ທະນາຄານໂລກເພີ່ມຄາດຄະເນ ການເຕີບໃຫຍ່ເສດຖະກິດໂລກ

- advert banner 728 90 728x90 - ທະນາຄານໂລກເພີ່ມຄາດຄະເນ ການເຕີບໃຫຍ່ເສດຖະກິດໂລກ

ທະນາຄານ​ໂລກ​ເພີ່ມ​ທ່າ​ອ່ຽງການ​ຂະຫຍາຍຕົວ​ຂອງ​ເສດຖະກິດ​ໂລກ​ໃນ​ປີຜ່ານມາ​ເປັນ 3,0% ​ແລະ ຂອງ​ປີ​ນີ້​ຄາດ​ຄະ​ເນ​ໄວ້​ທີ່ 3,1% ​ແຕ່​ເຕືອນ​ວ່າ​ມາດ​ຕະການ​ກີດ​ກັ້ນການ​ຄ້າ ​ແລະ ໜີ້​ສາທາລະນະ​ຂອງ​ຫລາຍ​ປະ​ເທດ​ທີ່​ເພີ່ມ​ຂຶ້ນຈະ​ເປັນ “ອຸປະສັກ” ຕໍ່​ຂະ​ບວນການ​ເສດຖະກິດ​ໂລກ.

- lattana 1 - ທະນາຄານໂລກເພີ່ມຄາດຄະເນ ການເຕີບໃຫຍ່ເສດຖະກິດໂລກ

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ວໍ​ຊິງ​ຕັນ ປະ​ເທດ​ສະຫະລັດ​ອາ​ເມ​ລິ​ກາ ​ໃນ​ວັນ​ທີ 9 ມັງກອນ​ວ່າ: ທະນາຄານ​ໂລກ​ອອກ​ຖະ​ແຫລ​ງການ​ໃນ​ວັນ​ທີ 9 ມັງກອນ ປັບ​ເພີ່ມຄາດ​ຄະ​ເນ​ການ​ເຕີບ​ໃຫຍ່​ຂອງ​ເສດຖະກິດ​ໂລກ​ປະຈຳ​ປີ 2017 ​ເປັນ 3,0% ​ເພີ່ມ​ຂຶ້ນຈາກ​ລາຍ​ງານ​ໃນ​ເດືອນ​ມິຖຸນາປີຜ່ານມາ ​ເຊິ່ງຢູ່​ທີ່ 2,7%. ຂະນະ​ທີ່​ຄາດ​ຄະ​ເນ​ການ​ຂະຫຍາຍຕົວ​ຂອງ​ເສດຖະກິດ​ໂລກ​ໃນ​ປີ​ນີ້​ຕາມ​ການ​ວິ​ເຄາະ​ຂອງ​ທະນາຄານ​ໂລກ​ຈະ​ຢູ່​ທີ່ 3,1% ​ແລະ 3,0% ​ໃນ​ປີ 2018.

​ເຖິງ​ຢ່າງ​ໃດ​ກໍ​ຕາມ, ປະສິດທິພາບ​ໃນ​ການ​ເຕີບ​ໃຫຍ່​ຂອງ​ເສດຖະກິດ​ໂລກ​ລະຫວ່າງ​ປີ 2013 ​ເຖິງ 2017 ຢູ່​ທີ່​ສະ​ເລ່ຍ 2,5% ຕໍ່​ປີ ຫລຸດ​ລົງ 0,6% ​ເມື່ອ​ທຽບ​ໃສ່​ໄລຍະ​ເວລາ 1 ທົດ​ສະ​ວັດ​ຜ່ານ​ມາ ​ແລະ ນ້ອຍ​ຍິ່ງ​ກວ່າ​ນັ້ນ​ໃນ​ກຸ່ມ​ຕະຫລາດ​ເກີດ​ໃໝ່ ​ແລະ ປະ​ເທດ​ກຳລັງ​ພັດທະນາ. ຂະນະ​ທີ່​ເມື່ອ​ຈຳ​ແນ​ກອອກ​ເປັນ​ແຕ່ລະ​ປະ​ເທດ​ພົບ​ວ່າ: ​ເສດຖະກິດ​ຂອງ​ອາ​ເມ​ລິ​ກາ ​ເຊິ່ງມີ​ຂະໜາດ​ໃຫຍ່​ທີ່​ສຸດ​ຂອງ​ໂລກ​ຂະຫຍາຍຕົວ 2,3% ​​ໃນ​ປີຜ່ານມາ ​ແລະ 2,2% ​ໃນ​ປີ​ນີ້, ສ່ວນ​ເສດຖະກິດ​ທີ່​ໃຫຍ່​ເປັນອັນ​ດັບ 2 ຄື​ຈີນ ​ໄດ້​ຮັບ​ການ​ປັບ​ເພີ່ມ​ຂຶ້ນ​ເຖິງ 0,3 ຈຸດ ​ເປັນ 6,8% ​ໃນ​ປີຜ່ານມາ ​ແລະ 6,4% ​ໃນ​ປີ​ນີ້.

ຂະນະ​ດຽວ​ກັນ, ລາຍ​ງານ​ຂອງ​ທະນາຄານ​ໂລກ​ລະບຸ​ອີກ​ວ່າ: ການ​ທີ່​ທະນາຄານ​ກາງຂອງ​ຫລາຍ​ປະ​ເທດ​ພະຍາຍາມ​ຮັກສາ​ອັດຕາ​ດອກ​ເບ້ຍ​ນະ​ໂຍບາຍ​ໃຫ້​ຢູ່​ໃນ​ລະດັບ​ຕໍ່າ​​ໃນ​ປີຜ່ານມາ ຖື​ເປັນ​ປັດ​ໄຈ​ສຳຄັນ​ໃນ​ການ​ຊ່ວຍ​ໃຫ້​ເສດຖະກິດ​ໂລກ​ຟື້ນຕົວ “ຢ່າງ​ເປັນ​ລະບົບ” ​ແຕ່​ທະນາຄານ​ໂລກ​ຍອມຮັບ​ວ່າ: ​ເປັນ​ໄປ​ຕາມ​ກົນ​ໄກ​ຂອງ​ຕະຫລາດ​ທີ່​ການ​ຂະຫຍາຍຕົວ​ຈະ​ຢຸດ​ລົງ “​ເມື່ອ​ເຖິງ​ເວລາ” ​ໂດຍ​ຄວາມ​ສ່ຽງ​ຕາມ​ສະຖານະ​ການ​ໃນ​ປັດຈຸບັນ ຄື​ການ​ທີ່​ຫລາຍ​ປະ​ເທດ​ມີ​ປະລິມານ​ໜີ້​ສາທາລະນະ​ເພີ່ມ​ຂຶ້ນ ​ເຊິ່ງຈະ​ເປັນ​ການ​ກົດ​ດັນ​ໃຫ້​ທະນາຄານ​ກາງຂອງ​ປະ​ເທດ​ນັ້ນຕ້ອງ​ປັບ​ເພີ່ມ​ອັດຕາ​ດອກ​ເບ້ຍ ​ເພື່ອ​ໃຫ້​ອັດຕາ​ເງິນ​ເຟີ້​ເປັນ​ໄປ​ຕາມ​​ເປົ້າໝາຍ ​ແລະ ມາດ​ຕະການ​ກີດ​ກັ້ນທາງ​ການ​ຄ້າ​ທີ່​ເພີ່ມ​ຂຶ້ນ.