ຈຳນວນຜູ້ຕິດເຊື້ອໄຂ້ເລືອດອອກເພີ່ມເປັນ 520 ກວ່າກໍລະນີໃນທົ່ວປະເທດ

- advert banner 728 90 728x90 - ຈຳນວນຜູ້ຕິດເຊື້ອໄຂ້ເລືອດອອກເພີ່ມເປັນ 520 ກວ່າກໍລະນີໃນທົ່ວປະເທດ

ຕາມການລາຍງານຂອງໜ່ວຍເຝົ້າລະວັງພະຍາດລະບາດຂອງກະຊວງສາທາລະນະສຸກ ໃຫ້ຮູ້ວ່າ: ສະພາບໄຂ້ເລືອດອອກປີນີ້ເຖິງວ່າຍັງບໍ່ມີການລະບາດ, ແຕ່ຈຳນວນສະສົມຂອງຜູ້ຕິດເຊື້ອນັບແຕ່ເດືອນມັງກອນ 2017 ມາຮອດປັດຈຸບັນນີ້ເຫັນວ່າ: ຢູ່ທົ່ວປະເທດມີຜູ້ຕິດເຊື້ອໄຂ້ເລືອດອອກເພີ່ມເປັນ 520 ກວ່າກໍລະນີແລ້ວແຕ່ຍັງບໍ່ມີຜູ້ເສຍຊີວິດ. ໃນນັ້ນແຂວງທີ່ມີຈຳນວນຜູ້ຕິດເຊື້ອຫລາຍກວ່າໝູ່ແມ່ນນະຄອນຫລວງວຽງຈັນມີຫລາຍກວ່າ 144  ກໍລະນີ, ຮອງລົງມາແມ່ນແຂວງຈຳປາສັກມີ 123 ກໍລະນີ, ອັດຕະປືມີ 113 ກໍລະນີ, ບໍລິຄຳໄຊ 40 ກໍລະນີ, ສະຫວັນນະເຂດ 34 ກໍລະນີ, ເຊກອງ ແລະ ສາລະວັນແຂວງລະ 20 ກໍລະນີ, ຄຳມ່ວນ 17 ກໍລະນີ, ສ່ວນແຂວງອື່ນໆນັ້ນແມ່ນມີໜ້ອຍ.

- lattana 1 - ຈຳນວນຜູ້ຕິດເຊື້ອໄຂ້ເລືອດອອກເພີ່ມເປັນ 520 ກວ່າກໍລະນີໃນທົ່ວປະເທດ

ເຖິງຢ່າງໃດກໍຕາມ, ເພື່ອເປັນການປ້ອງກັນບໍ່ໃຫ້ພະຍາດດັ່ງກ່າວເກີດການລະບາດດັ່ງທີ່ເຄີຍເປັນມາແລ້ວນັ້ນ, ທຸກຄົນຕ້ອງເອົາໃຈໃສ່ສືບຕໍ່ເຝົ້າລະວັງດ້ວຍການປະຕິບັດຫລັກການ 5ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະນະທີ່ມີນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂໃສ່. 2 ປ່ຽນນ້ຳ ແລະ ຜັດຖູພາຊະນະ ເຊັ່ນ: ເຕົ້າດອກໄມ້, ນ້ຳຮອງຕີນຕູ້ເຢັນ, ຖ້ານຮອງຈອກນ້ຳ. 3 ປ່ອຍປາຫາງນົກຍຸງເພື່ອກິນໜອນນ້ຳຍຸງລາຍ. 4  ປັບປຸງບໍ່ໃຫ້ມີນ້ຳຄ້າງ, ຂັງຕາມກະໂປະກະປ໋ອງ, ຮາງລິນ ແລະ ຢ່າງຕີນລົດເກົ່າ ແລະ 5 ປະຕິບັດເປັນປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປປິ່ນປົ່ວຢູ່ໂຮງໝໍ ຫລື ສຸກສາລາໃກ້ບ້ານ, ພ້ອມນັ້ນກໍຕ້ອງເອົາໃຈໃສ່ປ້ອງກັນພະຍາດຕາມລະດູການ, ໂດຍສະເພາະແມ່ນພະຍາດຖອກທ້ອງ, ຫລັກການອານາໄມ 3 ສະອາດຢ່າງເຂັ້ມງວດ, ເນື່ອງຈາກປັດຈຸບັນສະພາບອາການເລີ່ມມີການປ່ຽນແປງຮ້ອນຂື້ນ, ຈຶ່ງເປັນເງື່ອນໄຂກໍ່ໃຫ້ເກີດພະຍາດດັ່ງກ່າວໄດ້ງ່າຍ.