ລາວ-​ເອດີ​ບີ ຫາລື​ຮ່າງ​ແຜນ​ບໍລິການ​ຈັດ​ຫາ​ງານ​ໃນ ສປປ ລາວ

ລາວ-​ເອດີ​ບີ ຫາລື​ຮ່າງ​ແຜນ​ບໍລິການ​ຈັດ​ຫາ​ງານ​ໃນ ສປປ ລາວ - advert banner 728 90 728x90 - ລາວ-​ເອດີ​ບີ ຫາລື​ຮ່າງ​ແຜນ​ບໍລິການ​ຈັດ​ຫາ​ງານ​ໃນ ສປປ ລາວ

​ກົມ​ພັດທະນາ​ສີມື​ແຮງ​ງານ ແລະ ຈັດ​ຫາ​ງານ ກະຊວງ​​ແຮງ​ງານ ​ແລະ ສະຫວັດດີ​ການ​ສັງຄົມ ຮ່ວມ​ກັບ​ ທະ​ນາຄາ​ນພັດທະນາ​ອາຊີ ປະຈຳ ສປປ ລາວ (​ເອດີ​ບີ) ​ໄດ້​ຈັດ​ກອງ​ປະຊຸມ​ຄູ່​ຮ່ວມ​ງານ​ແຫ່ງ​ຊາດ ​ເພື່ອ​ປຶກສາ​ຫາລື​ຮ່າງ​ແຜນ​ບໍລິການ​ຈັດ​ຫາ​ງານ ພາຍ​ໃຕ້​ໂຄງການ​ເສີມ​ສ້າງ​ຄວາມ​ອາດ​ສາມາດ​ທາງ​ດ້ານ​ວິຊາ​ການ​ເພື່ອ​ພັດທະນາລະບົບ​ການຈັດ​ຫາ​ງານ​ຢູ່ ສປປ ລາວ ຂຶ້ນໃນ​ວັນ​ທີ 26 ມັງກອນນີ້ ທີ່​ນະຄອນຫລວງ​ວຽງ​ຈັນ ພາຍໃຕ້​ການ​ເປັນ​ປະທານ​ຂອງ​ທ່ານນາງ ອານຸສອນ ຄຳ​ສິງ​ສະຫວັດ ຮັກສາ​ການ​ຫົວໜ້າ​ກົມ​ພັດທະນາ​ສີມື​ແຮງ​ງານ ​ແລະ ຈັດຫາ​ງານ ​ແລະ ທ່ານ ຊັນ​ສຸ​ເກ ບັນ​ໂດ ຊ່ຽວຊານ​ອາວຸ​ໂສ ທະນາຄານ​ພັດທະນາ​ອາຊີ ປະຈຳ ລາວ.

ລາວ-​ເອດີ​ບີ ຫາລື​ຮ່າງ​ແຜນ​ບໍລິການ​ຈັດ​ຫາ​ງານ​ໃນ ສປປ ລາວ - lattana 1 - ລາວ-​ເອດີ​ບີ ຫາລື​ຮ່າງ​ແຜນ​ບໍລິການ​ຈັດ​ຫາ​ງານ​ໃນ ສປປ ລາວ

ທ່ານນາງ ອານຸສອນ ຄຳ​ສິງ​ສະຫວັດ ​​ກ່າວ​ວ່າ: ​ເພື່ອ​ເປັນ​ການ​ກຽມພ້ອມ​ການ​ເຊື່ອມ​ໂຍງ​ເຂົ້າ ​AEC ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ​ໄດ້​ສ້າງ​ວິ​ໄສ​ທັດ ​ແລະ ​ເປົ້າ​ໝາຍ​ຮອດ​ປີ 2030 ​ເພື່ອ​ນຳພາ​ປະ​ເທດ​ຫລຸດ​ພົ້ນອອກ​ຈາກ​ປະ​ເທດ​ດ້ອຍ​ພັດທະນາ ​ໂດຍ​ເນັ້ນ​ໜັກ​ໃນ​ການ​ສ້າງ​ແຮ​ງງານ​ທີ່​ມີ​ຄຸນ​ນະພາ​ບ ​ແລະ ປະລິມານທີ່​ພຽງພໍ​ກັບ​ຄວາມ​ຕ້ອງການ​ຂອງ​ຕະຫລາດ​ແຮງ​ງານ, ສາມາດ​ແຂ່ງ​ຂັນ​ກັບ​ພາກ​ພື້ນ ​ແລະ ສາກົນ, ມີ​ຄວາມ​ໝັ້ນຄົງ​ໃນ​ການ​ເຮັດ​ວຽກ ​ແລະ ມີ​ຄຸນ​ນະພາ​ບຊີວິດ​ທີ່​ດີ ​ເຊິ່ງ​ໄດ້​ວາງ​ຄາດໝາຍ​ສູ້​ຊົນ​ໃນ​ການ​ສົ່ງ​ເສີມ​ວຽກ​ເຮັດ​ງານ​ທຳ​ໃນ​ 5 ປີ (2016-2020) ສ້າງ​ລະບົບ​ຖານ​ຂໍ້​ມູນ​ຂ່າວສານ​ຕະຫລາດ​ແຮງ​ງານທີ່​ລວມສູນ​ເອກະ​ພາບ ມີ​ເຄືອ​ຂ່າ​ຍ​ໃນ​ຂອບ​ເຂດ​ທົ່ວ​ປະ​ເທດ, ບໍລິການ​ຈັດ​ຫາ​ວຽກ​ເຮັດ​ງານ​ທຳ​ໃຫ້​ຕະຫລາດ​ແຮງ​ງານ​ທີ່​ເພີ່ມ​ຂຶ້ນ​​ໃໝ່ປະມານ 716.193 ຄົນ (ສະ​ເລ່ຍ 143.239 ຄົນ​ຕໍ່​ປີ), ​ໃນ​ນັ້ນ ​ຂົງ​ເຂດ​ກະສິກຳປະມານ 522.863 ຄົນ, ​ອຸດສາຫະກຳ 58.805 ຄົນ ​ແລະ ​ບໍລິການ 134.525 ຄົນ.

​ໃນ​ໄລຍະ 5 ປີຜ່ານມາ ກະຊວງ​ແຮງງານ ​ແລະ ສະຫວັດດີ​ການ​ສັງຄົມ ຮ່ວມ​ກັບ​ອົງກາ​ນຈັດ​ຕັ້ງ​ສາກົນ ​ແລະ ບັນດາ​ຂະ​ແໜງ​ການ​ກ່ຽວຂ້ອງ ​​ໄດ້​ພັດທະນາ ​ແລະ ປັບປຸງ​ນະ​ໂຍບາຍ, ກົດໝາ​ຍ, ດຳລັດ, ຂໍ້​ຕົກລົງ ​ແລະ ລະບຽບ​ການ​ອື່ນໆ ທີ່​ພົວພັນ​ເຖິງ​ການ​ພັດທະນາ​ສີມື​ແຮງ​ງານ ​ແລະ ຈັດ​ຫາ ​ເພື່ອ​ແກ້​ໄຂ​ບັນຫາ​ການ​ຂາດ​ແຄນ​ແຮງ​ງານ ​ໂດຍ​ສະ​ເພາະ​ການຈັດ​ຕັ້ງ​ປະຕິບັດ​ໂຄງການ, ກິດຈະກຳ​ທີ່​ມີ​ເປົ້າ​ໝາຍ​ສ້າງ​ເງື່ອນ​ໄຂ ​ແລະ ​ໂອກາດ​ໃຫ້​ຜູ້​ໃຊ້​ແຮ​ງງານ ​ແລະ ຜູ້​ອອກ​ແຮງ​ງານ​ເພື່ອ​ສາມາດ​ເຂົ້າ​ເຖິງດ້ານ​ການບໍລິຫານ​ຈັດ​ຫາ​ງານ ​ເພື່ອ​ສ້າງ​ຄວາມ​ດຸ່ນດ່ຽງ​ລະຫວ່າງ​ຄວາມ​ຕ້ອງການ​ຂອງ​ຕະຫລາດ​ໄດ້.