ນັກກິລາເບັສບໍລລາວໄດ້ຮັບການຍົກລະດັບ ຈາກອະດີດນັກກິລາເບັສບໍລທີມຊາດຍີ່ປຸ່ນ

ນັກກິລາເບັສບໍລລາວໄດ້ຮັບການຍົກລະດັບ ຈາກອະດີດນັກກິລາເບັສບໍລທີມຊາດຍີ່ປຸ່ນ - advert banner 728 90 728x90 - ນັກກິລາເບັສບໍລລາວໄດ້ຮັບການຍົກລະດັບ ຈາກອະດີດນັກກິລາເບັສບໍລທີມຊາດຍີ່ປຸ່ນ

ຄູ​ຝຶກ ​ແລະ ນັກ​ກິລາ​ເບັສບໍລລາວ​ໄດ້​ຮັບ​ການ​ຍົກ​ລະດັບ​ຄວາມ​ຮູ້ດ້ານ​ກິລາ​ເບັສບໍລຈາກ​ອະດີດ​ນັກ​ກິລາ​ເບັສບໍລທີ​ມຊາດຍີ່ປຸ່ນ ​ເພື່ອ​ກຽມ​ຄວາມ​ພ້ອມ​ສູ່​ການ​ແຂ່ງຂັນ​ກິລາ​ເອຊຽນ​ເກ​ມ ​ໃນ​ປີ 2018 ທີ່​ປະ​ເທດ​ອິນ​ໂດ​ເນ​ເຊຍ. ການ​ຍົກ​ລະດັບ​​ໃນ​ຄັ້ງນີ້​ໄດ້​ຈັດ​ຂຶ້ນ​ໃນ​ວັນ​ທີ 27-28 ມັງກອນ​ຜ່ານ​ມາ ທີ່​ເດີ່ນ​ກິລາ​ຊັບ​ພະ​ວິຊາ ນະຄອນຫລວງ​ວຽງ​ຈັນ ​ເຊິ່ງ​ເປັນ​ການ​ຮ່ວມ​ມື​ກັນ​ລະຫວ່າງສູນ​ອາຊີ ມູນ​ນິທິ​ຍີ່ປຸ່ນ​ປະຈຳ​ລາວ ກັບ​ສະ​ໂມ​ສອນ​ໂກ​ເດັນ ​ເພ​ເຢີ ຈາກ​ຍີ່ປຸ່ນ ​ແລະ ສະຫະພັນ​ເບັສບໍລ​ແຫ່ງ​ຊາດ​ລາວ ​ເປັນ​ໂຄງການ​ຮ່ວມ​ມື​ຊ່ວຍ​ເຫລືອ​ດ້ານ​ກິລາ​ເບັສບໍລ​ໃນ​ອາ​ຊຽນ ​ເພື່ອ​ນຳ​ເອົາ​ຄວາມ​ຮູ້​ພື້ນຖານດ້ານ​ກິລາ​ນີ້​ມາ​ເຜີຍ​ແຜ່ ​ແລະ ຍົກ​ລະດັບການ​ສິດ​ສອນນັກ​ກິລາ​ເບັສບໍລ​ໃນ​ອາ​ຊຽນ ​ເຊິ່ງລາວ​ເປັນ​ປະ​ເທດ​ທີ​ສາມ​ໃນ​ປີ​ນີ້ ຕໍ່​ຈາກ​ມາ​ເລ​ເຊຍ ​ແລະ ສິງກະ​ໂປ ກ່ອນ​ໄປ​ຫວຽດນາມ ​ແລະ ​ໄທ​ໃນ​ຕໍ່​ໄປ. ການ​ມາລາ​ວຄັ້ງນີ້​ເປັນ​ຄັ້ງທຳ​ອິດ​ຂອງ​ຄະນະ​ດັ່ງກ່າວ ນຳ​ໂດຍ​ວິທະຍາກອນ ທ່ານ ມາ​ນາບຸ ກິ​ຕາ​ເບັບບູ (Manabu Kitabappu)  ​ແລະ ທ່ານ ​ໂນ​ຣິຮີ​ໂດະ ​ໂກ​ມາ​ດະ ອະດີດ​ນັກ​ກິລາ​ເບັສ​ບໍລທີ​ມຊາດ​ຍີ່ປຸ່ນທີ່​ມີ​ຊື່​ສຽງມາ​ຖ່າຍ​ທອດ​ບົດຮຽນ​ປະສົບ​ການ​ໃຫ້ຄູ​ຝຶກ ​ແລະ ນັກ​ກິລາ​ເບັສບໍລຂອງ​ລາວ.

ນັກກິລາເບັສບໍລລາວໄດ້ຮັບການຍົກລະດັບ ຈາກອະດີດນັກກິລາເບັສບໍລທີມຊາດຍີ່ປຸ່ນ - lattana 1 - ນັກກິລາເບັສບໍລລາວໄດ້ຮັບການຍົກລະດັບ ຈາກອະດີດນັກກິລາເບັສບໍລທີມຊາດຍີ່ປຸ່ນ

ທ່ານ ມາ​ນາບຸ ກິ​ຕາ​ເບັ​ບບູ ກ່າວ​ວ່າ: ​ໂຄງການ​ນີ້​ຈັດ​ມາ​ແລ້ວ 3 ປີ ມີ​ຈຸດປະສົງ​ເພື່ອ​ເຜີຍ​ແຜ່​ແນະນຳ​ປະ​ໂຫຍ​ດຂອງ​ກິລາ​ເບັສບໍລ, ຊ່ວຍ​ຝຶກ​ສອນ​ເຕັກນິກ​ພື້ນຖານ ​ແລະ ​ເຄັດ​ລັບ​ການ​ຫລິ້ນກິລາ​ເບັສບໍລ ​ເພື່ອ​ສ້າງ​ຄູ​ຝຶກ ​ແລະ ນັກ​ກິລາ​ລຸ້ນ​ໃໝ່.

ທ່ານ ​ໂນ​ຣິຮີ​ໂດະ ​ໂກ​ມາ​ດະ ກ່າວ​ວ່າ: ດີ​ໃຈ​ທີ່​ໄດ້​ມາ​ຮ່ວມ​ກິດຈະກຳ​ຄັ້ງນີ້, ຜ່ານ​ມາ​ພວກ​ເຮົາ​ເຄີຍ​ໄປ​ຈັດ​ກິດຈະກຳ​​ແບບ​ນີ້ທີ່​ຟີ​ລິບ​ປິນ, ມຽນມາ ​ແລະ ຫວຽດນາມ, ຄົນ​ລາວ​ເໝາະສົມ​ກັບ​ເບັສບໍລ ​ເພາະ​ເປັນກິລາບໍ່​ໄດ້​ປະ​ທະ​ກັນ, ນັກ​ກິລາ​ລາວ​ມີ​ຄວາມ​ຕັ້ງ​ໃຈ​ໃນ​ການ​ຝຶກ​ຊ້ອມ ​ແລະ ຄິດ​ວ່າ​ໃນ​ໂອກາດ​ໜ້າຈະ​ຈັດ​ກິດຈະກຳ​ແບບ​ນີ້​ຕື່ມ​ອີກ.

ຄູ​ຝຶກ ​ແລະ ນັກ​ກິລາ​ທີ່​ເຂົ້າຮ່ວມ​ໃນ​ກິດຈະກຳ​ຄັ້ງນີ້​ໄດ້​ຍົກ​ລະດັບ​ຄວາມ​ຮູ້​ຄວາມ​ສາມາດຫລາຍ​ດ້ານ ​ເປັນຕົ້ນ​ເຕັກນິກ​ການ​ຕີ, ການ​ຮັບ, ການ​ແລ່ນ, ການ​ເຄື່ອນ​ຕົວ ​ແລະ ​ເຕັກນິກ​ການສື່ສານ​ຕໍ່​ກັນ. ທັງ​ນີ້​ກໍ​ເພື່ອກຽມ​ຄວາມ​ພ້ອມ​ສູ່​ການ​ແຂ່ງຂັນລະດັບ​ຕ່າງໆ​ໃນ​ຕໍ່ໜ້າ ​ໂດຍ​ສະ​ເພາະ​ການ​ແຂ່ງຂັນ​ກິລາ​ເອຊຽນ​ເກ​ມ ທີ່​ປະ​ເທດ​ອິນ​ໂດ​ເນ​ເຊຍ ​ໃນ​ເດືອນ​ສິງຫາ 2018.