ການເກັບຄ່າທໍານຽມທາງປະຕິບັດໄດ້ແລ້ວ 30 ຕື້ກີບ

ການເກັບຄ່າທໍານຽມທາງປະຕິບັດໄດ້ແລ້ວ 30 ຕື້ກີບ - advert banner 728 90 728x90 - ການເກັບຄ່າທໍານຽມທາງປະຕິບັດໄດ້ແລ້ວ 30 ຕື້ກີບ

ທ່ານຫົວໜ້າກົມສ່ວຍສາອາກອນກະຊວງການເງິນ ໃຫ້ສໍາພາດວ່າ: ການເກັບຄ່າທໍານຽມທາງເປັນລາຍຮັບທີ່ສໍາຄັນໜຶ່ງຂອງງົບປະມານ ເພື່ອໃຫ້ສອດຄ່ອງກັບການຂະຫຍາຍຕົວທາງດ້ານເສດຖະກິດ-ສັງຄົມ ແລະ ການພັດທະນາ, ລັດຖະບານຈຶ່ງໄດ້ມີການປັບປຸງອັດຕາຄ່າທໍານຽມການນໍາໃຊ້ຫົນທາງຕາມລັດຖະບັນຍັດຂອງປະທານປະເທດສາທາລະນະລັດ ປະຊາທິປະໄຕ ປະຊາຊົນລາວ ສະບັບເລກທີ 001/ປປທ ລົງວັນທີ 20 ກັນຍາ 2017 ວ່າດ້ວຍຄ່າທໍານຽມທາງ ແລະ ໄດ້ຊີ້ນໍາໃຫ້ກະຊວງການເງິນປັບປຸງກົນໄກການເກັບລາຍຮັບດັ່ງກ່າວຫັນເປັນທັນສະໄໝ ເພື່ອຄວາມໂປ່ງໃສ, ບໍ່ໃຫ້ມີການຮົ່ວໄຫລ ແລະ ທັງອໍານວຍຄວາມສະດວກໃຫ້ແກ່ຜູ້ເສຍຄ່າທໍານຽມທາງ, ຊຶ່ງຜ່ານໄລຍະການນໍາໃຊ້ລະບົບດັ່ງກ່າວມາແຕ່ວັນທີ 26 ຕຸລາ 2017 ຜ່ານມາ, ເຊິ່ງເຫັນວ່າມີສຽງຕອບຮັບຈາກສັງຄົມໄດ້ເປັນຢ່າງດີ ແລະ ມາຮອດວັນທີ 15 ມັງກອນ 2018 ສາມາດຈັດເກັບໄດ້ແລ້ວ 30 ຕື້ກີບ, ເພີ່ມຂຶ້ນເປັນຈໍານວນຫລາຍເມື່ອທຽບກັບແຕ່ກ່ອນ, ທັງນີ້, ຍ້ອນການນໍາໃຊ້ລະບົບທີ່ທັນສະໄໝເຂົ້າໃນການເກັບຄ່າທໍານຽມທາງ, ໂດຍແມ່ນທະນາຄານການຄ້າຕ່າງປະເທດລາວມະຫາຊົນ (ທຄຕລ) ເປັນຜູ້ໃຫ້ບໍລິການ.

ການເກັບຄ່າທໍານຽມທາງປະຕິບັດໄດ້ແລ້ວ 30 ຕື້ກີບ - lattana 1 - ການເກັບຄ່າທໍານຽມທາງປະຕິບັດໄດ້ແລ້ວ 30 ຕື້ກີບ

ທ່ານຫົວໜ້າກົມສ່ວຍສາອາກອນກະຊວງການເງິນ ໃຫ້ຮູ້ອີກວ່າ: ການນໍາໃຊ້ລະບົບດັ່ງກ່າວເຫັນວ່າໄດ້ຮັບຜົນດີຫລາຍຖ້າທຽບໃສ່ຊຸມປີຜ່ານມາການຈັດຕັ້ງປະຕິບັດເກັບຄ່າທໍານຽມທາງໝົດປີບັນລຸໄດ້ພຽງ 10 ຕື້ກວ່າກີບ (ຕາມອັດຕາລັດຖະບັນຍັດສະບັບເກົ່າ) ແລະ ຖ້າອິງຕາມສະຖິຕິການມາຂຶ້ນທະບຽນຍານພາຫະນະທົ່ວປະເທດທີ່ກະຊວງໂຍທາທິການ ແລະ ຂົນສົ່ງມີພາຫະນະທັງໝົດ 1,8 ລ້ານຄັນ, ດັ່ງນັ້ນຄາດວ່ານັບແຕ່ເດືອນຕຸລາ 2017 ຫາເດືອນມີນາ 2018 ຈະສ້າງລາຍຮັບໄດ້ທັງໝົດຢ່າງຕໍ່າ 60 ຕື້ກີບ.

ທ່ານຫົວໜ້າກົມດັ່ງກ່າວໃຫ້ຮູ້ວ່າ: ສ່ວນການເສຍຄ່າທຳນຽມທາງປະຈຳປີ 2018 ສາມາດຊໍາລະໄດ້ເລີ່ມແຕ່ເດືອນມັງກອນຫາເດືອນມິຖຸນາ 2018, ກໍເນື່ອງຈາກວ່າລັດຖະບັນຍັດທີ່ປະກາດໃຊ້ແມ່ນມີຄວາມລ່າຊ້າເຮັດໃຫ້ການຈັດຕັ້ງປະຕິບັດຈຶ່ງໄດ້ມີການເຍື້ອນເວລາໃນການຊໍາລະຄ່າທາງປີ 2018, ສ່ວນອັດຕາຄ່າທຳນຽມແມ່ນອີງຕາມລັດຖະບັນຍັດຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ສະບັບເລກທີ 001/ປປທ ລົງວັນທີ 20 ກັນຍາ 2017 ແລະ ໄປຕາມປະເພດລົດ, ຕາມຄວາມແຮງຂອງລົດແຕ່ລະຊະນິດ ແລະ ສາມາດຊໍາລະໂດຍຜ່ານ 5 ຊ່ອງທາງປະກອບມີ: 1). ຊໍາລະຜ່ານຕູ້ ATM  2). ແອັບພີເຄເຊີນ BCEL One 3). ຊໍາລະຜ່ານເຄົ້າເຕີ້ບໍລິການຂອງ ທຄຕລ 4). ຜ່ານລະບົບ Becom ເປັນກຸ່ມສາຂາຂອງທະນາຄານທີ່ໃຫ້ບໍລິການ 5). ຜ່ານລະບົບຕູ້ກີອັອດ (Kiosk) ຊຶ່ງປັດຈຸບັນໄດ້ຕິດຕັ້ງໄປແລ້ວສອງຈຸດຄື: ສໍານັກງານໃຫ່ຍທະນາຄານ ທຄຕລ, ປະຕູໄຊ ແລະ ແຫ່ງທີ່ສາມກໍາລັງຄົ້ນຄວ້າສະຖານທີ່ ຊຶ່ງເປັນຕູ້ທີ່ສາມາດຮັບສະຕິກເກີໄດ້ທັນທີໃນຕູ້ດັ່ງກ່າວ ແລະ ຈະໄດ້ມີການຂະຫຍາຍໄປເມືອງອື່ນໆອີກເພື່ອອໍານວຍຄວາມສະດວກໃຫ້ແກ່ການບໍລິການ.