ລົມກັນແບບໃດໃຫ້ຊີວິດຄູ່ມີຄວາມສຸກຂຶ້ນ

ລົມກັນແບບໃດໃຫ້ຊີວິດຄູ່ມີຄວາມສຸກຂຶ້ນ - advert banner 728 90 728x90 - ລົມກັນແບບໃດໃຫ້ຊີວິດຄູ່ມີຄວາມສຸກຂຶ້ນ

ສິ່ງໜຶ່ງທີ່ເຮັດໃຫ້ການມີຄວາມຮັກເປັນຄວາມສຸກຢ່າງໜຶ່ງຂອງຊີວິດກໍຄື : ການມີຄົນທີ່ເຮົາສາມາດລົມນຳໄດ້ທຸກເລື່ອງ, ແຕ່ ບາງເທື່ອການສາມາດລົມກັນໄດ້ທຸກເລື່ອງທຸກມື້ ກໍເຮັດໃຫ້ມີບັນຫາໄດ້ຄືກັນ ເມື່ອມື້ໃດມື້ໜຶ່ງພວກທ່ານໝົດເລື່ອງທີ່ຈະລົມກັນ ແລະ ຫລັງຈາກນັ້ນກໍຈະເລີ່ມເສີຍຊາໃສ່ກັນໄປເລື້ອຍໆ.

ລົມກັນແບບໃດໃຫ້ຊີວິດຄູ່ມີຄວາມສຸກຂຶ້ນ - lattana 1 - ລົມກັນແບບໃດໃຫ້ຊີວິດຄູ່ມີຄວາມສຸກຂຶ້ນ

     – ໄລຍະເວລາດີໆຂອງທ່ານທັງສອງ : ສິ່ງທີ່ດີສຸດຂອງຄົນມີຄວາມຮັກກໍຄືການມີຄວາມຊົງຈຳດີໆຮ່ວມກັນໃຫ້ໄດ້ຄິດເຖິງຢູ່ສະເໝີ ແລະ ສິ່ງນີ້ຈະເຮັດໃຫ້ພວກທ່ານໃກ້ຊິດກັນຫລາຍຂຶ້ນ ຫາກມີໂອກາດໄດ້ຍົກເອົາເລື່ອງເຫລົ່ານັ້ນຂຶ້ນມາລົມກັນ ຫລື ແບ່ງປັນກັນ ພ້ອມທັງເປັນການເຕືອນວ່າ ຍ້ອນສາເຫດໃດທີ່ເຮັດໃຫ້ພວກທ່ານຫລົງຮັກກັນໄດ້.

     – ເລື່ອງເລົ່າໃນໄວເດັກ : ການເລົ່າເລື່ອງໄວເດັກຂອງຕົນເອງໃຫ້ຟັງ ເຊັ່ນ : ທ່ານເປັນໃຜ ມາຈາກໃສ, ຊີວິດເຄີຍຜ່ານຫຍັງມາແດ່ ລວມໄປເຖິງເລື່ອງຂອງສະມາຊິກຄົນອື່ນໆໃນຄອບຄົວ ເປັນສ່ວນໜຶ່ງທີ່ຈະເຮັດໃຫ້ຄົນຮັກເຂົ້າໃຈສິ່ງທີ່ທ່ານເປັນຢູ່ຫລາຍຂຶ້ນ. ໃນຂະນະດຽວກັນ ການເລົ່າເລື່ອງສ່ວນໂຕແບບນີ້ຍັງເຮັດໃຫ້ຄວາມຮັກຍິ່ງເລິກເຊິ່ງ ເຕັມໄປດ້ວຍຄວາມໝາຍ, ໜ້າຕື່ນເຕັ້ນ ແລະ ໜ້າສົນໃຈນຳອີກ.

     – ຄວາມຊົງຈຳອັນບໍ່ດີທີ່ຜ່ານມາ : ຄົນສອງຄົນຈະຍິ່ງໃກ້ຊິດກັນຫລາຍຂຶ້ນຫາກມີໂອກາດໄດ້ແລກປ່ຽນປະສົບການໃນອະດີດຄວາມເຈັບປວດໃຫ້ກັນຟັງແດ່ ບໍ່ວ່າຈະເປັນເລື່ອງຄົນ, ບົດຮຽນ ຫລື ປະສົບການ ເພື່ອໃຫ້ຄົນຮັກໄດ້ຮູ້ຈັກທ່ານຫລາຍຂຶ້ນໃນທຸກໆດ້ານເຖິງ ເລື່ອງແບບນີ້ຈະບໍ່ເຮັດໃຫ້ຮູ້ສຶກມ່ວນຄືກັບເລື່ອງຄວາມຊົງຈຳດີໆ, ແຕ່ກໍຈະຊ່ວຍສ້າງຄວາມເຊື່ອໃຈ ພ້ອມທັງຊ່ວຍຫລຸດໄລຍະຫ່າງລະຫ່ວາງທ່ານທັງສອງໄດ້ນຳ.

     – ອຸປະສັກໃນອະດີດທີ່ຜ່ານມາໄດ້ : ເຖິງວ່າຈະເປັນອຸປະສັກທີ່ເຄີຍລົມກັນໄປແລ້ວກໍສາມາດເອົາກັບມາລົມກັນໄດ້ອີກ, ແຕ່ໃນເທື່ອນີ້ຄວນຈະແຕກຕ່າງອອກໄປໂດຍການລົມເຖິງສິ່ງທີ່ພວກທ່ານໄດ້ຮຽນຮູ້ຈາກເລື່ອງທີ່ເຄີຍເປັນບັນຫາ ເພື່ອນຳມາປັບປຸງໂຕເອງ ແລະ ເຮັດໃຫ້ຄວາມຮັກພັດທະນາຕໍ່ໄປເລື້ອຍໆ.

     – ບອກເລົ່າເຖິງຄວາມຮູ້ສຶກໃນໃຈ : ປັດໄຈທີ່ສຳຄັນທີ່ສຸດທີ່ເຮັດໃຫ້ພວກທ່ານເຂົ້າໃຈກັນຫລາຍຂຶ້ນແມ່ນການແບ່ງປັນ ແລະ ສະແດງຄວາມຮູ້ສຶກອອກມາໂດຍກົງວ່າກຳລັງຮູ້ສຶກຫຍັງຢູ່ໃນຂະນະນີ້ ເພາະຈະຊ່ວຍໃຫ້ຝ່າຍກົງຂ້າມ ວາງໂຕໄດ້ຢ່າງເໝາະສົມ ເຊິ່ງການເວົ້າຄວາມຮູ້ສຶກໂດຍກົງນັ້ນອອກມາຍັງຊ່ວຍໃຫ້ການສື່ສານມີຄວາມຈະແຈ້ງກ່ວາທີ່ເປັນຢູ່.

     – ລົມກັນເຖິງຊີວິດປະຈຳວັນ : ສະພາບສັງຄົມທີ່ເຕັມໄປດ້ວຍສິ່ງຫລອກລໍ້ໃຈຕ່າງໆທີ່ຢູ່ອ້ອມໂຕໃນປະຈຸບັນ ເຮັດໃຫ້ຄູ່ຮັກບາງຄູ່ມີເວລາຢູ່ນຳກັນໜ້ອຍລົງ ແລະ ອາດເຮັດໃຫ້ຮູ້ສຶກຫ່າງເຫີນກັນໄປ ເຊິ່ງວິທີຫລຸດຊ່ອງວ່າງນີ້ກໍສາມາດຈະເຮັດໄດ້ໂດຍການສົ່ງຂໍ້ຄວາມສັ້ນໄປຫາໃນເວລາວ່າງວຽກ ຫລື ໂທຫາເວລາວ່າງກໍໄດ້ ເພື່ອຖາມເຖິງຄວາມເປັນໄປໃນມື້ນັ້ນ,​ ແຕ່ກໍບໍ່ຈຳເປັນຕ້ອງໂທຫາກັນຖີ່ຫລາຍ ເພາະມັນອາດເຮັດໃຫ້ເກີດຄວາມລຳຄານແກ່ກັນໄດ້.

     – ເລື່ອງຕະຫລົກຊ່ວຍໃຫ້ຜ່ອນຄາຍ : ບໍ່ສະເພາະແຕ່ເປັນເລື່ອງທີ່ເຮັດໃຫ້ພວກທ່ານຮູ້ສຶກມີຄວາມສຸກເທົ່ານັ້ນ, ແຕ່ຍັງເປັນເລື່ອງທີ່ຊ່ວຍປ່ຽນບັນຍາກາດຂອງມື້ທີ່ສຸດໜ້າເບື່ອ ຫລື ຄວາມອິດເມື່ອຍຈາກການເຮັດວຽກໃຫ້ຫາຍໄປໄດ້ຢ່າງໜ້າອັດສະຈັນ. ຂະນະດຽວກັນກໍຍັງເຮັດໃຫ້ສອງຄົນມີເລື່ອງມາເລົ່າສູ່ກັນຟັງສະເໝີ ເຖິງວ່າຈະເປັນມຸກຕະຫລົກທີ່ຄົນອື່ນບໍ່ເຂົ້າໃຈກໍຕາມ.

     – ຄວາມມັກສ່ວນໂຕຂອງແຕ່ລະຄົນ : ການສື່ສານລະຫ່ວາງຄູ່ຮັກຈະຫຍັບເຂົ້າໃກ້ກັນຫລາຍຂຶ້ນ ຫາກໄດ້ລົມກັນເລື່ອງຄວາມມັກສ່ວນໂຕ ບໍ່ວ່າຈະເປັນເລື່ອງດົນຕີ, ຮູບເງົາ, ອາຫານ ຫລື ກິດຈະກຳຍາມວ່າງ ເພາະການແລກປ່ຽນເລື່ອງລາວທີ່ແຕ່ລະຄົນມັກໃຫ້ກັນຟັງຈະເຮັດໃຫ້ທ່ານຮູ້ຈັກກັນດີຂຶ້ນກ່ວາເກົ່າ, ຮູ້ວ່າມັກຫຍັງ,  ບໍ່ມັກຫຍັງ, ຮູ້ວ່າສິ່ງໃດທີ່ເຮັດແລ້ວຈະເຮັດໃຫ້ມີຄວາມສຸກ ແລະ ເຮັດໃຫ້ຄວາມສຳພັນຂອງທ່ານທັງສອງແໜ້ນແຟ້ນຍິ່ງຂຶ້ນ.

     – ເລື່ອງໜ້າອາຍທີ່ຜ່ານມາ : ເຖິງຈະເປັນເລື່ອງໜ້າອາຍທີ່ທ່ານບໍ່ເຄີຍບອກ ແລະ ອາດບໍ່ຢາກບອກໃຫ້ໃຜຮູ້, ແຕ່ເລື່ອງໜ້າອາຍ ເປັນຕາຫົວຕ່າງໆນີ້ສາມາດຊ່ວຍໃຫ້ຄູ່ຮັກໄດ້ເຫັນທ່ານໃນມຸມເປັນຕາຫົວແດ່. ໃນຂະນະດຽວກັນກໍຍັງເປັນການສ້າງຮອຍຍິ້ມໃຫ້ຄົນຮັກໄດ້ນຳ.

     – ເວົ້າເຖິງເລື່ອງອະນາຄົດ : ຄົນຮັກຂອງທ່ານຈະມີຄວາມສຸກຍິ່ງຂຶ້ນຫາກທ່ານຮູ້ຈັກວາງແຜນອະນາຄົດໂຕເອງ ວ່າຈະແຕ່ງດອງກັນຍາມໃດ, ມີລູກຕອນໃດ, ວາງແຜນອະນາຄົດເລື່ອງວຽກງານໄວ້ແນວໃດແດ່ ທັງນີ້ກໍເພື່ອໃຫ້ຄູ່ຮັກຮູ້ສຶກສະບາຍໃຈໄດ້ວ່າທ່ານພ້ອມຈະເປັນຄູ່ຊີວິດໃນອະນາຄົດໃຫ້ແກ່ເຂົາໄດ້, ສາມາດເພິິ່ງພາ ແລະ ວາງໃຈວ່າຈະຝາກຊີວິດທີ່ເຫລືອໄວ້ນຳກັນໄດ້.