ແຂງຄຳມ່ວນເປີດທ່ອງທ່ຽວດ້ວຍບັນຍາກາດຟົດຟື້ນ

ແຂງຄຳມ່ວນເປີດທ່ອງທ່ຽວດ້ວຍບັນຍາກາດຟົດຟື້ນ - advert banner 728 90 728x90 - ແຂງຄຳມ່ວນເປີດທ່ອງທ່ຽວດ້ວຍບັນຍາກາດຟົດຟື້ນ

ພິທີເປີດປີທ່ອງທ່ຽວລາວ 2018 ທີ່ແຂວງຄໍາມ່ວນໄດ້ຈັດຂຶ້ນ ພ້ອມໆກັບງານບຸນນະມັດສະການພະທາດສີໂຄດຕະບອງ ໃນວັນທີ 25 ມັງກອນນີ້ ດ້ວຍບັນຍາກາດຟົດຟື້ນ ໂດຍການໃຫ້ກຽດລັ່ນຄ້ອງ 9 ບາດ ເພື່ອເປັນສິລິມຸງຄຸນຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີທັງເປັນປະທານຊີ້ນໍາຈັດງານປີທ່ອງທ່ຽວລາວ2018, ມີທ່ານເຈົ້າແຂວງຄໍາມ່ວນ ແລະ ຜູ້ຕາງຫນ້າຈາກແຂວງອ້ອມຂ້າງ, ກະຊວງ-ກົມກອງທີ່ກ່ຽວຂ້ອງ ແລະ ແຂກຕ່າງປະເທດພ້ອມດ້ວຍປະຊາຊົນຊາວແຂວງຄໍາມ່ວນເຂົ້າຮ່ວມຢ່າງຫລວງຫລາຍ.

ແຂງຄຳມ່ວນເປີດທ່ອງທ່ຽວດ້ວຍບັນຍາກາດຟົດຟື້ນ - lattana 1 - ແຂງຄຳມ່ວນເປີດທ່ອງທ່ຽວດ້ວຍບັນຍາກາດຟົດຟື້ນ

ໃນໂອກາດນີ້, ທ່ານຮອງເຈົ້າແຂວງໄດ້ລາຍງານໃຫ້ຊາບວ່າ: ມັນເປັນໂອກາດອັນດີທີ່ປີທ່ອງທ່ຽວລາວຢູ່ແຂວງຄໍາມ່ວນໄດ້ຈັດຂຶ້ນພ້ອມໆກັນກັບນະມັດສະການພະທາດສີໂຄດຕະບອງ ແລະ ໃນງານດັ່ງກ່າວ ນອກຈາກພິທີຄົບງັນທາງສາສະຫນາແລ້ວຍັງມີງານຕະຫລາດນັດ, ການສະແດງສິລະປະວັນນະຄະດີ ແລະການແຂ່ງຂັນກິລາປະເພດຕ່າງໆເພື່ອເປັນການສົ່ງເສີມວຽກງານການທ່ອງທ່ຽວໃຫ້ມີບັນຍາກາດຟົດຟື້ນຍິ່ງຂຶ້ນ. ປັດຈຸບັນຢູ່ແຂວງຄໍາມ່ວນມີແຫລ່ງທ່ອງທ່ຽວທໍາມະຊາດ 139 ແຫ່ງ, ທ່ອງທ່ຽວດ້ານວັດທະນະທໍາ 30 ແຫ່ງແລະ ທ່ອງທ່ຽວປະຫວັດສາດ29 ແຫ່ງ. ໂຄງລ່າງພື້ນຖານ, ເສັ້ນທາງຄົມມະນາຄົມໄດ້ຮັບການປັບປຸງດີຂຶ້ນ, ໂຮງແຮມ-ເຮືອນພັກໄດ້ຮັບການພັດທະນາຂະຫຍາຍຕົວ, ປັດຈຸບັນມີຫລາຍກວ່າ 140 ແຫ່ງ, ຮ້ານອາ ຫານ,ບັນເທີງ ແລະ ກິນດື່ມເກືອບ 340 ແຫ່ງ. ໃນປີ 2016 ຜ່ານມາ ມີນັກທ່ອງທ່ຽວເຂົ້າມາທ່ຽວແຂວງຄໍາມ່ວນຫລາຍກວ່າ 538 ພັນກວ່າເທື່ອຄົນ ສ້າງລາຍຮັບປະມານ 345 ຕື້ກີບ ແລະ ຄາດວ່າໃນປີ 2018 ນີ້ ຈະມີນັກທ່ອງທ່ຽວເຂົ້າມາທ່ຽວແຂວງຄໍາມ່ວນຫລາຍກວ່າ 565 ພັນກວ່າເທື່ອຄົນ ແລະ ຈະມີລາຍຮັບປະມານ370 ຕື້ກີບ. ສໍາລັບປີທ່ອງທ່ຽວລາວແຂວງຄໍາມ່ວນໄດ້ວາງຄໍາຂວັນໄວ້ວ່າ: “ທ່ອງທ່ຽວເມືອງລາວ ມ່ວນຊື່ນສຸກໃຈ-ໃສ່ໃຈສິ່ງແວດລ້ອມ, ທ່ອງທ່ຽວເມືອງລາວຮຽນຮູ້ປະຫວັດສາດ ຊື່ນຊົມທໍາມະຊາດ ອະນຸລັກວັດທະນະທໍາ, ທ່ອງທ່ຽວຄໍາມ່ວນ ດິນແດນເຊື່ອງຊ້ອນ ຊັບພະຍາກອນລ້ໍາຄ່າທີ່ຕ້ອງຊອກຫາ” ແລະ ໃນງານບຸນພະທາດສີໂຄດຕະບອງຍັງຈະຈັດໃຫ້ມີພິທີໃສ່ບາດພະຍາສີໂຄດ, ພິທີແຫ່ຜາສາດເຜິ້ງ ແລະ ວຽນທຽນໃນຕອນຄໍ່າ ແລະ ກິດຈະກໍາມ່ວນຊື່ນອື່ນໆ.

ທ່ານ ໂອໄດ ສຸດາພອນ ເຈົ້າແຂວງຄໍາມ່ວນ ໄດ້ກ່າວໃນພິທີວ່າ: ຂ້າພະເຈົ້າຂໍຖືໂອກາດນີ້ເປີດປີທ່ອງທ່ຽວລາວຂອງແຂວງຄໍາມ່ວນເພື່ອແນະນໍາໃຫ້ບັນດາແຂກ ແລະ ນັກທ່ອງທ່ຽວທີ່ມາຮ່ວມງານໄດ້ຮັບຮູ້, ເຂົ້າໃຈໂດຍອີງໃສ່ຈຸດພິເສດທີ່ຕັ້ງຂອງແຂວງທີ່ເປັນຈຸດໃຈກາງທາງຜ່ານຈາກພາກກາງຫາພາກໃຕ້ຕາມເສັ້ນທາງຫລວງແຫ່ງຊາດເລກທີ 13 ແລະ ການເຊື່ອມຈອດກັບ ສສ ຫວຽດນາມ ຫາຣາຊະອານາຈັກໄທ ດ້ວຍເສັ້ນທາງເລກທີ 12 ເຊື່ອມໃສ່ກັບຂົວມິດຕະພາບແຫ່ງທີ 3 ຄໍາມ່ວນ-ນະຄອນພະນົມ ເຊິ່ງເປັນເງື່ອນໄຂຫນຶ່ງໃນການດຶງດູດແຂກ ແລະ ນັກທ່ອງທ່ຽວເຂົ້າມາແຂວງຄໍາມ່ວນນັບມື້ນັບຫລາຍຂຶ້ນ. ພ້ອມນັ້ນ ປະຊາຊົນຊາວແຂວງຄໍາມ່ວນຍັງມີຄວາມອຸດົມສົມບູນໄປດ້ວຍວັດທະນະທໍາ ແລະ ຮີດຄອງປະເພນີທີ່ສາມາດສ້າງຄວາມປະທັບໃຈໃຫ້ແຂກທີ່ມາພົບເຫັນ ໂດຍສະເພາະວັດທະນະທໍາການນຸ່ງຖືທີ່ເປັນເອກະລັກຂອງແຕ່ລະຊົນເຜົ່າທີ່ໄດ້ສືບທອດກັນມານັບຫລາຍຮ້ອຍປີມາແລ້ວ. ແຂວງຄໍາມ່ວນຍັງມີຊັບພະຍາກອນທໍາມະຊາດອັນສວຍສົດງົດງາມ, ມີສະຖານທີ່ປະຫວັດສາດອັນຍາວນານ ແລະ ຈະເລີນຮຸ່ງເຮືອງ, ມີປູສະນີຍະສະຖານທີ່ຂຶ້ນຊື່ລືນາມກໍຄືພະທາດສີໂຄດຕະບອງແຫ່ງນີ້ອັນໄດ້ກາຍເປັນທ່າແຮງທີ່ສໍາຄັນດ້ານການທ່ອງທ່ຽວຂອງ ແຂວງຄໍາມ່ວນ, ພ້ອມທັງການມີສ່ວນຮ່ວມຂອງປະຊາຊົນ ແລະ ສັງຄົມ ຈະເຮັດໃຫ້ການທ່ອງທ່ຽວແຂວງຄໍາມ່ວນສາມາດ ບັນລຸໄດ້ຕາມວິໄສທັດແລະ ຄາດຫມາຍທີ່ໄດ້ກໍານົດໄວ້.