດ້ສະແດງໃຫ້ເຫັນຕໍ່ແນວທາງອັນຖືກຕ້ອງສອດຄ່ອງນັ້ນແມ່ນພວກເຮົາໄດ້ ເຊື່ອມໂຍງເຂົ້າກັບໂລກໄດ້ເປັນຢ່າງດີ ເປັນຕົ້ນນັບແຕ່ພວກເຮົາໄດ້ຮັບກຽດເປັນເຈົ້າພາບອາຊຽນຄັ້ງທີ 28 ແລະ 29 ມານີ້, ຍິ່ງເຮັດໃຫ້ລາວເຮົາເພີ່ມກຽດສັກສີ, ຄວາມເຊື່ອໝັ້ນຕໍ່ເວທີພາກພື້ນ ແລະ ສາກົນຢ່າງໜັກແໜ້ນ ແລະ ສະເໝີຕົ້ນສະເໝີປາຍ. ປັດຈຸບັນ, ພວກເຮົາມີວົງຄະນາຍາດ ແລະ ອົງການຈັດຕັ້ງສາກົນໃຫ້ການສະໜັບ ສະໜູນຮ່ວມມືຊ່ວຍເຫລືອຢ່າງກວ້າງຂວາງ.

ຕາມເຮົາວ່າໄປຄຽງຄູ່ກັບສິ່ງດັ່ງກ່າວນີ້ແລ້ວ, ກ້າວເຂົ້າສູ່ປີໃໝ່ 2560 ເປັນຕົ້ນໄປ ພວກເຮົາຍິ່ງຕ້ອງໄດ້ຮ່ວມ ແຮງຮ່ວມໃຈກັນຫລາຍຂຶ້ນເພື່ອສ້າງສາພັດທະນາປະເທດຊາດບ້ານເມືອງເຮົາໃຫ້ກາຍເປັນປະເທດທີ່ມີຄວາມສະ ຫງົບ, ອຸດົມຮັ່ງມີ ແລະ ກ້າວໄປໜ້າຢ່າງບໍ່ຢຸດຢັ້ງ.